Dai fats e de culture des tieris Ladins

Anade ( XIII ) n.6 Jugn 2010
LADINS
dal FRIÛL
________________________________________________________________________________
Periodic-mensîl di informazion e culture sul cont de minorance celtiche
dai Ladins de Furlanie. Edizion par cure de associazion "CjargneCulture"
Chest gjornâl inte sô version on-line al ven fûr sul sît: www.ladinsdalfriul.eu
I trente agns di Radio Onde Furlane
Sodisfazions e problemis dal fâ informazion intune lenghe di minorance
Radio Onde Furlane e à trente agns, e je une fantate juste apont vivarose e cetant ferbint. Si fâs
par mût di dî naturalmentri, parcè che trente agns di vite par une radio a son dabon tancj. E inmò, se
cheste radio al è un imprest di informazion di une lenghe di minorance, la maravee par une vite cussì
lungje e je une vore plui grande. Cuant che tal 1980 Onde Furlane e je nassude, graziis a un piçul
grup di furlaniscj, idealiscj, si impensin par esempli di Sergio Venuti, di Silvano Paian, di Luzie
Sasso, di Federico dai Ros (che al sarà il prin diretôr e po par tancj agns pont di riferiment di cheste
straordenarie iniziative), no ducj a jerin cussients dulà che si sarès lâts a finîle, ma istès persuadûts
che la comunicazion, o miei la informazion, in lenghe furlane e jere une strade gnove, di bati, parcè
che il mont al stave cambiant di corse, e di corse al jere daûr a cambiâ ancje il mût di fâ informazion.
Si ricuardin de viere sede, intun piçul apartament di un condomini che al cjalave sul plaçâl Cella,
po la sielte induvinade di vê une sede propie, progjet che si realizarà cuant che al vignarà comprât
l’apartament di Strade Volturno, dulà che e je inmò vuê logade la radio. Tancj a son i personaçs che
a àn colaborât e fat vivi cheste radio, tancj chei che a àn fate sintî la lôr vôs a traviers chescj
microfons. Ducj i personaçs di rilêf de culture, de politiche e dal sport dal Friûl. Cetancj dibatiments
e cetantis taulis tarondis no sono stadis fatis, sul cont dai problemis de lenghe e de culture furlanis,
de tutele dal ambient, de integrazion cun chês altris minorancis presints in Friûl, ancje lis gnovis
puartadis chenti de imigrazion, e sui fats de economie e de identitât di cheste nestre amade tiere
furlane. Cence dismenteâ il grant contribût dât al recupar e ae valorizazion de musiche furlane, chê
viere tradizionâl ma ancje e soredut chê gnove, massime cu la istituzion dal Premi Friûl.
In sumis un lavoron grant, ma tant fadiôs, parcè che cui che nol cjante intune cu la corâl de “vôs
dal paron”, di contribûts e di sostegns economics indi cjape pôcs, e la publicitât pes piçulis emitents
locâls nol è che e buti cui sa cetant. Ma lôr, chei di Radio Onde Furlane a son lâts dilunc a tignî dûr, a
un ciert pont a àn vût cûr meti sù ancje la Cooperative Furlane di Informazion, ancje cul fin di rindi
istituzionâl il lôr progjet. E inalore no si rive nancje a tignî il cont des tantis iniziativis pensadis,
realizadis, puartadis indenant cun simpri maiôr professionalitât. Par esempli, il radio gjornâl di Onde
Furlane al ven realizât cuntune professionalitât che no je nancje di meti cun chê di Rai-Triest, che e à
disposizion mieç, bêçs e ce. Cussì, cuant che o sintin che chei di Rai-Triest a pratindin une fulugne
di euros par fâ lis lôr “sbitiadis” par furlan, nus ven sù ancje la fote. Ju dessino, chei bêçs, a Onde
Furlane vadì!
A chest pont scomencin a ricuardâ i protagoniscj di vuê de “Radio Libare dai Furlans”: il diretôr di
cumò, Maur Missane, brâf, professionâl e ancje simpatic e di companie. Pauli Cjatarut, president de
Cooperative Furlane di Informazion, za diretôr, dal sigûr la memorie storiche dal grup. Carli Pup de
redazion gjornalistiche, une vore espert e informât sul cont dai problemis des minorancis, oltri che
puarte vôs dal “Comitât 482 dal Friûl”. E inmò tancj altris zovins che a colaborin in maniere ative e
passionade cu la radio che, tra l’altri, e sta sperimentant un gnûf lengaç radiofonic, dant spazi a
radiodramis che a metin a messet suns, rumôrs, peraulis e storiis intune sorte di psicadelie
radiofoniche: un destruturâ i mieçs di comunicazion par scoltâju e rindiju vîfs come se la lenghe e
podès vignî modelade cemût che i pâr miôr a cui che la dopre. In sumis, Radio Onde Furlane e sta
dant un prudêl gnûf al furlan.
Inalore no podìn fâ di mancul di augurâ a Radio Onde Furlane almancul inmò altris trente agns di
vite, ancje se si rindin cont che i timps a son daûr a fasi dûrs pe libare informazion, parcè che
proviodiments come chei cjapât di resint dal consei dai ministris di Rome (viôt il nestri servizi a
pagjine 4) a semei fats di pueste par meti il bavai aes vôs indipendents, e a chês des minorancis, cun
buine pâs des leçs di tutele, che verementri a son daûr a sei tibiadis cence remission. Ma nô o tignìn
dûr istès, e fin che la Radio Libare dai Furlans e vîf, o podin sei sigûrs che e vîf ancje la lenghe
furlane. Auguris di cûr fantats! (tarvos)
Ladins dal Friûl pag.2 - Jugn 2010
www.ladinsdalfriul.eu
DAL TIMÂF A LA LIVENCE
Lavôr: 400 domandis par 40 puescj
Al è stât screât ai 24 di Avrîl stât, inte aree industriâl de Ausse-Cuar, il gnûf stabiliment pe
produzion di vueli (“Oleificio San Giorgio”), il prin inte regjon, che al viôt impegnât il grup trevisan
Crich, che al fâs riferiment ae famee Rossetto, par un investiment di circje 80 milions di euros.
