Daūr di cheste premesse lā a scandaiā cuant e cemūt

Commenti

Transcript

Daūr di cheste premesse lā a scandaiā cuant e cemūt
INTRODUZION
La peraule sport e diven di une peraule inglese ch’e je cjapade di une forme francese
apocopade (desport, atestade dal 1130, deverbâl dal antîc francês se déporter, ven a
stâi divertisi) e e à un significât gnûf. Al fo l’educadôr anglican Thomas Arnold
(1795-1842) che le doprà par prin: fâ sport, a dî educâ divertint, daûr de concezion
dal pedagoc Vittorino di Feltre.
Daûr di cheste premesse, lâ a scandaiâ cuant e cemût che il sport al podè jentrâ tal
“costum” dai furlans al pâr avonde scontât. Se di sport, te acezion moderne, si po
fevelâ da la seconde metât dal secul XIX, no si à di dismenteâ nancje ce ch’e jere
l’Italie e ce ch’al jere il Friûl in chel periodi. Dut si podarès pensâ, fale che a la int ur
passàs par çurviel di fâ sport. Se alc si moveve in chest sens, o podìn riferîlu dome a
chê classe borghese che in cualchi mût e voleve “emancipâsi” rispiet a chês altris
classis sociâls, o clamâ l’atenzion publiche tal fâ alc di “snob”. Cuant podaraial jessi
stât fat chel pas “culturâl” storic che un pari di famee i ves permetût e al ves acetât
che cualchi fantat di cjase al pierdessi timp daûr di chês “macacadis” alì, degnis di
pucefadiis? La volgarizazion dal sport si realizarà desenis di agns dopo, a la fin da
seconde guere, cuant che il stomi si lu veve un pôc cidinât e si podeve pensâ a alc di
fâ “par sport”. Paraltri a son cetancj i esemplis, ancje tal nestri Friûl, dulà che il sport
al à figurât tant che imprest e strade par vignî fûr de miserie.
GJINASTICHE
In passe plui di cent’agns i sportîfs che si àn vuadagnade une grande innomine al è
incressût par vie che plui alt al jere il numar dai praticants. Scrusignant indaûr ta lis
ultimis desenis dal secul XIX, Antonio Dal Dan al figure tant che protagonist, prin
come atlete e po dopo come dirigjent. Ai 10 di Zenâr dal 1875 e jere stade metude sù
a Udin, prime in Friûl, la Societât Gjinastiche. Il comun ur lassà, sore nuie, tant che
palestre i locâi dal oratori dai Paris Filipins. Poben, tal prin concors nazionâl di
gjinastiche (Rome, 1889) la Societât di Udin e vincè une medae d’aur e une d’arint e
propit Antonio Dal Dan al vincè une medae. Chest campion al risultà prin ancje tal
tierç concors gjinic nazionâl dal 1895, a Rome pai vincjecinc agns de liberazion de
“citât eterne” e po ancje a Torin dal 1898. Pe scree, il 4 di jugn dal 1899, dal gnûf
cjamp di zûc di Vie Cavallotti (vuê Vie Gorghi) si derin dongje pes garis ancje 300
fantatis, un event in chê volte, par vie che pe prime volte in Italie a parteciparin a un
concors gjinic lis feminis.
ATLETICHE
Tal câs de atletiche, al somee che da lis origjins e di cualchi pratiche di garis di corse
e di marce a Udin o in Friûl si cjati olme bielzà dal Tresinte. Une corse si le faseve
partint di Zardin Grant, scjavaçant Borc Aquilee par tornâ in Zardin fintremai al
1782. Dopo de Grande Vuere, cul contribût dal Comun di Udin, al fo screât il cjamp
pe atletiche di Vie Mentane che al permetè a tancj zovins di svicinâsi a cheste
dissipline. Il numar dai atletis al incressè e, ai 25 di Mai dal 1924, al fo screât il
polisportîf “L. Moretti”; in chê zornade e in vie uficiâl a poderin partecipâ a lis garis,
velocitât e salt, ancje lis frutatis. Al fo un periodi di sodisfazions grandis pe atletiche
de Furlanie cui grancj sucès di Mario Agosti, di Udin, tal decathlon e tal lanç dal
gjavelot. Il so record di 62, 45 metris dal 5 di Mai dal 1934 al tignì dûr par cuindis
agns, fintremai al 1950. Tai agns dopo di Grande Vuere al rivà titui nazionâi Aurelio
Lenzi di Gurize, tal lanç dal disc e dal pês. Risultâts straordenaris ju rivarin tal salt
tripli Plinio Romano di Flaiban e tal lanç dal gjavelot cun dôs mans cul record dal
mont Elvira Faccin di Udin dal 1930. In chest periodi al fo un bon atlete Alberto
Dominutti di Udin te stesse dissipline. Atletis fenomenâi tai agns dal Cincuante a
forin Armando Filiput di Roncjis cul primât dal mont te corse cui ostacui il 8 di
Otubar dal 1950. Filiput al veve ancje fat la serie A di basket e al zuiave di balon in
serie C. Une domenie che la sô squadre no zuiave, al à partecipât a garis di atletiche
zonâls e di li po si à butât dome te atletiche. Altri bon atlet al fo Lorenzo Vecchiutti
di Udin tal decathlon (campion talian par vot agns, dal 1946 al 1954, fale il 1952).
Sodisfazions si verin ancje cui atletis dal salt tripli cun Enzo Cavalli di Gurize (cuatri
voltis campion talian, 1958-1959-1960-1962). Doi bogns saltadôrs cu l’aste a forin
Mauro Barella, nassût a Palermo, e Sergio Rossetti che al fo ancje un grant tal
decathlon (campion talian par cinc agns). Cualchi an dopo, soredut tai lançs a vignirin
fûr doi campions: Silvano Simeon di Visc tal lanç dal disc che, fale cuatri agns, al
tignì il record talian dal 1966 fintremai al 1979 e Mario Vecchiato di Udin (trê voltis
campion talian).
Tal salt tripli Paolo Camossi di Gurize, campion europeo juniores tal 1993, al vincè 9
titui talians e al fo campion mondiâl indoor dal 2001.
Te dissipline dal mieç font al ve une cariere sflandorose Venanzio Ortiz di Paluce
che, in trê dîs, al vincè une medae d’arint (10.000 metris) e une d’aur (5.000 metris)
tai campionâts europeos di Praghe dal 1978. Ortiz al jere ancje stât campion nazionâl
di schi di font tai aliêfs.
A mertin menzionâts in bande chê schirie di atletis che a derin dongje chê che si
clamà la “scuele udinese di salt in alt”. Bielzà fin dai agns Cuarante l’udinês di
adozion Ovidio Bernes (al jere di Visignano) al rivà il titul nazionâl. Dal 1970 in ca i
nestris sportîfs di cheste dissipline a tignirin alt l’onôr dal Friûl cun cetancj primâts e
medais in plusoris manifstazions internazionâls (campionâts talians, europeos,
mondiâi e olimpiadis): o fevelìn di Enzo Dal Forno di Pasian di Prât, di Bruno Bruni
di San Vît dal Tiliment, di Massimo Di Giorgio di Udin, Donatella Bulfoni di Udin,
Luca Toso di Tavagnà e, par ultin, Massimo Talotti di Udin. Imprese di rimanrcâ
ancje chê de starete campions d’Europe 4x100 indoor, dade dongje di Licciardello,
Galvan, Rao e Marin di Grau.
ALPINISIM
Ancje se nol burì fûr garis diretis, une pratiche sportive faturose, periculose ma ancje
apaiant e je simpri stade chê dal alpinisim. Rimpinâsi sù pes monts al deventà une
sorte di sfide di cuant che, dal 1786, une spedizion francese e rivà su la Mont Blancje
(Monte Bianco). In Friûl, a Tumieç, tal 1874 e fo metude sù la 18ime sezion dal CAI
(Club Alpino Italiano) e, dal 1880 e fo metude sù la Societât Alpine Furlane (SAF).
Tal imprin dal Nûfcent si slargjà la pratiche dal alpinisim cence guide. Si miorà il
materiâl (gnovis pichis, gnûfs clauts pe crete e pe glace e gnûfs moschetons) e si
doprarin i rampons. Si vincerin lis pichis ancjemò no rivadis daûr di un gnûf spirt di
emulazion e ancje di nazionalisim. Caparentri, lis Monts plui altis a forin cjapadis di
forescj, doi todescs: Grohmann, sul Colians (2809 metris) dal 1865 e Findenegg, sul
Montâs (2754 metris) tal 1877. I nons dai rifugjis ta lis nestris monts a son vuê chi a
ricuardânus chei cetancj alpiniscj che plui voltis lis àn, tra sport, esplorazion, sience
e, parcè no, ancje poesie, violadis. O podìn cussì fevelâ di Giovanni e Olinto
Marinelli, di Leonida D’Agostin, di Giuseppe De Gasperi, di Giuseppe Feruglio
che tal unvier dal 1902, partîts di Sele Nevee, a tentarin di rivâ su la Mont Cjanine, pe
prime volte, doprant i schi. O vin di nomenâ ancje Giacomo di Brazzà, Celso
Gilberti, grant alpinist pal so ardiment e pe sô tecniche di rimpinâsi ch’e à fat scuele
e che, in dome sîs agns al à viert 46 gnovis viis alpinis e Oscar Soravito che lu à
compagnât, tant che secont, in tantis escursions. Grancj a forin Riccardo Cassin di
Savorgnan di San Vît dal Tiliment, calcolât tal ambient, il plui fuart scjaladôr dal
mont, une piere miliâr te storie dal alpinisim (70 agns di ativitât e passe 100 primis).
