lauga: faamanatuga o le sunami

1
LAUGA: FAAMANATUGA O LE SUNAMI
(Tui Atua Tupua Tamasese Ta’isi, Ao o le Malo 29 Setema 2010)
“Ia outou faia lenei mea ma faamanatuga iā te a’u”
Ina ua faatama’ia Samoa e le Sunami i le aso 29 Setema i le
tausaga ua tuana’i, sa mafatia ma faanoanoa ai si o tatou atunuu. O
loo i ai pea nisi o loo afaina ae i ai ē ua toe fuata’iina a latou
atina’e ma ua faamalosia ia le mafutaga mafana a aiga, uo, le
atunuu ma uso a tagata o le lalolagi.
O le fe’au o la’u tautalaga i le asō, e faatūtū i le faamanatuga
ma le mafutaga ua ‘au’autasi. I le talisuaga mulimuli a Iesu ma
ona Soo, na ia tofitofi ai le areto, taumafa le uaina, ma faapea mai,
Ia outou faia lenei mea ma faamanatuga ia te a’u. Ona o i tatou o
se atunuu Kerisiano, tatou te talitonu ma o tatou auai i le
faamanatuga o le talisuaga mulimuli a Iesu ma ona Soo. E māfua
ona e famanatu ai le Satauro o Iesu aemaise ai le faamanatuga ma
le taulaga faafetai i le Atua i lana taulaga togiola ma lona alofa lē
mavae mo i tatou.
I le aso tonu o le Sunami, sa o ma malaga faatasi ma le
susuga a le Sui Palemia, le tofa a Tuuu Anasii Leota i nuu e sili le
afaina. Sa o ma vaaia le tiga alofa ma le atupopole ina ua maua
mai tino o ē ua maliliu po ua lata ina maliliu mai faapuloulou, mai
laau, mai lalo o fale; ua lē mafai taofiofia loimata maligi. I le po
ou te ala valevale ona ua tula’i mai i lo’u mafaufau le ata o e maliu
2
ma ē o loo tigaina, ma ua oo mai le manatu, pagā lea, ailoga iseā e
lavea’ia le ola o le ‘au matutua ma tamaiti laiti. Ua lofia le tatalo
ma le mafaufau e le fesili taligatā, e māfua iseā?
E faataugā i le malosi o le tino ma le mafaufau le tau
fuafuaina o se tali po o ni tali o le fesili lenei. E foliga mai o le
‘avega e faaopoopo ae ua lē se faamāmā ‘avega. Aua fo’i o lea ua
tau sa’ili se tali i le mea lea e ta’ua e le ‘au matutua, o le tupua e lē
gase. E māfua ona taumate le tupua ona e lē oo le malamalama o
le tagata i le tulu’iga o le finagalo o le Atua. I le tatou tau sa’ili o
le uiga ma le mafuaaga o le Sunami o Setema aso 29, 2009, ua
tatou samo ai ma su’e faalumaga i le ‘auga o le tatou talitonuga
faa-Kerisiano.
O se tasi o faavae o le mau faa-Kerisiano, na sauāina ma
faasatauroina Keriso mo le togiolaina o i tatou. A tatou mafaufau i
mala faalenatura, e le mafai ona ‘alofia le silisili, afai se Atua
alofa, aiseā e māfua ai ia mala faapenei? Afai se Atua amiotonu,
aiseā e māfua ai lenei lē amiotonu?
O le fe’au o le Satauro, o le faamanatu mai iā i tatou, o i tatou
o ni tagata lē atoatoa. E ao ona tatou felagolagoma’i ina ia tatou
saogalemu; aua o i tatou o tagata e i ai o tatou malosi’aga, e i ai
fo’i o tatou vaivaiga. I o tatou tiga ma o tatou tofotofoga, i o tatou
maumalo ma le ‘oli’oli, tatou te iloa ai e le gata e iai mea tatou te
mafaia, ae e iai fo’i mea tatou te lē mafaia. E le gata i lea ae o le
3
tāua o le alofa, le faitaulaga ma le faaolataga. O le alofa e lē na o
le ‘oli’oli, e alofa fo’i le tiga ma le mafatia. O le pulega amiotonu
e lē na o le togisala, e iai fo’i ma le puipuimalu ma le faamagalo.
Ma o le mafuaaga lea o le fesili: O ā mea o loo tatou
faamanatu i lenei aso?
O lea tatou te faamanatu le fe’au o le Satauro ma le fe’au a
Iopu. I le tulu’iga o tiga o Iopu, e le’i maluelue lona talitonuga, o
loo i ai Lē e togiola ia te ia. Pei ona fai mai le Tusi Paia, E ui lava
fo’i ina faaumatia lenei tino pe a mavae atu lo’u pa’u, ae ou te iloa
atu le Atua.
O lea tatou te faamanatu le tamaititi e fitu tausaga na ia
lavea’i le matua o ona matua. Na fai atu le loomatua, e tamomo’e
latou, tuu ai pea ia. Na momo’e faatasi ma isi tamaiti ae mea ane
ua tu ma toe fo’i mai, ‘u’u le lima o le tinā ma fai mai, “Sau ta ō!”