L’implant, che al darà lavôr a 40 dipendent, a front di plui di 400 domandis di cjolte sù a vore, si
slargje su 35 mil metris cuadrâts cuvierts cun altris 170 mil a disposizion par un eventuâl svilup in a
vignî, al è logât dongje dal pontîl pai barcjons Pittini. Chest al permetarà di gjestî la logjistiche in
maniere convenient e adeguade ae cressint velocitât domandade dai marcjâts pe movimentazion dai
prodots. Naturalmentri la fabriche si zovarà purpûr dal dopli racuardi di ferade in propietât.
Par cheste prime fase di inviament la aziende e à za cjolt a vore 24 lavoradôrs, selezionâts tra chei
in casse integrazion o in mobilitât des aziendis in crisi dal teritori. Une seconde fase di cjolte sù a
vore e je impen proviodude tal 2011. In chê volte si lavorarà a cicli continui: trê turnis par 365 dîs ad
an.
L’implant al produsarà vueli cun tratament di rafinazion al complet, e al podarà sei colegât cun
altris implants pe produzion di vuelis alimentârs e industriâls, produzions di biodisel, rafinazion des
glicerinis, produzions di materiis plastichis, e inmò produzion di mangjaduris e farinis di soie e
derivâts pe alimentazion umane. Al varà une capacitât di lavorazion di mil toneladis in dì di soie e 500
di zirasol, colze o mais, che, pe plui part a rivaran vie mâr dai Paîs dal Est. La produzion in dì di vueli
e sarà pari a circje 200 toneladis.
In sumis une biele novitât in timps come chescj dulà che a son plui lis fabrichis che a sierin se no
chês che a vierzin. Come che, par esempli, al è daûr a sucedi a Remanzâs, dulà che il mês di Lui cu
ven e sierarà la Nicotra Spa, une fabriche che e prodûs ventiladôrs e che e da lavôr a 58 dipendents.
A comunicâlu ai lavoradôrs a son stâts i sindacâts, displeant che la propietât e à decidût di sierâ dal
dut la fabriche di Remanzâs e di trasferî la produzion a Bergum, dulà che la aziende e à ancje la sô
sede legâl. A vignaran metûts in vore sostegns sociâi, tra casse integrazion e mobilitât, da 3 a 5 agns
a seconde des sengulis posizions. Il probleme dut câs al è che plui de mitât dai dipendents e à
mancul di 30 agns.
La situazion ocupazionâl darest e preocupe ancje inte zone disore Udin, tra Tarcint e San Denêl,
dulà che, secont il sindacât a saressin a riscjio scuasit 200 puescj di lavôr, soredut intes aziendis
metalmecanichis. Intant a son bielzà 100 chei pierdûts intai ultins mês. Lis proceduris di mobilitât
inviadis de Siat Spa di Glemone e de Dm Elektron di Buie, 75 inte prime e 45 inte seconde lis
personis interessadis, a rapresentin, in fats, des pesantis ipotechis su la ocupazion, cussì come la
prossime sierade dal stabiliment de Leander Pumps di Trasâgs. In cheste ultime aziende la casse
integrazion e sarà dome une sclagne consolazion ae pierdite finâl dal lavôr pai 67 dipendents.
A son invezit za stâts pierdûts i puescj di lavôr de De Simon di Osôf, dulà che inte costruzion di
autobus a lavoravin circje 80 personis, e chei de Reda di Dartigne che indi ocupave 40. Vadì che pal
segretari regjonâl de Fiom Cgil, Zuanpauli Roccasalva: “la crisi no je par nuie passade, co si è daûr
cumò a vivi il moment plui dûr par vie che si sta esaurint il prin cicli dai sostegns sociâi. A chest
pont a scugnin, par fuarce, intervignî sevi la Regjon che il Stât, che no puedin plui rimandâ un seri
intervent sul front dai sostegns aes impresis. Dome cussì - al zonte in fin - si podarà jessi de crisi e
tornâ a dâ un lavôr a cui che no lu à plui”.
Dutis chestis dificoltâts darest lis cjatìn testemoneadis ancje tal andament dai interscambis
comerciâi. A dî la veretât alc, in chescj prins mês dal 2010, al à scomençât a movisi, ma il recupar al
è debul e al sarà lunc, massime se no si met man al sisteme produtîf furlan. “Un sisteme produtîf
masse sminuçât e che, cun chestis dimensions, al fadie cetant a rezi lis dinamichis che i marcjât
ogni dì a imponin - al à vût mût di sotliniâ di resint il president de Casse di Sparagn, Josef Morandini
-. Bisugne, vadì, procedi daurman su la strade des agregazions par cjapâ fuarce”. E di fuarce indi
coventarà cetante par invertî i dâts dal import-export. Tant par dâ une idee in provincie di Udin, fra il
2008 e 2009, il segn mancul des impuartazions al stât di 2 miliarts (- 40,12%), e chel des
espuartazions di 4,3 miliart (-25,14). Numars dabon che a fasin fastiliâ.
Fra tancj scûrs provìn a contâ ancje di cualchi salustri. Daspò un 2009 di grande preocupazion pai
174 lavoradôrs de storiche Weissenfels Spa, la ativitât lavorative e je tornade a partî tal mês di Zenâr
stât e cumò la produzion di cjadenis tecnichis e je rivade a 17 toneladis in dì. In chest moments intai
capanons di Fusinis di Tarvis (4500 metri cuadrats) a son a vore 85 personis fra operaris (70) e
impiegâts (15).
La gnove societât, la Weissenfels Tech - Chain, rezude dai imprenditôrs Collino e Cantarutti, e à
inviât la sfide pal rilanç dal vieri marc Weissenfels e, un pôc a la volte, e sta recuperant impuartantis
cuotis di marcjât. Cemût che si à vût iniment denant trat, i adets di cumò a garantissin une produzion
di 17 toneladis in dì, cu la smire di rivâ dentri la fin l’an a 30 toneladis e incressi cussì il faturât da 600
euros a un milion di euros al mês. E, naturalmentri, cu la pussibilitât di aumentâ i puescj di lavôr a
120 dentri cualchi mês. (renzo balzan)
Ladins dal Friûl pag.3 - Jugn 2010
www.ladinsdalfriul.eu
CRONICHIS DI CHENTI
Eletrodots: Terna e Tondo a àn gjavade la mascare
Puçui - L’eletrodot di 380 kv di colegament tra Udin-Ovest e Redipulie al à di jessi fat par aiar, o sei
su lis entimis. Cun dutis lis pressions rivadis di plui parts pe sielte di fâ l’eletrodot sot tiere, Terna
(Enel) no à intindût, gran, di cambiâ opinion e progjets, e lu à inmò confermât cumò di resint,
sostignint che “une linie in cabli sot tiere no podarès furnî sigurece e stabilitât al aes dibisugnis di
energjie eletriche dal Friûl”.
