1 O manu felelei i le Tusi Paia 1 Manu felelei o le Feagaiga Tuai
Transcript
1 O manu felelei i le Tusi Paia 1 Manu felelei o le Feagaiga Tuai
1 O manu felelei i le Tusi Paia Manu felelei o le Feagaiga Tuai. [Saunia apoapoaiga o le vaiaso: Rachel Montagu] E faiaoga Rachel i gagana o le Tusi Paia, le faa-Iutaia ma le faa-Eperu. E faiaoga ina ia malamalama tagata a’o’oga i gagana o le Tusi Paia Eperu, e aunoa ma le faalagolago i ni faamatalaupu, a ia faitau i ai ma le lagona fiafia. Ua tele tausaga o ‘auai i fetufaa’iga e faasoa ai lagona e faatatau i talitonuga faale-faatuatua. Sa a’oa’oina o ia ina ia avea ma Rapi i le Leo Beeck College, Lonetona. E mau o ia i Lonetona ma lona to’alua, Francis Treuherz, o se foma’i o gasegase o le mafaufau, ma le fanau tama e toalua; faatasi ma le fale-tusi (library) e silia i le 15,000 le aofai o tusi e i ai. Aso Sa, Oketopa 4, 2015: “Faatalitali i se iuga faatasi ma le tatalo.” Tusi Faitau: Kenese 8:1-12. Matua - Kene.8:10-11 Ona toe faatalitali lea o ia i nisi aso e fitu, ona toe tuuina atu lea e ia o le lupe ai le vaa; ua toe foi mai ia te ia o le lupe i le afiafi; faauta foi, o i lona gutu le lau olive mata; ona iloa ai lea e Noa ua papa’u le vai i le lalolagi. E tele ituaiga o manu eseese i laufanua o Isaraelu, e tele foi ituaiga eseese o manulele e felelei mai i lea itu ma lea itu o le lalolagi ma mapu ane i laufanua o Isaraelu, e tusa ma le 500 miliona ituaiga eseese e felelei ma ui ane i Isaraelu pe faalua i le tausaga. Ua avea le masani i uiga o manu felelei, ma pogai ua faaaoga ai pea manu felelei i le Tusi Paia, e le gata o ni tala faa-faatusa, a o tala e faatatau lava i le natura o manu felelei. Taluai o le tala i le Lolo, e foliga tutusa ma isi tala faamaumau mai isi talitonuga faa-anamua, ua manatu ai: O le lofia i le vai, o se ata faatusa lea na tu’ugutu mai i lea auga tupulaga ma lea auga tupulaga. Ua tusia i le Tusi Paia, o le Lolo o se fuafuaga ua saunia e le Atua lava; na silasila atu le Atua i lana foafoaga ua lelei, a e ua faaleaga e le tagata ina ua fe’ese’esea’i ma fetaua’i, ona suia ai lea e le Atua o ana fuafuaga. Ua faaumatia e le Atua manu felelei uma na faia, o manu o le vao faapea ma tagata; se’i vagana le vaa o Noa, ma lona ‘au aiga ma le ta’ilua mai ituaiga o manu eseese uma lava. O le oreva, o le manu e ola i tino o manu-mamate, e mafai ona ola e aunoa ma le faalagolago i le vaa o Noa; aua e mafai ona ola faalagolago i tino-mamate o lo o opeopea i le suavai o le Lolo. Ina ua toe foi mai le lupe ma le lau olive i lona gutu, ua iloa ai iina e Noa ua maui le suavai ma ua mafai ona faaauau le ola i le fogaeleele. Tatou te mulimuli i le poloaiga a le Atua, e pei ona fetalai mai, “e le toe tupu” se lolo, a e faatupu le filemu i le lalolagi. A e ua avea nei le ata o le lupe ma le lau olive i lona gutu ma faailoga o le nofo filemu. Tatalo: Ia avea pea le Alii le Atua e fai ma faatumutumuga o le ola fifilemu; ia tatou talosia le nofo filemu o Isaraelu ma le lalolagi atoa. Amene. 1 Aso Gafua, Oketopa 5, 2015: “O le manai mai le lagi.” Tusi Faitau: Esoto 16:9-21 Matua - Esoto 16:17-18, Ua faapea lava ona faia e le fanauga a Isaraelu, ua latou faaputu lava, ua tele a isi, a ua itiiti a isi. Ona latou fuatia lea i le omera; o le ua tele ana mea e leai sana mea e toe, o le ua itiiti ana mea, e le faalelava foi ana mea, ua latou taitasi ma faaputu e tusa ma lana mea e ‘ai ai. I le tusi o Ieremia, ua fetalai mai le Atua, na faaliliuina mai le gagana Eperu, “... Ou te manatua oe, o lou agalelei mai ina o e teine muli, ma lou alofa i ona po sa e faufautane ai, ma lou mulimuli mai ia te a’u i le vao, o le nuu e le totoina ai ni mea.” (Ieremia 2:2b). E ono fesiligia lenei folafolaga, aua tatou te mafaufau i lo latou muimui ma faitio, lo latou le usiusitai ma le le mulimuli tonu i Tulafono e Sefulu lea na tuuina mai a o fesea’i i le vao. Peitai, e ese ma le matagofie o le ‘aumaia e Ieremia o lenei faamatalaga, ona ua faaalia ai le alofa e le faatuaoia o le Atua, ua atagia ai: E ui ina le usiusitai ma le faamaoni Isaraelu, a e le ave’esea ai le alofa faale-Atua. Ua faaalia i le Esoto 16 moomooga o le nuu i le tausiga lelei a o i Aikupito, ua latou fetuu i o latou ta’ita’i; ua faatusatusa le faaletonu ua i ai nei, ma le nofopologa a o saili se sa’olotoga. Ua o’o ina tali mai le Atua, o ta’umafa e tele ua auala mai i le salu: “ua a’e mai lea o le salu, ua ufitia ai le togalauapi,” (16:13). E le tuulafoa’iina e le Atua ona tagata, e ui lava ina faigata ona latou talitonu ma faatuatua. O le manai, o le vavega i mea’ai, a e le faatapula’a na o se mea’ai. Ua foai mai e le Atua ia a’oa’oina ai le ola amiotonu ma savavali faamaoni i le tausiga o le aso sapati---ia na o le Aso Faraile e le faatapulaa ai le faaputuga o mea’ai, a e mafai ona faasili i le aso e tasi, ina ia mafai ai ona lava mea’ai mo le isi aso e malolo ai ma faamamalu le sapati. Ia tutusa le avanoa mo tagata uma, tusa pe taumafai e faaputu faasili, po o le le mafai foi ona faaputu e pei ona tatau ai. E toatele le ‘au faamatala upu o le gagana Iutaia mai anamua, ua latou faapea mai, o le tasi o faaaliga uiga ese o le vavega i mea’ai, o le manai lea: O le faaosofia lea o le mana’o e tusa ma le mea ua loto i ai. A o i le vao e tutusa tagata uma, o le ola foa’i o lona uiga: o le mau’oa sa ‘ai i mea’ai lelei e tele i Aikupito, ua faamatala atu le felanulanu a’i o mea’ai ia i latou sa tele ina faatapulaa a latou mea’ai ina o faapologaina, ma le faamoemoe e maua faamanuiaga eseese mai le manai. Pe mafai ona faamaonia lea manatu? Atonu e leai, peitai, o lenei tala ua a’oa’o mai ai le alofa, le fesoasoani ma le mafuta faatasi. Tatalo: Ia tatou faafetai i le Atua ona o ta’umafa ma vai e tele ua tatou maua. A e le gata i lea, ia faafetai ona o le ola e faavavau ua saunia e le Atua e faamalie ai o tatou mana’oga uma. Amene. 2 Mafaufauga Loloto: E tele atunuu ua lelei le tamaoaiga, ua latou lafoa’i i le tele o taumafa ma le suavai; ma isi foi tamaoaiga e aoga mo le tagata. Ia taumafai e faatau na o mea e tusa ma tatau mo le aso po o le vaiaso. Aso Lua, Oketopa 6, 2015: “Vavega i mea’ai ua saunia mo le perofeta fia ola.” Tusi Faitau: 1 Tupu 17:1-6 Matua - 1 Tupu 17:2-4, Ua oo mai foi le afioga a le Alii ia te ia, ua faapea mai, Tuu ia lenei mea, ma e liliu ane i le itu i sasae, ma e lafi i le alia o Kirita, e feagai ma Ioritana. E te inu foi i le alia; ua ou fai atu foi i oreva latou te fafaga ia te oe i lea mea. Ua tatou iloa i le Samuelu ma le Tupu le amataga o le galuega faaperofeta ua fai ma vaega tuma’oti. O nisi o perofeta sa na o ni ‘avefe’au e faailoa atu le finagalo o le Atua i tagata; a o isi e faapei o Elia, ua faaalia le vavalalata ma le Atua e iloa i le faatinoina o vavega. Ua faaalia ia Elia, e le gata sa na faia vavega, a e sa tausia ma ola i vavega: muamua sa tausia o ia e oreva i le alia; na tausia foi o ia e le fafine ma sina suauu itiiti, a e mulimuli ane ua le faaitiiti se ia o’o i le iuga o le faasalaga o le tupu o Aapo---ua leai se timu e pa’u i le laueleele. O le manulelei o le oreva, e faalagolago lona malosi i isi manu e ola ai. Ua ta’ua i suesuega a fomai faapitoa mo manu felelei, o le oreva o se manu e tausi-tama (faa-failele) lelei. O lenei ua filifilia e le Atua le oreva na te fafaga i le perofeta o Elia se ia mavae le lamala. Sa poloaiina Elia e alu i Sarefata. Ua tusia i le Tusi Paia (Feagaiga Tuai) faatonuga e uiga i manu eseese, o manu e le tatau ma manu e lelei ona faaaogaina mo le manuia o le tagata (Levitiko 11, Teuterenome 14). Ua tusia i le Teuterenome 32 se faatusa o le aeto e faamalumalu i lana toloa’i, o le ata faatusa lea o le tausiga alofa faale-Atua i lona nuu o Isaraelu. O Rapi Hugo Gryn, o se tasi o o’u faiaoga, sa na faamatala se tulaga sa i ai i le nofoaga sauniuni mo le oti, ina ua vaai atu i lona tama ua faaaoga le ga’o mo mea’ai e faamumu ai moliga’o mo le tapuaiga. Fai mai upu a lo’u tama, “E mafai ona e ola i le tolu vaiaso e aunoa ma se mea’ai, po’o le tolu itula e aunoa ma se vai inu; peitai, e le mafai ona e ola lelei i se tolu minute e aunoa ma se faamoemoega.” O mea’ai na avane e le oreva ina ia faamalosia ai Elia, o lo’o i ai faatasi ma le faamoemoe---o lo’o faatasi mai pea le Atua e lagolagoina lona faafeagai ai ma le tupu o Aapo. Tatalo: Faafetai le Atua mo au faamanuiaga ua matou ola ai i aso taitasi a o matou i ai i le lalolagi na e foafoaina mai le amataga. Amene. 3 Mafaufauga Loloto: Ia saili sou taimi e te fesoasoani ai i se ua manaomia se fesoasoani, i mea’ai ma vai, tupe po’o se faamafanafanaga. Aso Lulu, Oketopa 7, 2015: “E matua ofoofogia lava.” Tusi Faitau: Iopu 39:12-18, 26-30 Matua - Iopu 39:26-27, O le atamai ea mai ia te oe, e lele ai le nesa, ma falo atu ai ona apaau i le itu i toga? O lau upu ea e lele maualuga ai le aeto, ma fai ai lona ofaga i le mea maualuga? Ua faamanatu mai e Iopu le lalolagi faigata ma ofoofogia, o mea leaga e ono tutupu i tagata lelei. E sili ona taua, o se fautuaga: Pe a o’o mai faigata ma puapuaga, e moomia se faamafanafanaga e mapu ai le ua mafatia, a e le ina ia tatou lelei ai. E le tau faailoaina igoa o e sa agalelei ia Iopu. O le ogoogo o faigata ua mafatia ai Iopu, ua latou faapea ane ai o uiga masani ia o le soifuaga---e faamanuiaina le amiolelei a e faasalaina le amioleaga. Ua latou manatu, ua faia e Iopu se agasala e sili ona leaga, e tatau ia te ia ona ta’utino lona sese. Peitai, ua iloa e Iopu na te le’i faia lava se mea leaga. Ua iloa e Iopu le lalolagi ma ona faigata, o le Atua e silisili lona poto i le tagata ma mea uma lava. Na fetalai le Atua ia Iopu, ua iloa foi e ana uo e tonu lava Iopu. O se lauga umi lava lenei ua faapuupuuina ina ia tatou te faitau i ai, o le Atua ua na faailoa le lalolagi e tumu i mea faigata ma le ofoofogia. Silasila i tusi e faatatau i manu, o ata tifaga po’o se isi lava faamaumauga e faatatau i manu. E tele uiga e faatatau i manu: ituaiga eseese, o lanu, o leo, ma foliga eseese e tele, o se mea lea e ofo ai. E le tioa ona faailoa e le Atua lenei tulaga ofoofogia i e sa faamafanafanaina ina ia latou iloa. I nei ona po, ua faaopoopo le iloa ma le malamalama e ala i suesuega ma sailiiliga faasaienisi, ua iloa atili ai le ofoofogia o galuega mamana a le Silisili Ese, e faapei ona a’oa’o mai le Tusi Paia. Tatalo: Le Atua e, ou te valaau atu ia te oe; ia e faafofoga mai ia te a’u; ia e liliu mai ou fofoga ia te a’u, ia e faafofoga mai i a’u upu. ... Ia e leoleo mai ia te a’u e pei o le tamatama’i mata; ia e natia a’u i le paolo o ou apaau. (Salamo 17:6,8). Mafaufauga Loloto: Saili ane i le “website” a le faalapotopotoga o le Society for Protection of Nature in Israel, e te iloa ai le tele o ata mananaia o manu felelei eseese. 4 Aso Tofi, Oketopa 8, 2015: “Lele sa’oloto.” Tusi Faitau: Salamo 84:1-12 Matua - Salamo 84:3a-4, E moni, o le manu lele ua maua se fale, o le pe’ape’a foi ua maua sona ofaga e tuu ai lana toloa’i, ... Amuia i latou ua nonofo i lou fale; latou te vivii pea ia te oe. O le salamo lenei e usuina i faaipoipoga faa-Iutaia, e faamanatu mai foi lenei i le tele o faaipoipoga ou te taitaiina ma faapaiaina. Ua faavae le faaipoipoga faaIutaia i le silafia lelei e i laua ua osifeagaiga ona fausia le mafutaga i le olaga faa-Iutaia ma ia tausia lelei o a la ta’utinoga i le alofa o le tasi i le isi. O le autu tonu o lenei salamo, ua faatatau i le maota o le Atua ma le olioli i le mafutaga ma le Atua. Ua tusia i le tusi, Bird Walk Through the Bible, e faapea, ua faatusaina e le fai salamo o le pe’ape’a: laitiiti, fiafia i le aiga, e ola latalata i le foga’ele’ele, e felelea’i mai lea vao i lea vao---a o le manu lele, e lele i le ‘ea mo itula e tele, na ona mapu ane teisi e asi lana toloa’i. O le upu Eperu ua faaliliu mai ai le upu “pe’ape’a” ua faatatau lea i manu; a e o le upu ‘manu lele’ ua faatatau lea i le sa’olotoga. Ina ua faasa’olotoina mai Isaraelu mai le nofopologa i Aikupito e le Atua, o le sa’olotoga lava lea e tapuai ai ma auauna i le Atua. O le mea lea, o le manu lele: O le sa’olotoga e lele atu ai i itu e fa o le lalolagi, ma le faamoemoe e toe foi mai faatasi i le tausaga i lona ofaga. O le ata faatusa lea o le asiasi atu o auga-tama i tausaga taitasi e mafuta i le Malumalu e auauna ai i le Atua, ma fiafia ai i le sa’olotoga e tapuai ai. O foliga o le pe’ape’a, e atagia ai le faapotopotoga o e o lo’o galulue ma auauna i fanua ma tapuai i le Atua i aso fai pea. I le Tusi Paia Eperu, o le upu ‘ofaga’ ua tusia i le mata’itusi tele, ua faatatau lea i le taua o le nofoaga e mapu ai ma mafuta faatasi ai ma le Alii le Atua, e avanoa pea mo ‘aumalaga faale-agaga. Tatalo: E fiafia i latou e mafuta i lou Nofoalii e faavavau. Latou te vivii, e olioli foi ma fiafia i le mapusaga ua saunia mo e ua talitonu ma faatuatua i le faaolataga ua uma ona saunia. Amene (Faitau le Salamo 84, 144). Mafaufauga Loloto: Pe mafai ona e fausia se nofoaga i lou aiga po’o lau ekalesia e faaleleia atili ai lau auaunaga i le Atua? I lau tatalo po o lou agalelei atu i nisi? 5 Aso Faraile, Oketopa 9, 2015: “Ia faapei o le malosi o le aeto.” Tusi Faitau: Isaia 40:25-31 Matua - Isaia 40:31 A o e faatalitali i le Alii, e toe faafouina lo latou malosi; latou te sii a’e apaau e pei o aeto; latou te femo’ei, a e le vaivai; latou te savavali, a e le tigaina. Ua faaalia i nei fuaiupu se valoaga ua leva ona foufou mai. Ua faailoa e Isaia ua leva ona finagalo le Atua i le ‘au perofeta ia nofo filemu ona tagata se’i faailoa atu le tala lelei: ua uma le tafeaga i Papelonia o le a toe atia’e le laueleele. Atonu o lo’o i ai le manatu faaletonu i lenei folafolaga pe mata e auala mai ai ni faamanuiaga. E umi ma faigata le faigamalaga; e ono tutupu mai ni faigata, peitai, e i ai pea le faamoemoe o le a i ai puapuaga. I le amataga o le Mataupu, ua faailoa e Isaia le faigofie o le faigamalaga. Ua faamatala e Isaia le tele o ata faatusa o le Atua, e faapei o se leoleo mamoe e taitai filemu i le lafu i luga o ala (fuaiupu 11). Ua faamalosi loto mai Isaia, ua faia ia mea aua o le Atua e le vaivai lava, e leai se tapulaa e gata ai lona silafia o mea uma, e mataala fofoga o le Alii e silasila i e ua tigaina ma mafatia. O i latou e i ai le faamoemoe mo le ola faavavau e toe faafouina lo latou malosi; ua faaaoga e Isaia upu e faatatau i le vaivai ma le tigaina, e faapei ona faamatalaina ai le Atua malosi i le fuaiupu 28. O le faatusaina o le Atua, i lona paia po o le le vaivai foi, o se autu iloa so’o lea i le Tusi Paia. O foliga malosi ma uiga faaalia o le aeto i lona lele a’e i le ‘ea, ua fai lea ma faatusa o le faamoemoe lumana’i o le nuu o le Atua. E le’i mamao se va talu ona mae’a le fonotaga a Malo Aufaatasi, tausaga 1948, lea na pasia ai le faavaeina o le malo fou, State of Israel, a e auina atu loa le fuavaalele e la’u mai ai tagata Iutaia (Yemen’s Jews) ina ia nofoia le malo fou ua faavaeina. O le toatele o tagata Iutaia (Yemens) ia sa fasiotia i taimi o le taua ua mavae (WWII). Sa atuatu vale i latou, aua o se vaaaiga fou lenei ini vaalele se tele. Peitai, e toatele ua iloa le Tusi Paia o lo o faamatala ai le tala i le Esoto ma le feagaiga osia, “... na ou ava’e ia te outou i luga o apaau o aeto, ...” (19:4b), faapea ma le Mataupu lenei o le Isaia. O lo’o faamanatuina pea e Iutaia le faasinoga o le Sapati (consolation sabbath), e sosoo ma le faamanatuga o le faatafunaina o le Malumalu. Tatalo: Faauta, o le Atua, o lo’u faaolataga ia; ou te faatuatua, ou te le fefe; aua o le Alii le Atua, o lo’u malosi ia ma la’u pese; ua avea foi o ia mo’u faaolataga. Tou te utu vai ma le olioli i vaipuna o le faaolataga. (Isaia 12:2-3). Mafaufauga Loloto: Fai sau lisi o mea e te vaivai ai (20), ma mea e te malosi ai (30): Faamata e mafai ona faatutusa i lou olaga? 