Giusto Gervasutti di Sarvignan (1910), al jere indotât di grande resistence e
condurance fisiche e di temperament e al fo sorenomenât “il Fortissimo”, muart sul
cjamp, su la Mont Blanc du Tacul intant che al cirive di tornâ indaûr cu la cuarde
dople. Ignazio Piussi (1935) di Pecêt di Scluse si fasè scuasit dutis lis monts chi
dulintor e po al partì par concuistis tal Antartit e tal Nepal. Grancj merits pes lôr
impresis a verin Raffaele Carlesso e Piero Taiariol di Pordenon, Cirillo Floreanini
di Denemonç, De Infanti (1947) di Monai di Ravasclêt, Ernesto Lamasti (1949) di
Pontebe, Antonio Cella di Paulâr, Giovanni Valle di Comelians e Marco Cedolin di
For di Sore. Ducj i furlans si tignirin cetant in bon cuant che dal 1954 une spedizion
taliane e rivà su la piche dal K2, la seconde mont plui alte dal mont. Poben, in chê
spedizion, a jerin ancje trê furlans: Ardito Desio di Palme, Cirillo Floreanini di
Denemonç e Mario Fantin. Fantin in plui di jessi un grant alpinist (50 asensions sui
“4000” ta lis Alps e vincj sui passe “5.000” in chei altri continents), al jere famôs
ancjetant come scritôr (monografiis e publicazions sul alpinisim e su lis esplorazions)
e documentarist e nus à lassât un archîf fotografic di passe tresintemil negatîfs. Nives
Meroi, furlane par adozion (nassude a Bonate Sotto (BG) e je l’uniche femine ch’e je
rivade a vinci undis (dai cutuardis) 8.000 cence bombule di ossigjen!!! Insieme cul so
om Romano Benet e je rivade su la cime da la Mont Everest passant de bande dal
Tibet e po ancje sul K2, simpri cence ossigjen dal 2006.
SCHI
Se si fevele di montagne nus vegnin subit tal cjâf i sports d’unvier: il schi (slalom,
disese, font e salt), ma ancje bob e slitin. La peraule “schi” e diven dal antîc islandês
“skith”, ch’e vûl dî sclese, toc di len, pal plui di frassin, gjavât de part plui viere dal
tronc. Riferiments a imprescj compagns dai schi si ju cjate in incisions su piere ch’a
van indaur al 2000 prin di Crist, intes Storie di Erodoto e te Eneide di Virgilio. Tai
paîs dal Nord si ju doprave, plui che par divertiment, par spostâsi di un paîs a chel
altri in chês zonis simpri plenis di nêf. Si tratave paraltri di schis particolârs: chel di
drete al jere plui lunc di chel di çampe e al jere cuviert cun piel di foche par dâsi la
sburtade. In Italie si metè sù il prin Ski Club a Torin dal 1901. Lis garis di disese a
scomençarin tal 1911 cul prin campionât inmaneât dal inglês Arnold Lunn te valade
dal Rodan e chês di slalom si faserin dome dal 1922. Tal 1924 il schi al fo ametût tai
Zûcs Olimpics d’Unvier. In Friûl i prins praticants a forin chei dal Tarvisian. Tai
prins agns dal secul XX un atlete fuartissin di Tesis, Carlo Lenardon, al vincè
cetantis garis in Italie, ma in particolâr te Europe centrâl. Ta la metât dai agns Vincj
Alessandro Del Torso (ancje grant alpinist e schermidôr) al partecipà a lis Olmpiadis
di Saint Moritz e al rivà bogns sucès tal skeleton, une sorte di slite cul carel mobil.
Un fat ecezionâl e fo dal 1932 l’adunance inmaneade dal Dopolavôr Feroviari di
Udin cun cuatri mil schiadôrs ch’a rivarin di dut il Trivenit su la nêf dal Priesnig. Al
jere presint alì il Duche d’Aoste che po chês pistis a cjaparin il so non. Tai agns
Cuarante e Cincuante a forin grancj atletis Alberto Tassotti di Paluce (in plusoris
specialitâts), Edoardo Nicolaucich di Tarvis, Ermes e Leo De Crignis di Ravasclêt e
i saltadôrs Mario Cecon e Albino Bazzana. Dôs feminis, ta lis garis di font, a
mertarin grandis vitoriis in Italie e tal fortest: Ildegarda Taffra di Tarvis e Fides
Romanin di For Davôtri. Ancje Franco Vuerich di Pontebe e Anna Maria Samassa a
mertarin il titul talian ta lis lôr specialitâts. Un record particolâr lu batè Luigi Di
Marco di Cividât che dal 1970 al rivà tal chilometri lançât la velocitât di 180, 995 km
l’ore! Roberto Primus di Paluce al partecipà cun onôr tal font ai campionâts dal mont
e a lis Olimpiadis di Innsbruck (1976) e di Lake City (1980). Si faserin preseâ tal
slalom Marco Tolazzi di Udin e Nadia Bonfini ch’e rivà cuinte tai campionâts
mondiâi juniores (1983) e seconde e tierce tes Copis dal mont dal 1985 e 1986. Ancje
i saltadôrs si faserin rispietâ: si trate di Roberto Cecon, Andrea Cecon e Thomas
Rampazzo; René Cattarinussi al cjapà il bronç tal biathlon dai mondiâi dal 1996. La
samence par rivâ a risultâts straordenaris e jere stade metude sot, i butui a vevin fat
sperâ ben e difat di chês pomis che il sport furlan al cjapâ sù tra la fin dal secul XX e
l’imprin dal secul XXI nus reste ancjemò vuê il grant e imparegjabil savôr: Roberto
De Zolt, Piller Cottrer di Sapade cun titui olimpics (arint e bronç) e il titul mondiâl
dai 15 km tal 2005, e i grandissims Giorgio e Manuela Di Centa di Paluce e
Gabriella Paruzzi di Fusine. In chês zornadis dai trionfs la Cjargne e il Friûl a son
jentrâts, ancje cu la lenghe, ta lis cjasis dai talians. Ducj si son sintûts braurôs di
chescj atletis fenomenâi; provìn a visâsi, a pôcs metris dal traguart, chês musis tiradis
scuasit a sclopâ ch’a parevin dî: chi no si mole! Pluitost si mûr! Epos, poesie, liriche
pure!
CICLISIM
Alc che al podeve someâ a un imprest cu lis ruedis si lu cjate bielzà te Ete di Mieç. Il
celerifar di De Sivrac (1790) e la draisine di Drais von Sauerbronn a vevin l’om a
cavalot e il moviment al vignive cui pîts (di chi la peraule “velocipede”). Lawson,
inglês, dal 1879 i de il moviment a lis dôs ruedis mediant di une cjadene: une ruede
devant grandonone e une daûr pitinine. Dome dal 1884 si proviodè il telâr (cane o
cambron) tra lis dôs ruedis che al ten sù la siele, i pedâi, il manuvri e la forcele devant.
Però la prime biciclete cu lis dôs ruedis compagnis e fo chê di Starley dal 1890. Par
sintî fevelâ di une gare uficiâl di biciclete si à di rivâ al 1868 a Saint Cloud, dongje di
Parîs, dulà che si doprarin velocipits cun ruedis di fier e gomis plenis. Il ciclisim al
jentrà tai Zûcs Olimpics dal 1896, i prins de Ete Moderne. Tal 1903 si corè il prin Zîr
di France e tal 1909 si corê il Zîr d’Italie.
Al pâr di strani, ma lis primis corsis di biciclete fatis in Italie a forin chês fatis a Udin
tal Avost dal 1869 e al vincé Selz, un francês. Dal 1887, tra tante curiositât e
entusiasim, si faserin corsis in Place Umberto I a Udin. Tal 1887 istès, tal cuartîr
udinês di Vât, suntune piste di 404 metri (1/4 di mie inglese) si faserin garis di
velocitât pal prin campionât furlan: tra i vincidôrs a figurarin Carlo De Braida,
Gracco Muratti, Evaristo Reccardini, Emilio Klampfer, Alessandro e Giovan
Battista De Pauli che al risultà jessi stât, agns prime, il prin coridôr di “biciclete”.
Carlo De Braida al fo ancje campion talian a Torin dal 1885, campion di resistence su
la Trevîs-Pordenon e al stabilì il record dal mont di velocitât sul chilometri lançât tal
1891 su la strade pontebane a Pontesacco (Trevîs). Al veve un mût so di cori, intune
sacume disclaudade (dinoccolata) e cu la sô fuarce atletiche al batè innomenâts
campions par dute l’Europe. Dal 1888 si fasè a Gurize une corse internazionâl e, in
chê ocasion, e comparì la publicitât de prime fabriche di bicicletis in Friûl, la Battello.