Terna e à ancje sclarît che la ret eletriche a alte tension de nestre regjon no je plui bastant a
garantî sigurece e continuitât di alimentazion al slargjat teritori furlan. Vadì che il gnûf eletrodot al
varès la funzion di infuartî la rêt eletriche furlane, garantint la continuitât di alimentazion ancje tal câs
che si vessin dai vuascj su chei altris eletrodots. Propite par chest, secont la societât “la realizazion
di un eletrodot sot tiere no rispuindarès aes dibisugnis par vie che i cablis sot tiere, in câs di vuascj,
a domandin timps di intervent e di riparazion cetant plui luncs, cun dutis lis conseguencis che chest
al compuartarès pes utencis”.
Dut câs la posizion di Terna e je stade criticade cun durece de segretarie regjonâl dal Partît
Democratic, Debora Serracchiani, pe cuâl sul eletrodot Udin-Redipulie: “Terna e vûl imponi lis sôs
sieltis cence lassâ spazi a nissun confront“. L’anunzii che l’eletrodot al vignarà realizât su lis
entimis, inmò pe Serracchiani “Al è contrari a cualsisei concet di riduzion dal impat ambientâl,
umiliant cussì i Comuns e i citadins interessâts”. La europarlamentâr no à pierdût la ocasion par
atacâ la zonte regjonâl sostignint che “Tondo al veve sigurât che la posizion de zonte e jere, in vie
prioritarie, pe soluzion dal cabli sot tiere, e par chest cont e veve invidât la societât a discuti lis
soluzions progjetuâls plui adatis par chest cont. Se cheste e je la rispueste - e à zontât la
Serracchiani -, inmò une volte si palese la pocjece de zonte come cuintri part istituzionâl. O vorès
ancje domandâ - e je rivade insom la segretarie dal Pd - ai maiorents de Leghe se al è in cheste
maniere che si è parons a cjase nestre, o pûr se di front a cierts interès i partidants di Bossi si
dismentein di alçâ la vôs e di fâsi valê”.
Cundut achel la rispueste plui dure ae cjapade di posizion di Terna e je rivade de bande dal vivarôs
e ferbint “Comitât pe vite dal Friûl rurâl”. “Une posizion fûr dal vade”, al è stât definît dal referent dal
Comitât, Aldevis Tibaldi, il proclame cul cuâl Terna e torne a confermâ il no ae soluzion sot tiere:
“Cun chest at - al sotlinie - si sfrancje dai siei dovês istituzionâi di societât di servizi ae coletivitât, co
no rapresente i interès de popolazion, ni e ten cont dai parês des aministrazions locâls. Terna e va
dilunc a spaurî ducj cu la liende dal black-out, come se la soluzion dal eletrodot sot tiere no podès
puartâ ai stes risultâts, cemût che darest al è dimostrât dulà che e je stade fate cheste sielte”. Inmò
secont il Comitât “cu la scuse dal eletrodot par aiar Terna e intint realizâ une linie comerciâl cetant
potent , di doprâ par traspuartâ energjie eletriche a traviers il Friûl e no pal Friûl, il dut par infuartî un
model monopolistic contrari al federalisim e estrani aes autoproduzions di energjie divignintti di
fonts che a tornin a rinovâsi. Une politiche “di fuarce”, contrarie ae compartecipazion des realtâts
imprenditoriâls e finanziariis di chenti, pronte a favorî gnûfs implants di produzion energjetiche inte
Basse e tal Friûl di Jevât, no ultime la simpri plui probabil realizazion di une centrâl nucleâr ret
Monfalcon”.
In sumis il contraditori si sta fasint simpri plui dûr, parcè che la int no intint molâ. Il probleme al è
che e je ore di finîle di considerâ il Friûl simpri e dome come tiere di servitûts: îr di servitûts militârs,
vuê di servitût viariis e energjetichis, doman di cui sa ce. Come che al sostegn il “Comitât pe vite
rurâl dal Friûl”, il ben plui preseôs de nestre tiere al è il paisaç rurâl e l’ambient, che nol po jessi
doprât, svendût e tibiât par fâ i interès e par ingrassâ il tacuin di grups monopolistics di inalgò. Se il
slogan “parons a cjase nestre” al à un sens, cui che al va ator a berlâlu intes placis che al scomenci
a mostrâ un pêl di coerence. (mateu di prun)
Provocazions Ogm tal Friûl di là de aghe
Pordenon - Provocazions Ogm tal Friûl di là de aghe. I “Agricoltori Federati” (500
associâts a Pordenon) tal mês di Avrîl stât a àn semenât dal mais (sorturc) Ogm intun lûc
tignût segret, dongje Pordenon. Dut chest al à inviade la reazion de bande des
associazions ambientalistis, che a viodin in chestis iniziativis une maniere par sfuarçâ lis
istituzions a liberalizâ cheste sorte di agriculture, che ribalte dal dut il mût di coltivâ
puartât indenant fint vuê. Si è darest convints che lis multinazionâls paronis dai brevets
su lis semencis, a vuelin cirî di rompi i slaifs che fint vuê lis àn blocadis pleant cussì al lôr
volê lis regulis des istituzions. Contrarie e je naturalmentri ancje la Coldirets dal Friûl, che
si è dite pronte fintremai a organizâ dai presidis sul teritori. Ma la robe che plui e fâs
fastiliâ a son lis conseguencis che a podaran vê chescj prodots su la salût dai citadins.
(mdp)
Ladins dal Friûl pag.4 - Jugn 2010
www.ladinsdalfriul.eu
DOCUMENTS
De Profundis pe stampe libare
Udin - Cuant che o sin lâts in Pueste-Ferovie a Udin a spedî l’ultin numar dal nestri
mensîl, il n.5 di Mai 2010, o vin vude la brute sorprese di viodisi a cuadruplicâ lis spesis di
spedizion di pont in blanc, cence che denant trat nissun nol ves comunicât nuie. Colpe di
un decret ministeriâl dai 30 di Març che al cancelave lis agjevolazions za concedudis ai
piçui gjornâi des associazions culturâls e di chês no profit, nus àn displeât i imbredeâts
impiegâts daûr dal sportel.