6 Aso Toonai, Oketopa 10, 2015: “O le koli ma le laau.” Tusi Faitau: Ieremia 17:5-11 Matua - Ieremia 17:11, Ua moe le koli i fua, a e le ni ona fua; e faapea o ia e maua le ‘oa, a e le maua i le amiotonu, e tuu e ia ana ‘oa i le tautuluaga o ona aso, a e avea o ia ma vale i lona gataaga. Ua folafola atu e Ieremia le faamasinoga tonu a le Atua, aua e tasi le pule o ia foi na te faatafeaina i latou e tusa ma a latou agasala. Sa finau Ieremia i folafolaga a perofeta pepelo, ua latou fai mai e leai se mea e tupu; peitai, o lo’o mana’omia e tagata se tala o le filemu. Ua iloa o le a o’o mai le to’asa, o lea ua mana’omia ai se fe’au vave, se feau alofa e tusa ma le galuega faaperofeta a Ieremia. Ua faailoa e Ieremia e saili le Atua i le loto ma le mafaufau, ina ua iloa e i ai le eseesega o le faalagolago i tagata ma le talitonu i le Atua silisili ese. O le koli (o lona uiga i le gagana Eperu, “manulele tautala”), e i ai le talitonuga: o le manulele e ta’oto i faamoega o isi manu ma fofoa ai ana tama. Ua faatusaina e Ieremia lenei ata, i le tagata e ‘ave faagaoi le tamaoaiga a isi, ma o le faatinoga lava lea o le amioletonu. Na fai se faamatalaga a le tama’ita’i o Virginia Holmgren, e faapea: O le tala i le koli ma ona uiga ua faatatau lea i le tuu o ni fuamoa i totonu o le isi ofaga e tua’oi ane, ona alu ane lea i ai o se isi koli e faafofoa ma saga faateleina ai pea le aofai o tama’i koli. E le taumate e le afe i isi ofaga, a e aafia na o isi. Ona ou manatunatu ai lea i a matou talatalanoaga ma le tama o lo’u tama, e faatatau i uiga o le manulele o le koli: Pe a fai e faatusa i matou o manu laiti, ua matou ola ona e le o le mana’o tele, a e ona o le lelei ma le saogalemu o le tausiga faa-tina. Tatalo: Le Alii e, le faamoemoe o Isaraelu, e faamaina i latou uma o e lafoai ia te oe; o i latou e liliu ese ia te a’u e tusia i latou i le eleele, aua ua lafoaiina e i latou o le Alii le puna o vai ola. Le Alii e, ia e faamalolo mai ia te au, ona malolo ai lea o a’u; ia e faaola mai ia te a’u, ona faaolaina ai lea o a’u; aua o oe ou te vivii i ai. (Ieremia 17:13-14). Mafaufauga Loloto: A’oa’o atili i tala i manulele ma matamata i tusi e uiga i manulele, vaavaai i ata ma tifaga i manulele; po’o le YouTube foi ma maimoaga i tama’aga o manulele. Mafaufau e sauni ni mea’ai e tausi ai manulele. 7 2 O manu felelei i le Tusi Paia Manu felelei o le Feagaiga Fou. [Saunia apoapoaiga o le vaiaso: Jan Sutch Pickard] O Jan o le fatu solo ma tauloto, o le failauga o tala e nofo tumau i le nuu o Isle of Mull. O le Failauga i le Ekalesia Metotisi, e avanoa e lauga sa’oloto i aulotu o le Ekalesia i Sikotilani. O ia o le totino o le faalapotopotoga soofaatasi i le Itumalo o Iona, sa auauna ai mo le ono tausaga. Taluai nei sa fai ma Faatonu i le Abbey, e fiafia e galue i le faaaogaina o auala fou e feagai tonu ma lagona o le toatele. Ina ua tuua e Jan ia Iona, na faalua ona tautua o ia i le polokalama o le Ecumenical Accompaniment i Palesetina ma Isaraelu. Aso Sa, Oketopa 11, 2015: “Ua faasa’olotoina.” Tusi Faitau: Ioane 2:13-17 Matua - Ioa. 2:16 Ua faapea atu foi o ia i e faatau lupe, “Ave ese ia nei mea; ‘aua le fai le fale o lo’u Tama ma fale faatau ‘oa.” Se’i mafaufau ane lava: o le fuli’eseina o laulau, ta’ape solo o tupe, ua le iloga se mea e felelei solo i ai. A o le nofoaga lenei e faia ai tapua’iga, ua le iloga le pisapisao ma leo eseese a e maise o leo o faafinauga. A o a ni mea sa faalogoina i totonu o le Malumalu i aso ia ua tuana’i? O fefaataua’iga o povi, o mamoe, o lupe foi o mea sa sailia ai tupe ma lo latou tamaoaiga faaletino. O foliga o le ola sa’oloto. E le na ona pau ai lea---o manufelelei ua matalatala mai totonu o faamoega, ua felelei a’e nisi i le tumutumu o le Malumalu---o le faailoga, o se maota taualoaina i tausaga e tele a ua matua faaaoga sese i mana’oga faale-tagata ma le ola tu’inanau. Mo le lautele o e ua mafuta mai, sa faimalaga mai i itu eseese o le atunuu, na faatasi mai ona o le fia tapua’i, a ua tuutuu ‘ese ma o’o lava ina aafia i fefaataua’iga. A e ui i le pisapisao, na o’o lava ina to’amalie ma taaligoligoa totonu o le Malumalu. O le a nei se lagona ua o’o ia te i latou? O le fe’au o le Tala Lelei na te tosina mai laau ma vao faapea i manulele, o le faailoga e le tuulafoa’iina e le Atua lana foafoaga. O tusi faitau mo lenei vaiaso, o loo faamanatu mai ai ia te i tatou manulele i ona po a o afio Iesu i le lalolagi---a e maise lava i ana a’oa’oga. O tala i le faasa’olotoina o manulele, o le faatusa o le afio mai o Iesu e ‘aumai le sa’olotoga i o tatou agaga ma le faamoemoe lumana’i o le tagata sa’ili i le manuia e faavavau. Tatalo: Le Atua Mamana e, se’i e soloi’esea faamasinoga le tonu ma le faailoga tagata, ia e faatupu le amiotonu ma le alofa i le va fealoa’i o tagata, ma ia matou maua le nofo fealofani e faavae i lau amiotonu ma matou maua le sa’olotoga e fiafia ai. Amene. 8 Aso Gafua, Oketopa 12, 2015: “Ia faapei o se lupe.” Tusi Faitau: Ioane 1:19-34 Matua - Ioane 1:32, Ua molimau foi Ioane, “Na ou iloa le Agaga ua afio ifo mai le lagi, peiseai se lupe, ua nofo i ona luga. O le molimau a Ioane le Papatiso, ua faailoa mai ai le uiga o lona soifuaga atoa. I le faasolosolo mai o tausaga i lea auga tupulaga ma lea auga tupulaga, ua toatele tusiata iloga faale-lotu ua latou faatosina i tatou ia fai ma molimau i le uiga o lenei vaaiga: o Ioane, o Iesu, i le taimi na faatino ai le papatisoga ma le Agaga o le Atua ua afio ifo. I le tulimanu o loo i ai le avanoa o mata’aga ua toe teuteuina i le Abbey i le motu o Iona, i le itu i sisifo o Sikotilani; o lo’o tu matilatila ai le faatagata sa taina e se tufuga lauiloa o aso nei. A vaai sa’o atu i luma, ona iloa atu lea o le vaitafe o Ioritana---e iloa le fatifati o galu ma le felelei a’e o i’a i luga o le vai, ua fai ma vaaiga e faapei lava o le “Sound of Iona!” E to’alua ni alii o lo o asa atu i le vai. O le tasi, o Ioane, ua faatulutulu le suavai i le ao (ulu) o Iesu, a o talia le faamanuiaga, a o ona lima faa’ofu’ofu o lo’o tu ai le lupe. O le manulele e foliga o le manu-ola, e faapei lava o manulele o lo’o tutu i le Abbey ma felelei faataamilomilo i le avanoa o mata’aga, e tutu i luga o le mutia i isi taimi. O se vaaiga faatupu manatu lenei, o le lupe o lo’o tu i le ogatotonu ma ona apa’au ua faaloaloa, ua fesoota’i ai le lagi ma le lalolagi; o le vai o lo’o tafe ma alii e toalua ua savavali ai. Se’i e manatunatu ifo nei, e faapei o i tatou foi ua savavali ai: silasila ane---o se taimi faapitoa lenei i le tala faasolopito o le tagata--o le tagata, ua faamalosia i le ‘auai mai o le Atua. Tatalo: Le Atua o loo faatasi mai pea, faafetai i ou aao alofa o loo faaloaloa i luga o lau fanau faatuatua i le lalolagi. A’oa’o mai ia matou iloa atili lou alofa, ina ia matou alolofa ai i so’o se tasi ma le laolao o au galuega na e faia. Amene. Mafaufauga Loloto: Mafaufau ini ata tusia e faatatau i tala o le Tusi Paia. Afai e mafai, ia e taga’i toto’a i ai ma manatunatu i lou olaga faale-agaga. 9 Aso Lua, Oketopa 13, 2015: “O nofoaga e malolo ai manu felelei.” Tusi Faitau: Mataio 8:18-22 Matua - Mataio 8:20, Ona fetalai atu ai lea o Iesu ia te ia, “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.” Ua toe aga atu Iesu ma ona so’o, ina ua faamalosia e le Agaga. O se tasi o taule’ale’a a’oa’oina, o le tusiupu, ua alu ane ia Iesu, ua faapea mai, “Le A’oa’o e, ou te mulimuli atu ia te oe i mea uma e te maliu atu i ai.” (f.19b). A ua ta’utino atu Iesu e leai se faamaoniga po o se mafua’aga foi e ala ai ona mulimuli atu ia te ia. O manu o le fanua ma manu felelei ua mafai ona ola lava i latou. I aso o le tau e to’ulu ai lau o laau, na ou savalivali ai i le taimi ua fai ifo le la i le aoauli, ma manatunatu i le uiga o lenei a’oa’oga. O manu felelei e faaputuputu faatasi i se nofoaga e malolo ai i le po, e ui sa le nofoia lea nofoaga i le tele o taimi. O le manu o le swallows e tele ina tuufua lona faamoega: o le fuifui o manu, e tele aso e felelei atu ai aga’i i Aferika o lo’o i ai isi nofoaga e nonofo ai. O manu laiti foi ua latou iloa ona faamaopoopo ma tuufaatasi a latou mea e aai ai---e fau ai moega ma saunia ai mea’ai o le taeao! O le manu e igoa i le wren, o le ituaiga o manulele pito itiiti lona tino, e fausia lona nofoaga ia malu i matagi e faapipii i le papa. Ua silafia lelei e Iesu uiga ma amioga a mea ola e tusa ma galuega mamana a le Atua, a e maise lava i laufanua o Kalilaia---e iloa ai iina le eseesega o loo soifua ai tagata. O isi e faapotopoto i talanoaga ma pisapisao ai lava, o isi e nonofo e aunoa ma se vevesi; o isi e faatasi i nofoaga faitele, a o isi e le nofonofo a e feoa’i ma sa’ili pea i luma; o nisi nofoaga e saogalemu, a o isi e leai se toafilemu o i ai. A e mo Iesu lava---e fiafia e faafeiloai i aiga ua asiasi i ai, e faapea i ona soo ma o latou au aiga---e le tuuna le tagata ia na o ia lava. I ala e feoa’i ai, i nuu ua tua’oi, o aai e i ai tagata eseese, a e maise o le fesouaina i uiga eseese i totonu o Ierusalema: O loo i ai le Agaga o le Atua e fusia ai e ua talitonu ma faatuatua, ma lu’itauina ai tagata i le faamoemoe mo le o’o mai o le tala lelei e fiafia ma olioli ai. Tatalo: Le Atua e, e ui ina fesouaina o matou manatu ma lagona i uiga eseese o le olaga, a e tulimata’i atu pea o matou loto i le mafutaga ma lou Agaga Paia, e tonu ma lelei ai mea uma matou te faia. Amene. Mafaufauga Loloto: Ta’oto i le faamoega, po o le folau atu i le vateatea? Pe faapefea ona faatusatusa lou ola e faapei o manu felelei ua ta’ua nei? 10 Aso Lulu, Oketopa 14, 2015: “Aua le ta’u faatauvaaina.” Tusi Faitau: Mataio 10:26-31 Matua - Mataio 10:29-31, E le faataulia ea ni manu iti se lua i le asari? (peni) E leai foi so laua e pau i le eleele e aunoa ma lo outou Tama. A o outou lauulu lava ua faitaulia uma ia. O lea aua tou te matatau ai; e sili outou i manu iti e tele. Se’i mafaufau ane lava i manu laiti e lua ua faatau i le peni e tasi. E le o le faamoemoe autu lena o le a’oa’oga sa faitauina ananafi---ia vaavaai i manu felelei ua na o se mata’aga, e taua le olaga taavao, e taua le ola saogalemu o mea-ola, ma manu laiti e lua ia le faatauina tuulafoa’i na o le peni e tasi. A o soifua Iesu i le lalolagi, e pei o atunuu ua atina’e lelei i aso nei: O le manulele tino laitiiti o le sparrow, ua faatusa i ai le soifuaga tausia lelei o le tagata. O fanau-tama ua tafana i fanameme’i ia lavevea ni manu se tele. Afai e lavevea manulele, ona faamama lea ma faatau i alatele: ona o le mana’o tele o le tagata, a e aoga foi mo le soifua o le tagata. E tele nofoaga i le lalolagi i nei ona po e i ai tagata e ola maualalo ma taugofie foi. Ua i ai pepe ua fananau mai a e ua tuulafoa’iina e o latou tina failele, ona ua le mafai ona tausia ia ola pea. O nisi o matua ua matua matitiva lava, ona taumafai lea e faatau atu a latou fanauiti i maketi, ma fai ai ma pologa; a le o le na, ua faafaigaluega i galuega maualalo po’o le avea ma talitane i le maketi. O nisi atunuu ua faatuina ofisa fesoasoani i le soifua saogalemu lautele o tagata, a e manatu mama ma faailoga tagata i nisi o aiga o lo o mana’omia le fesoasoani, a e maise o uiga tuulafoa’i ma le faapologa i fanau laiti. O sparrows o manulele e pito laiti---e ono fai ma mea e manatu mama i ai ona e “faatauvaa” i le vaai; a ua faataua mea tetele aua e atagia ai se taui e tele lava. Ua silafia e le Atua le pa’u ifo o le manulele itiiti o le sparrow, ma le tuulafoa’iina o le pepe faatoa fanau mai---e silasila ma le alofa, e to’asa foi le finagalo o le Alii. O galuega mamana uma o le foafoaga a le Atua, ua tofu ma lona aoga aua e alofa ma agalelei le Alii i ana mea na fai. Tatalo: Ou te itiiti, ou te vaivai, ou te manaomia le fesoasoani mai. A e sili ona vaivai, pe a fai ou te manatu ifo e leai so’u aoga. O lo’o oi ma mafatia le lalolagi o tagata: Le Atua e, se’i e lavea’i mai. IA e silasila i au galuega mamana, o vao ma manufelelei, o i’a o le sami ma mea uma lava---IA e faafofoga mai i la matou olega. Amene. Mafaufauga Loloto: Pe e te fia faalogo i nei upu: “Aua e te fefe?” Se’i mafaufau pe aisea---ma ia e faafetai i le Atua. 11 Aso Tofi, Oketopa 15, 2015: “Ia mafaufau i manulele.” Tusi Faitau: Luka 12:22-31 Matua - Luka 12:24a, Ia outou mafaufau i oreva; latou te le lulu saito, latou te le selesele foi; e leai lava so latou potu oloa, po o se fale saito, a e fagaina i latou e le Atua;... Pe faigofie ‘ea ona mafaufau i oreva? O le mea lea ou te nofo ai, a o tusia la’u faamatalaga, ou te vaavaai pea i oreva i le tele o aso. E felelei ane i le ‘ea ma o latou apaau malolosi e faaloloa. E peiseai e valaau atu le isi manu i le tasi manu, “cronk, cronk.” I aso anamua i Europa ma Sasa’e Tutotonu, sa faigofie i tagata ona mafaufau i manu felelei ma faaaoga ia latou tala: aua o mea-ola uma o se vaega o foafoaga mamana a le Silisili Ese. Ua faatusaina le manulele o le oreva i le alofa o le Atua---e faafesaga’i itu e lua--o le Atua Foafoa e faafofoga i tama’i oreva o lo o fetagisi a o fafagaina i latou (Salamo 147); e faapena le ata i le fafagaina e oreva le auauna o Elia i le vao (1 Tupu 17). Pe a faatusatusa le seneturi lenei ua tatou o i ai (21st) ma le soifuaga i totonu o aai tetele: O fea o i ai le oreva? Se’i silasila ane i tala tusia i le Tusi Paia ma le una’iina o i tatou ina ia mafaufau i ‘manufelelei i le vanimonimo’--mafaufau i manu ua tatou masani ai. O tala moni i manufelelei lea ua tatou faitau i ai. O le faamatalaga a se tasi o tufuga ta’uta’ua na fauina le faatagata o Ioane a o papatisoina Iesu, o lo’o tu lea faatagata i le nofoaga o mata’aga i le aai o Iona: Na faitau vaiaso na faatino ai lea galuega. A o feagai a’u ma le galue i aso taitasi, e i ai manulele e lua sa nonofo i le nofoaga o mataaga, ou te vaavaai pea i ai. E feoa’i ane i o’u tafatafa ma vaavaai mai i o laua mata e feilafi mai. A o’o ina ou malolo mo sa’u mea’ai i le aoauli, ona o mai lea ua faalatalata mai e aai i toega o mea’ai. Ou te fiafia e fafaga aua o lo’o faatasi pea ma a’u. Ina ua mae’a le vaaiga faale-Tusi Paia, a e o lo o i ai pea le avanoa---a e le umi lea avanoa. E le na o le lupe; a e o lo’o i ai foi ma isi manulele tausaafia. Tatalo: Le Atua o le foafoaga, ua e silafia lo matou faatauvaa; se’i e fesoasoani mai i lo matou vaivai faale-faatuatua. Ia e faailoa mai pea lou finagalo, ia manino i la matou vaai lo matou faatauvaa. E le gata i le tagata, a e faapea i au galuega uma o le foafoaga. Amene. Mafaufauga Loloto: Ia manino pea i lau vaai uiga eseese o galuega mamana a le Atua. Pe faapefea ona iloa le alofa ma le agalelei o le Atua? E faapefea ona fesoota’i, le alofa ma le agalelei faaalia o le Atua? 12 Aso Faraile, Oketopa 16, 2015: “Ierusalema e, Ierusalema e, ...” Tusi Faitau: Luka 13:31-35 Matua - Luka 13:34b ... Po ua faafia ona ou mana’o e faapotopoto i lau fanau, e pei o le moa ona ofaofata’i i lana toloa’i i lalo i ona apaau, a e le mafafai outou! E tele igoa o lenei aai, o ia foi igoa e tele o latou uiga. “Ierusalema”, e aofia ai le loloto ma le lautele o le mataupu e uiga i le “shalom”---o lona uiga o le filemu, ma ua atoatoa. Peitai, o aso nei ua na o se aai ua fesouaina i uiga eseese o le olaga, o le upu moni ua le o se nofoaga o le filemu. I ona po o Iesu, sa faapena foi, o se nofoaga o fe’ese’eseaiga ma le vevesi. Ua tatou faitau i le auega a Iesu, “Ierusalema e, Ierusalema e, o le fasiotia perofeta, ma fetogi i maa e na auina atu ie te ‘oe.” Sa le mafai e Iesu ona suia lona afio atu i Ierusalema, e ui ua na silafia o le iuga lea i lona maliu. Sa le avea lea ma mea e taofia ai lona lagona o le alofa i ona tagata. Ua na faaaoga se ata mai lona lava olaga masani ua iloa ai o ia e ona tagata. E mafai foi ona faatatau ia fetalaiga ia i tatou; ua alofa mai le Atua e faapei o le matuamoa ona ofaofata’i i lana toloa’i. O faato’aga manu e faapei o lafumoa, e feoa’i sa’oloto i le faato’aga, a e maise o le lotoa atoa, e sa’ili i manu laiti ma fatu o laau e ola ai. E faamama o latou tino i le pefu i le susulu o le la, a mae’a lea, ona foi lava lea i le ta’aga e masani ai le matuamoa. E faalogo i le leo o le matuamoa pe a o’o ina tuu se fuamoa. E ta’ita’i e le matuamoa lana toloa’i i le laolao o le fanua. E faafuase’i ona faalogo i le leo, e ese foi lea leo---e faafuase’i, e faatelevave foi. E tutu tama’imoa i sina minute ona tamomo’e lea i le matuamoa. A o’o mai tama’imoa, ona faaloloa loa lea o ona apa’au lautetele, ma faamalumalu ifo i lana toloa’i. Ua o’o ina malu ma puipuia le toloa’i i le malosi o le tina (matuamoa). Ua tuu atu foi lona lava ola ina ia faasaoina ai lana toloa’i. Tatalo: Le Atua alofa e, e ui ina siosiomia i matou i faigata ma puapuaga o le olaga nei, a e matou te talitonu o lo’o malu puipuia i matou i ou aao alofa ma le faamaoni. Ia e filifilia i matou i lou malo e faavavau. Ona o Iesu Keriso o matou Alii. Amene. Mafaufauga Loloto: Ua le o se vaaiga e masani ai le toatele ini lafumoa tata’a sa’oloto. A e pe i ai se isi ata e tali foliga i le matuamoa, e mafai ona e faaaogaina e faamatala ai le alofa o Iesu? 13 Aso Toonai, Oketopa 17, 2015: “Ua mate le faatuatua.” Tusi Faitau: Luka 22:31-34 Matua - Luka 22:34, Ona fetalai atu lea o ia, “Peteru e, ou te fai atu ia te oe, e le vivini moa i le po nei seia e faafiti faatolu mai e te le iloa a’u.” I sina taimi puupuu i le taaligoligoa o le po, e vivini ai moa ma faalavelave i malologa o le pogisa. A e o se faamanatu aua ua lata mai le ao---o lo’o totoe nai itula. O itula o totoe na mo le tagata moe umi ma le vaivai; e le mana’omia se vave ala e faafeagai ma nisi foi popolega po’o ni faafitauli a o pogisa pea. O manu tata’a sa’oloto i le faatoaga, o lo’o ola lava latou e pei ona masani ai. Ae i ai le po e le’i momoe ai isi tagata. Na faalataina Iesu e se tasi o ona soo ma ‘ave faapagota. O isi soo ua sosola ma lalafi (o alii i latou---a e sa maopoopo lelei tina). O Peteru, e taulamua i upufai a le ‘au soo, o le Papa e faamoemoe i ai le galueaiina o le ekalesia, a ua faafiti ma molimau na te le iloa lava Iesu. I la latou ta’umafataga (paseka) mulimuli lava, na silafia mamao e Iesu mea o le a tutupu i le lumanai. Na lapatai ma faamanatu atu Iesu ia Peteru (e le vivini moa ... se ia e faafitu faatolu). Ua le o se fe’au e tuulafoa’i, a e o le faamalosi loto. Na fetalai Iesu, o lo’o tatalo pea, ma e tatalo pea---a o Peteru, o ia sa taulamua ma loto talitonu ua o’o ina faavaivai ma solomuli, peitai, ua na toe lagona o ia e faalagolago i ai isi ona uso i le mafutaga. Tatalo: Le Keriso e, le Alii agalelei ma le alofa, matou te talitonu e te le tuulafoaiina i matou, e ui lava ina matou faavaivai ma solomuli so’o. Faafetai le Alii e, i le togiola ua matou maua ai le avanoa i le manuia e faavavau. Amene. Mafaufauga Loloto: Taga’i pea i le faafiti faatolu a Peteru (Luka 22:54-62, e maua foi i isi Evagelia), ma lana ta’utinoga faatolu ina ua fetaia’i ma Iesu, ua toe-tu mai i le oti ma le tuugamau (Ioane 21:9-17). 