LITERA ABERTA cun totus e po totus. Su CDA e

Centro di informazione turistica: via Adua n°2
Tel. 0781 797026 - cell. 3492923606 -
LITERA ABERTA
Cun s’idea de fai sciri a totus cumenti aturat sa Pro Loco po su chi acuntessit is contributus pùbricus arricius e
arremonaus in custas diis me is arrexonus de sa genti ocasionendi scuncòrdiu e intena mala, po torrai partis a
una Associatzioni sèria a cumenti est sa Pro Loco e a sa genti chi ddoi at traballau po ndi dda pesai e po dda
aguantai aici, si intendeus de nai a craru ca:
-) s’Associatzioni Turistica Biddaramosa no at mai torrau partis a nemus e dd’at amostau traballendi e
agiudendi in dònnia ocasioni e cun calisisiat aministratzioni fintzas de su 1999, annu de nascimentu de
s’Associatzioni;
-) est una Associatzioni chi sighit is leis natzionalis, chi bivit e traballat gràtzias a is contributus pùbricus chi
ndi benint de sa Regioni, de sa Provìntzia e de su Comunu. Funt giai 5 annus chi su contributu comunali
intregau a sa Pro Loco est de € 6.000,00 a s’annu (po dònnia annu);
-) est aministrada de unu C.D.A chi, de acòrdiu cun is sòcius, proponit e apariciat is atividadis e is
manifestatzionis chi s’ant a sboddiai in totu s’annu;
-) su traballu, aministrativu e operativu, fatu de is sòcius o collaboradoris est a indonu. De aguantai a craru chi
su tempus imperau po custas fainas est sempri tempus lìeru e personali chi s’imperat po sa comunidadi;
-) s’associatzioni est sempri pronta a agiudai e a traballai impari a atrus Entis e Associatzionis po ndi pesai
manifestatzionis e ocasionis de sprèviu fintzas po is chi ndi bessint a pillu in prus de su chi giai iat pentzau de
fai s’Associatzioni. Po su bonu proi e su profetu, su dinai andat a sa Pro Loco a cumenti dinai torrau sceti po
su gastu documentau. Est a nai ca si traballat po ndi pesai un’ocasioni pentzada e pagada de atrus e chi a
s’associatzioni no coillat dinai (a parti agò a sa Pro Loco no iat a torrai nimancu a contu, ca ddoi spendit prus
de su chi ddi torrant poita ca nci ponit traballu, benzina, telèfunu, ainas e totu su chi serbit po s’arrennescida de
s’ocasioni e de sa festa). Una cosa ‘e spantu, berus?! Balla! Ddu fadeus po sa bidda e poita ca si praxit e ndi
teneus prexeri e prexu mannu.
-) is bilàncius, preventivus (de innantis) e consuntivus (de agò) si podint ligi po connosci su stadu econòmicu de
sa Pro Loco e fintzas si podint domandai scedas miticoi ddoi fessit s’abisòngiu. Totu is scedas chi pertocant sa
contabilidadi e is contributus pùbricus arricius si podint connosci sceti ligendi is autus chi, ddu torraus a nai,
funt a dispositzioni de totus. Totu s’atru est crastullìmini tontu chi no serbit a nemus.
S’idea nosta est stètia sempri cussa de ndi pesai ocasionis de festa e sprèviu mannu po sa bidda. Fortzis no seus
arrennescius a donai su cuntentu a totus ma assumancu dd’eus tentada. Spereus de podi sighiri a traballai in
cuncòrdiu, cumenti eus fatu fintzas a imoi,
cun totus e po totus.
Apellu de acabu: tenis prexeri de donai unu pagu ‘e tempus cosa tua a sa bidda?
Iscrii.tì a sa Pro Loco. Prus seus mellus est.
Su C.D.A. e is Sòcius
Associazione Turistica Pro Loco Vallermosa – via Adua, n° 2 – 09010 Vallermosa (CA)
C.f. 92094120927 - Tel/Fax 0781797026 – cell. 3391173866-3492923606
e.mail : [email protected] - sito internet : www.prolocovallermosa.piczo.com
profilo Facebook: prolocovallermosa