La pratiche di chest sport di fadie si slargjà e a Udin e a Pordenon a vierzerin a la fin
dal secul lis primis buteghis di bicicletis. In Italie, tal imprin dal 1900 a jerin 230.000
bicicletis ch’a vignivin 250 liris l’une, cuant che si vuadagnave 3 liris par ore e si
veve di paiâ une tasse di 10 liris par an.
La Grande Vuere e fermà dute l’ativitât, no dome, ma si puartà daursi ancje la miôr
zoventût sportive. Chei vignûts fûr vîfs, cuntun slanç rignuvît e grande voie di
slontanâ i maçalizis ch’a vevin viodût, si butarin dutune cun gnûfs sportîfs par lis
stradis e su lis pistis a fâ corsis. Vincint cuatri tapis, Giovanni Micheletto di Sacîl al
vincè cu la sô scuadre, l’Atala, il Zîr d’Italie par scuadris e al corè il Zîr de France
vincint une tape. In chel periodi al fo dominadôr cence rivâi Luigi Maniago di Darzin.
Dapardut, a Pordenon, Sacîl e a Udin si verin corsis. E une stele sflandorose e
inluminà cu lis sôs vitoriis epichis il cîl furlan: chê di Ottavio Bottecchia. Furlan di
adozion (al jere nassût a Colle Umberto (Trevîs), prime de vuere al veve fat il
boscadôr e il caretîr. Passade chê buriane, al vendè il caret e il so mussut e al cjapà sù
la biciclete. Si fasè notâ pe sô sgrimie e pe sô fuarce. Al rivà impresis che nissun al
ripetarà: dal 1924 al metè sù la maie zale te prime tape (Zîr di France) e le puartà
fintremai a Parîs. Dal 1925 al fo ancjemò dominadôr: il secont al rivarà cun 54
minûts di distac: robis di no crodi! Al le indevant a vinci in Europe e in Sudameriche.
Magari cussì nò, dal 1927, intun stupit incident a Peonis al colà, nol rivà a dâsi di ca e
al murì ai 15 di Jugn.
Dopo de Seconde Vuere, intant che a dominavin i Bartali, i Magni e i Coppi, pai
furlans si faserin onôr Oreste Conte (dodis tapis al zîr d’Italie e une al Zîr di
Gjermanie), Bepi Doni, furlan par adozion (nassût a Padue), (tai campionâts mondiâi
di Reims e d’Olande, ta lis Olimpiadis di Londre e al vincè un Zîr d’Austrie), Paolo
Fabris di Basilian (campion talian diletants daûr motôr dal 1955), Aldo Zuliani
(campion talian tal inseguiment diletants dal 1965 e 1966 e secont tai mondiâi dal
1966). Grant e disfurtunât al fo Virginio Pezzali di Mortean: tal 1956, al jere daûr a
deventâ campion dal mont di inseguiment cuant che tai ultins zîrs, co al jere devant
bessôl, al trucà la ruede dal so motorist e al colà: pecjât. Ancjemò: Giorgio Ursi di
Doberdò (primatist mondiâl sui 4 km di fer e medae d’arint a Tokio dal 1964 e
campion talian dal 1965 e 1966. Dal 1966 Gino Pancino di Domanins al deventà
campion dal mont tra i diletants tal inseguiment par scuadris sui 4000 metris; po,
Primavera di Roncjis, campion mondiâl juniores te cronometri par scuadris dal
1976; Rampazzo di Sacîl, vice campion dal mont te velocitât dal 1981; Da Ros,
medae d’arint te 100 km par scuadris tai mondiâi dal 1977; Maurizio Bidinost di
Cordenons, campion talian e tierç tai mondiâi dal 1981.
Lis fantatis no sterin però indaûr: grancj risultâts a rivarin di Maria Paola Turcutto di
Cividât e di Nada Cristofoli di Taurian di Spilimberc (seconde tai mondiâi dal 1995).
Cu la biciclete di cross Daniele Pontoni di Varian al fo dôs voltis campion dal mont
(1992 e 1997) e tantis voltis dominadôr cence rivâi in cetantis garis ator pal mont.
Braure si à vût pai zovins atlets Enrico Gasparotto di Cjasarse che al à vinçût il titul
talian di professioniscj pe strade dal 2005 e pal cjargnel Franco Pellizotti ch’al è rivât
tierç tal zîr d’Italie dal 2009.
PUGJILÂT
Nol covente spiegâ che il pugjilât al nassè cul om, cu la sô necessitât di difindisi cui
pugns par prime robe. Za fa 6000 agns, lu pandin lis pituris cjatadis dai archeolics,
cheste ativitât e jere praticade. Tant che sport al jentrà tai Zûcs Olimpics intant de
23ime Olimpiade dal 688 p.d.C.; al vincè il titul Onomasto di Smirne. Ch’al sedi stât
praticât cui pugns nûts, sevi che si dopràs il teribil “cesto – zei” (sorte di manecis
fatis cun strichis di corean infuartidis cun brucjons di plomp e ch’a rivavin fintremai
tal comedon lassant fûr dome i dêts des mans) i pugjii si batevin a oltrance, cence
regulis e limits di colps: si fruçavin ben e no mâl e dispès a restavin pidimentâts par
in vite. A forin i Etruscs in Italie che lu praticarin par prins e po lu cjaparin i Romans.
Passât un periodi lunc in dismentie, il pugjilât (o box par inglês, dal verp to box,
petâsi cui pugns) al tornà a vignî fûr in Inghiltere ae fin dal secul XVII par merit
soredut di James Figg. Par doi secui chest sport (clamât ancje noble art) al continuà,
ma nol veve regulis precisis e acetadis, tant che a forin timps cuant che il pugjilât al
fo improibît. Dome dal 1896 John Sholto Douglas, marchês di Queensberry al butà jù
lis regulis che a son buinis ancje vuê: ûs di maneçons, durade dai timps (ripresis) di
trê minûts ognidun, pês dai contindints pôc sù pôc jù compagn, severitât pai colps
proibîts, compits dai “seconts”, cuadrât (ring) di 5,90-6,22 m di lât.
In Patrie, la Societât UCAMA, te vierte dal 1923, e inmaneà sul cjamp di Vât i prins
campionâts udinês di box ch’e ve ancje tante intone apassionade ator. I prins
campions furlans a forin Giuseppe Gri e Aldo Linz di Udin. Intant, su la sene
pugjilistiche al veve fat la sô jentrade il 12 di Dicembar dal 1928 Primo Carnera, a
Parîs. Di Sequals dulà ch’al jere nassût, la sô famee e veve scugnût emigrâ in France
tal 1918. Al veve fat, prin che lu convincessin a cjapâ sù il pugjilât, il spachelens e il
garzon di fadie. Dopo un pôc nol veve plui rivâi in Europe e al passà la Grande Aghe
par confrontâsi cu la mitiche box merecane. A forin tantis lis vitoriis (cumbinadis?)
par un campion che nancje lui salacor al pensave di sei. Al jere alt 204 cm e al pesave
120 chilos! Il 29 di Jugn dal 1933 al metè jù sul tapêt Jack Sharkey tal Madison
Square Garden e al deventà campion dal mont tai pês massims! No si po stentâ a
crodi che i sedi vignût un inzirli. Difat al paià chel so fâ di bon e forsit ingjenui ta
chel mont dal pugjilât merecan ch’al masanave dut e ducj, contornât di gjernaziis di
malafar che i puartarin vie un slac di bêçs tant ch’al scugnì tornâ in Europe scuasit di
puar. Al fasè il lotadôr e al deventà campion dal mont di catch a Melbourne dal 1937.
Al reste il pugjil campion dal mont dai pês massims che al à rafilât plui fûr
combatiments (KO): 71! Il pugjil plui grant de storie sportive dal Friûl, malât di un
brut mâl, al tornà a Sequals dulà ch’al murì a pôc plui di sessant’agns.
Ta chel periodi istès al fo grant pugjil Luigi Musina di Gurize vincint “coronis”
talianis e continentâls. Al incuintrà Primo Carnera sul troi dal amont e lu batè trê
voltis.
Impuartants risultâts ju rivarin in Italie e in Europe tai agns Sessante, Setante e Otante,
tant tai diletants che tai profesioniscj, Bruno Freschi, Mario Vecchiato, Alfredo
Vogrig, Aldo Battistutta, Valentino Nardini, Aldo Zuliani, Oneglio Grando,
Claudio Piccolo, Sebastian Sotgia, Luigi Campo, Benito Confin, Dino Zuliani,
Roberto Sgrazzutti, Gino Martinis, Gino Rossi, Luciano Bomben, Stefano Zoff e,
tai ultins agns, Paolo Vidoz.
RUGBY
Chest sport al jere nassût in Inghiltere di une cueste de Football Association dal 1871.
