Comunicât stampe - Comune di Moggio Udinese

COMUNICÂT STAMPE
AL È VIGNÛT FÛR IL BANT DE IX EDIZION DAL
CONCORS PAR TESCJ CINEMATOGRAFICS IN LENGHE FURLANE
Al è vignût fûr il bant de novesime edizion dal Concors par Tescj Cinematografics in
Lenghe Furlane organizât dal CEC – Centro Espressioni Cinematgografiche cul
finanziament de ARLeF (Agjenzie Regjonâl pe Lenghe Furlane), de Provincie di Udin e dal
Comun di Udin.
Il regolament al previôt 4 sezions competitivis: une pes senegjaturis, cuntun prin premi di
1.300 euros, une pes storiis par film (al plui 10 cartelis) cuntun prin premi di 300 euros,
une pai articui di critiche (300 euros pal prin premi) e, par finî, une pai saçs sul cine (prin
premi di 300 euros).
Par ogni sezion a son ancje previodudis des menzons speciâls.
I tescj a àn di jessi scrits in lenghe furlane rispietant lis normis de grafie uficiâl e par furlan
comun. A son ametudis lis varietâts locâls intai dialics des senegjaturis che, in ogni mût, a
àn di jessi scrits inte grafie uficiâl.
I lavôrs a varan di rivâ li de sede dal CEC (in vie Villalta, 24 a Udin) dentri dai 14 di
Setembar dal 2012 e in forme anonime (in buste sierade cun disore scrit dome il titul dal
lavôr e la sezion li che al partecipe).
Par valutâ i lavôrs in competizion e sarà clamade une jurie formade di personalitâts dal
mont de culture furlane.
I lavôrs premiâts e chei segnalâts a saran publicâts inte riviste di cine Segnâi di lûs.
Intal mês di Dicembar dal 2012 e sarà organizade li dal Visionario di Udin une serade
speciâl pe premiazion.
Dongje dai premis za citâts al vignarà dât ancje il premi “Mario Quargnolo” che il CEC di
Udin al destine ogni doi agns a chei che si son fats cognossi intal setôr dal cine in lenghe
furlane pe sô realizazion e/o promozion.
Intant de serade a saran proietâts films di vuê e di archivi (chei chi in colaborazion cu la
Cineteca del Friuli). Cun di plui, vie pe cerimonie di premiazion, al sarà presentât l’ultin
numar de riviste Segnâi di lûs e il tierç volum de golaine “Segnâi di lûs”, publicât pe
ocasion, dedicât cheste volte aes localizazions cinematografichis in Friûl, a Triest, in
Slovenie e in Istrie. Il volum curât di Carlo Gaberscek, al sarà publicât in trê lenghis: furlan,
talian e sloven e al varà il titul di “I lûcs dal cine (cine di finzion in Friûl, a Triest, in Slovenie
e in Istrie: sets e localizazions)”.
La partecipazion al Concors e je sore nuie.
Il bant si pues cjatâlu li de sede dal CEC (in vie Villalta, 24 a Udin), li dal Visionario e li dal
cine Centrale di Udin e ancje intal sît www.mostredalcine.org (leam “Gnovis”).
Centro Espressioni Cinematografiche
Par informazions
CEC – Centro Espressioni Cinematografiche
via Villalta, 24 – Udin
tel. 0432-299545