O LE MALUMALU OLA
Transcript
O LE MALUMALU OLA
Lesona 15 O LE MALUMALU OLA O ituaiga taavale fou eseese uma lava e faatauina mai, e aumai ai lava ma se tusi na saunia e lē na faia le taavale o loo i ai faatonuga e faatatau i le tausiaina o le taavale i lona tulaga sili ona lelei e ola ai. E ta’u mai e lenei tusi-o-faatonuga le taimi e tatau ona faasuau’uina ai le taavale, o le ituaiga suau’u e tatau ona faaaoga, o le siakiina o le vai e faamālu ai le afi, o le toe faaleleia o vaega eseese o le taavale, ma isi vaega uma faapena. O le tagata na fuafuaina, fausia ma faia suesuega e tele i le taavale, na te iloa foi le auala sili e tausia ai le taavale. O lea la, o le tagata poto na te faatauina mai le taavale, na te matua faaeteete lava ina ia mulimuli i le faatonuga a lē na faia le taavale. O i tatou taitasi ua tuuina mai i ai le tiute o le tausiaina o se masini ola, e sili atu ona lē mafuatia le faigata ona malamalama i ai nai lo se taavale e fai sona afi. O lenei masini ola, o le tino lea o le tagata. A tatou manatunatu ma fuatia le ofoofogia o mata, taliga, faiai, fatu poo soo se vaega lava o o tatou tino, e faatumuina i tatou i le maofa tele ma le ava, i le poto lē mafuatia o le Atua na foafoaina ai ia mea uma. Tatou te alalaga faatasi ma Tavita faapea: “Ou te vivii atu ia te Oe, aua na faia a’u e ala ai ona matautia ma ofo tele ai; o mea na e faia, o mea mamana ia; ua ou matuā iloa e a’u nei mea. E le’i lilo lo’u tino ia te oe, ina ua faia a’u i le mea lilo, ina ua saunia a’u i mea loloto i le lalolagi. Na silasila mai ou fofoga i o’u tino uma ina o afuafua; ua tusia foi uma lava i lau tusi, o ona aso foi na faia ai, a’o leai ni o’u tino. Le Atua e, ua matuā sili ou manatunatuga ona aoga ia te a’u, ua sili lava ona tele o lo latou faitau aofai.!” – Salamo 139:14-17. Ua tuua ea e le Atua poto atoatoa le tagata e aunoa ma ni faatonuga ina ia tausia lenei “masini” ofoofogia – o o tatou tino – i le tulaga maloloina sili ona lelei? E leai, ua ia i tatou le tusi o faatonuga ma o le lē malamalama e faatatau i faatonuga o loo i lenei tusi-o-faatonuga, o loo mafua ai ona tele ma’i, mafatiaga ma le oti i le taimi e le’i tatau ona oti ai. E naunau mai lo tatou Atua i lo tatou manuia atoa lava, tino, agaga ma le mafaufau! “Le pele e, ia e manuia i mea uma, ma ia e malolo, faapei ona manuia o lou agaga.” – 3 Ioane 2. O loo to’atele tagata e fai mai: “O lo’u tino o la’u meatotino ma e mafai ona ou faia i lo’u tino soo se mea lava ou te malie i ai.” Ioe, e mafai ona tatou faia mea tatou te malilie i ai, peitai e faapei o le masini, a tatou le tausia lelei loa, o le a le toe umi lava ae leaga loa sona vaega. Ona tatou iloa loa lea ua tatou sailia le kamupani na faia lea masini mo vaega e manaomia ia fa’aleleia. Peitai o sa tatou meatotino ea o tatou tino? 1 “Tou te lē iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai i le Atua, e lē aiā foi outou ia te outou? Auā ua faatauina outou i le tau; o lenei, ia outou vivii atu i le Atua i o outou tino ma o outou agaga, o mea a le Atua ia.” – 1 Korinito 6:19, 20. O i tatou o mea totino a Keriso ona o mafuaaga e lua, muamua, na Ia foafoaina i tatou ma lona lua, na Ia totogiina le tau o le faaolataga mo i tatou i Lona lava toto paia i luga o le satauro o Kalevario. O lea ua fautuaina ai i tatou e le aposetolo o Paulo i lana tusi i le au uso talitonu i Roma: “O lenei, le au uso e, ou te aioi atu ia te outou, ona o le alofa mutimutivale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.” – Roma 12:1. O lo tatou matafaioi i le Atua le auala tatou te tausiaina ai o tatou tino, ma o le a Ia valaauina i tatou i se aso ina ia tatou talatala atu se tala e faatatau i lo tatou tausiaina o o tatou tino: “Auā tatou te tutu atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga.” – 2 Korinito 5:10. O o tatou tino na fuafuaina ina ia avea ma malumalu e afio ai i totonu le Agaga Paia. “Tou te lē o iloa ea o le malumalu outou o le Atua, o loo nofo foi le Agaga o le Atua i totonu ia te outou? Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.” – 1 Korinito 3:16, 17. Ia tatou suesueina nei loa ma le faaeteete lava le “tusi o faatonuga”, le Tusi Paia, ma usitai ai i faatonuga taitasi uma lava, ina ia avea o tatou tino ma malumalu o le Atua, ma faatumuina i Lona Agaga Paia. O LE MALUMALU O LE ATUA “O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua..” – 1 Korinito 10:31. O le tapulaa sili ona taua o le ola maloloina, o lo tatou faia lea o mea uma lava mo le viiga o le Atua Lē na foafoaina i tatou, i soo se mea lava tatou te faia, pe tatou te aai, feinu, galulue, faamalosi tino, poo le moe foi. Aua lava ne’i avea se faanaunauga faapito e faamalieina ai le mana’o e lē o se mana’o faalenatura, o lagona maulalo ia poo faanaunauga foi e lē o ni faanaunauga faalenatura, ina ia avea ma mafuaaga o a tatou gaioiga. O se masaniga faapea, afai e lē taofia, o le a mautinoa lava le i’u i faama’i ma le oti. “E tatau mea e ‘ai i le manava, e tatau foi le manava i mea e ‘ai; ae faatau faaumatia e le Atua o lena atoa ma ia mea. Ae lē tatau le tino i le faitaaga, ae tatau i le Alii; e tatau foi le Alii i le tino.” – 1 Korinito 6:13. 2 “O le malaia, o lo latou iuga lea; o le manava, o lo latou atua lea; o le mea latou te vivii ai, o le mea e maasiasi ai lea; e loto i latou i mea a le lalolagi.” – Filipi 3:19. O Iesu o lo tatou fa’aa’oa’o lea i mea uma lava. O Ia foi na faaosoosoina i le tuinanau o le ‘ai, peitai na faaosoosoina i lalo o se faaosoosoga sili ona faigata na mafai ona tuuina i ai o Ia, ae ui i lea na ia manumalo. Mataio 4:1-11. Ua Ia folafola mai ia i tatou Lona mana ina ia tatou maua ai le manumalo lava lea e tasi i o tatou lava tuinanauga o le ‘ai ma tuinanauga i isi mea e leaga. “Ona alu ane lea ia te ia o lē faaosooso, ua faapea mai, Afai o oe o le Alo o le Atua, ina fetalai atu ia ‘ia liu areto nei maa. Ona tali atu ai lea o Ia, ua faapea atu, Ua tusia, E lē na o mea e ‘ai e ola ai le tagata, a’o afioga uma e tulei mai i le fofoga o le Atua.” – Mataio 4:3, 4. O le tofotofoga muamua lava ma le manumalo muamua lava na fetaia’i ma Iesu, e faatatau lea i le ai, e faapei lava ona mua’i tofotofoina Atamu ma Eva peita’i sa la pa’u’ū ai. Na tali atu Iesu i le faaosoosoga i le Upu tusia a le Atua. O i tatou foi ua faatonuina i tatou ina ia tatou “savavali e faapei ona ia savali.” – 1 Ioane 2:6. O LE A LE MEAAI SILI ONA LELEI? “…ia outou aai i mea e lelei,…” – Isaia 55:2. Ina ua foa’iina atu meaai ia i la’ua i totonu o Etena, na foa’iina atu ai e Ieova ia Atamu ma Eva le meaai e sili ona lelei: “Ua fetalai atu foi le Atua, faauta, ua ou foa’i atu ia te oulua o laau afu uma e tutupu ma o latou fua oi le fogaeleele uma lava, atoa ma laau uma ua i ai le fua o le laau e tupu ma ona fatu; e ia te oulua ia e fai ma mea e’ai.” – Kenese 1:29. O fua o laau (fruits), fatu o laau (grains and nuts) o le meaai lea na faatonuina i le amataga. Ina ua mavae ona ulufale mai le agasala i le lalolagi, na faatonuina loa le tagata ina ’ia ia eliina le eleele e totō