Nol covente dî che o sin restâts cence peraule, cence la fuarce di rivâ a protestâ. Al è
evident che o sin di front a un atac ae stampe libare che nol à precedents dai timps di
chei dal manarin in ca. Cun cheste mosse di fat a dispariran centenârs di piçulis, ma
vivarosis e libaris testadis, oltri che lis vôs, preseôsis e origjinâls, des minorancis. Ancje
la nestre redazion e je daûr a tamesâ la intrigose situazion che si è vignude a creâ. A ogni
bon cont, par rispiet dai nestris letôrs, ma soredut di cui che nus sosten, o tignarìn dûr
fint ae fin dal an, ma po e sarà dure. La tentazion di molâ dut e je grande. In chescj mês o
cirarìn di rifleti cun calme sul cont des decisions che o larìn a cjapâ.
Intant us proponin, su chest cont, un articul dal diretôr de Vite Catoliche, Ezio
Gosgnach, vignût fûr sul setemanâl diocesan ai 10 di Avrîl stât. La traduzion par furlan le
à fate la nestre redazion. (rb)
Nol jere un pes di Avrîl, ma ben invezit un grant e brut scuâl che si mangje la piçule editorie e cun
jê une buine fete de libertât di stampe. Il decret ministeriâl che dal 1 di Avrîl al à aumentât dibot dal
121 par cent il cost di spedizion par pueste dai gjornâi, al rapresente une pesante copete pes testadis
locâls come la nestre, che a son in grande part - la Vite Catoliche par circje il 90 par cent - dâts fûr in
abonament individuâl o parochiâl. E se il guvier al à sielzût il moment miôr par dâ jù chest brut colp subite daûr des votazions no ’nd è plui il pericul di pierdi vôts - pai editôrs al è dabon chel piês, par
vie che al rive ae conclusion de campagne abonaments, cuant che i budget e i programs pal an intîr a
son bielzà fats.
Un pocjis di setemanis indaûr sul çoc e sot la manarie dal guvier e jere lade a finîle la emitence
radio-televisive locâl, che si è viodude gjavâ lis agjevolazions su la bolete eletriche, su lis spesis dal
telefon e sul abonament aes agjenziis stampe. Vadì che a paiâ pegn, naturalmentri, e je stade ancje
Radio Spazio 103. Cussì la nestre Arcidiocesi, inte sô vieste di editôr di un setemanâl e dal cjanâl
radiofonic, in chest 2010 e sarà obleade a frontâ un probleme economic di no pôc cont. No je in zûc
la sorevivence dai doi mieçs di comunicazion, ma al podarès vignî metût in forsit il livel di cualitât
che a son rivadis a cuistâ e che lis met tra lis miôr espressions mediatichis de Glesie a nivel talian.
E je vere che di dispès tancj citadins si interoghin sul sens dai contribûts a gjornâi, radios e
televisions. Ma la rispueste e je sempliç. La democrazie e domande la presince di une pluralitât di
media su dut il teritori. Par vie che cheste ultime condizion no po sei garantide des solis fuarcis di
marcjât - par colpe dai coscj cetant alts e partant de naturâl tindince ae concentrazion inte industrie
dai media e de no convenience de distribuzion in zonis particolârs il sostegn public ae
editorie al è fondamentâl e necessari par favorî
il pluralisim e la difusion de informazion.
Lis resintis decisions dal guvier, invezit, a van inte direzion contrarie. E e semee fintremai une
strategjie. Ancje parcè che i flums di bêçs dai contribuents, in tiermins di finanziaments direts e di
campagnis publicitariis, a continuin a jentrâ a pitinton intes cassis di grancj gjornâi, radios e
televisions che a fasin riferiment a grups finanziaris e a vêrs imperis economics che no varessin,
gran, bisugne di sostegn.
Di sigûr, la resinte sospension des agjevolazions sul ûs de pueste pe editorie e daneze soredut i
gjornâi diocesans. Lu sosten cun clarece, e ferbince, la letare che la Federazion taliane dai setemanâi
catolics (Fisc) e à mandât al sot-segretari ae Presidence dal Consei cun deleghe pe editorie, Paolo
Bonaiuti. “Si domandìn cemût che al sedi pussibil - si lei - un intervent improvîs di cheste sorte che
al podarès puartâ ae sierade di un numar elevât des nestris testadis catolichis diocesanis. Lu
considerìn un at une vore grâf e antidemocratic, parcè che al ven a colpî il pluralisim de
informazion”, e al rapresente ancje “une sorte di atac ae informazion de Glesie Catoliche”.
“No podìn crodi - e rive insom la letare de Fisc - che il guviers si fasi cjame de responsabilitât de
sierade di plusôrs testadis catolichis tal intîr Paîs, testadis che a metin adun une rêt informative
positive, complete e serie sul teritori (186 gjornâi par circje un milion di copiis) pal ben de societât
italiane. Al è fintremai masse evident che dopleâ lis spesis di pueste, di une zornade a chê altre,
subite daspò des votazions, al rapresente un at che nol po sei acetât”. Cetancj esponents politics de
maiorance e de oposizion si stan movint parcè che Palaç Chigi al fasi marce indaûr. A son in zûc, in
fats, il pluralisim e la difusion de informazion. In definitive, al è in zûc il procès democratic.
(ezio gosgnach)
Ladins dal Friûl pag.5 - Jugn 2010
www.ladinsdalfriul.eu
JOSEF MARCHET: LETARIS AI FURLANS
(XVIII) Letare a un artist
Siôr mestri, o soi sigûr di fâlu sgrisulâ cun cheste letare: o vuei scrivi une sfilze di enormitâts, di
eresiis, di robis cui piis in sù. O crôt di vê une idee di cemût che la pensais voaltris, creadôrs di
“bielece”, sul cont de vuestre art; e juste par chel mi è vignude sù cheste voiate di dî cuatri blestemis
che, in sostance, a son nome une lezionute di modestie.
Lui al va a cjace di un lengaç universâl, pûr, dispueât di ogni scusse di timp o di lûc: lui al intint di
lavorâ pe eternitât.
