CUMÜN DA SCUOL RADUNANZA CUMÜNALA Protocol nr. 9

CUMÜN DA SCUOL RADUNANZA CUMÜNALA Protocol nr. 9

CUMÜN DA SCUOL
RADUNANZA CUMÜNALA
Protocol nr. 9
Radunanza dals 12.12.2016, 20:00 - 22:45
Data:
12 december 2016
Urari:
20:00
Lö:
Scuol, sala cumünala (chasa da scoula)
Tractandas
1.
Orientaziun davart il plan da finanzas 2017–2021
2.
Credits per investiziuns (decisiuns)
3.
Preventiv cumünal 2017 (decisiuns)
− fixar il pè d'impostas; proposta: 100 % da l'imposta chantunala simpla
− fixar las taxas d'aua e da chanalisaziun/sarinera sco eir per las immundizchas
− acceptar il preventiv da gestiun e quel d'investiziuns per l'on 2017
4.
Vendita d’immobiglias a persunas cun naziunalità estra (decisiun)
− fixar la quota per l’on 2017; proposta: 100 %
5.
Gurlaina SA, impraist da 600'000 francs cun ün fit dad 1 % per üna dürada da 15 ons
− conceder l'impraist ed approvar la cunvegna d'impraist
6.
Bogn Engiadina Scuol (BES) SA, prefinanziaziun dad 1.3 milliuns francs. L'import vain
restitui dürant ils ons 2019 e 2020
− conceder l'import da prefinanziaziun
7.
Pendicularas Scuol SA, süertà da 2 milliuns francs sco garanzia per l'impraist dal
Chantun (NRP) pel proget d'innaiver Schlivera (condot d'aua Tasnan)
8.
Orientaziun e deliberaziun in vista a la votaziun dals 12 favrer 2017:
− Pendicularas Scuol SA, süertà da 4 milliuns francs sco garanzia per l'impraist da
banca pel proget d'innaiver Schlivera (condot d'aua Tasnan)*
9.
Orientaziuns
10. Varia
Preschaints:
var 130 votantas e votants
S-chüsats:
Cilgia Benderer, Emil Fried, Anna Mathis Nesa, Rudolf Pazeller, Gianna
Rauch Poo, Paul Solèr
Medias:
Benedict Stecher (ANR)
Scrutinaduors:
Jachen Andri Cadonau, Mario Franziscus ed Alfons Stuppan
- 58 -
1.
Orientaziun davart il plan da finanzas 2017–2021
La suprastanza ha repassà il plan da finanzas pels prossems 5 ons. El cuntegna fich bleras
investiziuns giavüschadas chi ston però gnir scurznidas amo per bainquant. Dürant ils prossems duos ons staina augmantar plüprobabel ils debits per 4 fin 6 milliuns francs. Id es plü
radschunaivel da finir las investiziuns cumanzadas co da tillas spostar adüna darcheu. Cun
nouvas investiziuns però esa dad esser fich precaut.
La radunanza piglia cogniziun dal plan da finanzas.
2.
Credits per investiziuns
La radunanza ha dad approvar ils credits per investiziuns chi surpassan l’import da CHF
200'000.00. I’s tratta da las seguaintas:
Pumpiers: autos da piket per Guarda e Sent
CHF 250'000
I fa dabsögn da s’acquistar duos veiculs per la prüm’intervenziun in cas serius per las
fracziuns da Guarda e da Sent. No pudain far quint cun üna contribuziun da la pulizia da fö
da maximal CHF 100'000.00.
Discussiun:
Ingüna.
La radunanza deliberescha unanimamaing il credit per l’acquist dals duos veiculs da piket.
Via Crusch – Sur En da Sent
CHF 700'000
La via da Crusch fin giò Sur En es in ün stadi desolat e sto gnir refatta. Id es previs da far
üna stabilisaziun da cement ed üna surtratta da catram. Quist proget vain realisà in duos
etappas, nempe la prüma dal 2017 per CHF 400’000.00 e’l rest dal 2018.
Discussiun:
Ingüna.
Unanimamaing approvescha la radunanza il credit per la sanaziun da la via da Crusch –
Sur En.