14 1 Faitauga o Mareko (4) I Ierusalema: o faataoto ma le a’oa’o atu. [Saunia apoapoaiga o le vaiaso: Julian Bond] O ia o le Faatonu o A’oa’oga Kerisiano ma Muslim i Egelani (www.christianmuslimforum.org). Ua na umia le faailoga tikeri i le Mataupu Silisili tau le Atua mai le University of Aberystwyth, a e sa muai galue i le HM Revenue & Customs. E fiafia o ia i le faaliliuina o mataupu autu mai le Tusi Paia, ma vaevaeina i uiga eseese. E mafuta so’o o ia ma e ua aoaoina faapitoa i talitonuga o lotu eseese, e aofia ai ma le Kerisiano; e suesue ma sailiili atili i le uiga o le Tusi Paia. O lo’o galue nei o ia i le tusia o le tusi e uiga i le Itu-tagata o Iesu. Aso Sa, Oketopa 18, 2015: “Ua latou saili auala.” Tusi Faitau: Mareko 12:1-12 Matua - Mareko 12:12, Ona latou fia pue ai lea ia te ia, a ua latou matatau i le vao o tagata; aua ua latou iloa, na ia faatu le faataoto ia te i latou; ua latou tuua o ia, a e o ese. Ua a’oa’o atu Iesu i faataoto e faatatau tonu i e ua fai ma ta’ita’i i faalapotopotoga, o i latou ua umia le malosi ma le pule, po’o i latou ua faaaoga lea avanoa ma le manatu faapito. E le o vaaia se tulaga vevesi o tagata, se’i vagana le aafia o Iesu: i lona soifua ma le galuega faale-talalelei, e faapei ona molimauina i uiga tete’e ma le faatu’iese o ta’ita’i. Ua fotua’i mai uiga faatupu vevesi. E foliga ua silafia e Iesu amioga ia o le a tutupu, e faapei ona ia si’itia ai le tala i le fai faato’aga ma le atalii o le pule o le tovine. O Iesuralema o se nofoaga faigata. O se aai e pei ona ta’ua i faata’oto, o le aai e “puipuia atoa i pa faataamilo”. Ua le’i manatu Iesu e avea lenei o se mataupu e faigata ona malamalama ai. Ua iloa e ta’ita’i ua faatatau lenei aoaoga ia te i latou; e le gata i lea, ua iloa foi ua malamalama le motu o tagata i le uiga o lenei aoaoga. O Ierusalema o le aai na auina mai i ai perofeta ma se fe’au e le faigofie---e filifili ai i mea nei: E laveai le Atua i le aai pe afai ua gata le faamoemoe i le faasaoina, ona faalelei lea i le itu tetee, po’o le faaumatia e le Atua mea uma ma e o nonofo ai, e ui ina latou manatu ua lava pa puipui e laveaiina ai. E peiseai na tusia se vaega tele o lenei tala ina ua mavae le olopalaina o Ierusalema. O le mamafa o le avega tauave e fesootai ma le oti, le faaumatia ma le olopalaina, o lo’o faamalumalu mai pea i luga o le faataoto lenei a Iesu. Tatalo: Tatou talosia i latou o loo saili malo e ala i le faatupu vevesi; ia suia o latou loto e ala i le galuega fesoasoani a le ekalesia Kerisiano---ia liua le loto ita i le agalelei ma le alofa. Amene. 15 Aso Gafua, Oketopa 19, 2015: “Po o se mailei?” Tusi Faitau: Mareko 12:13-17 Matua - Mareko 12:13a-14, Ona latou aauina mai lea ia te ia nisi o le au faresaio ma nisi o le au Herotiano, ... Ua latou oo mai, ona faapea mai lea ia te ia, “Le a’oa’o e, ua matou iloa ua e faamaoni lava, ma ua e le mata’u i se tasi, aua ua e le faailogaina se tagata; a e peitai ua e a’oa’o faamaoni lava i le ala o le Atua; pe sa ‘ea ona avatu le lafoga ia Kaisara pe leai? A matou avatu ea, pe matou te le avatu?” Ua faaalia i le tusi faitau o lenei aso, le taumafai o e ua fai ma taitai e fau se mailei mo Iesu. Ua taumafai e tatao se mailei, a e faaaoga ai ia faafitauli o finauga o loo feagai ma pulega a le malo o loo pulea nei le nuu, ma i latou o loo faatui’ese. Na tali Iesu ia te i latou, e faapea: Po o se faatupu vevesi ‘ea, po o se faatupu filemu? Taga’i foi i a latou faamatalaga, e foliga ua faalua ona latou vivii--faamaoni ma le le faailoga-tagata. Ua latou fesili faalua ma le manatu e moni lo latou talitonuga. Peitai, o auala faatogafiti ma fuafuaga e fausia i uiga le faamaoni, e oo ina goto ifo i le lua e tanumia ai mea sese ma amioletonu. A o nei ona po ma le tele o auala eseese e faailoa ai mafaufauga ma manatu, e pei ona faia i le “Twitter”---e taumafai le tagata e faamaonia le sa’o o se taofi ina ia liua ai le faatinoga o le filemu. E tasi lava le tino-i-tupe (coin) sa faaaoga e Iesu e faamalieina ai le finauga. ‘O ai ea e ona lenei faatagata...?’ ‘o Kaisara’ ... avatu ia o mea a Kaisara ia Kaisara’ ... A o le Atua? E le o le tupe. E finagalo le Atua i le tagata. O tagata moni o le konetineta o Amerika (Indians) ua latou faapelepele i a latou talatuu ua ta’ua o “Trickster” (talitonuga i atua eseese). E peiseai ua faaaoga e Iesu le ituaiga talitonuga ia e lu’itauina ai le ‘au popoto ia latou aganuu ma talitonuga masani---o le tino-i-tupe, o le manu, ma luuga fatu saito. Ua le’i tuumamaoina e Iesu lona tali atu i lo latou fia popoto e fai se togafiti e mailei ai o ia! Silasila foi i la latou tali mai, ua faia i le faamaoni ma le tonu, e tasi lava le upu, “o Kaisara.” Tatalo: Le Alii e, fesoasoani mai ia matou iloa ona mulimuli e tusa ma le a’oa’oga a Iesu, ia matou faia lau amiotonu ma le faamaoni. Foa’i mai ia te i matou le poto ina ia matou iloa le ala tonu matou te mulimuli ai i lau Afio. Amene. Mafaufauga Loloto: Pe faapefea ona tatou auauna i le Atua ma faaaoga lo tatou malosi atoatoa? E faaopoopo i le na: O fea o i ai le finagalo o le Atua i le mea e ao ina tatou faia mo lana Afio? 16 Aso Lua, Oketopa 20, 2015: “Sui le faatinoga.” Tusi Faitau: Mareko 12:18-23 Matua - Mareko 12:18-19, Ona o mai lea ia te ia o satukaio, o e taofi e leai se toe tu; ua latou fesili mai ia te ia, “Le a’oa’o e, ua tusi mai Mose ia te i matou, Pe a oti le uso o le tasi tagata, ma tuu ai lana ava a e leai se fanau, ona fai lea o lana ava ma ava a lona uso, e faatupuina ai se gafa mo lona uso.” O mana’oga faavalea i le mafaufau, o se tasi lea o uiga masani e faatino ai se manatu ia finau pea ma le le gaua’i. O le finau malosi foi ma uiga faatausua, ma foliga taufaa’ata, e avea lea ma pogai e le mafaia ai ona maua se iuga faatuatuaina o se fetufa’aiga. O Iesu na finagalo ia maua se fetufaa’iga ma ona fili, e ui o loo latou taumafai e faailoa e sili ona tonu o latou manatu. A e ua faate’ia Iesu ina ua fetaia’i ma le taulealea mau’oa, lea ua taua i le mataupu 10, o loo naunau i se fetufaa’iga ma Iesu, ma ua manao ia faafofoga Iesu i ona faafitauli a e le o le saili i se isi lava auala. O le ‘au satukaio, ua latou talia ma faaaoga na o le Torah (tusi a Mose). Ua faalogo Iesu i la latou faamatalaga, a e o se faamatalaga i se mea e le tatau ona tupu. Ua latou suesue e uiga i le va faafeagai o mea tutupu i le olaga faaletagata, pe a fai lava e toe-tu---e ui ina latou le talitonu i ai---mai le tagata nai le oti. E faigofie ona manatunatu i le ‘au satukaio o ni tagata e lelei o latou mafaufau, peitai, ua latou faamatala ni talitonuga ua leva o tagata Iutaia, i taimi sa leai se talitonuga mautinoa e i ai se isi ola i talatu o le oti. O le faatulagaina o le talitonuga e uiga i le ola i talatu o le oti---le toe-tu, le lagi/seoli, ma le faamasinoga mulimuli---na faatoa tuufaatasi tagata Iutaia ma faatino le Tusi Paia Eperu---na faatoa tutupu ia mea i ona po o le tafeaga i Papelonia. O lo latou potomasani, ma lo latou vaavaai i talitonuga a isi malo, na faatoa fausia ai iina o latou lava manatu ma mafaufauga. O le mea lea, e faaeteete ai e fai se manatu e tusa ma tulaga sa feagai ai. Pe afai o mea ua tatou talitonu i ai, ma fetufaa’i ai e le moni ia, po’o ni lagona e fai fua, ona le talafeagai lea ma le faitau a tagata faatuatua, ma e peiseai ua tatou fausia se taitaiga sese. Ua tatou molimauina, o Iesu ma lona finagalo, ua na taitaiina i tatou i le ala, e ese mai manatu o le lalolagi o tagata. Tatalo: Le Alii e, ia e taitaiina i matou ia savavali e tusa ma lou finagalo, a e le o matou lava lagona faale-tagata. Ia e fesoasoani ia matou folafola atu lou finagalo tonu ina ia liua ai i latou ua le iloa lau Afio. Amene. Mafaufauga Loloto: Pe faapefea ona tatou tali atu i e ua ‘ese o latou lava talitonuga? Pe tatou te manatu faatauvaa ‘ea i ai? Pe tatou te taumafai ina ia latou talitonu i lau Afio? 17 Aso Lulu, Oketopa 21, 2015: “O le oloa o filifiliga.” Tusi Faitau: Mareko 12:24-27 Matua - Mareko 12:26-27, A o e ua oti, ma lo latou toe tu, ua outou le faitau ai ea i le tusi a Mose, i le laau talatala, na fetalai mai le Atua ia te ia, ua faapea, “O a’u o le Atua o Aperaamo, o le Atua foi o Isaako, o le Atua foi o Iakopo? E le o le Atua ia o e ua oti, a o le Atua o e ola; o lea, ua tele ai lava lo outou sese.” E faalepopole tele Iesu ia latou upu, a ua tuusa’o le tali---e le masalomia lo latou sese! Ua faaaoga e Iesu la latou tusi o le Torah (tusi a Mose) e faasagatau ai i a latou lava upu. O lana tali, e iloa ai e moni o latou lagona faale-tagata, a e le faapena ona ola ai i le lagi---e pei lava ona molimau upu ua tusia i tusi. Pe tatou te toilalo ai ‘ea i mea ua faia e le ‘au fasioti tagata? Pe a fai e faamatalaina i se fuaiupu mai le Tusi Paia? Ua silafia e Iesu le faamatalaina o upu ua tusia i tusi. Ua aoaoina i tatou e Iesu, pe faapefea ona faauiga tatau tusi e tusa ma le ulua’i uiga, e faaalia ai le uiga moni. Ua toatele le ‘au popoto ua taumafai e faamatala tusi ma ‘ave’esea ai le uiga moni o a’oa’oga a Iesu; ua toe fafagu mai e Iesu le uiga moni o upu ua tusia i tusi! O le Tusi Paia e le o se tusi-tulafono, po’o se tusi o faatonuga, a e o le tusi o le ‘oloa o filifiliga’, a faapei ona faauigaina e le taitai o Justin Welby, Anglican Archbishop. O le Feagaiga Tuai i lona faauigaina fou ua faailoa mai ai se taunuuga fou. O le faasinoga fou lea ua ‘aumaia e Iesu. O nisi o taimi, ua tatou le manatunatu loloto i aoaoga a Iesu e tusa ma le saolotoga ua aumaia ai, a e tatau ona tatou mataala i faasinoga ua faatatau ia te ia---o valo’aga ia ua tusia i Tusi (Midrash). O le upu, “Midrash”, o talitonuga ia ma talatuu faa-Iutaia ua faaaoga e le ‘au rapi (faifeau o le Lotu Iutaia), ua faaalia ai mafaufauga felanulanua’i, e luitauina ai lagona ma mafaufauga o le tagata. Pe tatou te faaliliuina ea tusi paia ina ia atagia ai o tatou manatu ma tuu i totonu o tusi faitau aso? Afai e mafai ona tupu lea mea, e ono faamalieina ai la tatou faalogo, e tupu ai le faagaaetia, e tupu ai se isi amataga fou, ma e ‘aumaia ai ni lagona ma ni mafaufauga fou. O le faigata e maua i tala a le ‘au faievagelia, tatou te su’esu’e po’o ai ua aafia ma faatu i ai le manatu, “o i latou ia e tuua’i i ai le sese, a e le o i tatou”, afai o le faamoemoe o le mataupu ia suia o tatou manatu ia feagai ma le mana’o: Po’o tatou sailiili ‘ea po o ai ua sese, ma avea ai i tatou i nei ona po e suitulaga i le ‘au satukaio? Tatalo: Le Atua e, ia fesoasoani mai ia matou malamalama i lou finagalo tonu, a e aua nei o matou sailiili po o ai ua sese. Ia matou iloa ona faamatala tonu au afioga, ia tupu ma olaola i o matou olaga. Amene. 18 Mafaufauga Loloto: O fea tonu e fausia ai o tatou manatu? Po’o faatupuina o tatou manatu ma lagona e ala i aoaoga a Iesu? Pe faapefea ona suia ai i tatou ini faatinoga fou? Aso Tofi, Oketopa 22, 2015: “E viia le loto faafetai i mea lelei ua saunia.” Tusi Faitau: Mareko 12:28-34 Matua - Mareko 12:28, 34, Ua sau foi le tasi o le au tusiupu, ua faalogo ane i la latou fesilisili, ua na iloa ua malie ana sa tali atu ai ia te i latou, ona fesili mai lea o ia ia te ia “Po o le fea poloaiga e sili i poloaiga uma?” ... Ua silafia e Iesu ua tali mai o ia ma le atamai, ona fetalai atu lea ia te ia, “E te le vava mamao oe ma le malo o le Atua.” Talu ai ua le toe faamalosi se tasi e fesili ia te ia. O le faatinoina o le faafetai ona o mea lelei ua faia e isi, o se faatinoga taua e seasea maua. E toaitiiti i latou sa feagai ma Iesu, o taitai o le nuu, a e na faaalia le loto faafetai o le mea lea ua taua ai lenei tala. Na fesili se tasi o auauna ma le poto, aua ua na iloa le ala e faatino ai lona finagalo---ua faalatalata ia Iesu ma le agaga maualalo, a e le o le fia tete’e po’o se ua fai ma fili. Ua ia tautala i le faamaoni i lona loto. Ua na faailoa atu ia Iesu le avanoa e faatino ai lona finagalo; se ia faailoa lona talitonuga e uiga i le mea ua ia talitonu i ai (ia tapua’i i le Atua). O se fesili e faatupu manatu, ma ua tali Iesu i le upu moni e tali a’i---o le upu “shema” (Hear, O Israel), o le gagana Eperu e amata ai le a’oa’oina pe a tatalo i le Atua, a e maise o mea e ao ina faia e le tagata i lona uso-a-tua’oi. Ua fetalai Iesu i le auauna i lana lava gagana, o le gagana e manino ai le faalogo ma tupu a’e ai le lagona o le fia faafetai. Ua tali Iesu i le agaga o le alofa, ua atagia ai le iloa ma manino i le faalogo ma talia; ua faatupu ai le iloa faaperofeta o mea lilo e tusa ma le finagalo o le Atua. Ua tali le auauna e tusa ma le fetalaiga a Iesu, a ua silafia e Iesu lona loto fia faafetai. E le taumate na fiafia le Alii o Iesu, ina ua tautala mai le auauna i lagona ua i totonu o lona loto. O le faaiuga lenei o le faasologa o lu’itau ma tuufesili na fesiligia ai Iesu a e aunoa ma se mea faigata. E i ai pea le loto faafetai ma le agaga fiafia i le Alii o Iesu, i e faimalaga faatasi ma ia i le faatuatua moni, aua e naunau le Alii e faatasi ma i latou ua faavaivai ma tau solomuli, i le ola talitonu ma faatuatua i le finagalo o le Atua soifua. Tatalo: Ua atagia upu o le lauga “faa-Amuia a Iesu:” E faapefea ona matou lagona le moni o ia afioga a le Alii? E faapefea ona faamalosia i matou ia mulimuli ai? Pe faapefea ona matou malaga faatasi ma Keriso, e le gata ia te i matou a e faapea i o matou uso-a-tua’oi? Mafaufauga Loloto: Pe mafai ona matou tali atu i fesili, i le agaga o le tonu ma le faamaoni, pe a fesiligia i matou e tusa ma lo matou ola talitonu ma faatuatua? 