Tate wa magodimong o re nea borotho bja ka mehla

Tate wa magodimong o re nea borotho bja ka mehla
Thero mo Thapelo ya Morena
Palo ya Beibele: Psalm 104
Palo ya Katekisema ya Heidelberg 50
Bašemane le basetsana, ana le šetše le jele borotho lehono? Borotho bo tšwa kae? O hloka
borotho letšatši le latšatši go hwetša maatla a go ya sekolong goba go bapala go ba go ya
kerekeng. Ka tsela yeo re kgopela Tate wa magodimong o re nee lehono borotho bja rena bja ka
mehla. Ga re ithapelele rena fela. Ga re rapele ra re o nee borotho bja ka mehla. Empa: re re o RE
nee... ge re rapelela borotho, ga re re borotho fela empa re dijo tše dingwe bjalo ka bogobe,
matsapane, dienywa, nama, le tše dingwe. Re rapelela tšohle tšeo di hlokago ke mebele ya rena.
Gomme re rapelela gape tšeo re di hlokago mo bophelong bjalo ka diaparo goba dipuku goba tša
go ngwala ge re ya sekolong, le tšhelete ya go namela, goba ge re eya mošomong, bjalo bjalo.
Mohlomongwe go bonagala e ke tšhelete ka moka e tšwa dipotleng tša batswadi ba rena. Empa
ga go bjalo. Nnete ke gore e tšwa go Modimo. Modimo o re neile batswadi ba gago bo itekanelo
le maatla go kgona go šoma le go humana tšhelete.
Ge re rapela, o re nee borotho bja ka mehla, kgopelo yeo e re ruta gape gore re se ke ra nyaka go
ba le tšohle. Re kgopela fela seo re se hlokago. Gomme ge se kgahla Modimo gore nea go fetiša,
ka go rata re ka lebogela seo. Ga re se ke ra lebala go leboga Modimo ka seo! Ke Tate wa rena,
gomme o hlokomela bana ba gagwe!
Tabataba: Tate wa magodimong o re nea borotho bja ka mehla
1 Bo rapelele ka mehla
2 Bo šomele ka mehla
1 Bo rapelele ka mehla
Mohlomongwe batswadi ba bantši ba ipotšiša gore: re na le bana, ana re ka humana dijo tše
lekanego go ka ba godiša? Ge ba gola, le ge ba ya sekolong, ga ba hloke borotho fela, empa
diaparo le dipuku, le tšhelete ya maeto, le tšhelete ya dihlare ge ba lwala le tše dingwe. Gomme
ka mehla re a ipotšiša: ana re tlo kgona go lefela ditokela tša kgwedi? Go bonagala e ke bana ba
na le monagano wa gore tšhelete ya mme le tate e ka hloka. Gomme Morena Jesu Kriste o ruta ka
bobedi batswadi le bana go rapela: o re nee borotho bja ka mehla. Re tšea maema re a bea
magetleng a Modimo! O ka re hlokomelela dinyakwa tša rena. Mesomo ya rena le maitapiso a
rena ke lefela, kantle le tšhegofatšo ya gago. Re itšhepetše mo go Wena, dilo tšohle tše botse di
tšwa go wena.
Re badile mo Beibeleng mo Psalomeng kgaolo ya 104. Mang le mang eo a phelago o lebeletše
wena. Le diphoofolo le dinonyana. O hlogiša bjang gore dikgomo di fule. O hlokomela batho ka
borotho. Dihlare ka moka di bopile ke wena, gomme di tla gola fela ge wena o di nea pula. O
bopile ditaba le legohle, maswika le mafulo a matala gore dipedi di dule go ona. Letšatši le
ngwedi, ditau, dihlapi, dikwena, le tšohle ka moka di bopile ke wena. Gomme wa di hlokomela!
Gopola fela: gore ke kopanyo eo e makatšago! Ge re e bapetša lefelo la serapa sa diphoofolo. Ana
o ile wa akanya ka moo lefelo la serapa sa diphoofolo le hlokago dijo ka mehla go fepa
diphoofolo. Gomme diphoofolo ka moka di na le dijo tša tšona. Tau e ka se kgone go ja bjang. Le
thutlwa e hloka mahlare a mantši a mohlare. Gomme tlou e hloka go fetiša tshwene. Go mošomo
o mogolo go bašomi ka moka ba lefela la serapa sa diphoofolo go dira mošomo o ka mehla.
Gopola fela se Modimo a se dirago ka mehla! Ena yo a hlokomelago batho ba lefase dibillione tša
lefase, le diphoofolo ka moka, le dinonyane tša legodimong, le dihlapi ka moka tša lewatleng, le
diphedi ka moka, bjalo bjalo.
Modimo a laetša lefase, letšatši le ngwedi, le diplanete ka moka ka tsela yeo di ka bago le
tshepedišo ya letšatši le bošego. Ge e ba leswiswi, batho ba robala, empa diphoofolo bjalo ka
1
ditau di a tsoga. Ge letšatši le hlaba gape, ditau di a boela di a robala, empa motho o a tsoga gore
a ye mošomong. Gomme e šoma ka tsela yeo, ka tsela yeo a hlodilego ka gona. Ke ya mohlodi e
bile ke yena mohlokomedi wa lefase. Ge Modimo a bula letsogo la gagwe, re humana dijo, empa
ge a le tšwalela, re bolawa ke tlala. Ge a tšea moya wa rena, re a hwa. Ge a re neela moya, re a
tsosološwa. Se ke nnete, ke ka moo re itshepetšego go Modimo. Gomme ge re rapela, mo
thapelong kgopela ya bone o re nee borotho bja rena bja ka mehla, gomme re lemoga le go
amogela bonnete bjo.
