Fi e flomma an ples gros

La Pagina da Surmeir
66 avla annada
Nr. 27
5 da fanadour 2012
10
ORIGEN
Riom: premiera per l’opra «Igl furn da fi»
Fi e flomma an ples gros
Per part vign igl text dall’opra projecto sen las miraglias viglas digl casti uscheia tgi è simpel d’ancleir igl cuntign dall’ovra
da Benjamin Britten.
● G.N.S. Bler applaus per cantadours e musicists siva dalla
preschentaziun perfetga dalla pi
nova ovra tgi Giovanni Netzer, igl
intendant digl Origen Festival
Cultural, ò insceno.
Er per l’opra «Igl furn da fi» dat
ena istorgia digl vigl testamaint la
basa a Giovanni Netzer per sa
drizzar agl public cun ena ovra tgi
ò eneda daple incanto igl auditori
tar la premeira aint igl casti da
Riom. Tar igl concept da teater
digl intendant digl Origen Festival
Cultural, totga an general ena
ferma colliaziun da vigl e nov.
Chegl è adegna puspe sa musso
siva tgi Giovanni Netzer ò clamo
an veta igl festival cultural, tgi è
da preschaint cun radond 12 000
visitaders igl pi grond digl
Grischun. Tgi igl reschissour vo
sias atgnas veias cun las istorgias
biblicas e preschainta chellas agl
public an ena versiun moderna e
digl preschaint, conferma er
adegna puspe igl maletg da tribuna digl casti da Riom. Gist perveia digl plaz limito è Giovanni
Netzer restranschia ferm e tuttegna gartegia ad el adegna da dar
agl maletg dalla tribuna ena noda
fitg particulara. Chegl vala er per
la pi nova ovra, l’opra «Igl furn da
fi», noua tgi igls treis giovens gidias èn igl tema central. Piglia
chella istorgia digl vigl testamaint
e mess chella an notas, ò igl cumponist engles Benjamin Britten.
Tant seia pero detg, sias cumposiziuns èn tot oter tgi musica e cant
popular e chegl vala er per l’opra
tgi è da vaseir igl proxim taimp
aint igl casti da Riom. Intuno
chella ovra ò digl reminent
Benjamin Britten igl onn 1966.
Gist curt tar l’istorgia
Igl feil cotschen digl Origen Festival Cultural è da preschaint igl
martgea oriental Babylon. Cun
cant, musica, solt e teater lascha
Giovanni Netzer reveiver an diversas modas e manieras singulas
istorgias biblicas tgi dat digl martgea oriental. Egna da chellas,
chella digl profet Daniel, ò er do
igl fons all’opra «Igl furn da fi», tgi
ò gia premiera venderde passo
aint igl casti da Riom. Lagn gist resumar curt igl cuntign da chella
ovra tgi cozza radond 90 minutas.
Treis giovens gidias refuseschan
dad adorar igl Dia da Babylon ed
igl rètg Nebukadnezzar decida da
lascher ardar els treis veivs. Alla
fegn vignan els pero betg schinavant, cun en anghel spindrar igls
treis giovens gidias dalla mort
crudevla aint igl furn.
Tschintg paders ed en anghel
Er tar la pi nova opra tgi Giovanni
Netzer preschainta, lavoura el ple
u manc angal cun elemaints sim-
pels. Igls novs quaders signifitgeschan la pussanza digl rètg Nebukadnezzar e sen chels lascha el interpretar igls tschintg cantadours
e la cantadoura l’ovra singulara.
All’antschatta ed alla fegn cumparan els scu paders e sotsigneidas
vignan chellas dus scenas cun
cant choral da belezza. Ansomma
ins dastga deir tgi la prestaziun
cantica è fenomenala e tgi igls
tschintg omens e la donna dattan
cun lour vouschs igl dretg ambiaint e la dretga expressiun alla
istorgia digl vigl testamaint.
Mintga scena è tar Giovanni
Netzer eneda daple fitg stilisada e
moderna e gist chegl dat ansemen
cun las miraglias viglias digl casti
en caracter tot spezial all’ovra da
Benjamin Britten. An chel senn è
la simbiosa da vigl e modern perfetga scu chegl tgi nous cunaschagn gio dallas ulteriouras
ovras tgi Giovanni Netzer ò insceno cun success. Igl cumponist
engles Benjamin Britten pretenda
an chella ovra betg angal concentraziun cumplagna digls cantadours e dalla cantadoura, mabagn er digls musicists e dallas
musicistas. Er an chella tgossa ò
igl pitschen orchester persvadia
fitg cun adegna puspe dar allas
scenas sen tribuna igl dretg bol.
Chel tgi procura alloura per unitad cumpletta è scu adegna Clau
Scherrer, igl directour musical
digl Origen Festival Cultural. Er
venderde passo ò el dirigia cun
ena calmezza ed ena perfecziun
bravurousa, orchester ed ensemble e do a tots la duevla siertad.
Alla fegn procuro per fi e flomma
on betg angal igls treis giovens gidias cun aveir dad eir aint igl furn,
mabagn er Ursula Degen, tgi è
stada responsabla per la gleisch e
procuro cun chella pigl dretg
effect sen tribuna. Fi e flomma è
dantant er sto igl public tgi ò remunero la prestaziun excellenta
cun applaudar per en pi lung
taimp.
Alla fegn è igl anghel chel tgi spendra igls treis giovens gidias dalla mort crudevla. (fotos Benjamin Hofer)