Via da Vallatscha, Tarasp
CHF 450'000
La via da Vallatscha es sglischada ferm aval dürant quista stà. La costa lung la via sto gnir
stabilisada per sgürar l’access a Vallatscha ed Aschera. Id es previs dad investir ün import
da CHF 250’000.00 l’on chi vain e’l rest dal 2018.
L’uffizi da god e privels da la natüra subvenziunescha quistas lavuors cun 77 %.
Discussiun:
Dumonda
Ün votant as dumonda scha quist saja üna consequenza da las strasoras
dal 2015.
- 59 -
Resposta
Id ha plovü ferm eir quista prümavaira e per part saran stattas eir las
strasoras dal 2015 il motiv cha la costa sglischa.
Sainza cuntravuschs sancziunescha la radunanza il credit per la sanaziun da la via da
Vallatscha.
Nouv tractor cun fargun pel mantegnimaint
CHF 280'000
Il veicul cumünal dal cumün da Scuol (MB-Trac) es vegl e sto gnir rimplazzà. Il cumün
prevezza da cumprar ün nouv tractor cun fargun.
Discussiun:
Dumonda
Vegnan invidadas eir firmas indigenas per offrir?
Resposta
Il cumün metta quista cumprita in concurrenza e mincha firma ha la pussibiltà da far ün’offerta.
Dumonda
Ün oter votant dumonda schi nu füss plü favuraivel a cumprar il tractor in
«leasing».
Resposta
Quai es gnü scleri, ma in quist cas nun es quai plü favuraivel.
La radunanza conceda unanimamaing il credit per la cumprita dal nouv tractor cun fargun.
Provedimaint d’aua: colliaziun Scuol-Vulpera
CHF 1'600'000
L’anteriur cumün da Scuol vaiva l’intenziun da fabrichar ün reservuar sü San Jon. Ils cuosts
per quel sun calculats cun 2.4 milliuns francs.
Uossa cha’l cumün es fusiunà as poja eir ponderar la pussibiltà d'unir il provedimaint d’aua
da Scuol cun quel da Tarasp. Uschè pudess furnir Tarasp l’aua da baiver dürant l’inviern cur
cha Scuol ha massa pac’aua. La fracziun da Tarasp ha gnü trais eivnas aua tuorbla davo las
strasoras da l'on passa chi vaivan schmerdà tuot las funtanas. Cun unir ils duos provedimaints pudess Tarasp retrar aua dal provedimaint da Scuol in ün simil cas.
Discussiun:
Dumonda
Ün votant voul savair schi’s pudess spettar cun quista investiziun.
Resposta
Quai nun es pussibel. Il cumün sto metter il condot d’aua da Serras fin in
Gurlaina al listess mumaint chi vain fat il s-chav per la lingia da val da
110/16 kV da las Ouvras Electricas d’Engiadina.
Dumonda
Quants cuosts po spargnar il cumün cun metter las lingias i’l s-chav da
la lingia da val?
Resposta
Las lavuors d’indschegner sun gnüdas surdattas al büro Caprez.
L’indschegner respunsabel chi’d es eir preschaint a la radunanza disch
cha’l cumün possa spargnar 50 % dals cuosts da s-chav.
La radunanza deliberescha sainza cuntravuschs il credit per la colliaziun dal provedimaint
d’aua Scuol - Vulpera.
- 60 -
Aua e chanalisaziun Chaschiners, Scuol
CHF 200'000
Siond cha la surfabricaziun in Chaschiners nu vain realisada es il cumün in dovair dad
allontanar il provisori da l’areal e metter suot terra las lingias d’aua e da chanalisaziun.
Discussiun:
Ingüna.
Ils preschaints sancziuneschan quist credit sainza cuntravuschs.
Proget Clozza, Scuol (in connex cullas strasoras 2015)
CHF 1'500'000
Ils orizis dals 22 fin als 24 lügl 2015 han chaschunà auazuns pro la Clozza. Id es previs da
fabrichar üna serra per dosar var 100 meters sur la punt da Davo Clozza. Quella stuvess
tgnair almain 8'000 m3 material e vess ün mür dad 9 meters otezza. Da la punt da Davo
Clozza fin giò pro la punt da Porta as voula far correcturas vi dal let dal flüm.
Per l’on chi vain esa büdschetà ün import da CHF 250'000.00 per las lavuors da correctura
vi dal let da la Clozza e quai da la punt pro la Senda da Scoula aval.
