CUMÜN DA SCUOL RADUNANZA CUMÜNALA Protocol nr. 5

CUMÜN DA SCUOL
RADUNANZA CUMÜNALA
Protocol nr. 5
Radunanza dals 26.10.2015, 20:00 - 23:00
Data:
26 october 2015
Urari:
20:00
Lö:
Sala polivalenta Ftan
Tractandas
1.
Institut Otalpin Ftan, approvar il contrat per l’impraist da 3 milliuns francs, sainza fits,
per üna dürada maximala da 2 ons
2.
Gurlaina SA, approvar il contrat da servitut persunal pel pavigliun da lain
3.
Orientaziun in vista a la votaziun dals 29 november 2015
−
Reservat da Biosfera Val Müstair Parc Naziunal
−
Ledscha d’ustaria
−
Ledscha dal persunal
−
Ledscha davart las remuneraziuns per autoritats e cumischiuns
4.
Ulteriuras infuormaziuns
5.
Varia
Preschaints:
var 200 votantas e votants
Giasts:
Lucia Morandi, co-manadra da l‘IOF
Jon Peer, president dal nouv cussagl administrativ da l‘IOF
S-chüsats:
Cla Denoth, Andri Lansel, Rudolf Pazeller, Gianna Rauch-Poo
Medias:
Flurin Andry (ANR), Nicolo Bass (Posta Ladina), Dario Müller (RTR)
Scrutinaduors:
Albert Mayer ed Armon Parolini
1. Institut Otalpin Ftan, contrat per l’impraist da 3 milliuns francs, sainza fits, per
üna dürada maximala da 2 ons
L’Institut Otalpin Ftan ha gnü l’ultim temp da cumbatter cun grondas turbulenzas. La fin da
gün esa gnü cuntschaint cha l’Institut Otalpin Ftan (IOF) perda il label «Swiss Olympic».
Pac plü tard esa gnü public cha la scoula media serra las portas. Sün quai han genituors,
magisters, uffants e simpatisants ramassà suottascripziuns ed inoltrà ün’iniziativa cul böt
da salvar l’Institut Otalpin Ftan. Els han eir gnü ün enorm success e ramassà fich blers raps.
- 29 -
La suprastanza ha lura decis da garantir la gestiun e quai cun l’acquist dal stabilimaint. Quai
nun ha però pudü gnir realisà pervi da motivs giuridics. Perquai s’haja tscherchà ün’otra
soluziun ed i s’ha chattà quella cun ün impraist.
Tenor quai conceda il cumün da Scuol per la sgürezza da la gestiun da la scoula gimnasiala
e per l’internat ün impraist sainza fit da 3 milliuns francs. 2 milliuns francs vegnan pajats als
1. schner 2016 e’l rest dad 1 milliun francs il plü bod als 1. schner 2017.
Per sgürar l’impraist vain inscritta l’ipoteca da 3 milliuns francs a charg da las parcellas nr.
50878 e 53508 i’l cudesch fundiari. Plünavant vain inscrit i’l cudesch fundiari ün dret da
cumpra per üna dürada da 5 ons (fin als 1. schner 2021) a charg da la parcella 50878 ed a
favur dal cumün da Scuol. Il predsch da cumpra per la parcella nr. 50878 importa CHF
7'956'500.00 e correspuonda a la valur da rechav tenor la stima ufficiala. Implü vain annotà
ün dret da precumpra cun üna dürada fin als 1. december 2040 a charg da las duos
parcellas nr. 50878 e 53508 ed a favur dal cumün da Scuol.
La suprastanza es perincletta cul contrat d’impraist e propuona a la radunanza cumünala
da til approvar.
Ün votant ingrazcha a tuot las persunas chi s’han ingaschadas cun uschè veementamaing
a favur da «nossa» scoula media. Id es ourdvart important da far tuot ils sforzs pussibel per
tilla salvar. Be uschè saraja pussibel da tilla mantgnair eir in avegnir e garantir las plazzas
da lavur. Cun conceder quist impraist sustgnaina a quista instituziun importanta e mettain
ün cler signal.