William Webb Ellis, difat, intant di une partide di balon tal so colegjo di Rugby,
come scaturît, al cjapà sù il balon cu lis mans e al corè bande de puarte: al nassè il
rugby o zûc cu la bale ovâl. Cheste pratiche si slargjà soredut tra i students tes
universitâts di Oxford e di Cambridge e, tacant dal 1871, e ve un regolament so precîs.
A Udin, la rivade di chest zûc e vignì nunziade sul sfuei “La Patria del Friuli” di
lunis, ai 30 di Zenâr dal 1928 cuntune partide jenfri universitaris furlans e chei di
Padue. IL Rugby Udin al fo metût sù dal 1945 e al partecipà tai agns, cun plui o
mancul sucès, tai campionâts di serie A, B e C. Jenfri i zuiadôrs, doi in particolâr a àn
mertât glorie nazionâl: Enrico Fava di Udin, par cuatri agns campion d’Italie cul
Amatori di Milan (agns Cuarante) e Elio De Anna di Cordenons, doi scudets cul
Rovigo e cetantis presincis te nazionâl. Di riunde furlane a forin chê sorte di saghe
dai Spanghers, ch’a rivarin une innomine mondiâl zuiant in France e in Romanie.
TENNIS
Doi di lôr si passavin une balute di gome doprant une rachete: e vevin di fâi fâ no plui
di un sbalç e fâle passâ sore di un spali tirât tal mieç dal cjamp di zûc. O jerin in
Inghiltere e, stant ch’a jerin oms par ben (gentlemen), tal passâsale e disevin: “tenez”;
“tenez”. Volgarizade, la peraule francese e faseve plui snob e e deventà tennis. No
forin tancj i campions furlans in chest sport. Al tacà Augusto Tam che dal 1896 al
vincè il titul nazionâl. Tra i pionîrs o cjatìn Carlo De Braida di Udin che al fondà
ancje il prin Tennis Club. I cjamps di zûc di Vie Gurize a stramudarin tal 1930 tal
Polisportîf Moretti. Ta chei timps la tenniste Anna Maria Frisacco e fo campionesse
taliane par doi agns di file, 1937 e 1938. Tai agns Cuarante Giorgio Fachini al vincè
titui talians tal dopli e tal dopli misturât par cinc agns cun compagnis diferentis. Si
faserin onôr tai agns Setante Marco Armellini, Fabrizio David, Lucio Zamelli,
Luciana Gobitta, Paola Bolzon, Paola Voli. Po, dal 1985 e fo campionesse taliane
par scuadris Raffaella Scandolo e dal 1991 Maika Serafini. Ancje se lu ve praticât
inaltrò, Corrado Barazzutti di Udin al fo il campion plui innomenât: campion d’Italie
tal sengul par siet agns di file (1976-1982). Plui che di tecniche, al jere un zuiadôr di
font, cetant regolâr e cuntun mont di sgrimie. Il so sucès plui esaltant al fo la vitorie,
insiemit cun Panatta e Bertolucci, te Cope Davis (il campionât dal mont pal tennis)
dal 1976.
TENNIS DI TAULE – PING PONG
Al è une pratiche sportive nassude in Inghiltere tor dal 1880 tant che passetimp, une
sorte di tennis di cjase. Prin lu clamarin whiff whaff (un tiermin onomatopeic e ancje
non de dite ch’e faseve lis balutis) o po ping pong (ancje chest un tiermin
onomatopeic e non de dite di balutis che i de insom il non al sport). L’ativitât uficiâl e
tacà però dome de fondazion da lis primis associazions nazionâls. In Furlanie a
rivarin sucès nazionâi Sergio Durazzano, agns Sessante, (campion talian plui voltis,
1 scudet e 8 partidis te nazionâl), Flavio Floreani, Mario Agarinis e Lucio Saltarini
tai agns Otante. La samence butade dilunc tai agns e à puartât i siei racolts: tai ultins
campionâts talians 2009 par zovins il Gsd Rangers di San Roc di Udin al à dât la sô
çatade: trê aurs (Chiara Miani, Sofia Schierano e Alessia Toscano), un arint e doi
bronçs: par prionte, ancje altris doi arints cun Luca e Marco Bressan di Gurize.
SOLEVAMENT PÊS
Ancje se nol è un sport di tante visibilitât, e je dutcâs une ativitât sportive vielonone.
Garis si fasevin bielzà intant de prime Olimpiade de Ete Moderne, chê di Atene dal
1896. Dal 1907 il nestri Driulin al fo Campion talian. Il sport organizât al nassè però
a Udin ator dai agns Cincuante cuant che, paraltri, i atletis udinês a vincerin il titul
talian par scuadris. A mertin menzionâts ancje Luca Calzolari, vincidôr di 19 titui
talians e cun 16 presincis te rapresentative nazionâl; Katia Jacuzzo di Udin che, in
plui di vê stât 16 voltis in nazionâl, e stabilì nuiemancul che passe cent primâts
nazionâi; Vanni Lauzana di Merêt di Tombe al vincè 31 campionâts talians e al fo il
pesist plui titolât in Italie e si fasè onôr ancjetant in garis internazionâls (une medae
d’aur tai Zûcs dal Mediterani); Raffaele Mancino di Pordenon al vincè cinc titui
talians e une medae d’aur tai Zûcs dal Mediterani dal 1991.
FOBAL
Il re e il cont di Kent a assaltin Svualt cun ofesis violentis e lu clamin “buzaron, cjan
bastart, sclâf, manigolt” e a siarin cu la marche plui infamant: “ …. you base football
player! (tu carognôs zuiadôr di balon!)”. O sin tal King Lear di Shakespeare, at I,
sene IV. A corin i prins agns dal 1600 e al è clâr che il zûc nol gjolt di une buine
innomine se al devente fintremai une citazion di chê fate intun test leterari. Al jere un
pieç che si fevelave di chest zûc in Inghiltere, siben che la sô filusumie no jere inmò
ben clare.
Paraltri notiziis infumatadis sul balon si lis à ancje di timps cetant plui indaûr.
L’imperadôr cinês Huang-Ti ator dal 2500 p.d.C. al varès inventât un zûc scuasit
compagn di chel che si zuie vuê: il tsu chu, oben bale dade di une vissie sglonfade cul
aiar che si veve di sburtale cui pîts viers di une puarte fate cun cjanis altonis che
framieç a vevin une rêt cun mais largjis. Al jere gol se la bale e passave jenfri lis mais
o se e finive alte parsore de puarte. La bale e podeve sei ancje di un corean implenât
cun cjavei di femine. Al jere un sport, in chest câs, cun regulis precisis e cetant
furtunât se al è vêr, come che al è vêr, al passionave personis consideradis sacris tant
che i imperadôrs. E po, si pues nomenâ l’episciro, , dai Grêcs che e figurave
la linie di metât cjamp che e divideve lis dôs scuadris. Propit te linie di mieç si
meteve la bale che i contindints e vevin di petâi e fâi passâ la linie di font aversarie. E
parfìn i Berbars al somee che a vessin praticât un zûc cu la bale: il “koura”.
Tal mont latin si à vût l’harpastum o rapio. Ven a stâi la finalitât dal zûc e jere chê di
“puartâi vie” la bale al aversari e pidâle oltri la sô linie di font de sô zone di zûc.
Marziâl al definì chest zûc “pulveruntum harpastum”, faturôs e violent, nancje di
meti cul zûc gjentîl de bale che si ricreavin gaiarinis e legris, intun paisaç idiliac
Nausicaa e lis sôs famulis come che nus conte sù Omêr te Odissee (Cjant VI, viers
141-168). L’harpastum i Romans lu dismentearin a Rome e i legjonaris lu cjatarin te
Galie. Difats lenti i predis druids a praticavin un zûc clamât soule-choule, un tiermin
che al pues vê une lidrîs celtiche héaul (soreli) oben lidrîs latine soleae (sandui), par
dî che si veve di praticalu cun chei imprescj. La soule di zûc rituâl al deventà bataie
vere pal possès de bale jenfri lis variis popolazions. De Bretagne e de Picardie dulà
che al jere praticât e che al fo improibît des autoritâts dome dal 1810 parcè ritignût
tuntar e masse violent, il zûc al scjavaçà la Manie e, te Cornovalie, si ve te ete di
Mieç l’hurling. A Florence, intant dal guvier dai Medici si praticà il balon florentin o
“gioco del calzo”. Si à di rimarcâ che il so non nol diven dal at di pidâ la bale, come
al pues someâ tal imprin, siben des cjalzis di colôr diviers metudis dai zuiadôrs. Il zûc
al someave di plui al rugby di vuê par vie che si podeve zuiâ la bale sevi cu lis mans
che cui pîts e i zuiadôrs a jerin 27 par scuadre. La peraule “calzo- calcio” e jentrà
ancje tal vocabolari talian e e ve inviestidure uficiâl tal 1612 cuant che l’Accademia
della Crusca lu definì “… gioco proprio e antico della città di Firenze che
simboleggiava une battaglia con regole con una palla ad aria che assomigliava alla
sferomachia passata dai Greci ai Latini e dai Latini a noi”. Il zûc, dutcâs, al le ancje
chi al mancul par vie des tantis barufis che al discjadenave sevi tal cjamp di zûc che
fûr di une fate che e provocà l’intervent e des autoritâts civîls e di chês gleseastichis
come che al capità in Inghiltere.
