Il roman da Camenisch è sco «About A Boy» Canzuns da Nadal en
Transcript
Il roman da Camenisch è sco «About A Boy» Canzuns da Nadal en
La Quotidiana 03-11-2004, p. 02 Las schanzas futuras pil svilup dalla politica d’energia en Surselva ■ L’uniun per la promoziun dall’energia indigena, zona surselva, ha organisau el meins d’october differentas occurrenzas sut il tema dall’energia. Suenter in referat d’introducziun da cusseglier naziunal Sep Cathomas ha il cusseglier guvernativ, Hansjörg Trachsel, presentau ils 22 d’october 2004 ella sala dalla casa Cumin a Glion la studia davart l’efficacitad dall’energia e l’energia regenerabla tenor ina studia da pilot en Surselva. Quella studia ei vegnida incaricada dalla Regiun Surselva e demuossa co la Regiun Surselva sa surprender ina funcziun da pilot sin palancau dalla politica d’energia. Sco basa per ina politica d’energia cuzzeivla ed a liunga vesta stat in concept extendiu a disposiziun. El center da gravitaziun stat la reducziun dall’energia fossila ed aschia ina producziun sminuida digl oxid carbonic. La studia risguarda in spazi da temps entochen 2030. Cun ina isolaziun vid stabiliments existents ed ina construcziun effizienta d’energia tier baghetgs novs ei in grond potential dalla sminuaziun dall’energia avon maun en Surselva. Da sminuir la producziun digl oxid carbonic ei da contonscher cun far dapli diever d’indrezs d’energia regenerabla, sco per exempel da pumpas da calira ni collecturs da sulegl. Tier l’utilisaziun d’energia ord lenna en fuorma da stialas ni pellets duei vegnir risguardau la lenna indigena, quei sa medemamein muntar in progress per l’economia regiunala digl uaul. Per contonscher in svilup cuzzeivel dall’energia en la Regiun Surselva fa ei da basegnas da strategias adattadas. Ils regls finanzials sco era cumpleina informaziun per la populaziun ein da gronda muntada per la transposiziun da talas strategias. Per contonscher la finamira dalla studia e per sminuir la producziun digl oxid carbonic pretenda ei tut las forzas regiunalas e politicas. Sco ina dallas empremas mesiras dil concept da svilup II ei previu in liug da contact per la promoziun dall’economia entras la Corporaziun da vischnauncas Surselva (niev Regiun Surselva). Tenor las explicaziuns da Cathomas ein las vischnauncas envidadas da prender posiziun en quella caussa. Ins spetga cun marveglias sin las reacziuns. Conrad Cavigilli, Castrisch Parter – tgei munta quei ozildi? ■ (cp) La Gruppa «In mund» sepresenta era uonn alla fiera da s. Martin, che ha liug ils 8 da november a Mustér. Sco gia egl onn vargau sustenin nus era quella gada ina scola a Manila che vegn menada dallas «Franciscan Sisters of the Lord». La gronda part da quels scolars viva en slums e sa buc ir a scola senza agid finanzial dad ordeifer. Sco gia els onns vargai purschin nus a Vus denter auter cartas da Nadal, pommes frites e bubrondas cauldas. Sco novitad anfleis Vus tier nus schinumnai «creflis d’energia» tenor il recept dalla s. Hildegard. Quels ein medischina encunter stauncladad en scola, tristezia, nervusadad e sperdita da vesida ed udida. Naturalmein ein els era da guder mo aschia! Buca d’emblidar ei nossa rimnada dad egliers ed uras veglias. Mirei sperasvi e mei cun bien exempel ordavon cun mussar che parter ei era ozildi actual. La gruppa «In mund» engrazia e selegra da seveser cun Vus. Il roman da Camenisch è sco «About A Boy» In nov cudesch rumantsch per la giuventetgna è cumparì – ina raritad ■ (anr/vi) Il nov «Tschespet» è sin maisa. L’autur Silvio Camenisch ha scrit in roman per la giuventetgna rumantscha. Ses raquint «Hendri e ses babs» regorda al cudesch e film «About A Boy» da Nick Hornby. Exact sco il giuven en il roman da Hornby viva era Hendri, la persuna principala da Camenisch, en ina famiglia maschadada. Vul dir: Ils geniturs da Hendri èn spartids. La mamma ha in auter um, e perquai ha Hendri dus babs. El numna ils babs adina cun il prenum: «Igl ei pli sempel da gir ils nums sch’ins ha dus babs. Ei dat meins confusiuns ni malcapientschas.» Sco tar Hornby han ins era tar Camenisch il sentiment che ses protagonist, che sa chatta en la pubertad, n’agescha betg sez. Las chaussas chapitan simplamain cun il giuvenot. Schizunt cura ch’el engola