Che al si boni, mestri: l’univiers e la eternitât a àn pal cjâf altris rognis, e dai siei lavôrs ni che si
visin, ni che si visaran. Si visìn dome noaltris che, di chest lengaç, no rivìn adore di capî nuie. Parcè
che o sin ignorants o parcè che sot il so grant vosâ nol è juste nuie?
Lui al è stât a imparâ cheste… lenghe in France, in Italie, in Anglie o a cjadaldiaul, parcè che intai
siei lavôrs no si sint nissune lenghe umane; si sint un urlâ di infier, un sberghelâ di cjocs, un
sdramassâ di mats spacâts! Altri che bielece!
Che al provi mo a sierâ chês alis che a svoletin par dibant; che al provi a tornâ jù in tiere, su la sô
tiere furlane… Fer cu lis mans! no ai finît: che si fasi une animute picinine e che al torni a fevelâ par
furlan. O sarìn in pôcs a capîlu, ma miôr che no nissun. Che al impari a infotâsi de posterioritât e dai
critics: i grancj artiscj no àn mai bacilât ni daûr di chê ni daûr di chescj.
I grancj artiscj no àn mai vude pôre di
partignî a une “scuele” regjonâl: venite, toscane, romane, flamande, tirolese, osfordiane; e dut il
mont al à capît e al capìs il lôr… dialet!
I cosmopolitics, come Lui, cui ju capìs? Al è juste cualchi critic che al fâs fente di capî, par dâsi
une ande.
Che al feveli par furlan, siôr mestri: une “scuele” furlane no je inmò nassude: nassude, verementri,
e jere, ma si è lassade scjafoiâ inte scune dai talians. No saressie ore di fâle nassi e di fale cressi?
Une volte parom, no mo?
Lavorâ par furlan nol vûl dî, daûr il gno pinsîr, fâ dalminis o cjavedâi, nol vûl dî fâ pipins cul buinç
e i cjaldîrs o cu la cosse e il ristiel; nol vûl dî dasi al folclôr o aes ilustrazions, ni tornâ indaûr a cjapâ
sù la maniere dal Cinccent o dal Votcent.
Al vûl dî scoltâ la vôs plui intime di chest paîs, stonfâsi dal so spirt, messedâsi cu la sô int.
sglonfâsi i polmons cul so aiar, jemplâsi i vôi cu la sô lûs, il cûr cu la sô passion, lis orelis cul so
lengaç, la anime cu la sô serietât, cu la sô positivitât, cu la sô onestât, cu la sô misure; e daspò
metisi a lavorâ cun chê volontât, cun chê atenzion e cun chel scrupul che al à il nestri contadin o il
nestri artesan tal so lavôr.
A un artist, par solit, i covente un model. Lui al à sot dai vôi nome chest grant model: il Friûl e la sô
int: nol à la Estaque di Cézane ni la Polinesie di Gauguin. Che al lavori par furlan, mestri, che e je la
uniche strade par Lui, se al vûl rivâ a fâ alc di sancîr e di onest. Lu riverìs. (josef marchet)
Triest “caralcuore” e Friûl biadaç
La tesi dal divorzi tra Friûl e Triest no nas gran di un sintiment di aversion intai rivuarts di Triest.
Cui che al scrîf al à frecuentât chê citat, par studi e par lavôr, par passe un cuart di secul, vadì che
al crôt di cognossile benon, e par cierts aspiets la amire; e chest ultin, nus semee, al è ce che a
provin la maiorance dai furlans. Il probleme nol è di sintiments, ni di caratars plui o mancul
compatibii. Il probleme al è dome di conflit di interès. Cemût che si à bielzà sclarît, la balcanizazion
dal Friûl e je une necessitât politiche vitâl par Triest. La sconfite storiche-politiche dal Friûl no
diven di cualchi tristerie dai triestins, ma de bravece de lôr sorestanzie tal aprofitâ de pocjece de
sorestanzie politiche furlane. O ben, la bravece de prime e la pocjece de seconde no divegnin da
trats de personalitât o di “raze” ma da condizions ogjetivis, storichis-struturâls.
Triest e je une citât fisichementri e moralmentri compate (metin achì tra parentesi la component
slovene) e cuntune fuarte cussience unitarie dai propis interès: il Friûl al è une galassie di desenis
di “areis naturâls”, circje 200 comuns e mil cjampanii; ognidune di chestis realtâts e à i siei interès
particolârs. Ogni conseîr triestin al rapresente dute la citât. Ogni conseîr furlan al rispuint a une
zone, une val, un mandament. A Triest al baste pôc par mobilitâsi in maniere unitarie, cemût che si
à podût viodi cetantis voltis, tal ultin secul; a ’nd è un piçul numar di salis e salots, di cafè e di
lozis dulà che ducj che chei che a contin si cjatin continuementri. In Friûl si fâs une vore di fature,
ancje fisiche; cuant che la politiche inmò si la faseve muse-a-muse, bisugnave bati mil ostariis.
Triest e je stade, par un bon secul, une citât “caralcuore” di ducj i talians, e à intratignût fuarts
contats cul podê di Rome, e à ocupât un puest une vore in alt inte culture taliane dal Nûfcent. Il
Friûl al è stât a lunc une tiere di miserie, metude sui paradôrs, discognossude e biadace, e il so
puest inte culture nazionâl al è stât cence altri une vore plui sclagn.
(Raimont di Strassolt - da “Friuli la Soluzione Finale” - ed. Clape Culturâl Acuilee e Designgraf)
Ladins dal Friûl pag.6 - Jugn 2010
www.ladinsdalfriul.eu
DAI FATS E DE CULTURE
DES TIERIS LADINIS
Chel leam vieri tra Cjadovri e Friûl
Plêf di Cjadovri (Bl) - Ai 20 di Setembar dal passât 2009, la Societât Filologjiche e je lade a davuelzi il
so 86° congrès a Plêf, tal cûr dal Cjadovri. Come simpri par cheste ocasion al è stât publicât un penç
(635 pagjinis) numar unic, curât di Pier Carli Begot, par cont de Filologjiche, e di Ernesto Majoni
Coleto, par cont dal Istitût Ladin de la Dolomites di Borca/Borcia. Il titul, significatîf, dal volum al è
“Dolomites”.
