Vischnaunca politica Vuorz
Transcript
Vischnaunca politica Vuorz
Vischnaunca politica Vuorz Radunonza communala dils 28 d’uost 2015 Presents: Suprastonza communala e canzlista 44 vischinas e vischins 1. Approbaziun dils protocol dalla radunonza communala dils 19-06-2015 Il protocol dalla davosa radunonza communala dils 19-06-2015 vegn approbaus unanimamein. 2. Quen communal 2014 a) Presentaziun dil quen communal 2014 Quen current: Il quen current 2014 siara suenter expensas da frs. 2'645’716.02 ed entradas da frs. 2'721’746.79 cun in surpli d'entradas da frs. 76'030.77. Amortisaziuns ordinarias e supplementaras sin la facultad administrativa sco era sin la facultad finanziala ein vegnidas pridas avon ell'altezia da total frs. 519'107.30. Quen d'investiziun: Il quen d'investiziun 2014 siara suenter expensas da frs. 1'324'682.30 ed entradas da frs. 539'226.40 cun investiziuns nettas da frs. 785'455.90. Las pli impurtontas investiziuns egl onn 2014: - Sanaziun habitaziun center communal - Sanaziun vias da funs - Sanaziun tegia Urschiu Sura Bilanza: - Sanaziun via cantunala - Illuminaziun da vias - Tanc da latg Ils deivets a termin cuort, mesaun e liung (incl. credits d’investiziun) muntan per ils 31-12-2014 a frs. 2'301'909.15 (sminuziun da frs. 16'459.20 enviers onn 2013). Il capital agen ei s'augmentaus per frs. 76'030.77 sin frs. 1’033'146.98. b) Rapport dalla cumissiun da gestiun Muort la demissiun da Corina Hunger sco commembra dalla cumissiun da gestiun ha il president Guido Dietrich dumandau il suppleant Curdin Cadonau sch’el surpren naven dad immediat quei post. Curdin Cadonau ha dau tier. La cumissiun da gestiun propona tenor rapport alla radunonza communala dad approbar il quen 2014 e la bilanza per ils 31-12-2014 sco era da dar scarica all'administraziun ed a tuts funcziunaris da vischnaunca. c) Approbaziun dil quen Il quen communal 2014 vegn approbaus cun 28 vuschs gie encunter 2 vuschs na. 3. Dretg da precumpra/dretg da construcziun tegia sin parcella nr. 637 a Ladral Il president Guido Dietrich informescha davart l’intenziun dil possessur dalla tegia e dalla stalla sin il terren da dretg da construcziun 637 a Ladral da vender l’immobilia. La vischnaunca ha il dretg da precumpra. La suprastonza communala fa la proposta che la tegia savess suenter ina sanaziun (indrez sanitar, electrisch, eventualmein isolar) remplazzar la tegia d’alp la quala sto vegnir sanada el futur. Duront il temps che la tegia vegn buca duvrada per l’alp savess ella vegnir nezegiada sco ustria (pex. sonda/dumengia) ni eventualmein era sco habitaziun da vacanzas. La tegia e la stalla han ina valur nova da frs. 282'600.00, ed ina valur commerziala da frs. 120'900.00. Ils vischins han menau ina discussiun viva e constructiva. Ina proposta ei stada dad erreger ina resch nova tegia d’alp ord il motiv che la veglia stuess vegni sanada. Quella tegia nova savess silsuenter era vegni duvrada per igl intent turistic. Votantas e votants vulan buca far diever dil dretg da precumpra. Els han votau 22 ga na ed 3 ga gie. 4. Dislocaziun dils cunfins e vendita da terren sin parcella nr. 821 a Davos Chigiosch La famiglia Beer vul erreger in plaz per dus autos (Carport) sin ina surfatscha da 6 x 6 m e perquei spustar il cunfin da lur parcella nr. 711 (actual 1392 m2) sin la parcella nr. 821 (actual 1879 m2) ed acquistar la nova part dalla vischnaunca. La surfatscha munta rodund 170 m2, mintgamai circa per miez ella zona per edifezis accessorics ed ella zona forestala. Il prezi da vendita en la zona per edifezis accessorics ei frs. 30.00 m2 tochen frs. 40.00 per m2 ed ella zona forestala frs. 3.00 per m2 ; total summa da vendita circa frs. 3'700.00 (vegn mesirau en e silsuenter quintau ora exact). La dislocaziun dils cunfins e la vendita da terren sin parcella nr. 821 a Davos Chigiosch vegn approbada unanimamein. 5. Approbaziun dil niev reglament dalla corporaziun da pumpiers Vuorz/Andiast Il reglament dalla corporaziun da pumpiers Vuorz/Andiast ei vegnius surluvraus. Tenor proposta dall’assicuranza da baghetgs dil cantun Grischun (GVG) ha la cumissiun da pumpiers adattau la salarisaziun, ils castitgs sco era la taxa da cumpensaziun. El medem mument ein divers artechels vegni adattai al temps dad oz. Quei pertucca spezialmein ils artechels en connex cun la deliberaziun dil survetsch da pumpiers, perstgisas ed incumbensas dil cader. Per ch’il niev reglament va en vigur sto la vischnaunca d’Andiast era approbar el. Il niev reglament dalla corporaziun da pumpiers Vuorz/Andiast vegn approbaus unanimamein. 6. Informaziuns Sven Seeli presenta il project en connex cun l’ovra electrica Ruinas. Ils cuosts totals per quei project muntan à frs. 1'660'000.00. Da quels cuosts ein frs. 1'024’746.00 per la sanaziun dil provediment d’aua. Igl inschignier Iso Mazetta quenta cun in gudogn da frs. 20'000.00 ad onn dall’ovra electrica la quala sa furnir electrisch per 80 casadas. Per l’ovra electrica dat ei buca subvenziuns. Per la sanaziun dil provediment d’aua sa vegnir quintau cun minimum frs. 65'000.00. A caschun dalla proxima radunonza communala vegn fatg la damonda da credit. Guido Dietrich informescha davart la damonda da Florian Widmeier dalla registraziun dil film “Gotthard”en connex cun filmar ils 16 ed ils 17 da settember 2015 sin la via da Vuorz encunter Breil. Els vulan filmar ina szena cun carrotschas e cavals. Per saver filmar quella szena sto la via vegnir serrada per silmeins dus gis. Forsa gia empau avon per baghegiar si las requisitas. La suprastonza communala ha fatg ina damonda alla tgira da monuments en connex cun baghegiar in stiva da morts sper baselgia. Tenor la tgira da monuments duess ei buc esser in problem da construir ina stiva da morts sin terren el contuorn dalla baselgia. Guido Dietrich ed ils presidents dallas uniuns dil vitg ein gia inaga sesi ensemen per discussiunar la planisaziun dalla fiasta d’uaul che duei ver liug ils 13 ed ils 14 d’uost 2016. La proxima sesida ha liug ils 2 da settember 2015 en sala dalla casa da scola. Tgi che ha aunc interess dad organisar e gidar cun ei cordialmein envidaus. L’emprema sesida cun la gruppa da project en connex cun la fusiun ha gia giu liug. Proximamein vegnan tut las suprastonzas communalas dallas vischnauncas d’Andiast, Breil, Glion e Vuorz a seser ensemen. Ils emprems resultats san probablamein vegnir presentai primavera 2016. 7. Varia Dalla tractanda varia ei buca vegniu fatg diever. Finiziun dalla radunonza communala allas 22:00 uras. Vuorz, ils 28-08-2015 Il president: L’actuara: Guido Dietrich Silvia Calzaferri