asa segifli - HEAD OF STATE OF SAMOA

ASA SEGIFLI - FEAGAIGA
(Tui Atua Tupua Tamasese Ta’isi Efi – 21 January 2010)
O le molimau a le Alii Palemia o le fofoga taualoa lea o le Malo. O la’u
molimau ua nao sina tala faa-le-aiga mai Mulinu’ū ma Sepolataemo.
Na oo atu alo o le toeaina i lo matou aiga ma talosagaina a’u ina ia faia sa’u
molimau mo le toeaina, ona ou fai atu lea ou te augofie talu ai le feagaiga.
Ui o lea sa faatalatalanoa fo’i i le Alii Palemia ina ne’i meaane ua iai se
faaluafesasi. Ma ona ua mae’a ona laolao lea mataupu e ala ai nei ona ou
tula’i atu e fai sa’u molimau.
Ona o Asa o se tagata ua niuali i le Malo ma le Atunuu e le pine o le a
talatala pipi lona tala faasolopito. Ae mo a’u e lata mai le mea e amata mai
ai la’u molimau.
O le a amata mai i le upu “feagaiga”. A talanoa tagata o le nuu o Salelesi i
le latou tofi poo o le Anava e talanoa i le upu feagaiga. O le fesili, e mafua
isea – e mafua ona o le igagato o Lesi e afua mai i Mulinuū ma Sepolataemo.
E mau eseese i lē na faia le tofiga. Ae mau faatasi na faia i Mulinu’ū ma
Sepolataemo. Ma o lena tofiga na mafua ai ona maua e Lesi ma ona suli le
faga o loo alala ai nei. E mafua ai le Segi ma e mafua ai le igoa o Asa ma
isi suafa o le nuu o Salelesi.
1
A o loma lo’u momoli mo le tofi o le Ao o le Malo – ae taunuu atu le savali
mai le nuu o Salelesi e fia auai - ona ou fai atu lea e manaia tele. Ae pau nei
o mea e lua oute faamanatu atu – o le mea muamua, o le aganuu a Samoa e
faavae i le faataualofa. O lona uiga, e le faatau le alofa i le ea poo le upu, e
faatau le alofa e tino i le alofa e tino. O lona uiga e le faapea e na o le tuu
alaga o outou, ona fai atu lea o le faaaloaloga. Aua o lena e silafia lelei e
outou le tino o la outou taulaga. O le mea lona lua, afai o le a faataunuu taga
a le tou taulaga aua ne’i faataga faia. Pe faia faatagego. Ia fai mae’a uma
taga aua ne’i iai se taga e tuua pe vaea. E mafua ona fai atu ona ua pulapula
lagoto le soifua o le toeaina matua, ia Asa. Ae oute iloa e tele lana sao i le
galuega faatonutonu ma le faasinoala ile faatinoga ole taulaga. Aemaise ua
iai le faamoemoe o le a faamaumauina i se DVD ia taualumaga aua tupulaga
fai mai. Ona fai mai lea o le savali aua e te popole, o lea o le a matua fuli
lou nuu ma lou aiga e fai le mea atoa.
Pe a ma le vaiaso taunuu le faamoemoe ae toe alu atu le isi savali a Salelesi
pe e finagalo malie ae o le a amata le latou taulaga i le fa i le vaveao. Ona
ou fai atu lea, malilie fai le taulaga ina ua ou taunuu atu. Ma le isi aua le faia
matamuli pe fai palaai le taulaga – aua i lo’u lava manatu, e taua ma loloto le
feau faaleagaga o loo momoli mai i totonu o le taulaga a Salelesi.
2
Se tasi o na feau, aua ne’i faasausili, aua o le tatou i’uga o le eleele. O se isi
feau, aua ne’i seetia i viiga aua e tutusa i tatou – e tasi le tatou tupuaga, e tasi
fo’i le tatou taunuuga. Atonu e ‘ese le auala e momoli mai ai le feau, ae ua
le avea lena e faaitiitia ai le anoa ma le loloto o le feau.
O ananafi sa ou toe matamata a i le DVD o le afītunu ma le Vaa o Salelesi
na faataunuuina i lo’u momoli. E ta’ita’i mai le taulaga e le toeaina o Asa.