Ka lentšu le borotho re šupa tše dingwe go fetiša borotho. Borotho ke sešupo fela sa dinyakwa
tša rena tša letšatši le tša bophelo ka moka. Gomme ge a re neela tšona, o lebeletše gore le rena
re di šomiše ka maikarabelo. Ge a re neela borotho, ga a re re bolahlele ka gare ga matlakala. Ge
a re neela koloi, ga a re re e šomiše bošaedi, e ka ba re nyatša melao ya tsela. Ge a re neela bana,
ga a re re bahlakiše. Modimo o nyaka tšhomišo ya maikarabelo go dimpho tšea a re neago tšona.
Mpho e tliša maikarabelo. Ge o amogetše se sengwe se se botse go tšwa go Modimo, o amogetše
gape maikarabelo a go se hlokomela. Ga re se ke ra lebala go rapelela maatla le bohlale, bja go
šomiša dimpho tša rena ka tsela ya maleba, gore re hlomphe Modimo.
2 Re bo šomele ka mehla
Ke maitshwaro a mabotse go thoma letšatši ka thapelo. Bjalo ka go thoma letšatši la mathomo la
beke ka go ya kerekeng. Mo thapelong ya rena re kgopela tšhegofatšo ya Modimo mo letšatši le
le tlago. Re kgopela tšhireletšo boitekanelo le maatla a go phetha mešomo ya rena. Thapelo e re
iša go seo re swanetšego go se phetha mo letšatšing, e lego seo Modimo a hlokago gore re se dire
mo letšatšing. Thapelo e re thuša go araba thato ya Modimo letšatši le letšatši. Ka tsela yeo
thapelo ka boyona e re kgoniša go thoma mošomo go ka thoma go dira dilo tša maleba. Tate wa
magodimong o re nea ditšhegofatšo tša gagwe, e ka ba ka seo re se bonago e le ka tsela ya
borotho bjo bo lekanego dijo tšeo di lekanego, boitekanelo, tlhabo ya letšatši, le tše dingwe.
Empa ga di re seo fela gore rena re phuthe matsogo re dule fase. O re nea ditšhegofatšo tša
gagwe go ka kgona go phetha maikarabelo a rena. Ka morago ga go phutha matsogo mo
thapelong, go bohlokwa gore o thoma go diriša matsogo a gago, ka go dira mošomo wa gago. E
mongwe yeo a dirago engwe ya tše, a ka se kgone go holega moo ditšhegofatšong tša Modimo.
Rapela gomme o šome. Di a sepidišana. Ga se gore Modimo o a re hloka, e le ka tsela ya gore
kantle re rena a ka se kgona go re nea dijo. Gape ge re šoma re lemoga gore ke ka lebaka la
kgaugelo ya Modimo gore re kgona go šoma. Re kgona go šoma gobane re hema moya o ao
hlodilego. Re ka kgona fela go šomela tebogo ya boitekanelo bjo a re neago bjona. Ka nnete re
phela gobane re hlodile ke Modimo. Gomme ge re šoma le gona ke mpho e tšwago go Modimo.
Ge Modimo a re bitša gore re šome o a re kgoniša gape go dira seo.
Nke ke bolele dilo gape bonolo. Gona bjale ge o sa šome, mo mahlong a Modimo seo ga se re gore
ga o šome. Le ge o sa šome, go na le seo Modimo a go bileditšego sona. Mohlala, ge o le ntate
gomme o sa šome gonabjale o ka se dule fela mohlomongwe wa nwa bjalwa, gomme wa lebala
mathata a gago. Aowa, Modimo o go biditše gore o phele, o be tate mo go bana ba gago, go ka
tšenya maatla go ba godisa, o ba thusa le go ba hlahla. Gomme kantle le seo o swanetše gape go
ba motho mo setšhabeng, o thuša mosadi wa gago go hlokomela ntlo, le di bjalo le go ba
Setho se phelago mo kerekeng, o thuša mo mešomong yeo e swanetšego go dirwa. Mo mahlong
a Modimo o na le mošomo ka dinako tšohle! Gomme mo tshepe, le yena o tla go hlokomela, le ge
o se na mošomo wa go phathela. O tlile go go hlokomela! Mohlomongwe go tšwa letsogong la
kereke.
Bana bešo, ge re rapela: re nee borotho bja rena bja ka mehla, gare inaganele rena fela. Jesu o re
ruta gore re lemoge go hlokomela dinyakwa tša batho ba bangwe bao ba phelago le bona. Ge a
go šegofaditše ka tše dintši o swanetše go lemoga gore ditšhegofatšo tše ga se tša gago. Modimo
o go adimile tšona, a go bitša gore o di šomiše go tswetša pele mmušo wa gagwe! O bileditšwe
gape go hlokomela bahloki, Modimo o nyaka gore re rate baagišane ba rena. Gomme godimo ga
tšohle o nyaka gore re mo tshepe. Ke ka lebaka leo re sa rapele: ra re: o re nea borotho bja
2
bophelo le mahumo. Empa o re ruta gore re se ke ra kgopela tša letšatši le. Empa go mo tshepa
gore le ka moso o tlile go ba gona, gomme o tlile gore hlokomela! Bjalo ka ge Jesu a boletše mo
pukung ya Mateo 6:33-34: ‘gomme, le se ke la belaela ka tša ka moso, gobane tša ka moso di
tlilego ipelaela letšatši le lengwe le lengwe le na le tša lona.’ ‘empa sa mathomo nyaka mmušo
wa Modimo, le go loka ga gagwe gomme tšohle di tla latela ka morago.’
Amene.
3