i ai meaai. I le taimi lena, na faaopoopoina loa ma fualaau aina mata (vegetables) mai i le eleele e avea o se meaai faaopoopo i le meaai a le tagata. “…e te ‘ai foi laau afu o le fanua;” – Kenese 3:18. E ui lava ina e lē lelei atoatoa mo le tagata, ae o le mavae o le lolo lea na tuuina mai ai le faatagaga ina ia ‘aina foi aano o manu. A’o le’i o’o mai le lolo, o le tausaga masani lava o tagata, na sili atu ma le iva selau tausaga (Kenese 5). Ina ua mavae le lolo, na vave lava ona faaitiitia le telē o le tino o le tagata ma faapuupuuina foi le tele o ona tausaga. Ua na o ni nai augatupulaga ina ua mavae Noa, na faapuupuuina ai le olaga o le tagata i le fitu sefulu tausaga (Salamo 90:10). O le iuga o le aina o aano o manu na vave lava ona faamaonia lona aafiaga. E ui lava ina faatagaina le tagata na te aina manu, ae na matuā maoti lava tulafono na tuuina mai i lona faaaogaina. 3 “A’o le aano o manu o i ai le ola, o lona toto foi lea, aua tou te aai ai.” – Kenese 9:4. Na maoti foi le faatonuga i le va o manu “mamā” ma manu “lē mamā”. Na o manu “mamā” lava na fetaui mo meaai. Levitiko 11. O se manu mamā o le manu lea e magalua ona atigivae ae toe ai foi e ia lana mama. E ui lava ina faatagaina e le Atua le aina o aano o manu ina ua mavae le lolo, a’o lenei ua matuā faamaonia lava i le taimi lenei, e tatau ona lafoaia meaai faia i aano o manu i le taimi lenei, ona o fa’ama’i o loo i ai ma i’uga o nisi o auala o loo faaaogaina i le fasimateina o manu. O le fuafuaga a le Atua, o lo tatou toe fo’i lea i le tulaga atoa lava tatou te mafai ai, i le ulua’i meaai na faatonuina mai. Ua fautuaina e le Tusi Paia i tatou: “Aua ne’i avea oe o se tasi o i latou o ē inu tele i uaina; ma ē ua aai tetele i manu:” - Faataoto 23:20. “E lelei pe a lē ‘ai ni aano o manu, ma ia lē inu uaina,…” – Roma 14:21. O le olaga o Tanielu o loo faailoa mai ai faamanuiaga o le aina o meaai e lē faia i aano o manu. Maitau mai, na faamanuiaina e le Atua o ia ma ana uo ona o lo latou usitai i tapulaa o le meaai sa’o. “A ua manatu Tanielu, o le a lē leaga o ia i mea taumafa a le tupu, poo le uaina e inu ai o ia; ona aioi atu ai lea o ia i le alii e pule i eunuka ina ia lē leaga ai o ia. Ona faapea atu lea o Tanielu ia Melesara, o lē na tofia e le alii e pule i eunuka e pule ia Tanielu, ma Hanania, ma Mesaelu, ma Asaria; Ia e tofotofo i au nei auauna i po e sefulu, ia latou aumai ai ia te i matou ni fua o laau e aai ai, ma vai e inu ai. Ua mavae foi aso na fai atu ai le tupu e au mai ai i latou, ona au mai ai lea o i latou e le alii e pule i eunuka i luma o Nepukanesa. Ona tautalatala ai lea o le tupu ma i latou; a ua lē maua se tasi o i latou e tusa ma Tanielu, ma Hanania, ma Mesaelu, ma Asaria; ona latou tutū ai lea i luma o le tupu. O mea uma lava e ao ai le poto ma le faautauta na fesili atu ai le tupu ia te i latou, ua iloa ai e ia ua sautuasefulu ona sili o lo latou poto i taulaitu, ma vaafaatau uma i lona malo uma lava.” – Tanielu 1:8, 11, 12, 18-20. O A MEA E TATAU ONA TATOU INU AI? O vaiinu faia i vai ‘a’ava, o loo faasaina i le Tusi Paia. O le pia, uaina, uisikī, ‘ava malosi poo vai inu faapena, e lē tatau ona inuina e le Kerisiano. “O le uaina, o le faatauemu lea; o le ‘ava, o le faapisapisao lea; o i latou uma o e faaseseina ai, e le popoto i latou.” – Faataoto 20:1. “Oi talofa ia te i latou o e ala usu e matuā saili ‘ava, ma ua nonofo pea ua o’o i le po, seia faavalemalolosi ai i latou i le uaina!” – Isaia 5:11. Ua fetalaia mai se mala i luga o i latou e faia