Our da la chesa cumünela

Our da la chesa cumünela
___________________________________________________________________
A las tschantedas dals 21 schner 2015 e dals 4 favrer 2015 ho la suprastanza
cumünela da Bever trat las seguaintas decisiuns:
Departamaint da fabrica
Bever Lodge AG: Installaziun d'ün container in Isellas
A la Bever Lodge AG vain permiss da drizzer ün container da staunza per fer
reclama sül pascul dals puleders, a dretta zieva la genna dal pascul in direczun da
La Punt lung la Via Isellas, e que per duos mais sün basa da l'artichel 40 alinea 6
OPTGR.
Swisscom Mobile SA: Decisiun dal Tribunel administrativ dal chantun Grischun
Il Tribunel administrativ dal chantun Grischun ho refüso il seguond recuors cunter la
protesta da fabrica pertuchand l'installaziun d'ün indriz per telefonia mobila sül areal
da la Viafier retica SA sün territori cumünel da Samedan. Ils cuosts güdiciels
impunieus importan 8'086.00 frs. ed a la Swisscom Mobile SA esa da pajer
ün'indemnisaziun extragüdiciela da totelmaing 13'269.95 frs. La suprastanza
cumünela decida, da desister d'ün recuors al Tribunel federel in chosa protesta da
fabrica. Invers la Swisscom Mobile SA vain fat a savair, cha la vschinauncha accepta
la deicisiun e cha que füss d'avantag, scha's pudess discuter sur d'ün'optimaziun da
l'antenna al lö existent.
Departamaint dad agricultura, ova ed ova persa
Cunvegna servezzan da lavinas culla Viafier retica SA
La nouva cunvegna culla Viafier retica SA pel servezzan da lavinas in Val Bever vain
appruveda cun pitschnas correcturas.
Departamaint da trafic, pulizia e silvicultura
Nouva concepziun plazza cumünela: cu inavaunt?
Scu cha's so e displaschaivelmaing ho la nouva concepziun da la plazza cumünela
da Bever danövmaing fat naufragi a la radunanza cumünela. Al medem temp es eir
gnida proposta l'ideja da planiser danövmaing ed in möd pü simpel. Cun que cha la
suveranited da planisaziun nun es tar la vschinauncha e cha quista as partecipescha
cun üna part da 111/1000 vi dals cuosts da sanaziun, resta uossa la dumanda,
quaunt activmaing cha la vschinauncha as dess auncha parteciper vi d'üna megldra
e pü radschunaivla concepziun da la plazza cumünela da Bever. Culla nouva
concepziun da la plazza cumünela da Bever as ho eir gieu il böt da la reconstruir
uschè bain scu pussibel sainza nivel, per cha persunas impedidas cun chaminer chi
drouvan ün bastun, persunas cun rollatur, famiglias cun charrozzinas etc. hegian
meglder access. Impü do que üna nouva norma VSS 640 075 chi ho in mira ün spazi
public sainza obstaculs. Eir il trafic public in Engiadin'Ota ho in ögl la concepziun da
fermativas da bus sainza barrieras. Uschè dessan passagers cun s-chabels cun
roudas u eir persunas pü veglias cun ün rollatur pudair entrer aint il bus sainza agüd
supplementer fin il pü tard l'an 2023. Cun lascher e saner la plazza cumünela nu
paun quists böts gnir ragiunts. Our da quist püt da vista nu's lascha güstificher
ün'ulteriura planisaziun, causa cha raps dal maun public nu dessan gnir impundieus
per fabricats ed indrizs chi nu's cunfaun cullas normas e chi nu sun adattos per
persunas impedidas. La suprastanza cumünela decida, da conclüder la procedura da
planisaziun per la nouva concepziun da la plazza cumünela da Bever, e da
supplicher l'administraziun da la surfabricaziun, d'invier ils pass necessaris per üna
sanaziun da la plazza cumünela da Bever.