Tal salût di jentrade il president de Filologjiche, Laurinç Pelizzo, al displee che cheste sielte di
davuelzi il congrès sociâl in Cjadovri e diven no dome di un spirt di curiositât e di amistât cu lis
comunitâts che a loghin tra chestis bielis monts, ma ancje cul sintiment di: “… jessi jenfri amîs e di
jessi a cjase, di vê cussience di fâ part de stesse famee, co lis ricercjis e i studis di Graziadiu Isaie
Ascoli nus sburtin a cirî rapuarts fuarts cu lis realtâts ladinis. Il Cjadovri e il Friûl a àn spartît secui di
storie, a àn leams di lenghe, di culture, di tradizions, di lavôr, di art, tal non di Aquilee e dal
Patriarcjât. Ma di cualchi timp o vin un altri motîf di rapuart fecont: al è il non Dolomitis - ‘Dolomitis
furlanis’ - che al designe il parc naturâl regjonâl che al cjape dentri monts e valadis jenfri Cjargne e
Friûl di bonât, juste daprûf dal Cjadovri: e ‘Dolomites’ al è il non che o vin sielzût par lassâ, tal titul
dal libri che come simpri al insiore i lavôr dal congrès, une memorie che e resti a ricuart di un
aveniment dabon impuartant”.
Cemût che si à vût sclarît denant trat il volum publicât al è cetant penç, co al cjape dentri une
lungje rieste di contribûts une vore cualificâts che a tratin di plusôrs argoments di comun interès tra
Friûl e Cjadovri. Impussibil cussì vêju iniment ducj, o vin sielzût cussì doi tra chei che nus è semeât
tra i plui interessantti. Il prin al è chel dal professôr Luigi Guglielmi che al à scrit sul cont dal “Ladino
del Cadore”. Al dîs in fats che: “Al è oportun un paragon dal ladin cjadovrin cu lis areis ladinis
daprûf: il furlan a Jevât (considerât ‘ladin orientâl’) e il ladin atesin a Bonât (clamât ‘ladin dolomitan’,
ma la definizion aromai e semee improprie, viodût che la plui part des Dolomitis e je logade in
provincie di Belun e soredut in Cjadovri; mi semee, se mai, che ‘ladin dolomitan’ al podarès sei miei
usât come sinonim di ‘ladin centrâl’, intindint cun chest la aree ladine logade tra il Friûl e il ‘ladin
ocidentâl’ o ‘romanç’ dai Grisons de Svuizare.
Ancje a Jevât dal Cjadovri la mont furlane e cjargnele e fo logade fint de antighitât: la presince di
popolazions celtichis, i Celtics-Cjargnei, e je ben documentade (dai gjai Cjargnei a fevelin i storics
romans Plinio e Livio) e Iulium Carnicum (vuê Zui, daprûf Tumieç), za municipi e po sede vescuvîl, al
fo pal Cjadovri il centri di riferiment politic e religjôs de ete romane e fintremai a dute la Ete di Mieç.
Un leam che, sul plan aministratîf, za fa doi mil agns si manifestave cun clarece: i tiermins di confin,
di ete romane, a son marcâts sul cret de mont Civetta, a doi mil metris di cuote, e a diferenziavin il
teritori dai ‘Belumats’ (BEL) di chel dai ‘Iuliensis’ (IUL), mostrant che i Cjadovrins a jerin Iuliensis, o
sei che a dipendevin dal municipi di Iulium, Zui”.
In conclusion, sul plan linguistic, al ven metût in rilêf il marcât procès di venetizazion che al à
interessât il lengaç ladin dal Cjadovri, tant di vei fat pierdi la plui part des sôs carateristichis
origjinariis. Un procès che dut câs al è risultât mancul evident inte regjon plui orientâl dal Cjadovri, o
sei tal Cumieli, che vuê al po sei considerât pardabon l’ultin, debul, anel di coniunzion tra la aree
linguistiche ladine-furlane e chê ladine-dolomitane. Ma a un ciert pont a valin plui lis considerazions
di caratar politic che chês ordin glotologjic. Il sium e la utopie de “Grande Patrie Ladine”, bramade
dal nestri Achil Telin e à simpri scugnût fâ i conts cun tananais di cheste sorte.
Il secont contribût che nus à incuriosît al è chel di Alessandro Norsa sul cont dai “Rituâi dai
moroseçs e i fûcs di San Zuan: continuitât e diferencis fra il teritori furlan e chel belumat intune
prospetive europeane”. In veretât oltri che di fûcs di San Zuan si fevele ancje de tradizion des cidulis,
presint ancje cheste in cierts lûcs dal Cjadovri. Conferme ancje cheste di une esistence di rituâi
propiziatoris, tal timp dai solstizis di Unvier e di Istât, di divignince celtiche comuns a dute la aree dal
arc alpin di soreli Jevât. In fats ju cjatìn dal Cragn, ae Carintie, de Cjargne al Cjadovri e fint tal Tirol.
Curiôs al è il fat che oltri che des popolazions ladinis, chestis tradizions e sedin stadis cuistadis
ancje des popolazions todescjis e slovenis. Darest lis regjons alpinis orientâls a son simpri stadis
interessadis dal incrosâsi di popolazions di etnie divierse, in chest contest la “prospetive
europeane” vude iniment tal titul si propon dabon induvinade.
O rivin insom a cheste nestre recension dal libri “Dolomites”, nomenant un pas de “Cuintristorie
dal Friûl” di Josef Marchet: “Cul 3 di Otubar di chel an malandret (1420), e colave la ultime resistence
patriarcjine a Plêf di Cjadovri e la indipendence dal Friûl e finive, daspò vot secui e mieç di vite (5781420)”. Onôr inalore a chei di Plêf e a ladins dal Cjadovri che a àn difindût fint tal ultin la bandiere e la
libertât de nestre Patrie (furlane). (edelweiß)
Ladins dal Friûl pag.7 - Jugn 2010
www.ladinsdalfriul.eu
TAI PRÂTS DE CULTURE FURLANE
Agnui: lis figuris dal invisibil
Une altre grande mostre di nivel european a Dieç di Tumieç
Dieç di Tumieç - Ai 24 di Avrîl stât, alì de Cjase des Esposizions di Dieç di Tumieç, e je stade screade
la mostre titulade “Agnui: lis figuris dal invisibil”, curade come simpri di pre Alessi Geretti e
organizade dal Comitât di San Florean, che al à tant che president bons. Agnul Zanello, arcidiacun
dal cjâf lûc de Cjargne.
