Protocol - Sportklasse.ch

Protocol da la radunanza da fundaziun
Società da promoziun Regiun Parc Naziunal (RPN)
Protocol
Lündeschdi, 22. december 2008, 8:30, Büro Caprez, Scuol
Preschaint
Metz Christian, Samignun
Müller Marco, Scuol
Parolini Guido, Ftan
Sivertsen Odd Kare, Scuol
s-chüsà
Parolini Jon Domenic, Scuol
tractandas
1. bivgnaint
2. protocol SNAF radunanza generala
3. böt/mera Società da promoziun Regiun Parc Naziunal RPN
4. logo e nom da la Società da promoziun RPN
5. structuras d’organisaziun da la Società da promoziun RPN
6. proposta statüts sport da skis Società da promoziun RPN
7. tscherna president sport da skis Società da promoziun RPN
8. suprastanza Società da promoziun RPN
9. concept da sponsoring
10. varia
1. Bivgnaint
Odd Kare Sivertsen cumainza la radunanza da fundaziun a las 8:30 e bivgnainta a tuot ils
preschaints. El s’ingrazcha pro Marco Müller pel local miss a disposiziun.
2. protocol da la rg dal SNAF
Odd Kare Sivertsen manzuna cuort l’ultima radunanza generala dal SNAF illa quala il
SNAF es gnü scholt ed i til displascha chi d’eiran preschaints be 15 commembers, tanter
oter ün per commembers da la fundaziun. Sco società ha presta il SNAF dürant 12 ons
fich buna lavur e perquai d’eira quist mumaint per divers ün pa trist ed emoziunal. Il
pitschen nomer da partecipants muossa però eir chi’d es uossa temp per verer inavant e
per far inavant cun nouv elan e nouvas ideas. Important esa uossa da comunichar cha’l
SNAF vaiva üna funcziun fich importanta e cha la Società da promoziun Regiun Parc
Naziunal (SPRPN) saja la società successura dal SNAF. Las prestaziuns dal SNAF vegnan
cuntinuadas illa Società da promoziun RPN cun structuras operativas plü simplas.
3. böt/mera da la Società da promoziun Regiun Parc Naziunal RPN
Odd Kare Sivertsen intuna cha la Società da promoziun promouva il sport da concurrenza
illas disciplinas ski alpin, passlung e snowboard. Sustgnüts vegnan ils atlets da la regiun.
Pro la regiun toccan la Val Müstair, Samignun e l’Engiadina Bassa. Per gnir acceptà sco
atlet illa Società da promoziun han valair ils criteris seguaints: il bap o la mamma da
l’atlet sto avair sias scrittüras illa regiun ed esser commember da la Societä da promoziun
e l’atlet sto esser commember d’ün club da skis da la regiun. La Società da promoziun es
üna società autonoma da la regiun e nu suottasta a l’IOF.
4. logo e nom Società da promoziun Regiun Parc Naziunal RPN Sport da
skis
Nom: Società da promoziun Regiun Parc Naziunal Sport da skis RPN
Odd Kare Sivertsen declera perche chi’s s’ha allontanà dal nom SNAF e perche chi’s ha
decis per Società da promoziun “Sport da skis” e na per “Sport d’inviern” o “Sport da
naiv”. Tscherchà es gnü ün nom chi’s declera da sai eir sur la regiun oura, e quai nu d’eira
il nom SNAF (adonta ch’el es dvantà fich cuntschaint illa regiun dürant ils ultims ons)
I’l passà ha müdà p.ex. l’Uniun da skis grischuna nom e logo per pudair integrar plü bain
als snowboardists (Sport da naiv Grischun e plü tard Ski e Snowboard Grischun). Quai
nun ha gnü l’effet giavüschà pro la populaziun. Hozindi s’esa tuornà pro’l nom vegl
Uniun da skis grischuna.
Eir noss’uniun da tet Swiss Ski maina daspö ons tuot las disciplinas ed ha listess amo
listess nom. Perquai s’esa gnü a la conclusiun cha Società da promoziun Sport da skis saja
ün nom adattà.
Logo: Il logo es nat in collavuraziun cun Urs Wohler ed Engiadina Scuol Turissem.
Perquai cumpara la Società da promoziun culla marca da destinaziun Grischun.
Decisiun: Il logo e’l nom Società da promoziun Regiun Parc Naziunal Sport da skis
vegnan acceptats unanimamaing.
5. Structuras organisatoricas Società da promoziun sport da skis RPN
Odd Kare Sivertsen s’occupa cuort da las structuras da la società da promoziun la quala es
fingià gnüda preschantada als preschaints avant. El intuna danouvmaing ch’ils atlets da las
trais disciplinas hajan trenà eir fingià dürant il passà insembel e cha quai dess restar
uschea i avegnir. Cul nouv concept da cellas da trenamaint dal BSV vain manada la cella
da trenamaint alpina dal SSC Samignun. Las cellas da trenamaint da passlung e
snowboard vegnan manadas da la sportklasse.ch.