ina nota da tschient or da la bursa da ses segund bab, na pon ins sco lectur dar nagina culpa al giuven. Igl è, sco sche Hendri vegniss manà d’in maun nunvesaivel, e sco sch’el na faschess la tuppadad betg da libra voluntad. Ils medems problems a Londra sco a Domat Il roman da Hornby è situà a Londra. Il raquint da Camenisch gioga en ina vischnanca pli gronda, forsa a Domat. Ils problems da Hendri èn perquai tuttina ils medems sco quels dal protagonist da Hornby. il custaivel auto dal bab en ina cava da gera, daventa la tensiun nunsupportabla. Sco lectur spetgan ins trasora il sfratg. En questas passaschas è Camenisch era linguisticamain persvadent. Hendri vegn mudregià, pitgà e stuschà a chantun. Cunzunt Samuel tgietschen, il figl dal directur da televisiun, sa lubescha gieus perfids cun Hendri. Samuel ha tut: ina amia, il trotinet il pli modern, condoms en la maisa da notg e pli tard anc in hazer moped frisà. Hendri perencunter ha be ureglias sco portas d’ina remisa e quaidas da Giuanna. El ha era in grond giavisch: Che ses dus babs e sia mamma sa cumportassan meglier. Malsegirtad en la pubertad En il raquint sentan ins bain la malsegirtad da Hendri. Sco lectur speran ins che sia situaziun sa migliuria. Questa speranza dat tensiun. Schizunt l’operaziun d’ureglias che Hendri lascha far – perquai che ses geniturs han insistì – è spannegianta. Suenter l’operaziun vegn Hendri nanavant en il spital ed il giuven ch’è cun el en chombra di: «Aha, in’operaziun plastica… Speronza han els buca fatg mender. Miu camerat veva ureglias sco carlognas. Mo suenter ch’el ha schau far enzatgei vidlunder, eran ellas aunc pli horriblas, getg sinceramein.» Encunter la fin dal roman vegni plaunet meglier per Hendri: Giuanna daventa sia amia ed il garmadi Samuel tgietschen è suenter in accident bler pli hofli. Ma l’aura na resta betg ditg uschè buna: Tuttenina survegn la mamma da Hendri anc cancer, e ses emprim bab ha ina nova amia. Linus Flepp ha fatg las illustraziuns en il MAD Tschespet 69. Scenas persvadentas Camenisch lavura ora a moda fitg sensibla ses protagonist. Surprendent è, quant bain ch’el lascha observar Hendri las relaziuns tranter ils dus babs e la mamma. Hendri senta las pli finas midadas da temperaturas tranter ils creschids. L’optica resta dentant adina quella dal giuven. L’autur è consequent e na sforza mai si a Hendri ina optica da creschids. Quai persvada. Fermas èn las scenas cun Hendri e Samuel. Cura ch’els fan motocross cun Far pisch en il cup Ina giada u l’autra gioga Camenisch era cun perversitads. El lascha esser ses Hendri in tip voyeuristic cun mirveglias disgustusas. L’amia Giuanna raquinta p. ex.: Sia sora haja ina giada tezzà ses pitschen chaun cura ch’ella aveva bler memia bler latg en ils sains, ed ils sains faschevan snuaivel mal. Hendri avess mustgas da vesair co in chaun baiva latg d’in sain. En in auter lieu sa dumonda Hendri co ch’il sain operà da sia mamma vesia ora. Tar questas pitschnas scenas ballucca il raquint. Ins sa dumonda: Pensa in giuven en la pubertad propi uschia? Pli credibel èn las reminiscenzas cun il «far pisch en il cup tar il medi». Ellas cumparan en pliras variantas en il decurs dal raquint. Ils patratgs che Hendri ha en quest connex – sa co las dunnas fan pisch en il cup? etc. – laschan sentir, quant navidas ch’il giuven ha questa procedura penibla. Ma la mirveglia confusa na lascha tuttina mai luc. Silvio Camenisch: «Hendri e ses babs», roman da giuventetgna. Tschespet 69. Ediziun da la Romania. Illustraziuns da Linus Flepp. 177 paginas. 25 francs. Cuira 2004. ISBN 3-03900-903-6. Canzuns da Nadal en tschun lungatgs La fin da november ha liug a Mustér igl emprem concert da Nadal dils Furbaz DA HANS HUONDER / ANR ■ Las davosas preparativas per la turnea dils Furbaz marschan. Ils 28 da november 2004 partan els a Mustér a lur seria da concerts d’advent el Grischun ed ella Svizra centrala. Marie Louise Werth, Ursin Defuns, Gioni Defuns e Giusep Quinter contan 22 canzuns dil temps da Nadal en tschun lungatgs. Paucs meins avon che la gruppa Furbaz sesligi igl onn 1990, haveva ella ediu il disc cumpact intitulaus «Nadal». Ils tocs sin quella han ils quater Sursilvans cantau aposta per las registraziuns. En in concert public