ma tuuina atu ‘ava oona mo isi: “Oi talofa i lē na te faainu i lē la te tuaoi, o oe o lē liligi atu lau mea oona ia te ia, 4 ma ua ē faaonā ai ia te ia, ina ia ē vaai atu ai i lo latou lē lavalavā!” – Sapakuka 2:15. E leai se nofoaga i totonu o le malō o le Atua mo le tagata onā inu ava. “E lē i ai foi ē gaoi, poo ē matape’ape’a, ma ē onā, ma ē ‘agatele, ma ē fao mea, e lē fai mo latou tofi le malo o le Atua.” – 1 Korinito 6:10. O le ti ma le kofe, o mea nei e faatupulaia ai le tu’inanau i mea lē lelei ma e faavaivaia ai neura. Ua soona faaosofia malosi o neura o le manava ma avatu ai lagona lē lelei i le fai’ai, ma faapena ona fafaguina ai le fai’ai ina ia tuuina atu le gaioiga faateleina i le fatu, ma faapu’upu’uina ai le malosi i le tino atoa lava. Ua galo le vaivai; ua foliga mai ua faatupulaia le malosi. Ua fafaguina le mafaufau ma ua fafaguina ai manatunatuga o le mafaufau. Talu ai ona o nei i’uga, e toatele tagata latou te manatu o le ti ma le kofe o loo matuā tele le lelei o loo faia ai mo i latou. Peitai o se manatu sese lenei. A mavae ese atu loa le aafiaga o le malosi o le vailaau lea o loo i totonu o le ti poo le kofe, ua faaitiitia loa le malosi lea e lē o se malosi faalenatura, ma o le i’uga la, o le o’o mai lea o se lagona vaivai i le tino ma le mafaufau. O le fa’aauauina pea o le faaaogaina o nei mea inu lē lelei o loo faaleagaina ai neura, e mafai ona faaosofia ai le tiga o le ulu, lē mafai ona moe, o le soona saoasaoa o le tātā o le fatu pe gese foi i nisi o taimi, tigā le manava poo le moa foi, tete le tino poo isi foi ma’i. Vai: I le maloloina poo le ma’i foi, o le vai mamā o le tasi lenei o faamanuiaga tele lava a le lagi. O le vai inu lea na foa’i mai e le Atua ina ia faamalieina ai le fia inu o manu ma tagata. A inu sa’oloto i ai, e fesoasoani le vai e faamalieina ai le manaoga o le tino ma fesoasoani ai i le natura ina ia teena fa’ama’i. O ti faia i laau o le natura ma vaiinu e faia i fua o laau, o vaiinu sili foi nei ona lelei e maua ai le ola maloloina. TAPA’A MA FUALAAU OONA O se tuinanauga ua lē mafai ona taofia i le fa’aaogaina o fualaau oona e lē malolosi tele, e ta’ita’ia atu ai i le faaaogaina o fualaau e sili atu ona malolosi. O le faalagolago i le fa’aaogaina o fualaau oona, ua matuā taatele lava i se tulaga matautia lona fa’aaogaina i tausaga e le’i mamao tele atu. E toatele lava talavou o loo maileia i le masaniga o le faaaogaina o fualaau oona, lea afai e lē motusia i se taimi o lo latou faato’a fa’aaogaina o nei fualaau oona, o loo tele lava ina i’u atu ai i i’uga faanoanoa ia o loo taatele i lo tatou lalolagi. I taimi ua mavae, o le fa’aaogaina o le tapa’a, na manatu i ai o se masaniga e lē faamanu’alia ai. O suesuega faale-soifua maloloina ua faamaonia ai nei le masani lava ona avea o le tapa’a ma ‘ona e faifai malie lona leaga, peitai e sili ona lamatia ai le ola. E faapitoa lava lona matautia ona o ona aafiaga e faifai malie ma e faigata ona iloa vave i le taimi muamua. E faaoso faafuase’i ai le malosi o neura 5 ma toe faavaivaia ai foi neura. E faavaivaia ai le fai’ai. O lona fa’aaogaina e faaosofia ai se fia inu mo vai inu o loo i ai le ‘ava. O le fa’aaogaina o le tapa’a, e taugata, e lē mamā, e faamanu’alia ai lē o loo faaaogaina, ma e inosia i isi tagata. O tagata o nei masaniga o loo maua solo i falema’i ma fale faita’otoga. O le ulaina o tapa’a e mafua ai le tele lava o ma’i o le kanesa o le māmā, ma le kanesa o le fa’a’ī, ma e mafua ai foi fa’ama’i o le fatu, ma isi fa’ama’i sili ona