Si rivà al 26 di Otubar dal 1863 cuant che, te ostarie dai framassons te Great Queen’s
Street di Londre (Freemason’s Tavern, un puest innomenât pes riunions dai liberâi
inglês, ma vuê ricuardât tant che il lûc dulà che e nassè cheste “peste”, chest “tifo”
sportîf pal fobal) undis sportivis e scuelis inglesis (Kilburn, Barnes, Office,
Crusaders, Forest, Percival House, Crystal Palace, Blackheath, Kensington School,
Surbiton, Blackheath School) si derin adun par impastanâ la Associazion inglese e par
butâ jù un regolament. A forin zornadis di discussions su dôs tesis: la prime e
prudelave il zûc cu lis mans, cu la cjarie e no intendeve di disnaturâ il zûc dai vons; la
seconde e diseve il contrari e lis scuadris che la sustignivin, par no fâ tocjâ il balon cu
lis mans, a obleavin i lôr zuiadôrs a metisi manecis blancjis o a tignî ben strets tes
mans florins d’arint. Chei che a preferivin un zûc plui ghiart, plui dûr no forin
dacuardi e cualchi an dopo, il 26 di Zenar dal 1871, a fondarin la Rugby Union. Il
regolament fat bon de Football Association al jere dât dongje di 14 articui che a
stabilivin lis misuris dal cjamp di zûc (no plui di 150 yardis par 100, 137x91,4 metris,
la spartizion de partide in doi timps, la forme e lis misuris de puarte - doi pâi cence
travierse distants 5 metris l’un di chel altri -, la pidade di inizi prin di ogni timp di
metisi dacuardi pe sô durade, tornâ a meti il balon tal mieç dal cjamp dopo ogni gol,
la rimesse laterâl; nol jere invecit precisât il numar dai zuiadôrs che si lu lassave al
acuardi jenfri lis dôs scuadris. Ma chel che al decretà la nassite dal zûc dal balon a
forin chescj articui:
- nissun zuiadôr al pues cori cu la bale tes mans;
- no je permitude ni la cjarie, ni la gjambadorie e nissun zuiadôr al pues
stratignî oben sburtâ un aversari;
- doi zuiadôrs di une scuadre no puedin stâ tal timp istès dongje de puarte
aversarie, a dî une forme di opsai.
Ator dal 1870 i doi pâi de puarte a forin colegâts cuntune cuarde a cirche 2,50 metris
di tiere che, subit dopo, e fo cambiade cuntune travierse di len. Cundiplui, tes regulis,
il puartîr al fo l’unic zuiadôr ch’al podeve tocjâ il balon cu lis mans.
In dì di vuê la popolaritât di chest sport e je stade scuasit imponude, almancul in
Italie, dai mieçs di comunicazion di masse e che invecit di lâ a pareli cuntune cressite
sportive e à menât un impuariment culturâl ch’al è il spieli di cheste societât.
Esemplis dutafat contraris di ce ch’al sucêt tai Paîs dal Nord Europe.
A Udin il balon (o fobal) al rivà, come paraltri ancje in Italie a la fin dal secul XIX. E
si po dî che e sedi stade l’Udinês a laureâsi prin campion d’Italie cuant che dal 1895 a
Trevîs, intun incuintri cun diferentis dissiplinis e un centenârs di Societâts di
Gjinastiche, e vincè il torneu di balon. La scuadre e jere za stade presentade l’an prin
a Rome intun altri concors gjinic. Ma cemût jerial a Udin chest zûc? Il 26 di
Dicemabr dal 1893 si vè une esibizion e te sô cronache il gjornâl “Il Friuli” al
scriveve: “E’ un giuoco con una grossa palla di cuoio nel quale inverce delle mani si
adoperano i piedi; faticoso ma assai divertente e pieno di emozioni. In questo giuoco
ci vuole il maestro, e il maestro lo si trovò nel giovane Roner, che lo apprese a
Zurigo, e che lo giuoca con distinta abilità”. Si tratave di une partide fate tal Cjamp
dai Zûcs di Udin ch’al jere stât screât pôcs mês prime. Dut al jere tacât l’an prin,
cuant che une dozene di atletis di Udin a jerin lâts a Gjenue par partecipâ al secont
concors gjinic nazionâl. Lenti, il cjapitani de nestre scuadre al veve sintût a fevelâ di
un zûc gnûf puartât in Italie di marinârs inglês e s’ndi jere entusiasmât. Dal 1900 si
doprà un cjamp di balon vêr che lu clamarin sferisteri e po, dal 1914, si fasè un altri
cjamp inte aree di Puarte Vignesie, fintremai che dal 1924 si doprarà il Polisportîf
Moretti.
Curâts i slidrisaments materiâi, fisics e morâi de Grande Vuere, ancje il sport al judà
a tirâsi sù. Tai agns dal Vincj a nasserin cetantis Societâts Sportivis di fobal.
L’Udinês e ve di spietà fintremai al 1950 par podê fâ il prin vêr campionât di serie A.
A forin agns ancje di grancj risultâts come il secont puest dal 1954-55 daûr dai diaui
dal Milan, ma po e fo mandade jù in serie B par un ilecit sportîf di agns indaûr. E le
ancjemò plui in jù, in serie C. La scuadre Primevere (la farie di campions de Societât)
e rivà a vinci dal 1964 il campionât nazionâl e a mandâ in scuadris plui innomenadis
di serie A i siei campionuts. Di grant coinvolziment emotîf e sportîf e fo la corse de
serie C ae Serie A in doi soi campionâts, dal 1977 al 1979. Ben altris sflandôrs, cence
spiete, si faserin indevant tai ultins dîs agns. E rivà plui voltis jenfri lis prims sîs dal
campionât; si vuadagnà la partecipazion ai prestigjôs torneus continentâi, cun sdrumis
di furlans ch’a levin daûr de scuadre. E cui si dismetaraie l’emigrazion di 5.000
furlans a Barcelone pe partide di Cope Campions?!? E il fobal si pandè un veicul
straordenari di promozion turistiche e economiche pe Piçule Patrie. Desenis a forin,
vuê tancj di mancul, i zuiadôrs ch’a mertarin la stime e si faserin onôr sei cul Udin,
sevi in scuadris metropolitanis rivant a deventâ campions dal mont, un traguart che
tal imagjinari, in ispecie dai fruts di uns cincuante agns indaûr, al figurave une robe di
sium e parfin dal impussibil. Par prin si scuen nomenâ propit chescj campions dal
mont: Foni e Colaussi (1938), Collovati e Zoff (1982). A forin campions Olimpics
Foni e Frossi dal 1936. A forin campions d’Europe dal 1968 Burgnich e Zoff. Ducj
chescj a vincerin ancje scudets tes scuadris plui innomenadis in Italie. Alfredo Foni
di Udin al deventà purpûr prin alenadôr, vincint doi scudets cu l’Inter di Milan.
Annibale Frossi di Muçane al fo il miôr goleadôr tai Zûcs Olimpics di Berlin dal
1936 cun vot goi. Al zuiave cui ocjâi peâts daûr de cadope cuntun astic: vuê nol sarès
permetût; lu clamavin il “dotôr sotîl” sevi pai ocjâi sevi parvie che al jere, robe cetant
rare in chê volte, laureât in inzegnerie. Gino Colaussi (26 partidis in nazionâl) di
Gardiscje al à segnât doi goi cuintri l’Ongjarie te finâl dal campionât dal mont dal
1938. Tarcisio Burgnich di Rude al à zuiât 495 partidis in serie A, 68 cu la nazionâl e
al vincè ancje dôs Copis dai Campions e une Cope Intercontinentâl. Fulvio Collovati
di Teor al zuià cu lis plui fuartis scuadris talianis. Dino Zoff, il monument. Nassût a
Marian, dal 1959 al passà cul Udin, po al Mantue, al Napoli e insom ta la Juventus.
Plui di ducj al metè la mae de nazionâl (115 voltis), al tignî virgjine la sô puarte in
nazionâl plui a lunc (1143 minûts), al zuià in serie A plui partidis di ducj (514
partidis). Dal 1982, a cuarant’agns al alçà la cope di Campion dal mont insiemit cul
alenadôr, furlan ancje lui, Enzo Bearzot di Dael (bon zuiadôr tal Torin). E grande
disfurtune al ve tal Torin un furlan di Claut, Ruggero Grava che al emigrà in France
dopo de seconde Vuere e che al jere su chel aparechio che al colà jù su la culine di
Superghe scancelant chê mitiche scuadre ai 4 di Mai dal 1949. Fabio Capello di
Pieris al è stât plui voltis campion d’Italie come zuiadôr e, tant che alenadôr, al à vint
campionâts in Italie (Milan, Rome, Juventus) e in Spagne (Real Madrid). La schirie
dai “balonîrs” di Udin e provincie ch’a mertin ricuardâts e je lungje: Sergio Manente,
Luigi De Agostini di Tresesin, Giuseppe Virgili (clamât Pecos Bill), Ivano Bosdaves,
Severino Feruglio (clamât “vuaine”), Lorenzo Buffon di Tisane, Renzo Burini di
Palme, Pietro Fanna di Moimans, Ezio Pascutti di Mortean (17 voltis nazionâl, 1
scudet cul Bologne - 1964), Paride Tumburus di Aquilee (1 scudet cul Bologne dal
1964), Franco Janich di Palme (1 scudet cul Bologne – 1964). Janich al à un record,
ancje se negatîf: al zuiâ 426 partidis cence mai segnâ un gol!