Discussiun:
Dumonda
Co es quai pussibel cha l’IOF saja bun da restituir tuot l’impraist fin als
1. schner 2018 (art. 2 dal contrat d’impraist).
Resposta
Quista proposta es gnüda fatta dal cussagl administrativ disch il capo.
Jon Peer manzuna ch’els giaian a tscherchar üna finanziaziun a lunga
vista e cha uschè possan els restituir l’import al cumün. Tuot tenor vain
eir fat ün augmaint dal chapital.
Dumonda
Co vezza il president dal cussagl administrativ l’avegnir da la classa da
sport? Quella es statta dürant ils ultims ons üna pozza fich importanta
per la scoula ed ha eir gnü gronds success.
Resposta
Jon Peer respuonda ch’els vöglian in mincha cas far tuot il pussibel per
mantgnair la classa da sport.
Dumonda
L’anteriur cussagl administrativ da l’IOF chi’d ha decis in lügl da serrar
la scoula vaiva dal sgüra lur motivs. La situaziun nu s’ha müdada infra
quist cuort temp e uossa para chi saja pussibel da manar inavant la
scoula. Co es quai pussibel?
Tenor el vess da gnir suottamiss ün simil impraist al suveran per üna
votaziun a l’urna.
Resposta
Il capo piglia posiziun e disch cha trais scoulas medias in Engiadina
sajan massa bler.
Tenor la constituziun po decider be la radunanza davart il conceder ün
simil impraist.
- 30 -
Il capo renda attent cha scha ün quart dals preschaints giavüscha, schi chi gnia fatta üna
votaziun in scrit. Siond cha quai nu vain giavüschà decida la radunanza cun 4 cuntravuschs
dad approvar la dumonda e da conceder l’impraist da 3 milliuns francs sainza fits per la
dürada da duos ons.
Quista decisiun suottastà al referendum facultativ, quai in basa a l’artichel 32 al. 2, lit. 1 c)
da la constituziun cumünala.
2. Gurlaina SA, contrat da servitut persunal pel pavigliun da lain
La cumünanza d’urna dal anteriur cumün da Scuol ha approvà als 28 settember 2014 ün
credit da CHF 400'000.00 per la cumprita dal pavigliun da la TESSVM.
Davopro s’haja constatà chi saja meglder da transferir la proprietà dal pavigliun a la GUSA.
Cun quai fuorma quist tract supplementar eir üna part dals edifizis da la GUSA pels quals
id es gnü conclüt als 1. mai 1996 ün dret da fabrica cul cumün da vaschins da Scuol. Sco
cuntraprestaziun surdà la GUSA lur 646 aczias à CHF 100.00 al cumün da Scuol. Uschè
es lura il cumün possessur da 56.3 % da las aczias.
La GUSA s’oblaja da metter a disposiziun al cumün ed a societats las gardarobas e las
duschas i’l annex.
Per reglar quai in quel möd faja dabsögn d’ün contrat da servitut persunal chi’d ha da gnir
inscrit i’l cudesch fundiari.
Il capo da vaschins disch cha’l cumün da vaschins chi’d es proprietari da la parcella qua in
discussiun haja approvà l’adattamaint dal contrat da servitut persunal.
Discussiun:
Ingüna
Illa votaziun averta decida la radunanza unanimamaing dad approvar il contrat da servitut
persunal.
Quista decisiun suottastà al referendum facultativ, quai in basa a l’artichel 32 al. 2, lit. 1 c)
da la constituziun cumünala.
3. Orientaziun in vista a la votaziun dals 29 november 2015
Reservat da Biosfera Val Müstair Parc Naziunal
La cumünanza d'urna dal cumün da Scuol ha vuschà fingià als 14 gün 2015 davart il contrat
da cooperaziun davart il Reservat da Biosfera. Tenor quel contrat füssan stats partecipats
eir ils cumüns da S-chanf e Zernez. Tuots duos cumüns han refüsà il contrat in radunanza
cumünala resp. illa votaziun a l'urna.
