La Quotidiana, 24.7.2014
Transcript
La Quotidiana, 24.7.2014
SURSELVA GIEVGIA, ILS 24 DA FANADUR 2014 Schef e persunal discuoran l’organisaziun dil servis a caschun dalla tscheina da nozzas. FOTOS S. ROTHMUND 7 La rolla da hospitont plai a Sep Candinas che beneventa cun Christoph Schmidt (da sen.) ina buna clienta. Las portas per las visetas da pur e hotelier ein aviartas Barbara e Sep Candinas han passentau interessants dis el hotel Schweizerhof a Flem DA SUSI ROTHMUND / ANR ■ Las visetas vicendeivlas han plaschiu ton al hotelier da Flem Christoph Schmidt sco als purs Barbara e Sep Candinas da Sumvitg. Omisduas partidas han astgau mirar davos las culissas da l’auter menaschi e quei ch’ei han viu ha plaschiu, midar per adina vulessen ei denton buc. Persuenter han ei fatg amicezia ed ei dat pliras ideas da collaborar, sche quellas vegnan realisadas ei denton aunc buca decidiu. El rom dall’iniziativa «pur enquera hotelier» d’Agroturissem Grischun han il hotelier dil Schweizerhof a Flem, Christoph Schmidt e sia giuvna famiglia, visitau la fin matg ils purs Barbara e Sep Candinas a Sumvitg. La davosa fin da jamna ha la cunterviseta giu liug e la famiglia Candinas ha schau plascher ils dis el hotel da quater steilas Schweizerhof a Flem. Ei han astgau mirar davos las culissas dil hotel romantic cun 48 stanzas e 76 letgs, la restauraziun cun 100 plazs e la bar cun 40 plazs. Aviartamein ha Christoph Schmidt dau investa el menaschi cun 30 emploiai e rispundiu a numerusas damondas. La famiglia da purs ha denton era astgau guder la hospitalitad cordiala ed igl ambiente dalla Belle Epoque. Sco Sep Candinas ha relatau hagien ei giu ina biala combra cun la sensaziunala vesta sin Las siat Dunschalas. In’amicezia che po cuzzar «Emprender d’enconuscher in l’auter e far amicezia», quei numnan omisduas Sep Candinas ha empriu da far si letg sco ei descha en in hotel. partidas il meglier vid l’acziun «pur enquera hotelier». Sper dar investa ella lavur dil mintgadi els menaschis han las famiglias da purs e hoteliers priu avunda temps per star da cumpignia e discussiunar. Ei han anflau bia parallelas e secapescha era viu bia ch’ei enconuschevan aunc buc aschia. Ton Sep Candinas sco Chris- Ella cuschina dil hotel Schweizerhof han Barbara e Sep Candinas saviu profitar e prender enqual idea a casa per optimar lur survetsch da catering. toph Schmidt meinan lur menaschis da famiglia en quarta generaziun ed els fan lur lavur cun pissiun e carezia. Sco ei para ei la simpatia in per l’auter vicendeivla e l’amicezia pudess era cuzzar vinavon. «Secapescha ch’ins sto tgirar ils contacts sch’ins vul buca piarder in l’auter ord ils egls», ha Sep Candinas manegiau. El e sia dunna han astgau mirar davos las culissas e sur la schuiala dils emploiai dil hotel e quei han els fatg attentamein. «Nus savein prender a casa enqual tip per optimar nies survetsch da catering», manegian ils conjugals che fan part dall’Associaziun Amarenda a Sumvitg. Sut il tetg da quella porschan els caterings cun – ton sco pusseivel – products dil bein puril. Rodund 35 ga ad onn vegnan els en acziun. Sch’els procuran pil catering ad occurrenzas cun bia hosps drovan ei secapescha gidonters, ina ga han ei schizun organisau in apero per 600 persunas. «Quei ei denton tut mo temporar e buca da cumparegliar cul menaschi d’in hotel, nus essan buca profis sco els», dian ils Candinas. En discuors cul cuschinier hagien ei constatau che quei ch’els fetschien seigi endretg. Quei ch’in cuschinier da professiun sappi seigi denton immens. La rolla da hospitonts plai als purs da Sumvitg, denton oravontut a Sep Candinas. La pura che lavura aunc parzialmein sco scolasta primara preferescha d’organisar e star en cuschina. La sonda ha ei dau pulita truscha el Schweizerhof che ha surviu ina tscheina da nozzas. Barbara Candinas ha gidau ils cuschiniers e siu um ha lavau giu vischala, lur agid ei staus beinvegnius. Nova purschida pils hosps dil hotel Sco Sep Candinas tradescha eri el immens nervus il venderdis cu ei seigien vegni a Flem. El decuors dalla sonda seigi quei denton sedau ed il gust da veser ton sco pusseivel hagi dominau. «Nies pensum eis ei da satisfar allas aspectativas da nos hosps, els duein sesentir da casa cheu e per saver far quei stuein nus esser empatics», puntuescha Christoph Schmidt. «Nus essan sesenti fetg da casa ed havein constatau che mintga emploiau sa exact tgei ch’el ha da far, ei dat clars camonds, tut funcziuna e mintgin s’engascha 100 pertschien pil beinstar dil hosp», laudan ils Candinas. Sche las duas famiglias collaboreschan el futur han ei aunc buca decidiu. Duront lur visetas han ei denton filosofau dabia ed ei dat beinenqual idea che fuss realisabla. Aschia sa il hotelier s’imaginar da visitar cun ses hosps il menaschi dils Candinas ed era lezs ein incantai dall’idea, sfurzar atras enzatgei vul denton negin. Ils hosps savessien per exempel prender investa dil menaschi puril, guder ina buna tschavera, far in’excursiun ella regiun e forsa schizun durmir sil strom. «Sche jeu havess aunc ina ga d’entscheiver, mass jeu probabel ella hotellaria», tradescha Barbara Candinas suenter sia viseta a Flem. Cun ina egliada viers siu um manegia ella denton ch’ei seigi schon iu endretg sco ei seigi iu, cun lur purschida da catering hagien ei ina buna mischeida. www.schweizerhof-flims.ch www.amarenda.ch El romantic curtgin dil hotel han Therese Schmidt, Barbara e Sep Candinas e Christoph Schmidt giu temps per discuorer da lur menaschis.