Departamaint da turissem, ambiaint, alluntanamaint d'immundizchas
Via Isellas Bever: Cogniziun rendaquint finel
La suprastanza cumünela ho pudieu piglier cogniziun in circulaziun dal rendaquint
finel per la construcziun da la Via Isellas Bever cun cuosts da 21'943.40 frs. La
garanzia da deficit da 10'000.00 frs. ho finelmaing bastieu, cun que cha sun auncha
avaunt maun 45.80 frs. sül conto aviert specielmaing, e cha quist vain uossa saldo e
l'import finel restituieu a la vschinauncha.
Departamaint da finanzas, scolaziun, planisaziun regiunela
Sböz da statüts regiun Malögia
La suprastanza cumünela ho pudieu stüdger in circulaziun il sböz da statüts da la
regiun Malögia. Dal sböz da statüts da la regiun Malögia vain piglio cogniziun da
maniera positiva ed el vain delibero sainza müdamaints per mauns da la conferenza
da presidents.
Diversas contribuziuns
La suprastanza cumünela approuva contribuziuns per las seguaintas instituziuns:
Padrinedi per vschinaunchas da muntagna/Schlitteda da Bever
Tscherna d'üna magistra (pedagoga curativa in scolaziun)
Duonna Ursina Lehner-Pinggera da Zernez, chi pigliaro per mauns la scolaziun
correspundenta, vain tschernida scu nouva pedagoga curativa cun entreda in plazza
als 1 avuost 2015.
Impiegos d'administraziun
La suprastanza cumünela piglia cugnuschentscha dals profils da plazza da las duos
plazzas d'administraziun, chi sun fich difficilas da congualer cun otras
vschinaunchas. La suprastanza cumünela decida, da tscherner a duonna Beate
Angelini scu substituta da l'administratur cumünel e da la reclassificher confuorm a
las pretaisas augmantedas.
Nouv distribueder dal circul: Cogniziun
L'Uffizi circuitel d'Engaidin'Ota ho comunicho la nouva clev da scumpart cirquitela,
valabla per l'an 2015. La vschinauncha da Bever porta üna part dals cuosts da
3.26% chi'd es praticamaing listessa scu quella da l'an passo (3.23%).
EDV: Infurmaziun sur da problems cul server: credit 20'000.00 frs.
Düraunt las ultimas eivnas ho que adüna darcho do problems pü pitschens cul server
da la vschinauncha. In occasiun da l'ultima actualisaziun la mited schner d'eiran però
tuot ils sistems activs e pronts. In marculdi ils 28 schner 2015 nu's ho dandettamaing
pü gieu üngün access al server davent da las staziuns la lavur. Üna prüm'analisa ho
purto il resultat, ch'üna platta fixa d'eira desdrütta cumplettamaing e cha'l server as
preschantaiva scu ziev'ün cuolp da sajetta u ün'interrupziun da la forza electrica. A la
fin esa gnieu decis da rimplazzer cumplettamaing l'indriz da server. Per furtüna nu
sun idas a perder üngünas datas, causa cha la sgüreda da datas ho funcziuno
cumplainamaing e las datas haun darcho pudieu gnir chargedas. L'indriz nouv ho
bger dapü prestaziun ed es pü svelt, ed ils programs chi drouvan daspö las
actualisaziuns adüna dapü plazza e prestaziun funcziunan darcho da maniera pü
stabila e pü svelta. La suprastanza cumünela approuva ün credit da 20'000.00 frs.
per la substituziun da l'indriz da server. Ils cuosts supplementers na büdschetos sun
da cumpenser taunt inavaunt scu pussibel i'l sen d'üna planisaziun da renunzcha i'l
sectur administraziun cumünela.
Termins maisa arduonda (mincha mardi a las 19.30)
24 favrer
Da Primo
31 marz
Pensiun Korsonek
28 avrigl
Marlys Bar
30 gün
Pensiun Crasta Mora
25 avuost
Fuschigna Bar
29 settember
Hotel Chesa Salis
27 october
Da Primo
24 november
Marlys Bar
Bever, ils 10-2-2015rro