Il cumün po far quint cun var 50 % contribuziuns chantunalas.
Discussiun:
Dumonda
Perchè nu’s faja il prüm la serra e lura pür davo far las correcturas vi dal
let da la Clozza?
Resposta
La punt da Davo Clozza ha tgnü sü il material e po servir eir amo ün pêr
ons sco serra.
Dumonda
Ün votant es da l’avis cha’l privel da boudas saja blerun plü amunt (pro
la «Boda da Planta»). Nun esa previs da far là ingünas masüras da
sgürezza?
Resposta
Il büro d’indschegner chi ha elavurà il concept ha fat simulaziuns al computer e tenor quai nu faja dabsögn d’otras masüras.
La radunanza conceda unanimamaing il credit pel proget Clozza.
Via forestala Uina Punt Lunga, Sent
CHF 200'000
La Punt Lunga aint illa Val d’Uina ha da gnir refatta. Las contribuziuns chantunalas (uffizi
da god e privels da la natüra) importan 68 %.
Discussiun:
Ingüna.
La radunanza deliberescha sainza ingünas cuntravuschs il credit per refar la Punt Lunga.
- 61 -
Pendicularas Scuol SA:
contribuziun pel proget d'innaiver sül territori da Ftan
CHF 1'140'000
Il plü urgiaint esa da pudair innaiver las pistas da Schlivera fin giò Ftan. Uossa chi'd existan
la nouvas s-chabellera Ftan – Prui e Prui – Schlivera esa inclegiantaivel cha las Pendicularas vöglian pudair innaiver las pistas correspundentas cumplettamaing. Actualmaing
daja be la pussibiltà d'innaiver singuls lös.
I nun es pussibel cha las Pendicularas finanzieschan sulettamaing tuot las investiziuns
necessarias in connex cul innaiver. Perquai exista üna cunvegna culs anteriurs cumüns da
Ftan, Scuol e Sent ch'els portan 2/3 dals cuosts per innaiver las pistas fin giò la val. Il cumün
fusiunà ha surtut quista cunvegna e contribuischa correspundentamaing l’import da CHF
1’140’000.00 al proget actual (innaiver la pista Prui – Ftan).
Discussiun:
Dumonda
Ün votant dumonda scha’ls turistikers as sajan in cleras quant chi’d han
survgni fin hoz e chi survegnan amo dal cumün. Ad el para chi regna qua
üna tscherta grondaschia.
Resposta
Id es gnü investi dürant ils ons dad ota conjunctura. Uossa esa da
mantgnair quels ogets per avair üna spüerta attractiva. Schi nu vegnan
fattas investiziuns schi as pegiorescha la situaziun amo plü ferm.
Il president dal cussagl administrativ da las Pendicularas declera cha las
pendicularas nu sajan gronderas. Fin hoz pajan ellas tuot ils fits pels
impraists. Per finir discha’l cha schi giess mal a las pendicularas, schi
cha quai vess lura eir influenzas negativas per tuot l’economia in illa
regiun.
Ün oter preschaint manzuna cha las pendicularas fetschan fich gronds
sforzs per concuorrer cun otras destinaziuns.
La radunanza es unanimamaing da l’avis da deliberar il credit pel proget d’innaiver la pista
da Prui – Ftan
Center da passlung, Scuol
CHF 300'000
La situaziun actuala dal center da passlung in Manaröl fa pac üna buna impreschiun. Ils
containers sun vegls ed in ün stadi desolat. Ün votant ha fat la proposta da plazzar 8
containers là sülla plazza existenta. 4 containers servissan sco local da butia, ün per
tschairar, ün sco duschas e tualettas, ün pel material da la loipa ed ün sco gardaroba.
Eir schi vain plü o main be megliorà l’aspet da l’areal schi es quist ün’investiziun chi fa
dabsögn. Uschè as vessa üna soluziun satisfacenta pels prossems 10 fin 15 ons.
Discussiun:
Dumonda
Ün votant es cuntaint schi vain realisada almain la soluziun minimala. La
situaziun sco quai ch’ella as preschainta uossa es catastrofala.
Resposta
Il cumün s’es consciaint da quist problem e sperescha cha cun quista
proposta as possa megliorar la situaziun.
Sainza cuntravusch approvescha la radunanza il credit pel center da passlung Manaröl.