Lis supierbis alis di arint, la tuniche ingrispade di blancjis pletis luminosis, la onde rose de vieste
che e cuvierç lis gjambis a pene distacadis, il vîs limpit e perfet dal Agnul cun Tobiolo, dal Savoldo
(1522-1524, Galarie Borghese), e je une des oparis che a vierzin la mostre. Une gnove emozionant
trate che si davuelç intai sflandôrs de art europeane organizade, cul rigôr critic di simpri, colegât a
une profonde clime spirituâl, dal za mutivat Comitât di San Florean. “La mostre - al sotlinie bons.
Agnul Zanello - e intint ricuardâ la impuartance di chestis creaturis fatis dome di spirt, o sei
invisibilis, delegadis a comunicâ il sflandôr divin aes creaturis umanis, disprivadis de pussibilitât di
un contat diret cun Diu”. Al displee a sô volte il curadôr de rassegne, pre Alessi Geretti, dotât di un
spessôr di storic de art, dut câs sostignût di une slargjade e fonde dutrine teologjiche, aromai
ricognossût e preseât a nivel internazionâl: “O vin volût svilupâ, a traviers setante oparis maestris,
lis figuris di agnui ricuardadis des Sacris Scrituris in plusôrs episodis de storie de salvece”.
Aduncje “Tobiolo e l’Agnul”: meditazion visionarie, rafinade tal sflandôr smaraveât e incjantât.
L’arcagnul Rafaêl, poiât sul tron di cret, al pant a Tobiolo lis istruzions par vuarî il pari che al jere
vuarp a traviers lis vissaris di un grant pes. Pre figurazion de salvece puartade ai oms di Crist. Il
puartament gaiart dal zovin, la lusinte cjavelade che i cole jù pes spalis, la tuniche blancje, il comès e
la vieste rosse corispuindintti aes dôs tonalitât de creature celest, e à un tai elegant e une pueste
incierte. Sul sfont scûr di boscs, a comparin trasparints profîi di monts. La imobilitât sospindude de
composizion si lee par cierts aspiets aes misteriosis aureis dal Giorgione e di Lorenzo Lotto. A jê a
varessin fat riferiment tal Votcent lis misteriosis figuris dai Preraffaelliti.
Tal prin scomençâ la part centrâl de mostre si imposte sui episodis dal Antîc Testament. A fasin di
cuintri cjant ae statiche bielece dal Savoldo il stravuelzint impit espressîf dal “Sacrifici di Isac”,
opare dal todesc Johann Lyss (1625-1626, Uffizi) e altris dôs sul stes sogjet: chê di Antonio Maria
Crespi (1628-16299, Milan) di atmosfere cuintri riformiste lombarde che si impon cun clârs e scûr in
maniere dibot dramatiche, e chê, plastichementri potent intai scurts e intes tensions, di Orazio
Gentileschi (1610-1612, Gjenue). Savoltant barochisim si displee inte traence di colôr, tal edonisim
des formis dilatadis, il “San Micjêl ai agnui ribei” de Scuele di Rubens (1622-1635, Madrid). In Mai po
a son rivadis purpûr dôs splendidis telis di Zuanbatiste Tiepolo, de veneziane Scuele Grande di San
Roc, datadis ai prins agns Trente dal Sietcent: “Agar tal desert” e “Abram visitât dai Agnui”: colôr
vivarôs, delicatece slargjade, crevulece e trasparence cence parêi.
Vadì che la mostre e propon une slargjade rieste di pituris, sculturis, ogjets realizâts dai oresins di
argoment neu testamentari. Danzis angjelichis si incrosin sui doi fonts aur di preseose scuisitece di
flabe, de seconde mitât dal Tresinte, divignintti dai Uffizi: la “Nativitât” di Simon dai Crocifìs e la
“Presentazion di Marie al Templi” di Niccolò di Buonaccorso. Zentîls tortuositâts gotichis al à il
“Tritic cu la Anunciazion e dôs santis” de Scuele di Colonie (1300 circje, Madrid). Tal tont di Scuele
dal Botticelli (1500 circje, Florence), ator ae dolce e maluseriose “Madone cul Bambin”, a vegnin jù
vongolant come ramis di salgârs niçulats tal timp de Vierte, straordenariis figuris di agnui. Inte
“Pietât” dal Veronese (1585-1588, Berlin) i doi agnui a àn figuris che a semei dibot veris.
Oltri a dut chest o podìn inmò amirâ oparis di Benedetto Antelani, Paolo Veneziano, Filippo Lippi,
Ghirlandato, Garofalo, Correggio, Durer, Lanfranco, Bernini, iconis russi, pituris e manufats de
Mitteleurope, flamants e francês. Scuasit insom de trate une salute di sculturis di len cuntune taule
dal Guarentino (1351-1354, Arezzo) e da une sintesi des jerarchiis angjelichis. Aes parêts
riproduzions dal Guariento che a dan la ilusion di une capele frescjade.
La mostre e restarà vierte fintremai ai 3 di Otubar cu ven: dal martars ae sabide, 10 - 19: domenie,
9,30 - 19,30; lunis sierât. Par informazions e sclariments: [email protected] ; o pûr tel.
0433/44445 - 0433/2054 . (von zercläre)
Une zoie preseose clamade Dieç
Il piçul paîs di Dieç di Tumieç al è come une zoie preseose logade intune concje tra lis monts. A 750 metris
di cuote, suntun çuc di mont, e je la Plêf di San Florean, scrign di intate bielece, viere dal secul IX, che e po
jessi visitade ogni domenie lant sù par un troi che al propon la vision di paisaçs dabon di rare bielece. Resints
sgjâfs archeologjics a àn puartât ae lûs il sît paleocristian di San Pauli (IV secul) - a vuê la plui antighe glesie
rurâl dal arc alpin di soreli jevât -, une fortificazion langobarde, une piçule glesie carolingje e i rescj di
abitancis fuarteçadis de Ete di Mieç. Di Dieç si po inviâsi par diviersis tratis naturalistichis di grant interès.
Dongje de mostre, un pont di vendite al propon articui dal artesanât locâl e il laboratori di ricercjâts linçûi in
râs di coton e lin.