19 Aso Faraile, Oketopa 23, 2015: “O le Alo o Tavita.” Tusi Faitau: Mareko 12:35-40 Matua - Mareko 12:35-36, Ua a’oa’o Iesu i le malumalu, ona fetalai atu lea o ia, “Pe faapefea ona fai mai o le ‘au tusiupu, o le Keriso o le atalii ia o Tavita? Aua ua fai mai Tavita lava a o i ai o ia i le Agaga Paia, ‘Ua fetalai mai le Alii i lo’u Alii, Ia e nofo i lo’u itu taumatau, seia ou faia e ua ita mai ia te oe ma mea e tu ai ou vae.’” Ua tulai Iesu e faaali le auala e puipuia ai e faasagatau mai (E faapefea ona a’oa’o mai faiaoga o le tulafono?), a ua aliali mai ai se faaletonu i o latou manatu. E faamalieina o tatou loto i le auala na saunia e Iesu i lana tali atu i e ua faasagatau mai, e ui e le faigofie le auala na ia faatinoina ai. Afai tatou te faitau i le salamo a Tavita e aunoa ma le mafaufau i se valo’aga faaperofeta ua faataunuuina, ona le manatu ai lava lea i se tasi auauna, i se auauna e faapitoa sona faapaiaina---aua ua ta’utino Tavita o ia lava, po o lona atalii o Solomona. O le upu moni, o le mataupu e uiga i le afio mai o le Mesia e faapei ona faamatalaina i le nofoaiga faatupu a Tavita, ua leva ona faamalumalu i molimau faavalo’aga, e afio mai se Auauna e faapei o Tavita e taitaiina ona tagata ma fusia faatasi. O le mea lea, ua manatu ai nisi ua faitau i fetalaiga a Iesu, ua faatatau lea i le Mesia o le “Alii” lava, e faailoa ai lona tulaga faale-Atua (ua le o faaalia mai lea e le tusitala o le Salamo), ua na le faapea mai o le Mesia o le ‘atalii o Tavita’, a e o le “Atalii o le Atua.” O lona uiga ‘ea, e faapei o isi foi o ana fetalaiga, o lo o fesiligia e Iesu le manatu: o le Mesia e tupuga mai i le gafa o Tavita? Ina ia ‘ave’esea ai o ia mai le laina o le Mesia e afio mai? O le ta’ua o Iesu o le Mesia, o se manatu e tuufaafeagai ma uiga na aliali mai i ona toe aso i Ierusalema. O le upu moni, ua tosina atu Iesu, o ia o le Mesia ona o manatu o e sa latou feagai. Ua peiseai ua finau o ia ma se vaega toaitiiti, o e ua taofi e tetee ia Iesu o le Mesia e afio mai, ma foliga ua ave’esea ai le talitonuga i le malo o Roma. Peitai, na le pine ona feagai ma puapuaga ua aafia ai le aiga o Tavita, i taimi na tusia ai tusi a le ‘au faievagelia---i le oti ma puapuaga mamafatu i lima a fitafita Roma. Tatalo: Ia tatou talosia, ia ‘aua nei ‘ave’esea le moni ma le faamaoni o a’oa’oga e uiga i le Mesia e afio mai, a e maise lava pe a fesiligia i tatou e latou ua le talitonu i le Keriso. Amene. Mafaufauga Loloto: O fea o i ai lo tatou faatuatuaga e uiga i le fe’au ua aumaia e le Mesia mo le ‘au kerisiano? Pe faapefea foi ona tatou faamautuina lo tatou taofi e tusa ma le talitonuga faa-Iutaia? 20 Aso Toonai, Oketopa 24, 2015: “E le o le finagalo lea o le Alii.” Tusi Faitau: Mareko 12:41-44 Matua - Mareko 12:43-44, Ona valaau atu lea o ia i ona soo, ua fetalai atu ia te i latou, “E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai; aua o i latou uma, ua latou lafo nisi mea mai a latou mea ua tele; a o ia ua mativa ua ia lafo ana mea uma sa ia te ia, o ana mea uma e ola ai.” O le faaiuga lenei o le mataupu na faaauau mai i le faitauga o ananafi, lea na ta’ua ai le ‘au tusiupu ma o latou la’ei tatapuvae (Ou te manatua ai le ta’ua o le “bling bishop” ma le a’oa’oga e faatatau i le faaaogaina ma le le faautauta lelei le tamaoaiga.) Ua ta’ua e Iesu le tamaoaiga, o le tamaoaiga faale-lotu, o le tala lenei e uiga i le tina ua oti lana tane ma si ana toe tupe na totoe (e itiiti nai lo le peni): Ua fetalai Iesu e uiga i le ‘faaaogaina o mea-totino a le tina ua oti lana tane.’ Ua tatou faitau soo i tusi a le au faievagelia ma le tuufaafeagai o le mativa ma le mau’oa, peitai, ua faaliliuina e Iesu i se uiga e tuufaafeagai: O e ua tamaoaiga i le ‘oa faaletino, e matitiva i le ‘oa faale-agaga; a o e ua matitiva i le tino e tamaoaiga i le ‘oa faale-agaga. A e o se luitau foi lenei mo i latou o loo solosolo lelei pea, a e maise i latou ua le tagolima e sili ona fiafia nai lo i latou e maua le tamaoaiga ae i ai le pologa. O le tala lelei ua ‘aumaia e le au faievagelia, o le tala e tulaga tutusa uma ai. E ao ona tatou faaaoga i se tulaga e aofia ai tagata uma, e oo lava i e ua manatu faatauvaa i ai faale-tagata. O se faaosoosoga lenei i nisi vaega o a tatou ekalesia (aulotu), ua tatou vase le tua’oi ona o le manatu faapito i nisi taimi i a tatou filifiliga (A e galo ia i tatou sa le’i mama ia Iesu e na faitio mai i ana filifiliga.) Ia manatua lenei mea, o le tala lelei ua faailoa mai i le ekalesia (aulotu), e tatau ona amanaia e ua matitiva. O nisi o a tatou ekalesia (aulotu), e toatele ua tulaga lelei lo latou tamaoaiga. O le mea lea e ao ai ona toe tagai toto’a, po o ai ua faatatau i ai le upu “mativa.” I nisi o taimi, ua faaaoga e aulotu po o faalapotopotoga ua tufatufaina ma faasoasoa le tamaoaiga o taumafa (foodbanks) le upu “mativa” mo e tatau ona ‘ave i ai le faamuamua. O le pogai lea e tatau ai ona tatou mulimuli i aoaoga a Iesu, ‘o le na muamua e avea ma mulimuli’, i o tatou manatu ma a tatou faatinoga. Tatalo: Le Alii e, ua matou tatalo e manatua i latou ua aafia i le mativa ma le lē tagolima, ia e fesoasoani i mea ua vaivai ai ma mafatia ai. Ua matou talitonu, o lou tamaoaiga e lava ma totoe e faamalieina ai lo matou galala, e le na o le tino, e le na o le mafaufau, a e oo lava i o matou agaga. Amene. 21 Mafaufauga Loloto: O fea o i ai le lagona ma manatu o isi faatuatuaga faalelotu? Pe matou te faatalitali ‘ea se ia latou avanoa, po o lo latou saili mai e ala ia matou galuega? 2 Faitauga o Mareko (4) O faailoga o aso amuli. [Saunia apoapoaiga: Jember Teferra] O le faifeau foma’i (tinā) o Jember Teferra, o le uluai auauna na faavaeina, tuufaatasia ma saili tamaoaiga mo le atina’eina o le faalapotopotoga ua faaigoaina, “Integrated Holistic Approach Urban Development Project.” O lenei faalapotopotoga ua faavaeina mo le faamoemoe e fesoasoani i tagatanuu o loo aumau i nofoaga pito i maulalo le tamaoaiga e ono (6), i totonu o le aai o Addis Ababa, Ethiopia, konetineta o Aferika. Ua aofia ai le faitau aofai o tagata e 52,000. Peitai i lenei va i taimi, ua faataua e lenei faifeau-tina le aoaoina ma le ola faataitai o e ua taofi mau i le faaauauina pea o le ulua’i mana’oga, ia siitia le soifuaga maulalo ma le ola mativa ina ia faatupu le iloa ona soifua fesootai o tagata uma i le faamasinoga tonu. O Jember Teferra, ua maliu lona alii a e o loo soifua pea ma lana fanau e toatolu, ma fanau a lana fanau e toafa. Aso Sa, Oketopa 25, 2015: “Ua lapata’i mai Iesu.” Tusi Faitau: Mareko 13:1-8 Matua - Mareko 13:1a, 2, “...Le a’oa’o e, ina silasila ia i nei maa ua tetele lava, ma nei fale ua tetele lava!” ... Ua e iloa ‘ea nei fale tetele? E le tuua le tasi maa i luga o le tasi maa, a e uma lava ona soloia i lalo.” O le tusi faitau o lenei vaiaso ua faatatau i le mataupu ua faaigoa e le toatele o tagata lolotu, o le “toe afio mai.” O uluai a’oa’oga lava a Iesu i ona soo, ua faatatau lea i le Malumalu tele i Ierusalema, o le maota sa mafai ona fausia faapitoa e le tupu o Solomona. I nei ona po, ua toatele le au kerisiano ua le o matua mautinoa lelei, po o le faatafunaina o Ierusalema i le tausaga 70 T.A, ua faatatau lea i le lapata’iga a Iesu. A e le gata i le, ua i ai foi le isi lapata’iga ua faatatau i Mesia pepelo e o mai--- ‘o atunuu e faasagatau ma isi atunuu, o malo foi e tau ma i isi malo’---o le a tulai mai lea i tausaga amuli pe a mavae atu le pule a le malo o Roma. E lua taua a le lalolagi (WWI & WWII) ua uma ona tau, a o nei ona po ua molimauina le faailoga lanu ma le pule faasaua, o fevaevaeaiga i talitonuga faale-lotu, o faatuiesega ma le agasala ... o le loto faapopoleina ma le tele o isi uiga faigata o loo faaauau pea i nei auga tupulaga; e faaopoopo i ia faigata, o faalavelave faanatura e pei o le matelaina, o lologa ma afa malolosi, o mafui’e o loo tutupu soo i lea itu ma lea itu o le lalolagi. E ui ina fetalai lo tatou Alii, ‘o le a o’o mai lava le iuga’, o i tatou o tagata Kerisiano e tatau ona sauniuni e fetaia’i ma lo tatou Alii: Po’o le aso nei, po o a taeao, po ua e sauni ‘ea? Tatalo: Le Atua faavavau e, e ui lava ina matou vaavaai i le mata’utia o au galuega mamana, o taua foi ma le tele o isi faalavelave mata’utia i o matou 22 olaga, a e o loo agasala pea le tagata! Se’i e fesoasoani mai i o matou loto faigata, ina ia matou liliu e fai lau amiotonu. Ona o lou Suafa Iesu. Amene. Aso Gafua, Oketopa 26, 2015: “Tumau le faatuatua e oo i le iuga.” Tusi Faitau: Mareko 13:9-13 Matua - Mareko 13:13b, “...A o le tumau seia o’o i le iuga, e faaolaina lea.” E ‘ese mai ai ia Paulo le Taso, ua i ai lo’u potomasani i le nofo ai i le falepuipui i le va o le 1976 ma le 1981, ona o tagata faatui’ese i lalo o le pulega faaMarxist---ua lava lea mo lo’u agaga maulalo faa-Kerisiano. E toa 140 i matou na avea faapagota ma tuuina i totonu o le falepuipui na o le 7x17 mita lona fua: e eseese talitonuga e faavae ai o matou taofi ma mea ua faataua i o matou lagona. O nisi e matua tetee lava, a o nisi o sui mai vaega o Komunisi. Na ou taulamua i le talitonuga e tatau ona fai a matou talosaga afiafi ma le taeao. I se tasi o taeao, sa matou le mafaufauina lava, ua asiasi mai le sui o le pule o le falepuipui i le nofoaga o loo tuuina ai pagota e 485 o tama’ita’i. Sa ou le iloa, o a’u na faaautu i ai lenei asiasiga, ina ua molia a’u o loo faatui’ese pea i ‘uiga le usiusita’i’---e le faaaloalo i e fai mai e leai se Atua, e le amana’ia le talitonuga faa-Muslims ma isi lava talitonuga e le o ni Kerisiano. Ua faapotopoto i matou uma e le sui pule, ma ua faatonuina i matou ina ia faalogo ma usiusitai e tusa ma tuua’iga ua molia ai i matou. Na faafuase’ia ona faamamafa lana faatonuga e faatatau i le sui o loo feagai ma le tausiga o le soifua maloloina o pagota e 485 e faasolo atoa, ua ‘ese lea mai le faatonuga e aafia ai i matou. E manumalo pea le Atua! Na fesili le Sui o le pule i e ua faatui’ese i le faatinoina o sauniga talosaga, ia si’i o latou lima. Ua na o le toalima na si’i, e tuufeagai ma le 480 (e aofia ai ma i latou e ese le fale o lo’o nonofo ai) na lagolagoina. Ona faaiuina ai lea e le Sui o le pule, i ana upu e faapea: ‘Mo le tuafafine o Jember, ua faaalia nei le sapasapaia o le faatinoga ia faaauau la outou sauniga tatalo i le taeao, le aoauli ma le afiafi!‘ O tuua’iga e mafai ona tutupu mai ai ni faatinoga taua. Ua faamanatu mai e le Mareko 13:13 lea taofi, ma e faamanatu atili ai pea le “the red terror”, o sauaga mamafa ma le ogoogo na fasiotia ai le faitau afe ma afe. Tatou te molimauina foi le fasiotia faapagota o e ua nofosala i lea aso ma lea aso. Ia tatou vivii ma faamanu i le Alii ona o lagona ma manatu ua faatupuina ai le ola faatuatua ina ua tumau le loto talitonu i le Atua e ona le lagi ma le lalolagi, a e maise o le faauluuluga o ana galuega mamana na faia ai le tagata i lona faatusa paia. 23 Tatalo: Le Atua e, ua na o lau Afio lava ua matou iloa ai le tele o uiga matalasi o le lalolagi o loo matou o nonofo ai. Fesoasoani mai ia matou iloa ona ava ma migao i galuega uma o lau foafoaga. Amene. Mafaufauga Loloto: Po ua e talitonu ma faatuatua i le fesoasoani mai a le Agaga Paia e faatumauina ai lo tatou faatuatua moni, e ui ina tofotofoina ma faaosoosoina i tatou e Satani? Aso Lua, Oketopa 27, 2015: “O faalavelave ma puapuaga mata’utia.” Tusi Faitau: Mareko 13:14-23 Matua - Mareko 13:21-23 Afai foi e fai ane se tasi ia te outou i ia ona po, Faauta, o iinei le Keriso; pe faapea, Faauta, o iila; aua nei faalogo i ai. Aua e tutu mai Keriso pepelo, ma perofeta pepelo, ma latou faia faailoga ma vavega, ina ia faasese a’i e ua filifilia lava, pe afai e mafai ai. Ia outou; faauta, ua ou mua’i ta’uina ia te outou ia mea uma. O taimi uma ou te faitau ai i lenei vaega o le tusi a Mareko, ou te mafaufau ai i ata tifaga o taua ma puapuaga mata’utia e vaavaai i ai. O afa malolosi ua molimauina i nei auga tupulaga, e matua mata’utia lava le aafia ai o le laueleele ma le soifua o le toatele, e faitau selau ma selau tagata ua maliliu ma ua le toe iloa lava (o loo taluai nei le afa malosi na agi i Filipaina). Ua faatonu mai alii pailate o vaalele i gaoioiga e tatau ona faia pe a tutupu faalavelave faafuase’i: Ia ‘aua lava ne’i taua ia te ‘oe se isi lava mea, tau lava o lou soifua ma le ola ia faasaoina. Po ua lapata’i mai ‘ea Iesu i le i’uga o lo tatou ola, pe a fai e aafia i tatou i se faalavelave mata’utia? Po’o lapata’i mai Iesu i e o lo’o soifua ma ola pea i le lalolagi, pe a o’o i le aso o lona toe afio mai? O se luitau lenei faale-mafaufau, e faapei ona ‘ou ta’ua i le aso ananafi, i le taimi na aafia ai a’u i pulega faa-Marxist, o i matou sa avea ma pagota ona o pulega faale-tagata, sa masani ona matou faapea ane le tasi i le isi: “Afai ua aafia nei a’u ona o lenei pule saua (red terror), ou te faapea atu, faamolemole, se’i faailoa atu i o’u aiga---o la’u mavaega, ma a’u mea-totino uma, etc. Ua matou iloa e oo mai le oti---ua leai se isi mea e mafai, ua matou talia lenei tulaga faigata ua o’o mai a o maua le filemu i o matou agaga. Ua matou sauni e feiloa’i ma lo matou Alii; o le mapusaga foi lea i o matou loto ma agaga! Tatalo: Le Tupu e o tupu, ma le Alii o alii, ia e fesoasoani mai ia matou iloa ona sauniuni ma tapena e puipui ma faafilemu i puapuaga ma faigata e oo mai--e le gata i lo matou ola i le tino, i le feagai ma taua ma sauaga, a e oo lava i faalavelave faale-natura. Amene. 24 Mafaufauga Loloto: I le avea o i tatou e fai ma Kerisiano: Po ua tatou mafaufau loloto ‘ea i lapata’iga a le Alii o Iesu, ia saunia ai i tatou mo soo se faalavelave e o’o mai? Aso Lulu, Oketopa 28, 2015: “Toe afio mai i lona mamalu.” Tusi Faitau: Mareko 13:24-27 Matua - Mareko 13:26 Ona iloa atu lea e i latou o le Atalii o le tagata ua sau i ao ma le mana tele ma le mamalu. A o’o ina tulaga faaletonu mea e tutupu i le lalolagi, ona tupu lea o le lagona ma faapea ane: “Le Alii e, ina afio mai ia; Iesu e, ia vave mai.” A o lotolotoi ai i totonu o tulaga faigata o le olaga, ua atagia mai ai le ata manino o le Mesia puapuagatia, o Iesu lea, o le a toe afio mai i le atoatoa o lona malosi ma le mamalu---e ui ina le o matua manino mai po’o i latou ia ua faalogo ma vaavaai ia Iesu, o i latou lava ia e molimauina lenei vaaiga uiga ‘ese (ua le o manino lea). O le faamatalaina e le Alii lona toe afio mai, o se vaaiga e uiga ‘ese lava, a e maise lava i lea vaitaimi o le tala faasolopito o le lalolagi. Ua le o utuva lo tatou faitau ma vaavaai i sauaga ma soligatulafono i aso taitasi, a e maise o le aafia o fanau ma tina i taua, o le sauaina ma le faapologaina. I taimi o le Feagaiga Fou, ina ua mavae le maliu o Iesu, o talatu o lona toe-tu, ua o’o le lagona i ona so’o ma e sa talitonu: E toe afio mai le Alii i le ola nei, i lona mamalu, i le malosi ma faaalia ai lona manumalo. O se avanoa faapitoa lenei mo le fanau filifilia a le Atua, o i latou ia e auina mai agelu e faapotopoto mai le tasi itu e o’o i le isi itu o le lalolagi---’o tulu’iga o le lagi’. O le vaega lenei o le mataupu e 13 a Mareko, e avea ai le Kerisiano o lo’o galulue ma tautua i le tala lelei, o se mitamitaga i le ola tapua’i ma tatalo ia moni lona ‘filifilia e avea ma fanau a le Atua.’ Tatalo: Lo matou Tama e, o i le lagi, a o matou faatalitali pea mo lou toe afio mai e faatino lou malo e faavavau, ua matou tatalo ia faatasi mai lou Agaga Paia e fesoasoani i lo matou vaivai, ina ia saunia ai pea i matou mo lou toe afio mai, ma avea i matou o e ua ‘filifilia ma au fanau.’ Amene. Mafaufauga Loloto: Po ua matou sauniuni ‘ea e fai ma e ‘filifilia o lau fanau’ i o matou uiga ma mea matou te fai? Pe ua matou ola ai ‘ea i aso uma, e tusa ma faataitaiga mai le Tusi Paia? Aso Tofi, Oketopa 29, 2015: “O faailoga e iloa ai aso amuli.” Tusi Faitau: Mareko 13:28-31 25 Matua - Mareko 13:28-31, Ia outou matau i le faataoto i le mati; pe a faatoa tutupu ona tatupu, ma matala mai ona lau, ona outou iloa ai lea ua latalata mai le tau vevela. E faapea foi outou, pe a iloa ia mea ua tutupu mai, ia outou iloa ua latalata mai ia, ua i faitotoa lava. E moni, ou te fai atu ia te outou, E le mavae lenei tupulaga, seia taunuu ia mea uma. E mavae atu le lagi ma le lalolagi; a e peitai a’u upu, e le mavae lava ia. O se tasi o a’oa’oga ua tatou iloa mai fomai o le soifua maloloina, ia mafai ona maitauina foliga vaaia o tiga e o faatasi ma le ma’i, po o tiga o le tino. E leai foi se eseesega ma le faasinoga o tulaga e uiga i le tau o aso taitasi, tatou te iloa mea tutupu i foliga vaaia o le aso. O le faasinoga ua faaalia i le laau o le mati, e pei ona a’oa’o mai le Alii, ua faaali atu ai i ona soo le faasologa o mea e tutupu ma fesuiaiga o aso ma taimi e lima-taitaiina ai i latou i lona toe afio mai. O nisi Kerisiano ua manatu, o le faatafunaina o Ierusalema i le tausaga 70 T.A. o le i’uga lava lea. Peitai, na fetalai le Alii, “E le mavae lenei tupulaga, seia taunuu ia mea uma.” (f.30). O lo’o taoto pea lenei faasinoga, o se tupua-lemate’ia, mo le ‘au Kerisiano o le seneturi 21st. E tasi le mea ua mautinoa: O mea ua tatou faalogo i ai ma vaavaai i ai, i lenei aso, o mea ia sa fetalai mai ai lo tatou Alii. Tatalo: Lo matou Alii e, ua matou talitonu ua e fetalai: E mavae le lagi ma le lalolagi, peitai au fetalaiga e le mavae lava lea. Fesoasoani mai ia matou iloa ona mulimuli tonu i faailoga e tusa ma lou toe afio mai. Ia saunia i matou i le olioli ma fiafia mo lea faamoemoe taua. Amene. Mafaufauga Loloto: Pe faapefea ona saunia i tatou ma le loto toa, ma le malosi o tatou agaga, e faaali atu ai le finagalo lilo o lo tatou Atua, e ala i le lalolagi o fesuiaiga? Po ua e vaai ma molimau i se faailoga o le toe afio mai o Keriso i lou lava olaga? Aso Faraile, Oketopa 30, 2015: “Ia e mataala!” Tusi Faitau: Mareko 13:32-37 Matua - Mareko 13:36-37, Ne’i faafuasei ona sau, e maua mai outou o momoe. O le mea ou te fai atu ia te outou, ou te fai atu ai i tagata uma: Ina mataala ia.” O la’u uluai matagaluega i le malo, UK, o le galue faateine tausi ma’i. O lona lua o o’u tausaga i le vaega amata, sa ou asiasi ane ai i lo’u tina-matua (ua maliu le tama), ina ua silia i le lima tausaga ou te le’i toe feiloai ia te ia. Sa tele feuia’iga i le faiga o lo’u visa ma pepa malaga, ma o’o ai ina ou galue faasosoo mo le fitu sifi po e leai se malolo. O le po mulimuli, ua tau le mafai ona pupula o’u mata i le vaivai, a e faaopoopo i le na tulaga o lo’u galue toatasi i le vaega o tagata matutua se ia o’o ai ina maua a’u i le ma’i-moe (night nurse’s paralysis). Sa ou nofo i le nofoa ma o’u mata o loo pupula, a ua le mafai ona ou 26 gaoioi. Na valaau mai ni ma’i e toalua ia te a’u, a ua le mafai ona ‘ou fesoasoani i ai. Sa asiasi ane le tamaitai pule i le potu, a ua le mafai ona ou tautala i ai, ua leai foi so’u manatu e fesootai i ai. Sa vaavaai solo le tamaitai pule i totonu o le potu, ma ina ua mae’a lana asiasiga o le a toe fo’i, a e faafuase’ia loa ua mafai ona ou tula’i i luga, e peiseai o se vavega na o’o ia te a’u ua mafai ai ona ou malosi e tu i luga. Sa ou faamolemole ma faamalie i le tamaitai pule. Ua le fiafia le tama’itai pule, e ui lava ua na iloa le mea ua tupu ia te a’u, na o’o ina molia a’u i le Ofisa. Ina ua ou sauniuni e tapena la’u malaga ma aga’i atu i le malaevaalele, a e valaauina loa a’u ma ua tuu mai se lapata’iga (o le uluai taimi, ma le toe taimi). Sa ou talitonu i le manatu alofa o le Ofisa ia te a’u, peitai, sa le taofia ai le faailoa mai o le tulaga matuia ma le faaletonu e ono tupu mai ona ua le faataunuuina a’u matafaioi, ma avatu le fesoasoani i e ua talosaga mai. So’o se taimi ou te faitau ai i le vaega lenei o la’u Tusi Paia, e faamanatu mai pea ia te a’u, afai ou te tautala e uiga i le ‘toe afio faalua mai o le Alii’, o le taimi foi lea ou te faamatala ai lo’u faatamala ma le faaletonu sa oo ia te a’u. Ou te talitonu ma le faamaoni, o le tulaga tatau lenei mo soo se tagata Kerisiano--- ia mataala, e faapei ona a’oa’o mai lo tatou Alii. Tatalo: Le Atua paia e, o le Tama ua na silafia mea uma e ao ona matou faia. Ia e faamalosi mai ia aua lava nei o matou faatamala i taimi uma, ina ne’i o matou momoe a e galo ona faatino o matou tiute e pei ona e finagalo ai. Amene. Mafaufauga Loloto: Po ua e iloa ni taimi na e faatamala ai, ma galo ia te oe ona mulimuli i a’oa’oga a lou Alii o Iesu? E faapei ona aoao mai Iesu ia tatou mataala i taimi uma? Aso Toonai, Oketopa 31, 2015: “O le mea lelei ua na faia.” Tusi Faitau: Mareko 14:1-9 Matua - Mareko 14:6b, 8-9, “... Tuupea ia ia te ia; se a le mea tou te faalavelave ai ia te ia? O le mea lelei ua faia e ia ia te au nei. ...Ua faia e ia le mea ua ia mafai ai; ua na uuina lo’u tino e fai ma faataimuaga o lo’u tanuga. E moni, ou te fai atu ia te outou, o nuu uma lava i le lalolagi e talaiina i ai lenei tala lelei, e ta’ua ai foi lenei mea ua faia e ia, e faamanatu a’i ia te ia.” Ua fai ma aganuu i le ekalesia, Ethiopian Orthodox Church, ona u’u le tino o le tagata maliu a e le’i tuuina i le tuugamau. A e o se tulaga e maofa ai ona o le lagona na i lenei fafine ma lona alu ane i le fale o Simona, ma le fuafuaga a Iesu ia nofo ai i lea taimi. O le toe aso lea o Iesu na alu ane ai i le fale o Simona---ua na faamalolo i le tagata ma’i lepela---ma talisua ai i le afiafi; na ia talia ai foi iina le uuina o ia e se fafine e le amana’ia i manatu o tagata. 27 Sa iloa le agaga fiafia o le Alii e talia le agalelei, a e maise le uuina o ia e le fafine, ma lona taumafai e ‘ave’ese le manatu faatauvaa sa faaalia i upu a nisi o i latou. A e le o se tulaga fou lea i le Alii, o le agalelei i e ua ola i se olaga maualalo ma le mativa---o i latou ua te’ena e le toatele, i latou ua tuulafoa’i i manatu o le toatele; o se tulaga e matua mata’ina ona o toe aso ia o le Alii. O loo lamalama taitai o le lotu Iutaia e saili se auala e fasiotia ai o ia. O loo i ai o ia i se tulaga e tatau ona puipuia. A o le mea ua faia e lenei tina, ua na faata’imua le iuga ua lata mai o le mafutaga ma le Alii---ua faatino le alofa ina ua ‘faailoa ua latalata aso o ona puapuaga’, i le loto talitonu ma le agaga maulalo. Tatalo: Le Alii e, ia e a’oa’o mai ia matou iloa, e le na o e taua i manatu o le to’atele e te alofa ma agalelei i ai, a e oo lava i e ua manatu mama ma faatauvaa i manatu o le toatele. E te silasila lava ma le alofa i e amiotonu ma e agasala. Amene. Mafaufauga Loloto: O le a se a’oa’oga taua e maua mai ia Iesu i ona toe taimi, e uiga i e ua tuulafoa’iina ma le amana’ia e tagata? E faapefea ona tatou mulimuli ai i ia faaa’oa’oga a le Alii? LOIMATA 1. “Loimata i le Feagaiga Tuai.” [Saunia e: Nicola Slee] Aso Sa, Novema 01, 2015: “E o faatasi le tagi ma le olioli.” Tusi Faitau: Salamo 30. Matua – Salamo 30:11-12a: Ua e liua lo’u tagitu’i i le siva; ua e talaeseina lo’u ‘ie talatala, a e fusia a’u i le fiafia; ina ia pese atu ia te oe lo’u mamalu, ma le mapu;... E i ai nisi o loo faapea o le ola faatuatua o se fiafiaga umi lava, ma e leai se mea e popole ai le au Kerisiano, ona e lē a’afia tele ai i latou. O nisi foi ua manatu o le au Kerisiano o tagata e fiafia i puapuaga! O tagata su’esu’e i Mataupu Silisili tau i le sa’olotoga (liberation) ma le va’aiga i le tulaga tutusa o tama’ita’i i alii (feminist), ua latou faailoa se vaaiga e faapea, o tagata matitiva ma e olopalaina e tumau pea lo latou soifuaga i lea masaniga, ma e lē mafai lava ona suia e ui i se taumafaiga e fo’ia lea tulaga. A o faagasolo la tatou su’esu’ega i le Tusi Paia i nai vaiaso, o le a tatou manatunatu ai i le autu o, “Loimata”, ma lona feso’ota’iga e faamatala atili ai le vaaiga lē talafeagai o le vi’iga o puapuaga i le tasi itu, ma le faamoemoe e faafitia le loloto o puapuaga o tagata i le isi itu. O lo’o aofia uma nei mea e lua i le faitauga o lenei aso: e afe ane le tagi i le afiafi, a o le alaga fiafia i le taeao. (f.5) Ua e liua lo’u tagitu’i i le siva; ... ie talatala... (f.11-12) O lo’o faafeagai lelei e le fai Salamo le tagi ma le fiafia, ua ia faailoa ai le faigata o le faatino o le tasi e aunoa ma le isi. O le vi’iga e o’o mai, e faalagolago i lagona mafatia ma le pagatia sa i ai i le tuana’i; e le iloa le alaga 28 fiafia o le malamalama fou o le taeao, pe ana leai lagona o le puapuaga na afe ane ai i le po ua mavae. Tatalo: A’oa’o mai le Atua e, ina ia ou iloa ona tagi ma fiafia i lo’u olaga atoa, ma ia aua ne’i faafitia ni o’u lava lagona – a ia ou iloa lau Afio i mea uma. Amene. Aso Gafua, Novema 02, 2015: “Tagi ona o faai’uga faale-mālō.” Tusi Faitau: Salamo 137. Matua – Salamo 137:1-2,4 - Na matou nonofo i auvai o vaitafe i Papelonia, na fetagisi ai lava i matou, ina ua matou manatua Siona. Ua matou tautauina a matou kitara i luga o garava ua i ai... Pe faapefea ona matou pepese le pese i le Alii i le nuu ese? O le tasi lenei o a’oa’oga faale-Tusi Paia e le mafai ona ou faagaloina, o le faatinoga o le tala i le tafeaga i Papelonia, e aofia ai tagata a’o’oga ma faiaoga e to’aselau. O a’u sa avea ma se tasi o tagata Isaraelu na ave faatagata-o-taua. O le fasiga, saisaiina i maea, ma le tu’uina i totonu o se potu pogisa, o faatinoga ia ua ou lagona ai le pagatia ma le mafatia na o’o i le nu’u o le Atua i le na vaitaimi a’o feagai ma le tafeaga. Ua avea lenei faatinoga ma ala na ou lagona ai le mafatia o le ave’esea mai lo’u fale, mai lo’u aiga, ma lo’u nu’u i faiga a le fili – o se faatinoga e le mafai ona faatusaina ia i latou na o’o i ia tulaga, o le va’ava’ai atu a o faaumatia ma faaleagaina o latou nuu ma fale. O se vaaiga e iloa ai le pagatia ma le vaivai o tagata ua ave i tafeaga, ma ou manatua ai foi lagona faafiamalosi o i latou na faatinoina le fasiga o i matou! O lenei Salamo, o le tatalo a tagata ua ave’esea mai i o latou aiga ma nu’u, ma ua nofonofo ma fetagisi i ‘auvai o vaitafe o nu’u ese, ua toe manatua lagona o le mafatia ma le pagatia i le ave’esea mai o latou aiga ma nu’u, ua fetagisi ma le mana’o ia toe taui atu le mea ua faia e o latou fili. O latou loimata ua le o ni loimata o mea faaletino ua faaumatia, a e o loimata mo le faaleagaina o le lalolagi ua latou masani ai:i fanua, Malumalu, tapua’iga, o le saogalemu ma le pulea o latou lava fanua ma le soifuaga – ua ave’esea faamalosi i latou ma ua leai ma se mea o totoe. O le uiga moni o loo faamatala mai i lenei Salamo, o se faatinoga masani lea o loo i ai i le lalolagi i nei ona po, pe a o’o ina avea le tagi e tali ai lagona ita, o lagona mafatia ma le pagatia, ma le fia taui ma sui. E mafai foi ona avea loimata ma ala e tete’e ma faaolaola ai ni lagona mafatia, ma e mafai ona fai ma auala e tete’e atu ai i e ua latou faatupuina nei lagona ma faatinoga. Tatalo: A’oa’o mai le Atua e, ia matou fetagisi faatasi ma i latou ua maua i le loto mafatia. Ia matou lagona faatasi le tagi ona o lau amiotonu, ina ia faia ai lou finagalo, a e aua lava o matou loto. Amene. 29 Mafaufauga Loloto: O ai se tasi o loo faaaogaina lenei Salamo e fai ma tatalo i lenei aso? Faitau i le nusipepa ma faalogologo i tala faasalalau (news) ma mafaufau i upu o lenei Salamo. Aso Lua Novema 03, 2015: “O le Atua e faapei o se fafine ua tagi lotulotu.” Tusi Faitau: Ieremia 8:21-9:2, 17-21 Matua – Ieremia 9:17-18 - O loo faapea ona fetalai mai o le ALII o ‘au, Ina mafaufau ia outou, ma ia outou aami atu i fafine pepese, ina ia latou o mai, ma ia outou feauina atu i fafine popoto, ina ia o mai foi i latou; ia latou faataalise mai, ma ia latou lagi le pese e aualofa a’i mo i tatou, ia tafe ifo loimata i o tatou mata, ma ia maligi ifo le suāvai i o tatou laumata. O le taimi o faanoanoaga o Isaraelu i aso anamuā, e foliga tutusa lava ma le tele o aganu’u o atunuu i aso nei. Sa faatinoina lava e tinā ma fafine, e pei ona latou tausia le tino maliu i u’u manogi ma faatinoga uma ua fuafuaina e tatau ona fai a o feagai ma faanoanoaga. O le faatinoga o maliu i le tele o aganuu, e faitau aso ona o le tele o tapenaga ma sauniuniga e fai, atoa ai ma aso e faatino ai le faanoanoa i le ao ma le po (9:1). I le tusi a L. Juliana M Claassens, o le Mourner, Mother, Midwife (Westminster John Knox, 2012), o loo ia aumaia ai se ata o le Atua o loo talanoa mai i lenei vaega o le tusi o Ieremia, ma o loo ia aumaia ai se ata o le Atua o se fafine tagi lotulotu, o loo ia tausoa faatasi ‘auēga ma fafine e pei ona ta’ua i fuaiupu 17-21 mo e ua feoti. ‘O e feoti’ (The dead) i lenei tala, ‘o e ua fasiotia o tama fafine a lo’u nuu’ (9:1), o le to’atele o e faitau selau ua fasiotia ma faatama’ia e vaega ‘au a Papelonia i le faai’uga o le ono seneturi TLM. O lenei faatinoga i loimata, e pei ona faailoa i le finagalo o le Atua ma le ‘auega a fafine, e i ai lona taua faale-Mataupu Silisili i le manatu o Claassens. O le faatinoga o se molimau o loo faamatala ai le ogaoga ma le mafatia o le nu’u puapuagatia ua fa’ata’apeapeina. E le gata i lea, ua avea loimata ma vaifofō e mapu i ai mai le faanoanoa, ina ia faailoa o se tasi foi lea o faatinoga faaleperofeta, e faailoa ai e sologa lelei le taualumaga o le soifuaga i taimi uma, ma o se isi lea o auala e faailoa ai e tatau ona faia se suiga. E tulaga ese la tatou vaavaai i le Atua, pe a fai o foliga o se fafine ua tagi lotulotu, e ese mai le vaaiga o le Atua, o se toa taule’ale’a malosi e pei ona atagia i le tele o tala i le Tusi Paia. E faapefea ona e suia lā mā feso’ota’iga ma le Atua, pe a ou mafaufau i lona finagalo mafatia faatasi ma a’u, i o’u faanoanoaga faatasi ma o’u tagata? 30 Tatalo: Faailoa mai, le Atua e, Ou ala ina ia ou malamalama i le faatinoga o lou finagalo tonu. Amene. Mafaufauga Loloto: Ia faaavanoa sou taimi e te mafaufau ai i le ata o le Atua, e faapei o se fafine ua tagi lotulotu. O a ni mafaufauga fou e mafai ona atagia i le na ata o le Atua? Aso Lulu, Novema 04, 2015: “Faatusa o le Atua i le tinā tagi lotulotu.” Tusi Faitau: Ieremia 31:15-20 Matua – Ieremia 31:15 O loo faapea ona fetalai mai o le Alii, Ua lagona le leo i Rama, o le auega, o le tagi lotulotu lava; ua tagi Rasela ona o lana fanau, e le mafai foi ona faanaina o ia ona o lana fanau, auā ua leai i latou. O le faatusa o le Atua e atagia i le tina ua tagi lotulotu, ua tagiaue ona o lana fanau ua leai. O foliga ia ua aumaia i le tusi faitau o lenei aso, e pei ona molimauina i le tinā o Rasela, ua tagi ona ua leai lana fanau. O Rasela o le tinā o Iosefa ma Peniamina, ua fai ma suitulaga o le fanauga na tutupu mai ai malo e lua, o Iuta ma Isaraelu, lea na fai ma nuu filifilia o le Atua. Ua lagona le auega a Rasela i Rama, o le fanua na faapotopoto ai e Nepusatana tagata o le nuu e fai ma ta’imuaga i le tafeaga (Ieremia 40:1), o le fanua o le nofotoilalo o le nuu. Ua toe aumaia e Ieremia le tagi a Rasela, ma ona faanoanoaga, i le afe o tausaga talu ona maliu; e ui ina ua leva ona oti, a e manatua pea le tagi ona o puapuagatia ‘o lana fanau’ i le vaitau o perofeta. E leai se tinā e mana’o e feoti muamua sana fanau a o soifua pea. Ma o le tagi a se tinā ona ua oti sana tama, o se faanoanoaga e faigata ona faamalieina. E faapena le tagi a Rasela, ma e faapea foi le finagalo faa-tina o le Atua, aua e silisili ese lona alofa mo lana fanau. E tumau, e le gata foi lona finagalo alofa ona ua mafatia ma faatafea lana fanau. Peitai, o lona finagalo e i ai se aso ma se taimi e toe faapotopoto mai ai ma ofoofota’i lana fanau i ona a’ao alofa, ina ia faamalolo i o latou tiga uma. E ui ona e faamomoi loto i le finagalo faa-tina o le Atua, a e sa lē mapu ai lona alofa i lana fanau, ‘ua leai’, e pei ona molimau le tusi faitau o lenei aso. A e le gata i lea, o loo aumaia ai foi ma se faamoemoe fou aua le lumana’i: Pe a o’o ina mavae loimata, i le taimi e toe faapotopoto ai le fanauga a Isaraelu sa faatafeaina. I lona lava taimi, e lē uma le alofa saili mai o le Atua mo lana fanau. O tatou foi, ua ta’ua o fanau a le Atua, ua vala’auina e tausoa le galuega o le alofa saili atu mo e o lo’o tigaina ma mafatia i puapuaga o le olaga nei. Tatalo: Se’i faapaolo mai ou aao alofa i o matou luga, a e maise i latou o loo aafia i puapuaga ona o le pule saua. Amene. 