- 62 -
Credit supplementar
Provedimaint d'aua Val Lischana, Scuol
CHF 100'000
L’inchaschamaint d’üna da las funtanas nu correspuonda a las prescripziuns superiuras. I
pudess rivar aua da plövgia aint ill’aua da baiver.
Discussiun:
Ingüna.
La radunanza deliberescha unanimamaing il credit supplementar pel provedimaint d’aua
Val Lischana.
3.
Preventiv cumünal 2017
Pè d’imposta pel 2017
La radunanza decida sainza cuntravuschs da fixar il pè d'impostas pel 2017 sün 100 % da
l'imposta chantunala simpla.
Provedimaint d’aua
−
−
Taxa fundamentala:
Taxa tenor consüm:
0.25 %o da la valur da nouv dal stabel (tenor stima ufficiala)
CHF 0.42 per m3
Chanalisaziun / sarinera
−
−
−
Taxa fundamentala:
0.42 %o da la valur da nouv dal stabel (tenor stima ufficiala)
Taxa tenor consüm:
CHF 0.70 per m3
Taxa tenor consüm Nairs: CHF 1.35 per m3
Immundizchas
−
Taxa fundamentala:
0.18 %o da la valur da nouv dal stabel (tenor stima ufficiala)
Discussiun:
Dumonda
Ün votant nun es cuntaint cul sistem da las taxas fundamentalas. Uossa
pajan ils proprietaris da chasas veglias a Scuol blerun daplü co avant la
fusiun culla ledscha veglia.
Resposta
Il capo piglia posiziun e disch chi nu saja previs da müdar il sistem da las
taxas fundamentalas. Quellas vegnan calculadas in %o da la valur da
nouv tenor stima ufficiala. Il cumün voul ramassar dürant duos fin trais
ons experienzas e far lura ün’analisa detagliada. A man da quella faja
lura tuot tenor dabsögn da precisar e far correcturas illas trais ledschas.
I sun entrats passa 40 recuors cunter il quint da las taxas pel 2015. Quels
vegnan trattats prosmamaing. Tschertadüns stuvaran gnir fats bun e’ls
quints stuvaran gnir müdats.
Dumonda
Vegnan müdats tuot ils quints, sch’ün recuors chi pertocca eir ad oters
proprietaris da stabilimaints vain fat bun?
Resposta
Nà. Per quels chi nun ha fat recuors ed han acceptà il quint dal 2015 vain
però müdà lur quint da las taxas a partir da l’on 2016.
- 63 -
La radunanza accepta cun duos cuntravuschs las taxas d'aua e da chanalisaziun/sarinera
sco eir pellas immundizchas sco preschantà.
Gestiun
Dal quint da guadogn e perdita resulta üna perdita da 254’814 francs, quai pro entradas da
43'015’563 francs e sortidas da 43'270’377 francs. Quist es il prüm preventiv fat in basa a
las cifras dal prüm rendaquint cumünal davo la fusiun. La gestiun cul preventiv da guadogn
e da perdita es eir quist on vaira bain egualisà. I resulta ün pitschen s-chavd. Las contribuziuns vi dals implants turistics inchargian ferm eir il preventiv pel 2017. Ün müdamaint haja
dat eir pro las pajas: l'uffizi forestal Macun es uossa scholt, e las trais gestiuns forestalas
dal cumün fusiunà fuorman insembel l'uffizi forestal da Scuol. Implü es gnü scholt eir il
consorzi da scoula A fin Z (Ardez fin Zernez), quai voul dir cha la scoula d'Ardez (culs
scolars da Guarda e d'Ardez) es üna da 5 scoulas dal cumün fusiunà. Las pajas dals
impiegats forestals e dals magisters correspundents figüreschan uossa sco cuosts da persunal dal cumün. Avant ha pajà il cumün contribuziuns a las gestiuns nomnadas.
Il predsch da vendita da la forza as diminuischa a partir dals 1. schner 2017 per 2 raps. La
suprastanza ha decis dad augmantar la contribuziun al public per ün mez rap. Uschè restessan las entradas pel cumün listessas. La cumischiun sindicatoria ha rendü attent cha’l
cumün nun haja ingüna basa legala per far quai. La suprastanza preschainta in favrer 2017
üna proposta per üna ledscha correspundenta chi regla quai. Il suveran po lura decider als
26 marz 2017 lasupra.