Ladins dal Friûl pag.8 - Jugn 2010
www.ladinsdalfriul.eu
SCRITÔRS E LIBRIS IN MARILENGHE
I “Creps Umans” di Domeni Zannier
“L’ideâl dal amôr, de fradaie e dal ben universâl al à simpri guidât la opare poetiche di Domeni
Zannier (1930). Un ideâl leât ae cristianitât, ae culture e ae vite, pandût cu la vôs de liriche par creâ
une cuantitât grandone di oparis poetichis, tâls che no àn pareli inte storie de leterature furlane.
Oparis tra sium e realtât, nassudis de ferbint imagjinazion dal poete par fâ vivi intai siei poemis
personis, lûcs e vicendis tra passât e presint, intune suaze epiche, storiche, religjose e fantastiche.
Oparis pandudis cuntun furlan rampit e puntuâl, metût adun da une veve spontanie e frescje tant che
une risultive di mont”. Cheste la jentrade de schede che Luzian Verone al dediche a pre Domeni
Zannier inte sô “Rassegne di Leterature Furlane”.
A conferme di un tant e je jessude di resint de stamparie (Editrice Laurenziane) la ultime, gnove,
opare dal scritôr e poete di Cjasesole di Maian, titulade “Creps Umans”. Al dîs il nestri autôr tal
“sclariment” de jentrade che, considerade finide (ma “ istès cence sieradis definitivis pal avignî”) la
fase (lungje ben cincuante agns, cu la sodisfazion di dôs candidaturis al Premi Nobel) de propie
produzion epiche-liriche, in chescj ultins agns si è dedicât “ae stesure di une opare cence trame e
cence personaçs”, ma po daurman si mende: “Il personaç al è l’autôr stes”. In sumis chei che, rispiet
ai grancj poemis (L’Ancure te Natisse, I Dumblis Patriarcâi, Anilusi, Fili Petrae, Colomps di Etrurie e
Fanis, juste par vê iniment un poçs dai plui significants) a podaressin semeâ creps, bocons, a son in
realtât tassei di un autoritrat-mosaic dulà che a cjatin composizion i aspiets “in rime” di Zannier om,
predi, filosof, scritôr e – soredut – furlan ferbint.
Umans, a son chescj creps, ancje parcè che lui si presente in dute francjisie, l’orgoi de sô grande
opare e il marum par vie de masse pocje considerazion vude chenti (lis candidaturis pal Premi Nobel
no son stadis ni proponudis e ni sostignudis des instituzions di chenti); fer inte fede e critic viers i
Palaçs, de culture e de politiche: ustinât tal so impegn pe furlanetât e straneât di un etnicisim cence
costrut. Daspò lis indicazions di caratar plui juste apont poetichis-formâls, il “sclariment” si fâs
palês: Zannier al rispuint ae “ironie sociologjiche e materialistiche” che e à cirût di metilu in crôs,
rivendicant ae propie opare “sostanzialitât di pinsîr, e po largjece e fondece di informazion” e a se
stes la libertât di cui che, coerent cul propi impegn, nol cîr imprimatur di nissune sorte.
Energjic o sutîl intes enunciazions, il poesiâ di Zannier si module cun delicatecis cence parêi
cuant che si fâs efusion dal anim: i creps plui umans no son chei dulà che lui al esprim la propie
fede, i propis afiets (par chei di famee, pe Furlanie, pai amîs che no son plui, pai siei gjats), la
cussience de propie vocazion ae creazion leterarie e de ricjece de produzion.
Lis sîs parts che a componin la racolte (par un totâl di scuasit cuatri mil viers) a cjatin un trassunt
intai trê tescj finâi: Personis, Poesie e Promemorie familiâr, personâl, culturâl, dulà che Zannier al
esprim la sô concezion de umanitât (Cence il divin l’uman nol è persone) e de poesie (Servizi al cûr
uman ’e je poesie / e glorie de peraule e de lûš des lenghes. / Di reson e di passion nudrisi ’e cjante)
e al incrose ae autobiografie la propie bibliografie maiôr: “sclariments” plui padinâts, e ingusîts.
O rivin insom vint iniment, sul cont dal nestri Zannier, ce che al à vût scrit Zorç Faggin, un dai plui
autorevui studiôs de leterature furlane, inte antologjie “La poesia friulana del Novecento” (realizade
parie cun Walter Belardi): “La poesie di Domeni Zannier e à un timbri inconfondibil, che la diferenzie
di chê di ogni altri de piçule ‘Pleiade’ dai ladins. Par tindince al è un metafisic. Al semee anzit leât par
cualchi viers da une lontane fradilance spirituâl cun chei poetis inglês e todescs dal ’600 che a forin
clamâts, juste, poetis metafisics, no dome intai contignûts, ma ancje in chê sêt mai padinade di dâ
dongje metaforis che e je une des sôs carateristichis. I siei temis a son l’amôr, la ricercje di Diu, la
concuiste dal Jessi plen. Zanier al sint l’om ( e soredut se stes), come creature precarie, grop di arie,
bugade di vint, che par altri si jemple di sintiments che lu proietin su lis tratis dal infinît, de vastitât
de nature, dal amôr cence nissune sorte slaifs, dal Jessi cence confins”.
Cuant mai la Societât Filologjiche e la Universitât (Cirf) si acuarzarano di chest grant autôrtestemoni de liriche par furlan, e i rindarano finalmentri il ricognossiment e l’onôr che al merte?
La schede: D. Zannier, Creps Umans, Ed. Laurenziane, Buie 2009, pag. 199 .
Ladins dal Friûl / Diretôr responsabil : Renzo Balzan - Reg. Tribunâl di Tumieç n. 123 dai
09.03.98
Redazion : 33028 Tierç di Tumieç - V. Dandolo16 /tel. 0433/43696 / e-mail : ladinsdalfriul @
tiscalinet.it
F.I.P. (fotocopiât in propi) c/o la redazion di Tierç di Tumieç (Ud)
pes
Edizions
"CjargneCulture"
La publicazion e ven spedide es Bibliotechis dal Friûl, es Istituzions Culturâls Ladinis des
provinciis di Bolsan, Trent e Belun, e a ducj chei che a mandin la lôr libare contribuzion doprant il
C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320
0000000 19162
Chest gjornâl inte sô version on-line su Internet al ven fûr sul sît : www.ladinsdalfriul.eu
Realizât cul sostegn finanziari de Provincie di Udin (L.R. 24/2006 art.26)