Scusa_Bambin_Ada_Lauzi
Transcript
Scusa_Bambin_Ada_Lauzi
Scusa Bambin poesia da Denanz al presepi Ada Lauzi Natale 1988 Sarà per via de quell camisorin legger legger, che te vestiss de biott, sarà la paja che te spong de sott e chi manitt che paren giamo in cros, ma (scusa, veh, Bambin! ) Te gh'hee proppi el faccin de malmostos! Mì Te capissi, Tì te gh'hee reson: schisciaa in quell cavagnoeu con foeura i pee e tutta quella gent che inanz e indree Te boffa in sul faccin per devozion. E fudess domà quell... invece... o giust! Par che gòden on mond, che catten gust a passatt cont i man dessora e sott e se fermen (che vizzi!) in sui pescitt, (sarà che mi patissi de galitt) fussi al Tò post, je ciapparia a sberlott! ... e poeu chì lanternitt sul Tò crappin che se impizzen, se smorzen sora e a bass, coloraa come i pagn de l'Arlecchin che fann del tò Natal on sabet grass... Te disaree Bambin che son cattiva, che invece de pregà troeuvi de dì... Ma, dì la verità, Te gh'hee ona piva... che anca Tì, Te la penset come mì. Vegnessen a trovatt 'na volta in men, lassassen perd de fatt patì i galitt, se guardassen in torna... quanto ben... domà vorè... ma lì, saren i oggitt. Te gh'heet in ment la sera de Natal? Lor duu a brazzett, in viagg per la fonzion: loden, vison, borsetta e cappellin, dedree, a doo bass, patida e rassegnada la mamma d'on bagai "perduu per strada". "Te la cognosset? - Sì, ma slonga el pass... tant gh'è nagott de dì, poeu... se sa mai... Te veden ben vestii ... - trovaremm de setass? e proppi in sul denanz, che voeuri perd nagott, l'è insci bella la Messa a mezzanott! E con la stessa tolla de Pilatt hinn vegnuu chì a pregatt, de "bon cristian". Eh! Bambinell, forsi sarà per quell ch'el tò faccin l'è gnecch ... ... Còsa? Còsa t'hee dii?... che mì che parli tanto... eh, già... l'è vera. Di volt gh'hoo 'na manera... Te gh'hee proppi reson, provvedaroo, ma intant adess, adess mi Te ringrazzi de tuscoss e son contenta che gh'hoo voeuj el goss. Ada Lauzi 1 di 1