31 Mafaufauga Loloto: O fea, o anafea, ma e faapefea ona e lagona le alofa saili mai o le Atua i lona finagalo faatina? Aso Tofi, Novema 05, 2015: “O se faafanua o tigā.” Tusi Faitau: Auega 1: 1-6, 11-12, 16-17. Matua – Auega 1: vaega 1a,2a E! ua nofo toatasi le aai sa tumu i tagata; ua se fafine ua oti lana tane le sa mamalu i nuu;... Ua matuā tagi o ia i le po, ua i ai foi i ona alafau o ona loimata; o i latou uma e sa mananao i a te ia ua leai so latou e faamafanafana ia te ia;... E le na o tagata e fetagisi, a e o’o lava foi i nofoaga ma fanua e mafai ona o’o i ai le vaaiga o faanoanoaga: O fale, o nu’u, o aai, o nofoaga o māta’aga, faapea ma atunuu, e o’o i ai faanoanoaga ona o le faatamala po o le faatalale ua pogai ai mafatiaga. Ua mafai lava ona tatou lagona ma molimauina auala o loo faaali mai e le si’osi’omaga i ona mafatiaga ona o mea ua tutupu ai. I le tusi o Auega, o le nu’u ua faapologaina o Ierusalema, ua faatusaina i se tama’ita’i puapuagatia ua ave’esea ona mamalu a e ua pei se pologa, ‘mai le nu’u ‘āinā i le avea e pei se fafine ua oti lana tane ua nofo to’atasi i le mea maupu’epu’e’ (from fully inhabited city to a lonely widow on a hill) (Kathleen M O’Connor, Lamentations and the Tears of the World, Orbis, 2002:28). Ua fa’alātaina o ia e i latou o e lē alolofa moni ia te ia, ua fa’amalosi, ma tu’ulafoa’iina. E loloto ona tiga, ma e leai se tasi na te mafai ona faamafanafana ia te ia mai ona tiga. O vaega uma o lona tino ua tofu lava ma lona mafatiaga: o ona mata e lē mapu i le tagi, o lona gutu e alaga ma le ita, ma ua o’o i lona manava le matuitui o tiga. E pei o se tagata ua sao mai sauaga, e tumau pea lagona ma faailoga ua fai ma faamanatu ia te ia i ona tiga. Ma e pei ona tusia i le fuaiupu 17, ua avea Ierusalema o se fafine ua faanofo’ese. O loo faamatala e le tusi o Auega se vaaiga moni i tiga o se nu’u ma lona laumua. A o tatou faitauina lenei tusi, ia tatou tuuina atu i le Atua nofoaga, o nu’u ma atunuu o le lalolagi o loo feagai ma tiga, ma ia tatou ole faatasi atu i le Atua mo so latou filemu. Tatalo: Le Alii e, ia avea i matou ma itu tino e lagona faatasi le tiga o i latou uma o e puapuagatia ma mafatia i tiga i le lalolagi. Amene. 32 Mafaufauga Loloto: O fea ni nofoaga i totonu o lou nu’u o loo feagai ma faanoanoaga? Aso Faraile, Novema 06, 2015: “O loimata o le tino.” Tusi Faitau: Auega 2:11-22. Matua – Auega 2:11 - Ua avea o’u mata i le tagi, ua sapotuvale lo’u manava, ua masa’a lo’u ate i le eleele, ona ua tu’imomomo le tama fafine a lo’u nuu; ina ua matapogia tama iti ma tama meamea i ala o le aai. O le tusi faitau o lenei aso o loo faamatala ai le mātuiā o le faanoanoaga a le nuu: ua aofia ai le maligi o loimata mai mata (f.11, 18), o le masa’a o le ate (f.11), ma le mavae o le ola i fatafata o latou tinā (f.12), o le sisi’i atu o lima (f.19), o manu’a e tele (f.13) o le tino o lo’o alaga mai ma le tiga. E tagi le tino e faailoa ona tiga pe a lē mafai e upu ona faamatalaina. E lē fesiligia le ole atu ma le tatalo atu i le Atua: ua avea le tino atoa ua fa’ataugā e fai ma tatalo, e tauivi, ma ōi i ona tiga, ma o loo faatauanau e faailoa ma faaleoina lona puapuaga. O le faamamafa o le tatalo i le tusi o Auega, e le o le fia malolo po o le fia mapu mai faigata, a o le tatalo ina ia faailoa (seen), le nofo saisaitia i tiga. ‘Le Alii e, ina silasila mai ia’ (1:20). ‘Le Alii e, silasila mai ia, ma ia e silafia le ua e faia nei mea i ai.’ (2:20). E i ai nisi tagata e tagi gofie nai lo isi; e pei o le tagi i ata tifaga, o musika, o faaaliga ma galuega a atisi, ma le tele lava o isi mea e faatupu lagona e o’otia ai le loto ma le mafaufau. Peita’i, e tulaga ese lava le auēga o le tino, pe a o’o i le taimi e faailoa mai ai ona tiga. E le mafai ona faamatalaina lenei ituaiga auēga, ona o se auēga o lo’o sau mai le loloto e aunoa ma ni upu na te mafai ona faamatalaina. O le auēga ua liu tino mai ai tiga faale-agaga, ma ua tu’ufaatasia ma tiga faale-tino, o le alaga e faailoa ni lagona loloto ma le ita tele, o le fatu ma le tino ua tetemū. E leai lava ma se tali e mafai ona tali ai lenei tatalo, ua na o le Atua to’atasi, o lē na te taofia i tatou ma alofa faamaoni mai e tali i o tatou tiga. Tatalo: Ia faatulaga se taimi e te faalogogofie ai i ni faanoanoaga ma ni tiga o lou tino ma lou loto. Ia tu’u atu uma i le Atua, o lē tali mai i o tatou puapuaga. Amene. Mafaufauga Loloto: A o e feagai ma galuega masani o le aso, ia e mataala i nisi o feagai ma auēga, ma ia e tu’uina atu i latou uma i le tatalo i le Atua. 33 Aso Toona’i, Novema 07, 2015: “O le pa’i mai o loimata.” Tusi Faitau: Isaia 25:6-9 Matua – Isaia 25:6a, 8b - E faia e le Alii o ‘au i lenei mauga... e soloiesea foi e le Alii le Atua o loimata i mata uma lava; e faate’aeseina foi e ia le gao o lona nuu i le laolagi uma lava... O se tasi o faatinoga o’otia e mafai ona tatou faia mo isi tagata, o le pa’i atu lea i loimata; o se taimi taua lea e lagona faatasi ai tiga o loo mafatia ai se tasi uso-atagata. E i ai se ata e tolu ona vaega o loo faasolo nei i le televise, e ta’ua: Aua lava ne’i soloia ni loimata e aunoa ma ni totini lima. O upu nei ua avea ma upu tomua e faatonuina ai e se teine foma’i le isi teine foma’i, a o la galulue e fa’amamā manu’a ma papala o se tasi alii talavou ua lata ona maliu. O lenei ata faasolo o lo’o faatatau i le pepesi o le fa’ama’i faigata o le AIDS i le amataga o le 1980’s. Ua faalauiloa ai le a’afiaga tele i le itupa o faafafine ma le lautele o tagata. O loo faailoa i lenei ata le matata’u ma le fefefe o tagata e pa’i atu i tino o i latou nei ua masalomia. E ui ina faasalalau le lē aafia o se tagata pe a pa’i i le tino, vagana o feusua’iga ma le fa’aaoga o nila e tui ai le toto o e ua aafia i lenei fa’ama’i. Peitai, ua va’aia pea le to’atele ua lē fia papa’i i nei tagata, ma e ua a’afia i le fa’amai o le AIDS. O se molimau lauiloa lenei a le perofeta o Isaia e pei ona faitauina; o le aumaia lea o foliga latalata mai o le Atua, e pa’i mai i loimata o e ua faanoanoa ma mafatia i tiga. Ua ave’esea ma ua leai ni totini lima, ua pa’i atu o le aano i le aano, ma le tino i le tino. O loimata faale-Atua ua fesootai ma loimata faaletagata, ma o le na fesootaiga, ua aumaia ai le faamoemoe fou o le faamaloloina. Ua faamaonia lea faatinoga taua i le liutino-tagata o le Atua e ala i lona Alo Pele e toatasi. O le faailoga e le taumamao le Atua mai i o tatou tiga ma mafatiaga o le tino; e faalatalata mai pea o Ia ina ia lagona faatasi o tatou tiga uma. Ua liutino-tagata le Atua Silisili ese, i fesootaiga ma loimata faale-tagata; ina ia lagona faatasi le ōi ma faanoanoga loloto faale-tagata; a e maise o le o’o atu i le oti faale-tagata. Tatalo: A’oa’o mai le Atua e, ia matou pa’i atu i loimata o isi o matou uso-atagata ma le fa’aeteete. Ia matou lagona le mafuta mai o lou Agaga i taimi o tiga; ma ia matou faamafanafana atu i e ua mana’omia lou filemu. Amene. Mafaufauga Loloto: O fea le taimi o lou olaga e tatau ai ona ave’esea ou “totini lima”, a e pa’i atu i e o lo’o mana’omia lau fesoasoani? 34 Loimata 2. “Loimata i le Feagaiga Fou.” [Saunia e: Nicola Slee] Aso Sa, Novema 08, 2015: “O le meaalofa i loimata.” Tusi Faitau: Mataio 5:1-6. Matua – Mataio 5:1-5 - Ua silasila atu ia i le motu o tagata, ona maliu a’e lea o ia i le mauga; ua nofo ai i lalo, ona o mai ai lea o ona soo ia te ia; ua ia fetalai atu, ma a’oa’o ia te i latou, “Amuia ē matitiva i le agaga; auā e o latou le malo o le lagi. Amuia ē faanoanoa; auā e faamafanafanaina i latou. Amuia ē agamalu; auā e fai mo latou tofi le nuu.” E i ai le talitonuga i le ekalesia Eastern Orthodox e faapea, “o le meaalofa o loimata”, e faataua ai loimata e pei o se faailoga anagatā ma le lelei, e ao ona momo’o i ai tagata e ala i le tatalo. O lenei faaupuga masani e faatauaina i le a’oa’oga a Iesu i luga o le mauga, a e faasilisili ai lona faamamafa e pei ona tusia i le fuaiupu e 4, Amuia ē faanoanoa; auā e faamafanafanaina i latou. E peiseai e foliga lē talafeagai le mana’o po’o le momo’o i loimata, pe afai tatou te iloa o le faanoanoa o se tulaga tatou te lē fia o’o i ai. Peitai, i le talitonuga a le Orthodox, o loimata o se mea taua lea e iloa ai le moni o lagona ma mafaufauga e ofo atu ai le tatalo faamaoni. E faataua e tusitala Orthodox tamā ma tinā o le toafa i le tuana’i, o ē na latou iloa le taua o loimata, ma latou faamatalaina ai lea auala lilo o loo a’oa’o ma alofa mai ai le Atua ia i latou, o le faailoga o le tu’uina atu uma i le Atua. O loimata o faailoga vaaia ia o vaivaiga ma le ma’ale’ale o le tagata, o se vaaiga i lo tatou matitiva faale-agaga. O nei ituaiga loimata o loo tatou faailoa ai lo tatou faatauvaa i lo tatou va ma le Atua. O nei ituaiga loimata e mafai ona faafilemuina ai o tatou loto, ma sauni e talia le alofa o le Atua. E tutusa lelei lava lenei manatu ma a’oa’oga a Iesu i luga o le mauga, o i latou o e iloa lo latou matitiva latou te maua faamanuiaga, e ese mai ia i latou ua tele le tamaoaiga ma tele mafaufauga ma manatu latou te lē mana’omia ai le Atua. Tatalo: Le Atua o loimata, a’oa’o mai le taua o le tagi ina ia tatala ai lo’u loto e talia au faamanuiaga. Amene. 35 Aso Gafua, Novema 09, 2015: “O loimata e silisili lona tau i auro.” Tusi Faitau: Luka 7:36-48. Matua – Luka 7:37-38 - Faauta foi, o le fafine o le aai, o ia o le fafine agasala, ua iloa e ia ua taoto o ia e taumafa i le fale o le faresaio, ona au mai lea e ia o le fagu alapasa ua tumu i le suāuu manogi; ua tu foi o ia i tua i ona vae, ua tagi, ua faasisina ifo e ia loimata i ona vae, ua sōloi ai i lona lava lauulu, ua sogi foi i ona vae, ma faauuina i le suāuu manogi. Masalo ai ona o le leai o sona tulaga, e le ta’ualoaina po o le ta’uleagaina, ua faia ai e lenei fafine se faatinoga e maoa’e lona ofoofogia, a e sa le aloa’ia. E lē pei o Simona ma le au Faresaio, o loo latou malamalama lelei i o latou tulaga faale-lotu, o a latou faatinoga, o amio ma uiga e faia i luma o tagata; o gaoioiga ma faatinoga a le fafine ua faia mo Iesu, a e lē o manatu ia te ia. Ua tagi sa’oloto le fafine ua leai lava ma sona popole, o ona loimata o meaalofa taugata ma le anagatā, ua fefiloi ma le suāu’u manogi tau tele ua fa’au’uina ai vae o Iesu. Ua talia e Iesu ona loimata ma le agaga faafetai, ma lona silafia lelei e silisili atu lona tau i le u’u manogi, ona o loimata e mai le ta’ele ma le loloto o ona lagona. Tatou te le iloa le tala’aga o lenei fafine, ae ua na o se faamatalaga e faapea, o ia o le fafine agasala (f.37) – o loo faatusa i le soifuaga o le fafine tali tane. E ui ina e le o aumaia uma se faamatalaga e faatatau i le soifuaga o lenei fafine, a e ua aumaia e le tusitala o Luka se ata e faatusa ai le tagi ma loimata o lenei fafine: o le malosi o le mativa ua faamalosia ai o ia e faatau atu lona tino, o le agaleagaina o ia e tamaloloa ma le masiasi i faiga lē tatau ua latou faia ia te ia, o le sauaina ma le faaleagaina o lona tino. O faatinoga uma nei ua ia lagona ma maligi ai loimata o le masiasi, o le leai o se malosi e tete’e atu ai nei faiga, ma le fia ‘ai. E ui i lea, o ona loimata i totonu o lenei tala e uiga ese – o loimata ua sasa’aina mai le loloto o lona alofa ma lona faaaloalo, ua fai lea ma molimau o foliga vaaia o lona tagata faale-agaga. E lē pei o i latou ua a’ai faatasi ma Iesu, ua iloa e le fafine le taua ma le mamalu o le nofoaga ua i ai nei, ma ua ia faatauaina; ua ia to’otuli i ona vae, ua tagi, ma ua ia sasa’aina atu lona loto i le Alii. Tatalo: Le Atua e o loimata, a’oa’o mai ia aua ne’i o’u faamasino ma tauemu atu i loimata o isi, a ia ou taliaina e pei o meaalofa taugata ma le anagatā. Amene. Mafaufauga Loloto: O loimata o ai na e faatauaina i se taimi? Aisea? 36 Aso Lua, Novema 10, 2015: “O loimata o Iesu.” Tusi Faitau: Ioane 11:30-36. Matua – Ioane 11:33-35 - Ua silafia e Iesu o ia ua tagi, ma Iutaia ua o mai ma ia ua fetagisi, ona tiga tele lea o lona finagalo, ma ua ātu lava o ia; ona faapea atu lea, “O fea na outou tuuina ai o ia?” Ua faapea mai i latou ia te ia, “Le Alii e, maliu mai ia, e te silasila i ai.” Ua tagi Iesu. Ua le gata ina talia e Iesu loimata o isi o meaalofa anagatā – a ua faailoa mai foi lona tagi, ma ua aumaia i tala a le ‘au fai Evagelia loimata a Iesu, o foliga vaaia ia o le tunoa o lona alofa mo tagata: o Lasalo, i le la feiloa’iga muamua; o Maria ma Mareta, ua ia tausoa faatasi le faanoanoaga; a e maise i tatou, o e o loo saili pea ma tauivi ma faaosoosoga a ia avea Iesu ma faauo. E le ona pau lea o se taimi o loo faamatala mai ai le tagi a Iesu; ua ia tagi mo le nuu o Ierusalema (Luka 13:31-35), ma o loo aumaia i le tele o isi tala lona alofa i e ua o mai ia te ia mo se faamalologa. I Ketesemane, o loo ia tauivi ai ma ona lava lagona, faatasi ai ma ona loimata (Luka 22:44). Peitai, ua pau lea o le tala o lo’o ta’u mai ai lona tagi i le oti o lona uo. Ua maligi ona loimata ona o le tagi a Maria, faatasi ai ma le fetagisi a i latou o e na i ai faatasi ma ia (f.33). Ua pei lava ona atagia i le tagi a i latou nei, ua ia tagi lotulotu ai, ua ia sasa’a mai ona lagona alofa mo le uo pele ua le iloa. Ua avea foi ona loimata ma faamafanafanaga i le faanoanoa a le ‘au uso e to’alua. Ua silafia lelei e Iesu lenei aiga, ma e asiasi so’o i ai i le tele o taimi; e alofa tele Iesu ia i latou o ana uo, ma ua ia lagona foi lo latou faanoanoa, ua pei lava o lona aiga. Ua aumaia e le evagelia a Ioane le ata o le Keriso ua momomo lona finagalo i le faanoanoa, ma ua ia tagi faatasi ma i tatou i o tatou faanoanoaga ma mafatiaga. Tatalo: Le Atua o loimata e, faafetai mo loimata a Iesu, ua avea ma faamafanafanaga i le loloto o o’u tiga. Amene. Mafaufauga Loloto: O le a se mea e ono tagi ai Iesu i lenei aso, i le vaaiga i lou lotoifale faapea le lalolagi? 37 Aso Lulu, Novema 11, 2015: “O le papatisoga o loimata.” Tusi Faitau: Luka 22:54-62. Matua – Luka 22:61-62 - Ona fāliu lea o le Alii, ua silasila atu ia Peteru. Ona manatu mai ai lea o Peteru i le fetalaiga a le Alii, na ia fetalai mai ia te ia, “E le vivini moa seia e faafiti faatolu mai ia te au.” Ona alu ai lea o ia i fafo, ua tagi lotulotu ia. I le pese a se tasi o tusi pese lauiloa o le “Bach”, o le pese a St. Matthew’s ma St. John’s ua faaulutalaina o le “Passion”, o se tasi o vaega lauiloa i le pese atoa. I le fuaiupu 62, o loo usuina e le faievagelia, o se pese e faamatala ai le tagi ma le faanoanoa e lē faatua’oia i fatuga o pese. O le faaupuga o le ‘tagi auēuē’, o loo umi lava se taimi o fetosoa’i ai i nota o le pese, a e maise lava le faasologa i nota maulalo, e atagia ai le loloto ma le malosi o lagona o le tagi, e le mafai e upu ona faamatalaina le loloto o le faanoanoa ma le tagi auēuē a Peteru ma ona loimata. E faaosofia ai lava lagona o’otia ma lo’u tagi pe a ou faalogo i lenei pese. O loimata a Peteru, e pei ona faamatalaina e Luka, toe faaliliuina i le Bach faamusika, o loo i ai le malosi e fa’ao’otia ai le tagata faalogologo, ma maligi ai loimata fou. O le talitonuga masani a le ‘au Orthodox, e faataua e i latou loimata, ona o le faailoga lea o le loto salamo o le tagata, ma e fai lea ma ala e toe fo’i ai le tagata mo se faamagaloga ma le ola faafouina. O lenei faatinoga e ta’ua o le ‘pasch’, o loo faatino ai le soifua po o le olaga faa-Kerisiano: o le soifua e fa’aauau ai pea, e mavae mea tuai ma toe fanaufouina, e faapena foi ona faia i le papatisoga. E faatusaina loimata i le papatisoga e pei ona fai mai ai se tasi o tusitala Orthodox. Fai mai John Climacus, “O loimata ua faatusa lea i se ta’elega, e fufulu ese ai agasala (Patrologia Graeca 88:808). Ua avea lenei vaaiga ia Peteru ma ona loimata, tatou te lagona ai lona faafitia o Iesu, o lagona mafatia ma le lē mautonu. Ua avea loimata a Peteru ma se ata o lona papatisoga i ona faanoanoaga, ua toe liliu ai lona loto e toe foi atu i lē ua ia faafitia. Tatalo: Le Atua o loimata e, fufulu mai, papatiso mai, faafou mai a’u, mai le faanoanoa i lo’u tagi. Amene. Mafaufauga Loloto: Ia e faalogologo i le fatuga a Bach, Passion, ma ia e manatunatu i le faitauga o lenei aso. 38 Aso Tofi, Novema 12, 2015: “O le ‘oa i loimata.” Tusi Faitau: Luka 23:26-31. Matua – Luka 23:27-28 Ua mulimuli atu ia te ia le motu o tagata e toatele, ma fafine, e ua taufaitagitu’i, ma taufaitagiauē ia te ia. A ua fāliu Iesu ia te i latou, ua fetalai atu, “Tama fafine a Ierusalema e, soia le tagi ia te a’u, a ia outou tagi ia te outou, atoa foi ma a outou fanau. Ua tatou toe i ai foi i le tala i le fafine tagi lotulotu, faatasi ma Simona le Kurene, atoa foi ma tagata ese ma le toatele ua o mai e faafeao Iesu, a o ia aga’i atu i le satauro. O ana uo ma ona so’o, o i latou na faapea o le a tutū faatasi ma Iesu