SCHERME
La pratiche de scherme e à lidrîs antigonis. Si cjate evidence in basrilêfs egjizis dal
1200 p.d.C., dulà che a son figurâts doi duelants, protezûts di une mascare, che si
frontin brancant dôs siablis di len, sot dal control di un judiç. Dopo de jentrade des
lamis tai duei, si à capît dal moment l’impuartance ch’e varà tes batais plui indevant,
une impuartance che e durarà fintremai che no vignaran fûr lis armis cul fûc, fusîi e
pistolis. Par scomençâ e merte subit contade la storie di Fiore de’ Liberi, di
Premariâs. Ben, lassâts i studis (o sin te seconde metât dal 1300), si invià a imparâ lis
arts de scherme lant a inzornâsi ta lis Gjermaniis. Chest mestri di spade lu cjatarìn po
a Udin e, ae fin dal XIV secul, a Ferare, li dai Este. Chi, in onôr di Niccolò III, al
scrivè un tratât su l’art dal duel cu lis spadis “Flos duellarum in armis, sine armis,
equester, pedester”; su chest document si fondarin dopo ducj i tratâts che a rivuardin,
ancje in dì di vuê, cheste art nobil.
A Udin, tant che sport, si à notiziis de sô esistence de seconde metât dal Votcent.
Mestri al jere Bartolomeo Bertolini che si svantave di sei stât, tra i soldâts di
Napoleon, chel che al veve vude la vite plui aventurose. Si mertà, par chest, il titul di
cavalîr de Legjon d’Onôr. Tai prins agns dal Nûfcent al fo Alessandro Del Torso a
rivâ grancj risultâts. Di dî che Del Torso al fo ancje bon tennist e grant scjaladôr e al
rivà a puartâ a fâ academie a Udin i atlets schermidôrs plui innomenâts. La prime
fantate a incrosâ lis spadis (cui mascjos, però) e fo Vera Pecile tes salis di Vie dal
Ospedâl. I prins sucès a nivel nazionâl a rivarin dome dal 1954 cu la scuadre zovanîl
di spade (Alfredo Bulleri, Antigone Frangipane, Renzo Moro). De man esperte dal
Filippo Piraino a vignerin fûr grandis atletis ch’a puartarin ancjetantis sodisfazions:
vitoriis in plusôrs torneus, mo soreduit titui nazionâi e mondiâi. E Roberto Piraino, fi
di Filippo, al vincè il titul mondiâl par scuadris di mestris. Lant daûr di chest esempi,
Andrea Magro al fo prin grant schermidôr (l’unic in Italie a sei un seconde categorie
in dutis e trê lis armis de scherme); dal 1993 al deventà responsabil tecnic de scuadre
feminîl taliane e al deventarà il tecnic plui titolât de storie dal sport talian. Bogns
risultâts si verin tai agns Otante a nivel zovanîl. Tai ultins agns impuartantons
risultâts ju rivarin i Navarria di Cjarlins: Mara Navarria e à vinçût la Cope da Mont
dal 2003 e dal 2005; Caterina Navarria e fo campionesse europee e aur tai zûcs dal
Mediterani dal 2008 e campionesse taliane zovins dal 2004 e campionesse mondiâl
dal 2009; Enrico Navarria al è stât medae d’aur tai Zûcs dal Mediterani dal 2006.
BALE A SVOL – VOLLEY
Al è un sport merecan, lu vevin clamât mintonette, inventât lenti di William G.
Morgan il 9 di Fevrâr dal 1895 intun gjinasi a Holyoke tal Massachussetts. In Europe
al rivà daûr des trupis merecanis intant de Grande Vuere. In Friûl al fasè i prins pas,
par sburtade dai insegnants di gjinastiche, ta lis scuelis dopo de fin de seconde vuere.
A nivel locâl, a tacarin lis atletis gorizianis ae fin dai agns Cincuante. In ambit
maschîl e je di preseâ la lungje ativitât de Libertas di Salt di Poulêt, in C. Tai agns
Otante a zuiarin tal campionât di Serie A2 la VB Udin e la Rex di Pordenon. Ta chei
agns sucès e onôr ju vuadagnà, a sun di prestazions e vitoriis, Franco Bertoli di
Cjavalì di Tavagnà. Al vincè plusôrs scudets, campionâts europeos, mondiâi e
olimpics. Lis sôs possentis alçadis i mertarin il titul di “man di piere”. Lis fantatis a
àn vût e a àn une rodul impuartanton ta la popolaritât e ta la pratiche di chest sport:
cuntune percentuâl di un zuiadôr ogni 100 abitants te provincie di Udin la bale al svol
al è il prin sport feminîl e il secont in assolût! Ponte di chest grant sucès e je vuê
Chiara Negrini.
BALE TAL ZEI – BASKET
Al è un sport di riunde merecane e al nassè cu la publicazion des regulis ai 15 di
Zenâr dal 1892. Il zûc al jere stât inviât bielzà l’an prime dal professôr di gjinastiche
(pastôr protestant) James Naismith li de International Training School dal YMCA di
Springfield tal Massachusetts. Chest sport si praticà pes primis voltis tes scuelis intai
agns Vincj, prin a Gurize (1920) e po a Udin (1931). Tai agns Trente lis scuadris di
Udin e Gurize si notarin e a parteciparin ai campionâts di competence. Però, a fâ la
serie A pe prime volte a forin lis fantatis di Udin dal 1942. Atletis di buine innomine
a forin Gianna De Marchi, Maria Gobessi e Luciana Plaino. La prime scuadre a fâ la
serie A maschîl e fo invecit il CRDA di Monfalcon dal 1941 e, dal 1946, a rivarin in
serie A ancje l’Itala di Gardiscje dal Lusinç e l’A.P. Udinês. De Itala si à di ricuardâ
impuartants zuiadôrs tant che Collini, Canna, Zimolo, Oscar e Luciano Zia. Dopo
de union des scuadris feminîls A.P. Udinês e Fiamma di Gurize, al scomençà un
moment d’aur pe bale tal zei furlane. La gnove scuadre e vincè trê scudets e e rivà
seconde altris trê voltis. Tantis zuiadoris a faserin part par tancj agns de nazionâl
taliane. Ancje tra lis fantatis si à di marcâ i nons plui impuartants: Marisa Geroni di
Gurize (3 scudets e 109 voltis in nazionâl), Nicoletta Persi di Monfalcon (10 scudets
e 131 partidis in nazionâl), Rosa Maria Battistella di Sequals (4 scudets), Franca
Vendrame (3 scudets, 44 voltis nazionâl), Michela Ceschia di San Canzian dal
Lusinç (114 voltis nazionâl).
Pes scuadris maschîls, i moments plui esaltants si ju viverin tai agns Setante, cuant
che a Udin si zuiave il basket miôr. Inte storie dal basket furlan, cualchi atlete a’nd à
segnade ancje la sô storie: Giampiero Savio di Udin (1 scudet e marcadôr tra i prins
trente in Italie); Lino Paschini di Verzegnis (2 scudets, une Cope Campions);
Domenico Fantin di Pordenon (1 scudet); Sante Rossi di Vilecjasse di Listize
(medae d’aur tai Zûcs dal Mediterani); Vittorio Ferracini di Pordenon (1 scudet, 128
partidis in nazionâl); Paolo Vittori di Gurize (6 scudets, 2 Cope Campions, 1 Cope
Intercontinentâl, 3 Copis Italie, 1 Cope des Copis e 89 presincis in nazionâl);
Giuseppe Brumatti di Gurize (1 scudet, 2 Copis des Copis, 102 voltis in nazionâl);
Corrado Vescovo di Gurize (1 scudet); Gianfranco Sardagna di Gurize (4 scudets, 58
voltis in nazionâl); Antonio Zorzi di Gurize (1 scudet, 22 presincis te nazionâl);
Franco Meneghel di Grau (1 scudet, une Cope Intercontinentâl, 2 Copis des Copis),
Achille Canna di Gardiscje (2 scudets, 70 partidis in nazionâl), Sergio Macoratti di
Gardiscje (52 partidis in nazionâl), ancjemò Giovan Battista Cescutti di Udin
(scudets, 1 Cope Intercontinentâl, 30 voltis nazionâl), Michele Mian di Aquilee (157
partidis in nazionâl, campion d’Europe dal 1999 e arint tes Olimpiadis di Atene dal
2004, Gianmarco Pozzecco di Gurize (plui voltis scudetât, campion d’Europe dal
1999) e Roberto Chiacig di Cividât che però al à fat la sô cariere cetant brilant fûr de
Piçule Patrie (1 scuet, 402 partidis in serie A ,185 presincis te nazionâl, campion
d’Europe dal 1999). Tal mês di Mai dal 2009 lis fantatis dal Sporting Club a àn
vinçût il campionât talian Under 19. Dutis bravonis!
