A la pressa, al radio ed a la televisiun Museum d`art dal

A la pressa, al radio ed a la televisiun
Museum d'art dal Grischun a Cuira dals 30 da zercladur fin ils 9 da settember 2007
H.R. GIGER – L’OVRA AVANT IL «ALIEN» 1961–1976
Cun ses realissem fantastic occupa H.R. Giger (naschì l'onn 1940 a Cuira, viva e lavura
oz a Turitg) ina da las posiziuns las pli individualas en la successiun dal surrealissem dal
temp suenter la guerra, dentant er en l'ambient neodadaistic da la scena d'art da Turitg da
la fin dals onns 60. Fin mez dals onns 70 ha el creà in'ovra fulminanta che vegn
sutvalitada areguard sia gronda impurtanza ed areguard ses cuntegn artistic – tant pli che
questa fasa terminescha cun il monster "Alien", cun il qual l'artist ha survegnì renum
mundial ed il qual l'ha appurtà l'onn 1979 l'Oscar per il "Best Achievement in Visual
Effects".
L'exposiziun mussa l'operar da Giger, e quai dal cumenzament, cun ils dissegns temprivs
en tusch, sur las gruppas d'ovras dals vaus, da las passaschas anguschantas, dals
maletgs claustrofobs da locals sanitars fin als paesagis da la pel (carte du tendre) e fin als
dissegns cun la pistola da sprizzar (airbrush). Cun dar egliadas sin las ovras da gravura
da Giovanni Battista Piranesi, Johann Heinrich Füssli, Francisco José de Goya, Max
Klinger, James Ensor ed Alfred Kubin ordineschan ins l'ovra da Giger en ina "istorgia d'art
da l'orrur" che gida ad elavurar las ragischs ed ils impuls zuppads da sia ovra tempriva.
Bleras ovras da Giger n'èn anc betg vegnidas preschentadas a la publicitad u mo fitg
darar. Suenter la retrospectiva da l'onn 1984 en il center da cultura "Seedamm" a
Pfäffikon e suenter las ultimas exposiziuns grondas da Giger a Paris, a Prag ed a Vienna
vegn preschentada sia ovra per l'emprima giada en in'exposiziun da museum
cumplessiva al museum d'art dal Grischun a Cuira.
Exposiziun
30 da zercladur fin ils 9 da settember 2007
Uras d'avertura
Mardi fin dumengia da las 10.00 a las 17.00. Glindesdi serrà.
Pretschs d'entrada
CHF 12.– / CHF 10.– (AVS, emprendistAs, studentAs, gruppas a partir da 7 persunas) /
CHF 6.– (commembras / commembers da la UGA); uffants e giuvenils fin 16 onns:
entrada libra
Visitas guidadas
Visitas guidadas publicas han lieu las suandantas gievgias, mintgamai a las 12.30:ils 5,
19, 26 da fanadur, ils 2, 9, 23, 30 d'avust, ils 6 da settember.
Visitas guidadas privatas ed occurrenzas privatas per gruppas, per firmas, per uniuns
e.u.v. han lieu sin dumonda.
Publicaziun
HR Giger – Werke 1961–1976, cun texts da Carlos Arenas, da Fritz Billeter, da Kathleen
Bühler e da Beat Stutzer, ca. 140 paginas, numerusas illustraziuns per gronda part
coluradas, liadira da chartun cun cuverta, Cuira 2007, tudestg, CHF 40.– (CHF 28.– per
commembras / commembers da la UGA), plus spesas da spediziun.
Seras da film
Las gievgias, ils 23 d'avust ed ils 6 da settember a partir da las 19.30 al museum d'art dal
Grischun a Cuira.
Preschentads vegnan lavurs da film temprivas da HR Giger che n'èn strusch
enconuschentas sco er ils films curts ch'èn naschids en collavuraziun cun Fredi M. Murer
"Swiss-made" (1968) e "Passagen" (1971). Suenter las preschentaziuns da film
commentescha H.R. Giger – che vegn interrogà da Beat Stutzer – sias ovras.
L'exposiziun ed il catalog èn vegnids sustegnids da
Willy Reber-Stiftung
Fachstelle Kultur Kanton Zürich
Stadt Chur
Chur Tourismus
2