Discussiun:
Dumonda
Ün votant es da l’avis cha la cumpetenza per fixar l’otezza da la contribuziun stuvess restar in mincha cas pro la radunanza cumünala (preventiv) e na pro la suprastanza cumünala.
Resposta
Il capo piglia incunter quista proposta per sclerir scha quai saja pussibel
e pratichabel.
Investiuns
Il quint d’investiziuns prevezza pro sortidas da 10’782'000 francs ed entradas da 4’505'000
francs investiziuns nettas da 6’277'000 francs. Las investiziuns surpassan il rom da l'aigna
finanziaziun. Da remarchar sun las seguaintas: la contribuziun vi dal proget d’innaiver (part
per Ftan) da passa ün milliun francs, il proget da Clozza in connex cullas strasoras (250'000
francs) ed il rimplazzamaint d’ün tractor cun fargun (280'000 francs). Eir l’impraist a l’Institut
otalpin Ftan – chi nu gnarà pajà inavo pella fin dal 2017. La via tanter Crusch e Sur En da
Sent survain üna nouva fundamainta/surtratta, la prüm'etappa es previssa pel 2017 e
cuosta 400'000 francs. Pel provedimaint d’aua da Ftan Grond (nouva lingia da transport da
Surtaus fin pro'l reservuar da Ftan Grond) vegnan investits 700'000 francs. La colliaziun dal
provedimaint d'aua da Scuol cun quel da Vulpera/Tarasp (prüm'etappa) cuosta 900'000
francs. Il center da passlung a Scuol dess surgnir üna nouva infrastructura (gardarobas,
post d'infuormaziun, butia) per 300'000 francs.
Discussiun:
Ingüna.
Per finir acceptan ils preschaints il preventiv da gestiun e quel d'investiziuns per l'on 2017
sco preschantà.
- 64 -
4.
Vendita d’immobiglias a persunas cun naziunalità estra
La radunanza cumünala ha da fixar minch’on la quota per la vendita d’immobiglias a
persunas cun naziunalità estra. La suprastanza propuona a la radunanza da laschar quella
quota eir per l’on chi vain sco ingon, voul dir:
−
−
−
per la vendita our da surfabricaziuns cumplettas: 100 %
admetter la vendita dad objects singuls da vendaders svizzers
admetter la vendita dad abitaziuns da seguond man dad esters ad esters.
Discussiun:
Ingüna.
Sainza cuntravuschs approvescha la radunanza la proposta da la suprastanza manzunada
survart.
5.
Gurlaina SA, impraist da 600'000 francs per üna dürada da 15 ons
La tecnica «antiquada» da la halla da glatsch ha chaschunà ils ultims ons gronds cuosts da
mantegnimaint e d’energia. Per redüer quels faja dabsögn da far investiziuns per CHF
603'000.00. A la GUSA mancan las finanzas per quista investiziun e las bancas dan ün
credit be cun üna süertà dal cumün. La varianta da leasing es fich chara e finanzialmaing
na supportabla per la gestiun. Cun l’import chi’s po spargnar energia po la GUSA restituir
l’impraist al cumün.
Perquai dumonda la GUSA al cumün per ün impraist maximal da CHF 600'000.00 cun ün
fit dad 1 % chi gniss retrat in ratas tenor bsögn.
La suprastanza propuona a la radunanza da conceder l’impraist e d’approvar la cunvegna
d’impraist. L’impraist vain sgürà cun üna cunvegna da dret da pegn immobigliar chi vain
inscrit i’l cudesch fundiari sülla parcella dal dret da fabrica 2027.
Tenor la cunvegna ha la GUSA dad amortisar ün import dad almain CHF 40'000.00 l’on, la
prüma jada las 31 december 2019. Il debit ha dad esser pajà inavo al cumün fin il plü tard
als 31 december 2033.
Discussiun:
Dumonda
Perchè esa stipulà i’l contrat ün fit sün 1 %? Nu’s pudessa adattar quel
al fit da banca?
Resposta
Quella dumonda s’ha eir fatta la suprastanza. Per ella esa plü important
cha la halla da glatsch chi serva impustüt a la giuventüna da nos cumün
gnia nüzziada plü bain pussibel. Scha’l fit es massa ot, schi esa da far
quint cha la GUSA sto dumandar üna contribuziun cumünala plü ota.