E momomo le loto i le vaai atu i le tama matua. E mana ma laei le taulaga
ona ua auai le toe tagata o le Nuu. E faapea fo’i ona ua siva ma lauga ia
Asa. E ‘ese a le onomea ma matagofie o le gaioi ma upu a le tagata matua.
E mapo pei ole talo matua.
Ina ua mae’a le taulaga, ona savali mai lea o le toeaina i luga o le mea sa ou
iai ma faafeiloa’i mai a’u. Ina ua faasogi mai a’u na ou lagona le loto
nutimomoia ma le popole ona ua ou lagona e maualuga lona fiva. Na ou
fai atu loa lea ia Sogi ave le toeaina lea e u’u ma fai sona ofu mafanafana.
Na ou maua le tala na pueia ma na umi a ni aso o faataotolia le toeaina.
Ae i le taimi o savali mai, le taimi o siva ma le taimi o lauga, e leai ma se
foliga e faagasegasea. E pei o se tagata talavou ua faaosofia, o la e sufi le
3
Atua ma e o loo maimoa e silasila mai i le mamalu ma le matagofie o le
taulaga a Salelesi.
O se tasi lea o molimau o le feagaiga. O le isi molimau, o fata tetele o
meataumafa. Se mea a manaia o le aganuu pe a faatau alofa, e taui le alofa i
le alofa. E le mafai ona ola pe tumau se aganuu e taui le alofa i le upu poo le
ea.
Ina ua fai le galuega o le Falesa, o Salelesi, talu ai nei, a maua a sina
mealelei e tutuli mai le fanau e momoli mai i le galuega. A ou Malaga fo’i i
Atua oute asiasi pea iai i le toeaina. E maeu le sosia o le mafuta i matua
tausi. E te fo’i mai ma le mau faalumaga, aua fo’i e faaola totoga le pupula
mai ma le sagisagi, e faaola totoga le uu o lou lima ma lomi, e faaola totoga
le faamanuiaga. Mafua nei mea ona o le feagaiga.
E le mafai ona tatou faatauaso i le mea lea ua tupu, pe tatou te faataliga tuli i
le leo ma le alaga a tagata – o nisi nuu ua faasalalau mai ua sa Salelesi. O
nisi nuu a o atu Salelesi ua faasino esea.
E mafua ona ua lofia le feagaiga i le soona fai, ma le faaloloto. Soo se
feagaiga e tupu ma ola ona o le alofa, Afai ua taoama le feagaiga i le
4
faaloloto ma le mata pe’ape’a e āu ina tafea le feagaiga i le āu, pe lealea i le
savili.
E mafua ona ua leai se afuelo. E mafua ona ua leai se afītunu. E mafua ona
ua fai kegi a maua mai mea mai le taulaga ona o lea faasoa ia i latou ae le
aveina i le nuu. Ua lima mau e faia lana matafaioi i le osiga o le feagaiga.
Fai mai le upu faa-Samoa – o le aso ma le taeao. E ‘ese le aso ma le taeao, e
mafua ona ‘ese ona o le taeao e iai mea faitauina e tula’i mai ai. O le taeao o
le toe fuataina, e faasinoala ma lima ta’ita’iina aso o i luma.
I le maliu o Asa o lea ua silasila nei ile malo’ulo’u mai o le maualuga o le
Malo e sula ma faamanatuina le soifuaga fai taulaga ua iloga. Le auga lea o
le feagaiga, e to le igagato i le tautua matavela, poo le alofa faatino.
O le fesili tausisi i le usufono o Asa poo se aso poo se taeao, poo o le maliu
o Asa o le faailoilo lea o le maliu o le feagaiga. Poo o le maliu o Asa, o le
toe fuataiina lea ma le faafouina o le feagaiga.
5
Aua afai o se aso – ua se suagaipo na faia i Falealupo, le malo’ulo’u mai o le
Malo, le tuutuu laau mai o Ekalesia, ae afai o se taeao e toe fuataiina poo o
se taeao faafouina, ona talitonu lea e tautala mai pea le feau o lenei taeao i
sou alo ma sa’u fanau.
Ia manuia lau Malaga Asa.
6