In seguit es nada l'idea d'üna cooperaziun be tanter il cumün da Val Müstair, la fundaziun
Parc Naziunal Svizzer e'l cumün da Scuol. Ils respunsabels da la Biosfera han discus quista
varianta culs uffizis chantunals e federals. I para vaira realistic cha l'UNESCO accepta il
reservat da Biosfera, eir schi vain realisada be üna part da la zona circundanta necessaria,
nempe quella sül territori da Scuol. Quai eir causa cha Scuol ha acceptà il contrat da
cooperaziun als 14 gün cun bod 79%.
- 31 -
Il Parc Naziunal Svizzer es dvantà dal 1979 il prüm reservat da biosfera arcugnuschü da la
UNESCO in Svizra. 31 ons plü tard es gnüda integrada eir la Val Müstair. La Biosfera Val
Müstair Parc Naziunal UNESCO cumpiglia uossa dad üna vart il Parc Naziunal, la zona
centrala protetta severamaing, da tschella vart la Val Müstair chi fuorma vers süd ed ost
l'uscheditta zona circundanta, üna «zona da plümatsch» chi tegna davent influenzas
disturbantas da la zona centrala.
La UNESCO ha approvà quist ingrondimaint in gün dal 2010, schabain cha las premissas
nu sun amo accumplidas dal tuot. I voul nempe üna zona circundanta intuorn tuot il Parc
Naziunal (= la zona centrala). Perquai esa da s-chaffir üna tala zona eir al nord dal parc.
Be uschè esa pussibel cha la Biosfera Val Müstair Parc Naziunal possa tgnair seis status
sco reservat arcugnuschü da la UNESCO.
La zona circundanta consista da duos zonas: 1. la zona da chüra es protetta plü severamaing,
pussibla es impustüt ün'agricultura e silvicultura ecologica. 2. la zona da svilup es ün spazi
d'abitar e d'economia cun diversas ütilisaziuns persistentas dal terrain.
Il contrat regla impustüt l'organisaziun (Cussagl dal reservat, administraziun etc.). Ils
artichels 2 fin 5 definischan ils differents geners da zonas.
Discussiun:
Dumonda
Cur cha’l resultat da la votaziun es gnü cuntschaint ha dit il mainagestiun dal Parc Naziunal in ün’intervista culla RTR cha per els füss stat
il Reservat da Biosfera ün «nice to have». Quista externaziun es statta
curiusa. Siond ch’el es eir preschaint a quista radunanza po’l güsta dir
svessa co cha quai d'eira manià?
Resposta
El disch cha Scuol possa profitar cun S-charl il plü ferm dal Reservat
da Biosfera. Zernez e S-chanf nun han mai muossà grond interess vi
dal Reservat da Biosfera e nun han neir mai sviluppà progets.
Ils votants preschaints delibereschan cun 4 cuntravuschs la cunvegna da prestaziun per
mans da la cumünanza d’urna dals 29 november 2015.
Ledscha d’ustaria
La ledscha d'ustaria regla ils permiss, las uras d'avertüra sco eir las taxas per las activitats
d'ustaria sün territori dal cumün da Scuol. Seis intent es da mantgnair la quietezza e
sgürezza publica, l'uorden public sco eir la protecziun da la giuventüna.
La basa da la ledscha cumünala d'ustaria es la ledscha d'ustaria pel chantun Grischun dals
7 gün 1998 (LU, ledscha nr. 945.100 dal cudesch da dret grischun).
Discussiun:
Dumonda
Perchè es limità il temp d’avertüra (art. 9 al. 1) voul savair ün votant. El
fa la proposta dad abolir quai.