Perquai es la suprastanza da l’avis da fixar il fit sün 1 %.
La radunanza decida sainza cuntravuschs da conceder a la GUSA ün impraist da CHF
600’000.00 per üna dürada da 15 ons.
- 65 -
6.
Bogn Engiadina Scuol (BES) SA, prefinanziaziun dad 1.3 milliuns francs
Dürant ils ons 2016 – 2020 sun previssas diversas investiziuns i’l BES. I’s tratta da la sanaziun da la tecnica, la renovaziun da las gardarobas e la fasa da revisiun ordinaria. La planisaziun da finanzas dal BES es egualisada dürant tuot la dürada da la cunvegna da
prestaziun cul cumün. Causa quistas investiziuns intensivas tils manca però la liquidità.
Perquai dumonda il BES al cumün per üna prefinanziaziun da raduond 1.3 milliuns chi gniss
retratta in ratas tenor bsögn dürant il 2018. L’impraist gniss restitui cumplettamaing dürant
ils ons 2019 e 2020. Pel BES esa important cha quista dumonda gnia trattada fingià uossa,
per ch’els sapchan schi possan far quint cun la prefinanziaziun.
Discussiun:
Ingüna.
Sainza cuntravuschs accepta la radunanza la dumonda da prefianziaziun dad 1.3 milliuns
francs.
7.
Pendicularas Scuol SA, süertà da 2 milliuns francs sco garanzia per l'impraist
dal Chantun (NRP) pel proget d'innaiver Schlivera (condot d'aua Tasnan)
Sco fingià manzunà survart tractanda 2, pagina 62 (Pendicularas Scuol SA: contribuziun
pel proget d'innaiver sül territori da Ftan) esa urgiaint cha las Pendicularas possan innaiver
las pistas da Schlivera fin giò Ftan. L’impraist dal Chantun (NPR: nouva politica regiunala)
survegnan las Pendicularas be scha’l cumün dà üna süertà, q.v.d. üna garanzia per l’import
da 2 milliuns francs.
Discussiun:
Ingüna
La radunanza decida cun alchünas abstenziuns da conceder la süertà da 2 milliuns francs.
8.
Orientaziun e deliberaziun in vista a la votaziun dals 12 favrer 2017
Pendicularas Scuol SA, süertà da 4 milliuns francs
Sco fingià manzunà survart tractanda 2, pagina 62 (Pendicularas Scuol SA: contribuziun
pel proget d'innaiver sül territori da Ftan) esa urgiaint cha las Pendicularas possan innaiver
las pistas da Schlivera fin giò Ftan. L’impraist da la Banca Chantunala survegnan las
Pendicularas be scha’l cumün dà üna süertà, q.v.d. üna garanzia per l’import da 4 milliuns
francs. La süertà per quist impraist pretenda üna votaziun a l'urna.
Discussiun:
Ingüna.
Ils votants preschaints delibereschan cun alchünas abstenziuns la dumonda per üna süertà
da 4 milliuns francs per mans da la cumünanza d’urna dals 12 favrer 2017.
- 66 -
9.
Orientaziuns
Radunanzas cumünalas, termins
Las prosmas radunanzas cumünalas han lö als 13 favrer ed als 27 marz 2017. Là gnaran
preschantadas plüssas ledschas per tillas deliberar per mans da la cumünanza d’urna.
Implü vegnan suottamissas üna dumonda per üna süertà pel Center da cultura Nairs e la
cunvegna da prestaziun culla GUSA.
Turissem Engiadina Scuol Samignun Val Müstair, directer
Per finir ingrazcha il capo ad Urs Wohler chi banduna sia plazza sco directer da la
destinaziun da turissem (TESSVM) per la fin da l’on. Dürant seis 11 ons ch’el es stat directer
s’ha el ingaschà ferm per la TESSVM. El til giavüscha tuot il bun in sia nouva sfida e
sperescha cha no til possan salüdar in avegnir sco giast qua pro no.
La radunanza respuonda quai cun ün grond applaus.
10. Varia
Ingün nu piglia il pled tant cha’l capo giavüscha a tuot ils preschaints ün bel temp d’Advent,
bellas Festas da Nadal ed ün bun on nouv.
Il capo:
L'actuar:
Christian Fanzun
Andri Florineth
- 67 -