leaga. E leai se tagata ula tapa’a, seivagana ua ia lafoa’ia lea masaniga, o le a i ai sana aiā e ulufale atu ai i le Aai Paia i le lalolagi faafouina. “E lē sao atu lava i ai se mea leaga e tasi, poo sē na te faia se mea inosia, poo se pepelo; na o i latou lava ē ua tusia i le tusi o le ola a le Tama’i Mamoe.” – Faaaliga 21:27. O LE FAI FAATATAU LELEI Ua faamanino mai e le Alii ia i tatou mea e lelei ma mea e faamanu’alia ai i tatou. E to’atele e fai mai: “e lē’o i ai se leaga i le fa’aaogaina o se vaega laititi o nei mea, pe afai o loo tatou faatinoina pea le fai faatatau lelei.” O le a le uiga moni o le fai faatatau lelei? O le vavae ese mai lea mai i mea uma lava e faamanu’alia ai, ma le faaaogaina fuafua lelei o mea uma lava e lelei. “Tou te lē iloa ea, o ē tausinio i le ala tanu, e tausinio uma i latou, ae maua le taui e le toatasi? Ia faapea ona outou tausinio, ina ia outou maua. O i latou uma o e fai aigofie e fai faatatau i mea uma lava; o i latou foi ua latou faapea ina ia maua le pale palagofie, a’o i tatou, ina ia maua le pale e lē pala lava. O a’u nei foi, ua faapea ona ou momo’e e lē ma le faaletonu; ua faapea ona ou tu’i, e le pei o se tu’i le matagi. A ou te faatoilaloina lo’u nei tino, ma a’u fai ai ma pologa, ina ne’i i’u ina lē faamaoni a’u, o a’u sa tala’i atu i isi tagata.” – 1 Korinito 9:24-27. E mafai ona fa’aosoosoina i tatou ina ia tatou solia tulafono o le natura i se vaega itiiti ma tatou “sao ai mai i ia soligatulafono”, peitai o le a le tala a le Tusi Paia? “Aua ne’i faaseseina outou, e lē ulagia le Atua auā o le mea e luluina e le tagata, o le mea lava lea e seleseleina mai ai e ia.” – Kalatia 6:7. Lomia e le: Upu Moni Mo Le Taimi Lenei PO Box 6458 Apia WESTERN SAMOA 6 O LE MALUMALU OLA 1. Togi le faamatalaga sa’o.. ..... O lo’u tino o la’u meatotino lea. E pule lava a’u i le faiga o filifiliga e faatatau i le ituaiga olaga ou te ola ai. ..... O lo’u tino e lē o sa’u meatotino lea a’o le meatotino a Ieova e ala i Lana foafoaga ma Lana faaolataga. Ua Ia foa’i mai ia te a’u faatonuga manino lava i le auala e tatau ai ona ou amanaiaina ma tausiaina faalelei le tino. 2. O le a le tulafono e tatau ona pulea ai mea uma lava tatou te faia? 1 Korinito 10:31. _________________________________________________________ _________________________________________________________ _________________________________________________________ 3. Aisea na faapuupuuina ai le umi o le olaga o le tagata ina ua mavae le lolo? _________________________________________________________ _________________________________________________________ _________________________________________________________ 4. O le a le faamaoniga ua ia i tatou e iloa ai o le ula tapa’a ma le faaaogaina o isi fualaau oona e lē taliaina e le Atua? _________________________________________________________ _________________________________________________________ _________________________________________________________ 5. Fa’auma le fuaiupu o le Tusi Paia. “________________________________________________________ ______________o le mea e luluina e le tagata,__________________ ______________________” – Kalatia 6:7. 7 Auala & Numera ________________________ Nuu/Taulaga/Aai ________________________ Setete _________Numera Itumalō ________ Atunuu _______________________________ Faamolemole faafo’i lenei Ta’iala Toe Iloiloina i le Tuatusi lenei: SU’ESU’EGA FETUSIA’I o le UPU MONI MO LE TAIMI LENEI P O Box 6458, Apia, Western Samoa TA’IALA TOE ILOILOINA - LESONA 15 8