Piramida da las cuntribuziuns da cader:
Odd Kare Sivertsen declera l’intenziun da la piramida da cuntribuziuns da cader chi’s
disferenzchescha da models existents. Ils giuvens atlets chi nun appartegnan amo ad ün
cader e nun han amo üna carta da talent da Swiss Olympic pajan il plü grond import
perquai ch’els profitan il plü ferm da la sporta da trenamaint e nun han da pajar amo
ulteriuras cuntribuziuns da cader (p.ex. Swiss Ski). Meglders cha’ls atlets dvaintan e daplü
subvenziuns cha las structuras da trenamaint survegnan (cuntribuziuns Motion Hess, J+S
etc.).
Tuot las cuntribuziuns da J+S ed ils raps dal BSV van directamaing a la classa da sport o a
la cella da trenamaint Samignun.
Finanzas necessarias:
Il büdschè resp. Las finanzas necessarias da tuot las structuras da la classa da sport da
l’IOF, da la Società da promoziun e da la cella da trenamaint Samignun s’augmaintan a
600’000-650’000 francs. Da quel import stuvess surtour la società da promoziun var
150’000-170’000 francs. Pel mumaint sun l’IOF e’l SSC Samignun ils sponsuors
principals ed han la respunsabiltà pell’existenza da quistas structuras da sport. La scoula
sta aint cleramaing pel sport illa regiun.
Portaders da recloma potenzials:
Cun Dario Cologna, Hitsch Haller, Nevin Galmarini e Celina Hangl vain nus hoz portader
da recloma sün ot nivel. Üna tala preschentscha mediala es inpajabla (p.ex. SF live al Tour
de Ski pervi da Dario). Uossa stuvain nus nüzziar quistas pussibiltats e premissas e render
attent a la regiun da quellas.
6. Proposta statüts Società da promoziun sport da skis RPN
Tuot ils statüts sun gnüts preschantats a la radunanza da fundaziun ed i ha dat propostas
per seguaints müdamaints:
Art. 2 Mera: Agiundscher cha’l bap o la mamma da l’atlet stopcha avair sias scrittüras illa
regiun per cha l’atlet possa gnir acceptà illa società da promoziun e survegna sustegn
finanzial.
Art. 8 On da gestiun: L’on da gestiun düra dals 1. avuost fin als 31 lügl, sco l’on da
gestiun da l’IOF.
Art. 19 Sezzüdas: La suprastanza es cumpetenta da decider sch’almain 3 commembers da
la suprastanza sun preschaints.
La suprastanza as consituischa svessa.
Decisiun: Ils müdamaints e’ls statüts vegnan acceptats unanimamaing.
7. Tscherna dal president Società da promoziun sport da skis RPN
Odd Kare Sivertsen propuona a Marco Müller sco president da la Società da promoziun
sport da skis RPN. Marco d’eira commember pro la fundaziun dal SNAF e d’eira dürant
ot ons suprastant. El cugnuoscha la mentalità dals alpins e dals nordics, po dimena colliar.
Implü es el activ politicamaing. A la fin finala es Marco svessa ün grond fan da sport.
Decisiun: Marco Müller vain elet unanimamaing sco president ed accepta la carica.
8. Cumposiziun da la suprastanza Società da promoziun sport da skis RPN
La suprastanza as cumpuona seguaintamaing:
Marco Müller, president da la Società da promoziun
Christian Metz, delegà da la cella da trenamaint OJ alpin Samignun
Guido Parolini, president PEB
Jon Domenic Parolini, capo da Scuol, grondcusglier, CA IOF
(tenor dumonda ouravant es Jon Domenic Parolini perinclet da surtour la carica)
Odd Kare Sivertsen, manader classa da sport IOF
Vacant: La suprastanza stuvess as cumpuoner dad ot persunas, giavüschà es adüna ün
delegà da la Val Müstair e da Samignun.
Delegà da la Val Müstair: Guido Parolini propuona a Markus Malgiaritta da la Val
Müstair. Marco Müller til contactescha.
Delegà Samignun: Christian Metz ponderescha ün’ulteriura persuna dal sectur da las
pendicularas da Samignun o dal cumün da Samignun.
Decisiun: La cumposiziun da la suprastanza vain acceptada unanimamaing ed eletta.
9. Concept da sponsoring
Odd Kare Sivertsen preschainta il sböz dal concept da sponsoring. Guido Parolini e Marco
Müller propuonan d’integrar tanter ils sponsuors da team e’ls sponsuors amo ün’ulteriura
categoria cun sponsuors principals ( 10’000-49’999 francs) e spereschan da chattar in quel
sectur buns sponsuors.
Guido Parolini intuna chi stopcha dar differenzas a reguard las cuntraprestaziuns
pro’ls sponsuors da firmas e mezs finanzials publics. Sponsuors da fimras resp.
Sponsuors da l’economia privata pretendan preschentscha da logo sün bus, internet,
büschmainta etc intant cha’ls donatuors dad instituziuns publicas sustegnan la buna chosa
e nu pretendan pel mort e fin üna surfatscha da recloma.
10. Varia
I vain fatta la proposta da laschar tradüer la seguainta documainta in rumantsch:
-concept da sponsoring
- flyer
- sböz da la charta pellas dumondas da sponsoring
- statüts
Decisiun: La proposta da laschar tradüer la documainta manzunada survart in rumantsch
vain acceptada unanimamaing.
Fin da la sezzüda da fundaziun: 10:30
Muriel Hüberli
manadra da protocol
Odd Kare Sivertsen
manader da sport, IOF