i ona puapuaga, e tausoa ma tauave ona loimata ma ona tiga. Peitai, ua leai lava ma se isi e iloa Iesu. O loo faaalia e tagata ese lenei galuega alofa, o lana misiona i le lalolagi; e i ai le tulaga faamaoni o loo faaalia mai i lenei tala. E i ai taimi e tausoa ai ma tauave e tagata ese o tatou loimata ma mafatiaga, aua ua lē mafai e i latou ua latalata ma pele ia i tatou ona faatinoina. Ua fāliu atu Iesu i fafine ma fetalai atu, ‘soia le tagi ia te a’u, a ia outou tagi ia te outou, atoa foi ma a outou fanau. Faauta foi, e oo mai ona aso, e fai mai ai tagata, Amuia e ua pa, ma fafine e le’i fananau, ma susu e lei susuina! O le faailoga o le puapuaga e o’o mai ia i latou ma a latou fanau. E matuā faigata tele ona tatou mafaufau i fafine a e o’o i se tulaga faapea, o fafine ua manatu faapea i o latou aiga ma fanau. Peitai, o lenei ata o loo faasalalauina i ata faasolo i le televise, o mea e tutupu e a’afia ai fafine, o tinā, o tama’ita’i, o tatou aiga, ma fanau, ua faaleagaina i faama’i eseese, o le ola mativa, o taua ma misa, ma le sauaina ma le faamalosia o i latou e tagata e tatau ona puipui ia i latou ma maua ai le nofo saogalemu. Ua liliu ese Iesu mai ona lava tiga, e ui i le matuitui ma le o’ona, a e ua ia faamuamua ma faataua mafatiaga ma tiga o tagata, o ē sili atu o latou tiga nai lo ia. Ia mafai ona tatou lagona lea faatinoga taua, ma ia tatou faaa’oa’o i ai. Tatalo: Le Atua o loimata e, a’oa’o mai ia ou liliu ese mai o’u lava tiga, a e a’apa atu e fesoasoani ma faamafanafana i e ua mafatia ma puapuagatia. Amene. Mafaufauga Loloto: Mafaufau i se taimi na a’apa atu ai se tasi ma ofo atu lona fesoasoani ia te oe. Ia faafetai ma nofo tatalo mo ia. 39 Aso Faraile, Novema 13, 2015: “O le atuatuvale o loimata.” Tusi Faitau: II Korinito 1:23-2:4. Matua – II Korinito 2:4 - Auā o le puapuaga tele atoa ma le atuatuvale o le loto na ou tusi atu ai ia te outou ma loimata e tele; e lei ina ia faatigaina outou, a ia outou iloa ai lo’u alofa ua matuā tele ia te outou. O loo maitauina i le tusi muamua ma le tusi lona lua a Paulo i Korinito (I Korinito & II Korinito), le fesoua’ina o le mafutaga ma le feso’ota’iga a Paulo ma le ekalesia i Korinito. I le tusi lona lua a Paulo i Korinito, o loo atagia i totonu o lenei tusi le tele o tiga, o mafatiaga ma puapuaga – o le tele o tala e faatatau i lagona tiga ma puapuaga i le Feagaiga Fou, o loo maua uma i totonu o lenei tusi. O tiga ma puapuaga a Paulo e aofia uma ai tiga i le tino, o faigata, o le nofo saisaitia, o le atuatuvale, ma le faamata’uina i le oti (II Korinito 1:8-10), faapea le ātu o le mafaufau ma lona ita tele, o le faanoanoa pe a o’o ina faia e se tasi ua pele se mea e faatiga ai ia te oe. O mafatiaga ma puapuaga faapea o loo tusi atu ai Paulo, ua ia tusi atu ma ‘ona loimata e tele’. Ua ia tusi atu e apoapoa’i ma toe faatonutonu ia Korinito, ma ua ia faia ma le faaeteete ma le loto onosa’i. Ua ia toe tolopoina lona asiasi atu i Korinito, ina ia lava se taimi e mafaufau ma toe fuata’ina le ola talitonu o Korinitio ma le faatuatua i le Atua, e pei ona atagia i se tusi muamua (I Korinito), ina ia o’o i le taimi e taunu’u atu ai, ua mafai ona latou feso’ota’i fiafia faatasi i le mafutaga fealofani. O mafutaga ua loa tausaga o feso’ota’i pea, ma umi se taimi e mafuta ai, e lē taumate le fetaia’i pea ma faigata, o taimi e fe’ese’esea’i ma fevaevaea’i ai, o lagona ma mafutaga ua afaina i tiga ma puapuaga – po o mafutaga lautele, po o totonu lava o lo tatou lotoifale. O le mea moni lava e tatau lava ona paleni ma o tutusa lagona o tiga ma puapuaga faatasi ma lagona o le agamalu ma le loto faaaloalo i manatu ma lagona e fe’ese’esea’i ai – o se tulaga e faigata tele ona faatinoina. Tatalo: Le Atua o loimata e, a’oa’o mai ia ou iloa le taimi tatau e faailoa ai lo’u ita, ma taimi e tatau ona ou nofo filemu ai. Amene. Mafaufauga Lautele: O a ni faaletonu ma ni faigata i totonu o mafutaga ma feso’ota’iga i lou olaga, faapea i totonu o lou loto? E faapefea ona e tali atu i ia faaletonu ma faigata? 40 Aso Toonai Novema 14, 2015: “O le i’uga o loimata.” Tusi Faitau: Faaaliga 21:1-4. Matua – Faaaliga 21:4 - E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. A o’o ina lutia i tatou i faanoanoaga loloto, e faigata tele ona tatou mafaufau i se taimi e uma ai lo tatou mafatia ma le pagātia. E moni, e faigata lava ona tatou toe fo’i i se lelei mai le tele o manu’a tatou te feagai ai. O le maliu a sē ua pele ia i tatou, o se tasi o le fanau po o se uo, o tiga ia e le mafai ona tatou taofia, ona a fai e tu’u o lona uiga ua oti le alofa, ua leai se alofa o totoe ia i tatou. E le mafai ona tatou lagona pe manatunatu i le vave o’o mai o se tali ma se vaifofo e faauma ai o tatou tiga, pe a fai o loo feagai i tatou ma faanoanoaga loloto, e ui i ni taumafaiga e faafiafia le tagata ua aafia i faanoanoaga. O lo tatou taumafai e faafiafia e atili ai ona faatupu lagona o le fia nofo to’atasi, faatasi ma le faatupuina o lagona tiga ma le mafatia, ona o le manatu e le o faataua o latou lagona. E faapefea la ona tatou faalogo i upu i le faai’uga o le tusi a Faaaliga, e pei ona atagia ai le leai o se oti, po o se faanoanoa, po o se aue? O loo faailoa mai le tulaga moni e matuā ese mai lava i le lalolagi lea o loo i ai nei: e loloto i tiga, e i ai le oti, ma loimata. O loo faailoa mai e le Atua na te toe faia mea uma, o le Atua e faafou ma toe faatulaga, auā ua mavae atu mea muamua, na te faia ia fou mea uma lava. Mo le taimi nei, ua na o ni mafaufauga e faailoa mai i tusitusiga ma faaaliga a atisi, e o’o lava i le ta’aalo sa’oloto o tamaiti. Peitai, mo lenei taimi, a o tumau pea o tatou lagona o le tagi, o loo faatasi ma lotolotoi ma mafuta mai pea le Atua i la tatou savaliga, o lo’o IA pa’i mai i o tatou loimata, ma sōloiesea – e le na o se taimi e tasi, a e o loo IA faia pea, pe afai e maligi pea o tatou loimata. Tatalo: Le Atua o loimata e, e ui ina o matou momo’o pea i le taimi e sōloiesea uma ai o matou loimata, aua e te taumamao ma i matou, a ia e latalata mai i taimi e maligi ai o matou loimata. Amene. Mafaufauga Loloto: Mafaufau i se taimi na sōloiesea ai e le Atua ou loimata, ma ia e tatalo ma le agaga faafetai. 41 Olioli 1. “Olioli i le Feagaiga Tuai.” [Saunia e: Rachel Montagu] Aso Sa, Novema 15, 2015: “Loto faafetai ona o le fiafia tele.” Tusi Faitau: Teuteronome 12:5-12. Matua – Teuteronome 12:7,12b - Tou te aai ai i lea mea i luma o le Alii lo outou Atua, tou te olioli foi i mea uma lava e faia i o outou lima, o outou atoa ma o outou aiga, o mea ua faamanuia ai oe e le Alii lou Atua... o outou, ma o outou atalii, ma o outou afafine, ma a outou auauna tane, ma a outou auauna fafine... E amata le faitauga o lenei vaiaso i le loto faafetai i le Atua ona o ana meaalofa ma faamanuiaga e tele mo i tatou, ona soso’o lea ma le fiafia tele tatou te maua mai le Atua, ma faai’u ai i lo tatou nofo faatalitali mo se lumana’i manuia mo aso a sau. E tele upu i le gagana Eperu o loo faamatala ai le ‘olioli’ (rejoice); o nisi o nei upu o loo i ai i le tusi faitau o le vaiaso lenei. A o faasolo mai le tala ia Mose, ua o’o lava ina iloa tino e Mose, e na te lē tu vae i le Nu’u Folafolaina, ma ua toe lava o sina taimi e mafai ona ia toe a’oa’o, ma toe faamanatu atu ai tulafono ma poloaiga a le Atua i le fanauga a Isaraelu, e pei ona ia faia i le 40 tausaga o latou taamilomilo ai i le vao. Ua tatou faitau i le faasologa o le soifuaga a Mose, mai le taimi na vala’auina ai e le Atua i le la’au talatala, ma lona tali atu na te le iloa tautala (Esoto 3:10). Ua faamanatu pea e Teuteronome tulafono e tele mai le Atua, ma le tele o poloaiga ma faatonuga o loo faaopoopo pea, ina ia a’oa’oina ai fanau a Isaraelu i le taua o lo latou ola tausi feagaiga ma le Atua, i le nuu ua folafolaina e le Atua i lalo o le ta’ita’iga a Iosua. O loo tele ina ta’ua e Teuteronome le malumalu i le taimi o lumana’i. O le tuuina atu o le faafetai i le Atua e ala i taulaga ua osia i manu, o se tasi lea o faiga tapuaiga e faigata ona tatou malamalama i ai. A ua faigofie ona tatou malamalama i le loto faamalieina e maua mai i fua o faatoaga, ua loa aso, masina, ma tausaga o galulue faatasi ma isi, faapea le tapuaiga ma faamanuiaga mai le Atua ma le ‘au Sa Levi, o e galulue i le malumalu, a e le mafai ona pulea ni fanua. Tatalo: “E vivi’i atu foi ia te oe i lo’u gutu ma o’u laugutu e alaga fiafia. A ou manatua oe i lo’u moega, ou te mafaufau ia te oe i leoleoga o le po. Auā na fai oe ma fesoasoani ia te a’u; ou te olioli foi i le paolo o ou aao.” Amene. (Salamo 63:5b-7) 42 Aso Gafua, Novema 16, 2015: “Ia fiafia le lagi!” Tusi Faitau: I Nofoaiga Tupu 16:7-12, 23-27, 31. Matua – I Nofo. Tupu 16:26-27,31 - Auā o atua uma o nuu o tupua lava ia; a o le Alii na ia faia le lagi. O loo i ona luma le viiga ma le matagofie; o loo i lona afioaga le malosi ma le fiafia. Ia fiafia le lagi, ia olioli foi le lalolagi, ia outou fai atu i nuu ese, o le Alii o le tupu lava ia. O lenei salamo mai le Nofoaiga a Tupu, e foliga tutusa ma Salamo 105 ma 96, o le fiafia tele e vivii i le Atua. Ona o le tele o pese ma salamo na tusia e Tavita, o le tele o faamaumauga i tala i le Tusi Paia o loo aumaia ai le ata o Tavita o loo pese ma tā le napeli; a e o la’au faaili na faaaoga e Tavita o le kitara ma le talipalau e fai mai i pa’u o manu. Na tatou mua’i faalogo i le taleni pese a Tavita i lona faamaloloina o le tupu o Saulo mai lona ma’i, e ala i lana pese. Ona tatou faalogo lea i lona pese, e olioli ina ua aumaia le ato laau i Ierusalema, e ui ina le talafeagai i mafaufauga a lona to’alua o Mekala. O loo faailo mai foi i lenei salamo, a o le’i fausia le malumalu e Solomona, na mana’o lava Tavita e faatulaga se faatinoga e faia ai vi’iga o le Atua. Ia Tavita, o le lagiina o vi’iga a le Atua e afua mai vi’iga tu’usa’o i le Atua, faatasi ai ma le ta’uta’uina o tala tau i le Atua i nu’u tuaoi, ma le māfua’aga o le faaolataga. O loo faailoa foi e Tavita le Silisili ese o le Atua, o Lē na faia mea uma, e ese mai i atua – o tupua faapaupau o loo ifo ma tapua’i i ai nu’u tua’oi. I le fuaiupu 11, o loo tusia ai upu nei, “Saili ia outou i le Alii ma lona malosi; sailiili ia te ia”, o se faamanatu ia i tatou ia tatou saili pea i le Atua ma ia tatou i ai faatasi ma ia i lona mamalu. E pei ona pese ai Tavita, ia atoatoa la tatou vi’iga i le Atua, ma ia faatumauina la tatou vi’iga e faavavau; Ia olioli i le lagi... Tatalo: “Ia fiafia lava le laueleele ma mea uma o i ai; ona alalaga fiafia ai lea o laau uma o i le vao matua, i luma o le Alii; auā o loo afio mai e faamasino le lalolagi; na te faamasinoina le atu laulau i le amiotonu.” Amene. (Salamo 96:1213b) Mafaufauga Loloto: Ia fai sau lisi ini mafua’aga se luasefulu-lima (25) e te fia vivi’i ai ma le faafetai i le Atua, i mea na tutupu i lou olaga, po o mea na tutupu e amata mai i le vaitaimi o le Esoto se ia o’o mai i le taimi nei. 43 Aso Lua, Novema 17, 2015: “O le Atua fa’amanūina.” Tusi Faitau: Salamo 34:1-10. Matua – Salamo 34:1-2 - [O le salāmo a Tavita ina ua faataga amio valea o ia i luma o Apimeleko, ona tuli ai lea o ia ia te ia, ona alu ese ai lea o ia.] Ou te faafetai i le Alii i aso uma lava; e le aunoa ōna vi’iga i lo’u gutu. E mitamita lo’u agaga i le Alii, e faalogologo i ai e ua puapuagaina, ona latou fiafia ai lea. E i ai taimi tatou te faailoga ai tagata, e pei o isi i a latou va’aiga, ma isi i ni tala e faalogo ai. A e i totonu o le Tusi Paia, o loo faamatala ai le galulue faatasi o mata ma taliga, ma e leai se faailoga tagata i lea tulaga. Ma o loo aumaia i le fuaiupu e 8 le faatonuga, Ina tofotofo ia outou, ma ia outou iloa e lelei le Alii. O loo aumaia i le ulutala o lenei salamo le faatagā amio valea a Tavita i luma o Apimeleko. I le taimi na filifilia ai e le Atua ia Tavita e avea ma tupu, e sui tulaga ia Saulo, e le’i uma le mana’o o Saulo e avea pea o ia e fai ma tupu. Na nofonofo solo Tavita i lona sola ese mai a o tuliloa o ia e Saulo. Ina ua iloa o ia, e ui i le tele o taua na ia manumalo ai, na faatagā amio valea Tavita, ona o le musu e faailoa o ia, e pei ona tusia i le I Samuelu 21. O lona sola ese e le’i uma ai lona pese e vivi’i i le Atua. Peitai, o le tupu o Kata o Akisa na ia matuā fefe ai, a e le o Apimeleka. O loo faapea le manatu o nisi e su’esu’e i le Tusi Paia, o le igoa Apimeleka (o lona uiga i le gagana Eperu, o lo’u tamā le tupu) o se suafa-matai, a e le o le igoa moni o le tagata. O loo atagia i lenei salamo le faasologa masani o mata’itusi o le gagana Eperu, e pei o le faasologa o isi pese, e pei o Auega, o salamo o loo faailoa ai le atoaga o le faatasi mai o le Atua, i taimi e fetaia’i ai ma faigata. O loo i ai ma le fuaiupu faaopoopo e ta’u mai ai le galuega lavea’i a le Atua. Ua olioli Tavita, ona ua tali mai le Atua e ala i lona lavea’iina ma lona faasaoina o ia. Tatalo: “Ia pepese ma taufaiolioli o e loto i la’u amiotonu; ia fai ane pea lava i latou, Ia viia le Alii, o le ua finagalo ia manuia lana auauna. E ta’uta’u atu foi lo’u laulaufaiva i lau amiotonu, ma vivii atu ai ia te oe i le aso atoa.” Amene. (Salamo 35:27-28) Mafaufauga Loloto: O i ai se faalapotopotoga o latalata ane mo tagata o loo mana’omia se fesoasoani, e mafai ona e ofo atu ai lou taimi po o se tupe e te fesoasoani i ai? 44 Aso Lulu, Novema 18, 2015: “O le faafetai e faavavau.” Tusi Faitau: Salamo 118:15-24. Matua – Salamo 118:15,23-24 - O leo o le alaga fiafia ma le olataga, o i ai ia i fale ie o e amiotonu. Ua se toa le aao taumatau o le Alii. ...O le mea lea ua faia e le Alii; o le mea tatou te ofo ai pe a vaai i ai. O le aso lenei ua faia e le Alii; ia tatou olioli ma fiafia i ai. O le salamo i le aso ananafi o loo faatatau i le pese olioli a Tavita i le Atua, ina ua ia lavea’i ma faasao ia te ia mai lima o Saulo. O le salamo o lenei aso, o loo ua toe faamanatu mai ia te a’u le tausiga a le Atua ia te a’u, a o o’u feagai ma tiga i le fanauina o la’u fanau; e le mafai ona tutusa ma le tulaga na i ai Tavita, a e na ou lagona lo’u mana’omia o se fesoasoani. Na ou faitau i le tala i se tasi o fafine Iutaia, ua fai ma ana masani le tauloto o ia upu, ‘tatala mai ia faitotoa’, ua ou manatu ai o upu o le Salamo 118:20, ma ua ou avea ia upu e fai ma upu ou te taulotoa, pe a o’o i taimi ou te tiga fanau ai. O Salamo 113 – 118 o salamo e tauloto ma usuina i totonu o sunako i taimi o aso faamanatu, ua ou faaaogaina foi e fai ma pese e ofo ai le lotofaafetai i le Atua, mo lana tausiga ia te a’u ma la’u fanau. Ua avea foi nei salamo ma pese e faamanatu i taimi o le Paseka, e faamanatu ai i totonu o aiga ta’itasi, a e maise le a’oa’oina o fanau i le taua o le Esoto mai Aikupito, le o ese mai Aikupito; o se tasi lenei o salamo na ou mua’i faalogo i ai i taimi a o o’u la’itiiti. O le feau taua o loo aumaia i nei salamo, o le faafetai i le Atua o se fiafiaga tele, ma ia tatou ola faalagolago i le Atua mo lona alofa ma lona agalelei, e tusa lava pe eseese ni faamamafa o loo talanoa ai salamo ta’itasi. O loo faailoa le toe fo’i o le tafeaga; o e na tuli’esea ma faatafea, ua toe fo’i mai i fanua, ma ua fai le tapua’iga i le malumalu ma ma’a tulimanu, le vaega taua o pesepesega, o vi’ivi’iga, o faafetai ma le tau fai olioli i le Atua ua liu tino mai i le lalolagi. Tatalo: “Ou te alofa, auā ua faafofoga mai le Alii i lo’u leo ma la’u aioi... O le Alii o lē alofa fua ma lē amiotonu ia... Lo’u agaga e, ia e foi atu i lou mapusaga; auā ua agalelei mai le Alii ia te oe.” Amene. (Salamo 116:1,5a,7) Mafaufauga Loloto: A maua sou taimi avanoa, faalogologo i le aufaipese leo malie o le Lauderdale Road Synagogue, a o latou usuina le Salamo 118:26-29 i le gagana Eperu. www.youtube.com/watch?v=9PMzn7q1-tc 45 Aso Tofi, Novema 19, 2015: “Latou te maua le olioli ma le fiafia.” Tusi Faitau: Isaia 35:1-10. Matua – Isaia 35:1,10 - E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. ...E foi mai e ua togiolaina e le Alii, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga. E tele ina talanoa le tusi o Isaia i le faasalaga, o le faaleagaina, ma le tafeaga e o’o i tagata pe a lē taofia a latou amio leaga; o loo aumaia foi le lavea’iina ma le toe fo’i o le to’aitiiti o i latou, pe a toe faafo’i e le Atua le tafeaga i o latou lava fanua. Afai ua latou fefefe ma matata’u i faafitauli e tutupu i le ala – o manu fe’ai, o tagata tau fa’amata’u, ma le fia inu po o le fia ‘ai – o loo aumaia e Isaia se faamoemoe fou, o le ala e lē toe i ai ni mea sese, ma o le ala o faamanuiaga. Ua ta’u foi e Isaia le faamalolo o e mama’i, ma lē atoa le malosi i le tino – e le gata ina savavali e pipili, ma tautatala e na gūgū – ua osooso e pipili, ma vale ua latou alalaga fiafia. Ua aumaia foi se faamoemoe i le vaaiga i le toafa o le a latou savalia, o le a avea lea ma vai e tafe ma ola ai laau lanu meamata. O le upu Eperu mo le upu ala i lenei mataupu e uiga ese i totonu o le Tusi Paia. O loo faaaogaina e Isaia se isi foi upu Eperu e foliga tutusa ma lenei upu i le mataupu e 11, o loo ia faamatalaina ai le toe foi o le tafeaga mai Asuria, “E i ai foi le ala tele mo e ua totoe o lona nuu, o e ua totoe i Asuria; pei ona fai ia Isaraelu, i le aso na ia alu ae ai nai le nuu o Aikupito.” (Isaia 11:16). Ua faailoa e Isaia le folafolaga a le Atua i e o le a toe foi, ma le mamalu e faavavau e faaalia. Tatalo: Amuia le tagata e naunau o ia i le tulafono, a le Alii, e mafaufau foi o ia i lana tulafono i le ao atoa ma le po. O ia foi e faapei o le laau ua totō i tafatafa ane o vaitafe, e fua mai ona fua i ona lava tau. Amene. (cf. Salamo 1) Mafaufauga Loloto: Mafaufau i se mea e tatau ona e faia, a ua e tolopōina ona o lou fefe. Ia e tago e faataunuu ma faatino, ma iloilo lelei i lona i’uga ou lava mafaufauga. Olioli i lona i’uga, ma ia e fiafia ua mafai ona e faataunuuina. 