TÎR
Si po dî che il Friûl al sedi di simpri stât tiere di tîr. Difat, tra lis primis societâts in
Italie ch’a forin metudis sù e fo chê di Udin dal 1883. Domenico Crist di Osôf, che al
vincè il campionât venit dal 1930 e tantis garis internazionâls, al fo il prin a vê
innomine nazionâl pal tîr a segn. Al vignì daûr Nino Pittini, campion talian Balilla. A
varan di passâ agns prin di vê altris campions: dal 1977 al fo campion talian Paolo
Isola, Silvia Malagnini e fo campionesse europee par scuadris dal 1991 e
campionesse taliane juniores dal 1992. Francesco Rizzani al vincè il titul talian par
scuadris juniores dal 1992 e al fo campion talian dal 1987. Elena Toneatto e vincè
une Cope Italie e e fo campionesse taliane cu la carabine standard par tiere dal 1994. I
plui indotâts di classe a forin però Vincenzo Tondo e Barbara Stizzoli. Tondo, udinês
di adozion, al fo 130 voltis in nazionâl e al fo primatist talian dal 1976 al 1989 cu la
pistole cu l’aiar comprimût e campion europeo tal 1984. La Stizzoli, invecit, e fo
campionesse europee juniores dal 1989 e cetantis voltis campionesse taliane. E tignì
il record dal mont cu la pistole di 10 metris cun 382 ponts su 400 dal 1989 fintremai
al 1996!
Tal tîr cul arc bogns risultâts ju rivarin Ester Robertson, furlane par adozion
(campionesse taliane par cuatri agns, 1983-1986), Donatella Bigotti (campionesse
taliane dal 1979) e Gilberto Narduzzi (campion talian dal 1986).
Storie frescje e je la flabe cetant reâl di Chiara Cainero, di Cjavalì di Tavagnà. Plui
di une volte campionesse tal skeet (doi titui europeos – 2006 e 2007; arint ai mondiâi
2006 e bronç ta chei dal 2007) e je stade medae d’aur dal 2008 ta lis Olimpiadis a
Pechin e à fat sintî cetant braurôs ducj i furlans par cheste imprese e pe sô smicje
infalibil.
JUDO - KARATE
Il judo (dal gjaponês judo, troi pe molece: jū, dolç, mol e dǖ, vie, dutrine) al è prin di
dut une filosofie: al è ce che al à metût in pratiche il mestri di jujitsu Kano, dopo che
dal 1876 e fo parade fûr la caste dai samurai, ch’al netà vie lis tecnichis plui violentis
ch’a jerin te lote cu lis spadis. Dal 1957, an di fondazion dal prin club di judo a Udin,
cetancj a forin i atlets e lis atletis ch’a rivarin titui nazionâi: Baruzzo, Marcuzzi,
Masala, Pilosio, Rossetti e Segatti. Però, menzion e marcadure particolâr a meretin
Giorgina Zanette (par cinc agns campionesse taliane) e Gianna Bin (campionesse
taliane par 11 agns, un daûr chel altri dal 1965 al 1975. L’atlete però ch’e à vinçût
plui titui e je stade Laura Di Toma: trê voltis campionesse d’Europe, 25 voltis
campionesse d’Italie e e ve 52 presincis te scuadre nazionâl. E finì la sô cariere
agonistiche rivant il pont plui alt par une femine in chest sport: cinture nere sest dan!
A rivarin titui nazionâi ancje Laura Tomassetig, Alberto Casson e Massimiliano
Madeddu e, propit dal 2009, Lorenzo Bagnoli (campion talian assolût).
Ancje il Karate al ve i siei campions. A Udin chest sport si svilupà ator dai agns
Sessante. Da lis palestris udinesis al vignì fûr Roberto Ruberti (cetantis voltis
campion talian e campion europeo dal 1981) e al rivà secont tai mondiâi dal 1982. Di
rimarcâ ancje che chest atlet al metè sù 100 voltis la maie de nazionâl e, su 680
combatiments, al pierdè dome cinc voltis. E fo ancje une fantate a fâsi onôr: si trate di
Roberta Sodero. Lungjonone la sô schirie di vitoriis: dal 1990 al 2000 cun 18 medais
d’aur tai campionâts talians; trê mondiâi juniores e 7 medais d’aur tai campionâts
europeos cence contâ i seconts e tierçs puescj. Une trebiade di medais!
CANOE - CANOTAÇ
Si à di lâ indaûr a lis civiltâts egjizis e sumeris par cjatâ i antenâts de canoe: la
piroghe. Però, passant la Grande Aghe (l’Ocean Atlantic) si scuvierç ancje che i
indians de Americhe dal Nord (irochês) a dopravin la canoe (clamade apont
canadese), e che i eschimês de Tiere Verde (Gruenland = Groenlandie) a dopravin il
kayak. Tal so diari, Cristoforo Colombo, ai 13 di Otubar dal 1492, lis barcjis che si
svicinavin a li sôs caravelis lis veve clamadis cul tiermin caraibic canaoa (tronc di
arbul sgjavât), mudât po par castilian in canoa. La prime gare si le ve ai 27 di Avrîl
dal 1867 su la distance di une mie e e jentrà tai Zûcs Olimpics dal 1936. I campions
furlans che te canoe a rivarin titui a forin Barbara Nadalin (5 voltis campionesse
taliane e bronç ta lis Olimpiadis di Barcelone), Laura Boeri (campionesse taliane dal
1994) e Giorgio Tessarin di Grau (campion talian dal 2004-2005 e 2006).
Tal wind surf (bree pal aiar) e fo campionesse taliane Margherita Viola tal 1978.
Tal canotaç, dai agns 1924 e 1925, Genzo, Grio, Montegnacco, Privileggi e
Martinelli a vincerin pe Societât Timavo di Grau il titul talian e simpri dal 1925
ancje il titul europeo a Praghe. In plui a forin campions talians dal 1937 Italo
Petronio e Oscar Piccini (tal doi cence), Bobig, Bussani, Del Neri e Pelizzoni (tal
cuatri cun), campions d’Italie e d’Europe dal 1949, Bobig, Delise, Giurissa,
Tagliapietra e Suzzi (tal cuatri cun). Aldo Tarlao di Grau al fo campion talian(7
voltis) dal 1947 al 1953 e campion europeo (3 voltis); Ellero Borgnolo di Torean al
vincè trê titui talians e doi titui europeos. Cesare Del Bianco al fo prin tai Zûcs dal
Mediterani e campion talian dal 1955. Pasquale Chiabai di Grimà (5 voltis) e Lino
Coren di Pulfar (dôs voltis) a vincerin titui nazionâi. Bruno Dreossi di Monfalcon te
canoe al à vinçût 32 titui nazionâi e al è montât sul podi cetantis voltis in garis
europeis, mondiâls e olimpichis. Si à la bocje ancjemò buine pai sucès ch’a son rivâts
tal 2009: i titui talians tai 5000 metris seniores di Sofia Campana, Clara Smilzotti,
Ingrid Agostelli e Tamara Del Ponte e tal K2 cui frutats cun Nicola Franco e
Massimo Bronzin, ducj de canoe San Zorç di Noiâr.
Simpri pai sports di mâr si à vût pal Friûl altris doi fûrclasse: te vele, cun Fabio
Bernes di San Zuan dal Nadison (campion dal mont dal 1994) e Stefano Rizzi di San
Zorç di Noiâr, al jere però nassût a Rimini, che al jere te scuadre taliane che e à vint
l’Admiral’s Cup dal 1995.
Te motonautiche, Luca Fornasarig di Udin al fo trê voltis campion talian (1985,
1993 e 1994), campion europeo dal 1995 e campion mondiâl dal 1996. Par ultin doi
campionissims in cjase Roberto e David Del Pin di Maran. Il pari, par la F1000, al è
stât Campion dal Mont tal 2004, campion europeo dal 2005, campion europeo e
mondiâl dal 2006 e talian, europeo e mondiâl dal 2007. Il zovenut, 17 agns, al è stât
campion talian e campion dal mont tal 2008! Cuant che si dîs che la sclese no cole
mai lontan dal çoc.
NADAZION
La prime pissine screade a Udin e fo chê di 20 metris di Vie Pradaman de Opare
Balilla. Prin si nadave te “Stampetta” di Plaçâl Vignesie. Plusôrs a forin i titui
nazionâi rivâts dai nestris atletis: Ezio Della Savia (8 voltis), Romana Calligaris (8
voltis), Francesca Salvalajo (1 volte, plui doi titui tai Zûcs dal Mediterani) e, soredut,
Barbara Scaini (4 voltis e 20 presincis te rapresentastive nazionâl. Po o verin ancje
Giovanni Franceschi (1 titul talian), Stefano Segato (plui voltis campion talian) e,
cuntun titul parom, Marco Valenti, Giovanni Fonda e Raffaele Riem. Par ultimis,
Jessica Andreini e à cjapât il titul talian tai 200 pavee; Cesare Sciocchetti al è il
supercampion zovanîl tai mondiâi di Buenos Aires cun 4 titui (tai 200 e 400 stîl libar
e ta lis stafetis 4x100 e 4x200 insiemit cun Giorgetti, Pelizzon e Barbacini dal 2008.