ein quellas canzuns mai stadas d’udir dils Furbaz. Quei duei ussa semidar. Ils dudisch tocs da quei disc e diesch arranschaments novs fuorman il program dalla turnea d’advent d’uonn. La prevendita per ils siat concerts ha entschiet. En siat loghens La turnea dalla gruppa Furbaz entscheiva a Mustér. Silsuenter ein ils Sursilvans cun Marie Louise Werth al clavazin d’udir a Glion, Cuera, Cham, Stans, Sarnen e per conclusiun a Puntraschigna. Sco quei che Ursin Defuns di, ha l’elecziun da quels loghens da concert in motiv particular: «Nus lein sepresentar uonn leu nua che nus havein nossas ragischs, pia el Grischun ed ella Svizra centrala.» En in concert che cuoza mintgamai duas uras ein 22 tocs da Nadal en romontsch, engles, tudestg, talian e franzos d’udir. Ultra dils dudisch tocs ch’il disc cumpact cuntegn ha il cumponist e dirigent Peter Jacques procurau per diesch ulteriurs arranschaments. D’udir ein denter auter ils tocs «Happy Christmas» da John Lennon, «Mary’s Boy Child» da Boney M. sco era «Child in a Manger» da Bob Dylan e «Blue Christmas» da Céline Dion. Cumpletada vegn quella purschida pil temps da Nadal dils dus hits da pli baul dils Furbaz «Da cumpignia» e «Viver senza tei». La gruppa vegn accumpignada dils musicists Heinz Affolter (virtuos ghitarist), Thomas Custer (contrabass e mandolina), Charlie Weibel (percussiunist da professiun) e Peter Jacques (syntesizer). Cun la turnea da Nadal vulan la musicista ed ils treis musicists plidentar in e scadin, surtut denton il segment dallas persunas sur 30 onns. «Denter quels ein biars enconuschents ed amitgs da pli baul. Nus lein schar reviver empauet ils sentiments d’avon 15 onns», di Ursin Defuns che selegra da saver sepresentar. Saver cantar e far musica ensemen cun ils camerats dalla gruppa stetti el center da quei project. Biars resuns Parallelmein sper ils exercezis da cant e la collaboraziun cun la band han ils quater Furbaz era giu da sefatschentar quest atun cun bia lavur organisatoria. «Essend che nus organisein uonn sezs la gronda La gruppa Furbaz cun Ursin Defuns, Giusep Quinter, Gioni Defuns e Marie Louise Werth (da sen.) dat siat concerts da Nadal el Grischun ed ella Svizra centrala. FOTO L. DEGONDA part dils siat concerts, ha ei num da s’engaschar intensivamein», puntuescha Ursin Defuns. Aschia tucca ei denter auter da sefatschentar da reclama e marketing. Pli u meins sco preludi alla turnea sepresenta la gruppa la dumengia dils 21 da november 2004 alla Televisiun svizra DRS. «Nus essan vegni envidai en da Paola e Kurt Felix da cantar il toc dil ‘Pign schumbrader’ en quella emissiun davart il cancer,» di il scolast da musica dil gimnasi claustral a Mustér. Igl interess dalla televisiun ei buca staus il sulet dils mieds da massa suenter l’annunzia dall’Agentura da novitads rumantscha da questa primavera, ch’ils Furbaz retuornien sin tribuna: «Nus havein giu biars buns resuns dalla televisiun, da radios, sco era da biaras gasettas ed illustradas.» Igl avrel havevan ils Furbaz numnadamein annunziau lur comeback e quei – tenor Ursin Defuns – suenter madira ponderaziun: «Nus havein tuts nossas obligaziuns professiunalas e familiaras che ston vegnir ademplidas.» La truscha dil mintgadi ei lu era il motiv principal che la gruppa vul concentrar las forzas ils onns vegnents mintgamai sin ina turnea da Nadal: «Quei ei nossa filosofia. Per dapli tonscha ei semplamein buca.» L’idea dil comeback ei naschida avon dus onns a Breil. Leu eran ils quater Furbaz vegni envidai ad ina emissiun dalla Televisiun svizra DRS cun Mariano Tschuor. «Avon in onn havein nus lu concretisau ils plans ed era reediu il disc cumpact ‘Nadal’ ch’era exaurius dapi tschun onns», di Ursin Defuns. Ils concerts da Nadal dalla gruppa Furbaz han liug suandontamein: 28 da november en baselgia parochiala a Mustér; 5 da december en baselgia claustrala a Glion; 11 da december ella baselgia dalla S. Crusch a Cuera; 12 da december ella sala Lorenz a Cham; 17 da december ella baselgia parochiala a Stans; 23 da december ella baselgia parochiala a Sarnen; 25 da december el Rondo a Puntraschigna. Reservaziuns san vegnir fatgas tier las uniuns da cura e traffic dils loghens. Informaziuns retscheivan ins era sin la pagina d’internet www.furbaz.ch.