E faaola totoga le alofa o lenei ‘alu’alutoto! E le’i maua lona tino,
ae o lana taulaga, e ola pea i le mānava ma le manatua a le tinā
matua na ia lavea’i.
O lea tatou te faamanatu le alofa o le tinā i le fanau. E
faamanatu mai e le tinā e opo ma fusi ma sogi lana tama tainane ua
pala le tino ma manogi. E faamanatu mai ai le ‘anoa o le mau
faavae a Samoa o le vaevae manava; e vaevae le manava o le tinā
ona maua lea o le tagata.
4
O lea tatou te faamanatu le galuega faafou a le Sunami i lo
tatou olaga faa-Samoa. Aua e lē na o le soifua, laufanua, laau ma
fale na aafia i le Sunami. Na safea fo’i ma le olaga faaleagaga, le
olaga faalelotu, le tu ma le aga, le tino ma le mafaufau; ma ua
avea le Sunami ma faamamā ma le toe fuata’iga. Ua avea fo’i le
Sunami ma faamanatu o le ma’ale’ale o le tatou ola ma le tāua o le
toe faafou o le fua o mea tatou te ‘ave i ai le faamuamua. Ma mea
e lē auga o lo ua fai ma ‘avega e tautaulia ai le faasoa o lo tatou
malosi ma a tatou galuega fai.
Tatou te faamanatu ai le anoanoa’i o le alofa tula’i, e lē gata
i o tatou tagata i totonu o Samoa ae faapea ma ē mai fafo: o a tatou
tama fanau o loo aumau i nuu ‘ese, e aofia ai ma i latou e i ai taleni
faapitoa, o foma’i ma tausi ma’i, o tama ma teine taaalo faapea ai
ma faalapotopotoga o taaloga, o A’oga (aemaise le fanau iti o
a’oga faata’ita’i), o ‘Aulotu a Ekalesia ‘ese’ese, o Kamupanī, o
Faalapotopotoga ma Malo, aemaise le to’atele o tagata sa latou
foa’i lo latou taimi ma le malosi e aunoa ma le faalogologo tīgā po
o le faatilotilo i se taui; ona o le naunau e le gata ina atina’e le
soifua maloloina, le falesa ma le falea’oga, ae sili atu le atina’e o le
alofa, le faamoemoe ma le faatuatua o tagata Samoa.
Tatou te faamanatu ai le galuega punoua’i ma le ma’elegā a
Matagaluega ma Faalapotopotoga ‘ese’ese a le Malo i lalo o le
ta’ita’iga ma le faasinoala a le alii Palemia ma le Kapeneta.
5
O le fe’au o lenei Faamanatuga ma lenei taulaga e faia
faatasi, o le fea’u o le faaolataga ma le faamoemoe. Ona o i tatou
o se atunuu Kerisiano, tatou te talitonu o Keriso lo tatou Faaola,
pei ona fai mai upu o le Pese “o le paolo ou te lafi lilo ai”, o lo
tatou faamoemoe i vaitau o fītā ma tofotofoga. A o tatou manatua
lana galuega togiola, ona avea lea o lenā ma faamāmā ‘avega aua
ua maua lo tatou sulufa’iga ma le faaola totoga e faamamā ma
faafouina ai i tatou. Ona o tatou manatua ai lea ma le alofa
mutimutivale ia ē na maliliu ma ē na lavea’iina ma ē ua faamamā
ma faafouina o latou olaga. Ona o tatou vivii lea i le Atua i le
pese:
Iesu faapaolo mai
Ou te lafi lilo ai
O le toto ma le vai
Na e faamaligi mai
Ou te fia magalo ai
Ma ia faamamaina ai
I le tala faasolopito ma le mau tuufaasolo a Samoa, o loo
manino ma malamalama le tima’i a mātua, ia o tatou iloa talitīgā i
aso vale. Ma ia o tatou aga’i i luma ma le alofa e mamā e lē luagia
e le manatu ‘alu’alua. Sa latou a’oa’o mai, o le Sami o le aiga e ao
ona faaaloalo ma faamagalo i ai. Tatou te manatua lo latou
6
lotomau ma lo latou faitaulaga; tatou te manatua lo latou alofa ma
lo latou talitīgā. Ua avea nei i tatou ma Malo Tuto’atasi ona o le
latou naunau ma le latou faitaulaga.
Ona o i tatou o le fanau a le Atua, tatou te manatua ai, o le
Tuto’atasi ma le Sa’olotoga, e lē māfua ona o se tatou taulaga ae
māfua ona o le Satauro a lo tatou Faaola.
Tatou te auai i lenei aso, e lē ona o se faamanatuga o i tatou
ae o le faamanatuga o Lē na fai mai: Ia outou faia lenei mea ma
faamanatuga ia te a’u.
Ia faatasi mai le Atua i le tatou Faamanatuga.
Soifua.