Resposta
Il capo manzuna cha quai d’eira reglà uschè i’l anteriur cumün da Scuol.
Là faja il plü ferm dabsögn da fixar ils temps d’avertüra.
- 32 -
28 preschaints sustegna la proposta dal votant. Üna gronda majorità es da l’avis da mantgnair ils uraris cha las ustarias han dad esser serradas sco quai cha la suprastanza propuona, nempe:
− las nots da dumengia fin gövgia adüna tanter las 3 e las 6 e
− las nots da venderdi e sonda adüna tanter las 4 e las 6.
Ils votants preschaints delibereschan unanimamaing la ledscha per mans da la cumünanza
d’urna dals 29 november 2015.
Ledscha dal persunal
Las relaziuns da servezzan ed ils salaris dal persunal cumünal as drizzan da princip tenor
il dret da persunal dal Chantun, tant inavant cha'l cumün nu decretescha ingünas disposiziuns divergentas (tenor art. 57 al. 2 da la constituziun cumünala). Eir pella magistraglia
es relevanta la legislaziun chantunala.
La ledscha cumünala dal persunal fixa las excepziuns e regla particularmaing las cumpetenzas per decisiuns davart il persunal (elecziun, classificaziun etc.).
Discussiun:
Ingüna
Ils votants preschaints delibereschan unanimamaing la ledscha per mans da la cumünanza
d’urna dals 29 november 2015.
Ledscha davart las remuneraziuns per autoritats e cumischiuns
Ils commembers da las autoritats e cumischiuns cumünalas survegnan üna remuneraziun
per lur lavur. Quista ledscha regla las remuneraziuns sco eir la bunificaziun da las spaisas
chi stan in connex cun quista lavur.
Discussiun:
Dumonda
Ad ün votant para cha la remuneraziun pels commembers dal cussagl
da scoula e da la cumischiun sindicatoria saja cun 40 fin 60 francs l’ura
exagerada. El es da l’avis chi’s tratta tuottüna dad üna lavur pel public.
Resposta
Bleras sezzüdas han da gnir salvadas dürant il di. Id es adüna plü difficil
a chattar persunas chi’s mettan a disposiziun per caricas publicas.
Perquai esa important cha quellas gnian remuneradas inandret manzuna il capo.
Dumonda
Perchè survegnan il cussagl da scoula e la cumischiun sindicatoria üna
tariffa plü ota co las ulteriuras cumischiuns dumonda ün preschaint.
Resposta
Quai haja da chefar culla respunsabilità. Las ulteriuras cumischiuns han
«be» üna funcziun da cusgliaziun manaja il capo.
- 33 -
Ils votants preschaints delibereschan cun üna cuntravusch la ledscha per mans da la
cumünanza d’urna dals 29 november 2015.
4. Ulteriuras infuormaziuns
Il capo orientescha a la radunanza davart:
−
ils dons in connex cullas strasoras dal mais lügl,
−
las punts chi pendan da Sinestra – Zuort. La seguonda etappa vain realisada l’on chi
vain,
−
il film da Uorsin chi vain uossa muossà i’ls kinos in tuot la Svizra,
−
ils termins per las prosmas radunanzas
− 29 november votaziun a l’urna (contrat da cooperaziun davart il reservat da
biosfera e 3 ledschas cumünalas)
− 14 december radunanza da preventiv
5. Varia
−
Barbla Conrad ingrazcha fich a tuot las persunas chi’d han sustgnü l’iniziativa per l’Institut Otalpin. Ella invida a tuot las persunas interessadas ad üna sairada d’infuormaziun
als 2 november al Hotel Belvédère a Scuol.
−
Ün votant dà alchünas spiegaziuns sud da la situaziun finanziala sül sectur dal turissem
in general. El es stat stut da leger illa pressa davart il nouv model previs per la taxa da
cura, e quai avant cha la populaziun saja gnüda orientada.
Il capo:
L'actuar:
Christian Fanzun
Andri Florineth
- 34 -