Tal 2009 e je campionesse taliane tai 200 e tai 400 Alice Mizzau di Bean di Codroip.
Ta la nadazion cu lis pinis o verin Aldo Boccaccini che al fo campion europeo dal
1980 e campion talian 25 voltis cun 32 primâts nazionâi.
Invecit, te nadazion sincronizade, Udin e fo tierce, dopo Rome e Torin, a praticâ
chest sport dulà che lis nadadoris furlanis a verin risultâts plui che bogns.
BALE TE BASE – BASEBALL
Chest sport al ve origjin tal Nordameriche tai agns Trente dal XIX secul tant che
evoluzion di doi zûcs inglês, il rounders e il cricket. Dal 1846 si fasè la prime partide
uficiâl, daûr da lis regulis metudis jù di Alexander Cartwright l’an prime. In Friûl
chest sport al rivà tart, dome te metât dai agns Sessante. Chel ch’al fo un campion
grandissim al jere furlan, di Udin: Giulio Glorioso, dopo di vê zuiât par un pôc tai
Stâts Unîts, in Italie al vincè 7 scudets, une Cope Campions e al fo ancje campion
d’Europe; al metè dongje 68 partidis cu la nazionâl. Tra i siei numars si à: 2884
strikeouts, 45 homeruns e un no-hit (lançadôr a no fâur becâ la bale par une partide ai
aversaris), il prin te storie de baseball taliane tal 1951.
ECUITAZION
Pont di partence pe ecuitazion al reste il De re equestri, l’innomenât tratât sui
fondamentâi e su la tignude dal cjaval di Senonfont dal IV p.d. Crist. Però, cu la
jentrade de siele e de stafe e tache te Ete di Mieç (secul XI) la cavalerie moderne e
une sorte di ativitât agonistiche tai palis, ta lis gjostris e v.i. La federazion taliane e
nassè de Scuele di Ecuitazion di Venerìe Reâl a Torin dal 1823 e si perfezionà po te
Scuele romane di Tor di Quinto. Grant lustri a puartarin al Friûl in cheste dissipline
sportive Fabio Mangilli di Talmassons cun doi titui talians; Paolo Spezzotti cun
setante vitoriis, dal 1949 al 1956, al risultà prin tra i gentlemen. Alessandro
Argenton di Cividât al vincè la medae d’aur ta lis Olimpiadis dal 1964, il titul
europeo dal 1960 e il titul talian tal 1967 e 1972; te sô cariere, al vincè 300 garis di
percors complet.
MOTÔRS
Lis primis garis di moto si faserin in France e Inghiltere ae fin dal XIX secul. Te
Piçule Patrie nol fo facil parvie che vonde pôcs a podevin permetisi une moto. Cussì
dome tal 1923 si podè viodi une gare (di bicicletis cul motôr, però) di Plaçâl Cjavrîs a
Padiar di 60 km, cuant che a parteciparin 22 coridôrs e il vincidôr al fo Arturo Missio.
Tal speedway (corse su piste di cjarvon) a vincerin garis fûr e ator pe Europe Mario
Rupil e Renzo Travagini. Grant atrat pal public (ancje vincj mil spetadôrs) al ve
chest sport cuant si spostà tal stadi Moret; in chel periodi a rivarin il titul talian
Walter Fantuzzi, Ermanno Fedele e Gianni Pizzo, ducj di Udin e Plinio Medeot di
Gurize.
A nivel mondiâl a otignirin grandis vitoriis doi atletis di divignince furlane:
Gianfranco Bonera di Porpêt (secont tal mondiâl dal 1974) e Johnny Cecotto,
venezuelan, ma di gjenitôrs di Buje.
Tal motocross-enduro, o vin vût il pluricampion Edi Orioli di Sarsêt di Martignà. La
schirie dai siei sucès e je lungjonone: al à tacât a 17 agns cul prin titul talian e al è lât
indevant cun altris titui nazionâi in classis diferentis, cul titul mondiâl dal 1981 e cun
chel a scuadris dal 1986 fintremai a lis vitoriis tai mitics rally dai Faraons e te
supermitiche Paris-Dakar!
AUTOMOBILISIM
De prime gare di machinis si ve notizie il 22 di Lui dal 1894: te Paris-Rouen a
parteciparin 17 coridôrs e al vincè il marchês de Drion cuntune medie di 19 km a
l’ore. Dîs agns plui tart però, za la medie e fo di 105 km l’ore. Pal automobilism
furlan si verin bogns risultâts dopo dai agns Setante cun Benito Cappellari (campion
trivenit – 1962, 1963), Paolo Cora (campion da la montagne dal 1972), Achille
Minen (su 150 corsis a’ndi vincè 90!), Domenico Romanello (campion talian Abarth
dal 1965), Claudio De Eccher (campion talian rally), Mirko Peressutti (plui voltis
campion talian e europeo), Massimo De Antoni (campion talian Alpe Adria rally),
Luca Cappellari (plui voltis campion talian in diferentis categoriis), Pietro Corredig
(campion talian A112) e Gianni Marchiol, campion talian in classi diferentis dal
1978 al 1997.
In altris sports si faserin onôr Lucio Collovigh che al vincè une Cope dal Mont tal
Kickboxing e Fabio Beccaccini che al fo trê voltis campion talian juniores. Tal
bowling Elena Rigato dal 1984 e vincè intune maniere memorabil la Cope dal Mont;
po, e fo ancje 8 voltis in nazionâl e campionesse taliane par societâts dal 1991 e dal
1994. Coletta Marcuzzi in chest sport istès e fo campionesse europee.
BAL SPORTÎF
Al rapresente une trasposizion, pal plui in cubie, di dissipline artistiche in discipline
sportive, cun regulis, garis agonistichis propiis, sevi di nivel diletant che professionist.
I campions dal mont di bal standard (valzer inglês, tango, valzer vienês, slowfox,
foxtrot, quick step) tai ultins doi agns (2007 e 2008) a son stâts Paolo Bosco e Silvia
Pitton di Palaçûl. Di no crodi.
IL SPORT PAI DISFURTUNÂTS
Lis notis, lis plui bielis e lis plui significativis, a vegnin da l’ativitât sportive fate di
bande di personis, ancje zovinis, disfurtunadis. Nus dan la dimension plui alte dal
sport, viodût tant che confront, ma soredut viertidure, sperance e capacitât di fâ sintî
chescj disfurtuntâts compagns di chei altris “normâi”. Poben Pamela Pezzuto di
Brugnere, bessole o cun lis sôs compagnis, a àn vinçût medais d’aur e d’arint ta lis
Paralimpiadis cul ping pong a Pechin 2008; e à zontât po, no contente, altris titui
europeos. E ce dî de nadadore Elena D’Odorico, campionesse mondiâl pai cent
metris schene! Esemplis par ducj i zovins, di cetant che si po gjoldi te vite ancje cui
sacrificis in chês condizions cussì disvantazadis.
Insom de vore si à di spiegâ il criteri de selezion dai campions: si trate di sportîfs ch’a
àn rivât risultâts impuartants a nivel nazionâl e internazionâl e ancje a àn fat impresis
che a ur àn fat meretâ une innomine mondiâl. Si varà dismenteât cualchidun: al capite.
Al è impuartant che no sedi nuie ce dî su chei ch’a son menzionâts.
BIBLIOGRAFIE
Meroi R., Cento anni di sport a Udine, Franco Rosso, Udine 2002
Meroi R., Storia di Azzurri e Campioni del Friuli, PR Book, Udine 1997
Nazzi L. – Mc Furlan J., Di Carnera a Zoff, i campions dal Friûl, Clape Culturâl
Aquilee, Udin 1984
Mitri G., Dizionari dai Sports Olimpics, Chiandetti, Reana 1999
Mitri G., Il zûc dal balon, in Sot la Nape, LIV 2002 – 4, pp. 97-101
AA. VV., Il pallone d’oro, Perna Editore, Milano 1968
Brera G., Storia critica del calcio italiano, Bompiani, Milano 1975
Meroi R., 60 di basket a Udine, Ribis, Udine 1993
Glanville B., World footbll handbook, Mayflower-Dell, London 1966
Fugardi A., Storia delle Olimpiadi, Cappelli, Bologna 1972
Ferretti C. – Frasca A. (a cura di), La Garzantina dello Sport, Garzanti, Milano 2008
Pivato S., Come eravamo sportivi, Cooperativa Libraria Borgo Aquileia, Udine 1990

Documenti analoghi

In fieste pe Patrie dal Friûl

In fieste pe Patrie dal Friûl la sculture di cheste ete, in curt o viodìn ce che al sucedeve tal rest de Italie. Ancje te sculture si sint l’aiar dal rinovament che al puarte il gnûf lengaç artistic dal Rinassiment. Il gotic al...

Dettagli