46 Aso Faraile, Novema 20, 2015: “Ia olioli le lalolagi uma.” Tusi Faitau: Isaia 61:1-7. Matua – Isaia 61:1,7b - Ua i o’u luga le Agaga o le Alii le Atua; auā ua faauuina a’u e le Alii e tala’i le tala lelei i e ua tigaina, ua ia auina mai a’u e fufusi i e loto momomo, e tala’i le saolotoga i le tafeaga, ma le matuā tatalaina o e ua fusifusia... e ia te i latou le olioli e faavavau. Ua aumaia e Isaia se feau taua mai le Atua. Ua mavae atu tausaga o le tafeaga ma le toe fuata’iina, ma ua i ai ma se faamoemoe e toe fia fo’i ma se suiga i le soifuaga fou e ao ona toe faavae ma toe faafou ai aiga, o fanua, ma le nuu sa faaleagaina. Ua latou faamoemoe mo se olioli e faavavau mai le Atua. Ua faamatala e Isaia o ia, o lē ua faau’uina; o perofeta, e pei o tupu, sa faau’uina o latou tofi. I le fuaiupu e 3, o lo’o ta’ua ai ni upu e le mafai e upu faaliliuina ina ia faamalie le uiga ma le a’ano tonu o le upu i le gagana Eperu – o le upu lefulefu – aphar – ma le upu matagofie – pha’ar – e foliga tutusa o la uiga. O e faanoanoa latou te luluina lefulefu i luga o latou ulu, ma o le suia o lefulefu i le matagofie i luga o ulu, o se faailoga e faailoa ai ua uma le faanoanoa. E faapena foi pe a o’o ina faanoanoa, e lē mafai ona latou faau’uina i latou i le suau’u pe a feagai ma faanoanoaga. O le “u’u o le olioli” na te folafolaina se taimi e matuā ese mai lava i le taimi o le faaleagaina, le vaitaimi na fasiotia ma faapuapuagaina ai i latou i e na faato’ilaloina i latou. O le faitauga o le asō, o loo fetalai mai ai le Atua i lona fia osia o se feagaiga e faavavau ma ona tagata. E ui o loo faatatau le feagaiga i le toe foi o tagata Iuta mai le tafeaga, a e o loo aumaia e lenei mataupu se folafolaga aoao ma se faamoemoe o le matagofie ma le manumalo mo le lalolagi atoa (f.11), o le viiga i luma o nuu uma lava. Tatalo: “Ou te vivii atu ia te oe ma lo’u loto atoa; ou te fai pesega ia te oe i luma o atua. Ou te ifo i lou malumalu paia, ou te vivii atu foi i lou suafa ona o lou alofa ma lou faamaoni; auā ua e faasilisili lau afioga...” Amene. (Salamo 138:1-2). Aso Toonai Novema 21, 2015: “Ia faamanatu fiafia lou toe fo’i.” Tusi Faitau: Sefanaia 3:14-20. Matua – Sefanaia 3:14, 17 - Le tama fafine a Siona e, ia e pese. Isaraelu e, ia e alaga; le tama fafine a Ierusalema e, ia e fiafia, ma olioli lava ma le loto atoa. ...O le Alii lou Atua i totonu ia te oe o lē malosi ia; na te faaolaina; e olioli o ia ia te oe ma le fiafia; o lona alofa e le fetalai ai o ia; e olioli lava o ia ia te oe ma le ofo fiafia. Ua tatou toe faitau i le folafolaga a le Atua, e ala mai lana perofeta ua sauniuni le toe fo’i mai o le tafeaga i Papelonia. O loo faamatala i le fuaiupu e 18 le 47 faanoanoa o i latou, ona o le faaleagaina o le malumalu, ma ua lē mafai ona faamanatu ma faailoga le malaga atu i le malumalu. O Sefanaia, e pei o le faitauga mai le tusi o Isaia i le aso ananafi, e le gata ina faamatala mai le puapuaga ma le mafatia o Isaraelu mai le taua ma le tafeaga, a e o loo aumaia foi le tala i le mafatia o Isaraelu, ona o le masiasi i le to’ilalo i le taua, ua ave’esea o latou tulaga, o ta’u ma lo latou talitonuga. Ua folafola e Sefanaia le faafouga o le nuu, ma ua ia faamalosia le toe pepese ma le olioli, ina ia lagona ma malamalama ua suia lo latou tulaga ma lo latou ta’u ina ua mavae atu lo latou faasalaga. E pei ona i ai i nisi tusi faitau o lenei vaiaso, ou te talitonu o le faitauga o lenei aso ua ese lona faauigaina e le to’atele o le au Kerisiano mai le uiga moni, e pei ona tusia ai. Ua ou iloa, o la’u ta’u o le tagata Iutaia, e ui ina faasoa le tele o o’u manatu mo e faitau i nei tusitusiga, e ese lava lo’u talitonuga i le faitauga o tausaga faale-Mesia ma le vaitau o le Mesia. Ou te talitonu, e le’i afio mai le Mesia, ma e tumau lo’u faamomoe i se taimi o i le lumana’i mo le nofo filemu ma le fiafia tele. I se tasi o tala a Zalman Schachter Shalomi: Ua taunuu mai le Mesia. Fai mai le ‘au Iutaia, “O lou taimi muamua lea i inei, a ‘ea?” A e fai mai le ‘au Kerisiano, “Na e sau muamua fo’i i inei, a ‘ea?” A e tali mai le Mesia, “Ou te sau so’o lava i inei, pe faaselau ma ona tupu taimi ou te sau ai, a e o loo outou pisi vale lava, tou te le iloa mai lava a’u!” (retold by Nancy Fuchs Kraemer in Christianity in Jewish Terms, ed. Tikva Frymer-Kensky, Oxford: Westview Press 2000). Tatalo: Aleluia! Ia outou vivii atu i le Alii. Auā e lelei ona fai pesega i lo tatou Atua; auā e matagofie, e ono lava le viiga. ...O loo finagalo le Alii i e matatau ia te ia, o e faamoemoe i lona alofa.” Amene. (Salamo 147:1, 11) Mafaufauga Loloto: Ia taumafai e auai i ni polokalama faale-faatuatua i totonu o lou nu’u ma le atunuu. Ia taumafai e su’esu’e ma malamalama i le soifuaga, o talitonuga ma tapua’iga a isi tagata mai isi tapua’iga ma talitonuga. 48 Olioli 2. “O le olioli i le Feagaiga Fou.” [Saunia e: Kat Brealey] Aso Sa, Novema 22, 2015: “O le faatasiga.” Tusi Faitau: Luka 10:17-20. Matua – Luka 10:20 - A e peitai aua tou te olioli i lenei mea, ina ua usiusitai agaga ia te outou; a ia olioli ona ua tusia o outou igoa i le lagi. “O le mea e vala’auina ai oe e le Atua, o le mea e i ai le fiafia loloto ma le matelāina i le fia ‘ai.” E pei ona molimau ai Frederick Buechner (Wishful Thinking, New York: Harper Collins,1973), o loo faapea mai o le olioli – le manatu autu o lenei vaiaso – o se vaega taua lea e mafai ona faamatala ai le tagata ma lona feso’ota’i atu i le lalolagi. O le a la se manatu o le au tusitala o le Feagaiga Fou e faatatau i le olioli? O vavega i le Evagelia a Ioane, e tele ina ta’ua o faailoga, e faasino i le taunu’u po o le o’o mai o le malo. I le tusi lenei a Luka, ua faamanatu atu e Iesu i e ua mulimuli ia te ia, ina ia latou va’ai mamao ma taga’i i le lumana’i i mea e o’o mai, a e le na o le olioli i mea o tutupu i le taimi nei. E foliga faapena ni lagona e o’o mai ia te a’u i la’u galuega i le iunivesitē – o se galuega fou, o se faatalatalanoaga matagofie ua faaalia ai manatu ma mafaufauga lelei – ona gata lea. Ua galo ia te a’u le taua o le olioli moni o loo taoto i tua atu o nei galuega ma faatalatalanoaga, o le taunuu mai po o le o’o mai o le malo o le Atua, ma o la’u galuega o se vaega o le galuega tele a le Atua! Pe a tatou faaaogaina tatau a tatou taleni, o agava’a ma tomai e feagai ai ma le fia a’ai (faalemafaufau) o le lalolagi, ia tatou manatu ‘o [lou] tatou igoa ua tusia i le lagi’; e ao ona faasilisili i o tatou manatu lo tatou vala’auina mai le Atua, ma ia tatou tepa taula’i ai i le lagi. Tatalo: Le Atua alofa e, i lenei lalolagi o fiafiaga faale-tino ma le leai o se olioli moni, ia e ta’ita’iina i matou e sa’ili’ili, lagona, ma ia matou faatumauina le loloto o lou fiafia tele i o matou olaga. Amene. Aso Gafua, Novema 23, 2015: “O le sa’iliga.” Tusi Faitau: Luka 15:1-10. Matua – Luka 15:8 - O ai ea foi le fafine e ana tupe e fagafulu, afai e le iloa ia te ia le tasi tupe, e le tūtū ‘ea se moli, ma tafitafi le fale, ma matuā saili i ai, seia maua? E ese ma lo’u ita pe a le iloa ni a’u mea. E le tupu so’o lea tulaga, a e a o’o ina galo ia te a’u le mea na ou tu’uina ai se mea, e le gata i lo’u ita gofie, ou te ofo ma o’u toe manatu i lo’u valea. ‘O e ua le iloa’ i le tala a Iesu, e foliga e sili atu 49 lo latou faatautaia o lea tulaga, e pei ona latou tu’uina atu atoa le malosi i le sailiga o le mea taua ua le iloa, ona o se mea e faalagolago i ai le soifua. O mamoe na sē ma tupe siliva o foliga vaaia ia o le mativa i le soifuaga i Sasae Tutotonu – o le leai o se galuega, a e le pei o le le iloa o se mama faaipoipo pe a faatusa i nei ona po. Ou te manatunatu lava po o le a le uiga o lenei faitauga pe a faatusa ia i tatou. Afai e faatusa le tagata agasala i le tupe na le iloa a e ua toe maua, ona faapea lea o se manatu: E le o finagalo le Atua i lo tatou i ai faaletino, a e o tatou tofiga e tatau ona faataua. O le mea taua e pei ona aumaia i faataoto, e le o mea na maua, a e o lona toe maua mo lona aoga! O le to’amālie o e āna mea i le faataoto, e le’i manatu ina ia nanā a latou mea ina ia saogalemu; a o le manatu o mea e toe fia faaaoga, i lona aoga ma lona taua. Ua toe faamalosia a’u, e ala i manatunatuga fou ua tu’uina mai e lenei faataoto, o loo saili mai le Atua mo lo’u ola galue, a e le na o le manatu i lo’u i ai. Fai mai le manatu a Teresa mai Avila, ‘e leai ni lima o Keriso, ua na o o’u lima’, ma o lo’o vala’auina i tatou e le Atua e fai pa’aga i le fauina o lona malo i le lalolagi, i le tele o auala e mafai ai. Mulimuli ane, a o’o ina maua mea na le iloa, o le a le mea e tupu? E potopoto mai uma aiga ma uo e fiafia faatasi i le mea na sa’ilia. O le olioli o se lagona po o se faatinoga fai faatasi i totonu o le potopotoga lautele – o le a tatou faitau ai i tusitusiga a Paulo i le ekalesia i Roma i ni aso o i luma. Tatalo: Le Atua e, matou te faafetai atu i lau Afio, ina ua e maua i matou, ma matou iloa le uiga moni o le ola auauna atu i lau Afio i auala ese’ese, ina ia tala’i lou finagalo i e ua le iloa. Amene. Mafaufauga Loloto: O le a se ese’esega o le manatu o le faaaogaina e le Atua, mai le mana’omia e le Atua? O a ni auala e mafai ona e galue faatasi ai ma le Atua i lana galuega? Aso Lua, Novema 24, 2015: “Ia faatumauina.” Tusi Faitau: Ioane 15:1-11. Matua – Ioane 15:10-11 - Afai tou te tausia a’u poloaiga; ona tumau lea o outou i lo’u alofa; pei ona ou tausia poloaiga a lo’u Tamā, ma ou tumau i lona alofa. Ua ou fai atu nei mea ia te outou, ina ia tumau ai lo’u olioli ia te outou, ia atoatoa foi lo outou olioli. A o’o ina faitau nei fuaiupu, o le faamamafa o loo talanoa mai ai mo i tatou, o lo tatou tiute faifai pea, ia “tumau” – e pei ona faalausoso’o ona tusia o lenei upu i le faitauga o lenei aso. Afai tatou te tausia la tatou pito laau o le fetu’utu’una’iga, ona fai mai lea o Ioane, e tumau foi Iesu i totonu o tatou – ia tumau pea! i ni si vaaiga e faigofie lava ona avea le tumau a se tasi ma lagona e faamautinoa i le vaaiga o mata: a fai mai sau uo e faatali atu mo ia i fafo o se faleoloa, e te le popole, vagana ai ua e savali ese atu e aunoa ma le iloa e lou uo. O se vaaiga tofotofo, a e o loo aumaia ai se vaaiga loloto i o tatou lava manatu lē 50 mautonu ma le tu’u fesilisili i le mulimuli ia Iesu, e pei o ni lagona faapea, ‘afai ua mamao le Atua, o ai o i tatou ua alu ese?!’ E tu’ufesili lava e i tatou lo tatou faamaoni i lo tatou va feso’ota’i ma le Atua, tatou te tu’ufesili pea po o tatou tumau pe tete’e atu i le finagalo o le Atua mo i tatou. O le vaivaiga o lea manatu, o loo tu’u sa’o mai ai le matafaioi tausi ia i tatou! O loo aumaia e se tasi o tagata atamai, o le Feagaiga Fou, o Rudolph Bultmann se manatu e faasa’o ai lenei vaivaiga. Fai mai a Bultmann, o loo fetalai Iesu ‘e lē o le i ai, a o lē ua auina mai – e lē o le taofi, a o lē ua taofia’ (‘not a being for but a being from – not holding but being held’ (The Gospel of John, Westminster John Knox Press, Louisville, 1971). E ui i le itiiti o lo’u iloa i le faiga o la’au, ua mafai ona ou malamalama i le faamaoni o upu o lenei faitauga e faatatau i le ata o le vine ma ona lālā. E tutupu lālā mai le vine, ma o le vine o lo’o taofia ona la ia te ia, a e le o la o loo taofi mo lo latou lava ola! I se isi itu, e lelei lea manatu – masalo ai ua e masani i le faaupuga masani ‘tu’u ese, tu’u i le Atua’. Peita’i ane, i lenei vaitau ua tatou i ai, i le faatauaina o le tagata ma lana faiga filifiliga, ua fai lea manatu ma se lu’i tele o le tu’u i le Atua, na te taofia i tatou, nai lo tatou taofia o le Atua. Pe le o le tulaga ea lea ua tau mou ai le taua o le ola faatuatua? Tatalo: Le Atua alofa e, faafetai o loo e taofi pea i matou, ma o loo matou tumau pea ia te oe. Le Atua agalelei e, faaali mai lou finagalo moni, ia mafai ona matou ave’esea le manatu faapito ia i matou, a ia matou maua lou filemu. Amene. Mafaufauga Loloto: O tumau lou mautinoa i le avea o oe ma se tasi e mulimuli ia Iesu? E faapefea ona e fuatia lea iloa, ma o ai foi o loo e tuu avanoa i ai latou te faamatalaina lo latou iloa o oe? Aso Lulu, Novema 25, 2015: “O puapuaga.” Tusi Faitau: Roma 5:2-5. Matua – Roma 5:3-4 - E le gata foi i lea, a ua tatou mitamita foi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe. E ui ina faaaoga e le to’atele o tagata lenei faitauga e fai ma upu faamalosi pe a o’o i taimi e feagai ai ma faafitauli, o se isi lenei o faitauga o loo tele ina sese so’o lona faaaogaina! O le tele lava o taimi, ua avea faitauga e pei o lenei e faatupu ai se manatu faapea i e o loo puapuagatia, o lenei faiga o le galuega a le Atua, ma o le sa’ilia o lona i’uga e tu’ufesili ai le finagalo o le Atua. Peitai, o lo tatou a’oa’oina o mea taua ma le aogā i taimi o faafitauli, o mea e ao ona tatou lagona ai le loto faafetai, e le mafai ona faamalie ai lea manatu. O le finagalo o le Atua, e pei ona atagia i tala o le Tusi Paia, ia lavea’iina tagata mai le olopalaina ma puapuaga, a e le o le tulaga e faapuapuagaina ai. Ma e le tatau ona 51 faamalosia le ola puapuaga, pe tu’u i ai lona fa’aauauina e aunoa ma se faatinoga e tau tineia ai. I lena manatu, o le molimau o le toatele o toa o le faatuatua, o loo latou faaalia ai le malosi o puapuaga e fai ma a’oa’oga – mai ia Iopu e o’o atu i Dietrich Bonhoeffer, mai ē tatou te iloa na lavātia puapuaga, ma ua atili ai ona faamalosia lo latou faatuatua. Ma o se lu’itau foi lea mo i tatou. Afai o le ogatotonu o le faatuatuaga faa-Kerisiano le sa’ilia o le amiotonu, ma ia faamuta le olopalaina o tagata, e faigata la ona tatou malamalama i a’oa’oga taua e maua mai taimi tatou te fesaga’i ai ma faafitauli. O se ala e faigata tele ona savalia, a e tatau lava ona tatou uia, ina ia mafai ona tatou tali atu i le amioletonu, e aunoa ma le tete’e atu ia i latou o e ua fo’i mai lea tulaga. Fai mai se tasi o a’u faauo Katoliko, o ana upu masani e faamalosia ai a’u, ‘ulufale atu i le mea e iai le misiterio’, ma ou te manatu e ala tatau lenei faaupuga i le faitauga o lenei aso, a o tatou taumafai e faamatala le feso’ota’iga o le puapuga ma le olioli, o le olopalaina ma le malamalamaina. Tatalo: Le Atua e, fesoasoani mai e tatala o matou loto i a’oa’oga taua e maua mai puapuaga, a e le o le manatu faapito i tiga e maua mai puapuaga. Ia matou ulufale atu i le mea e lē ma faamatalaina - ia aua mo ni tali, a e ia matou saili atu i lau Afio. Amene. Mafaufauga Loloto: E faapefea ona avea lo tatou malamalama ia Iesu i ona puapuaga i luga o le satauro e a’afia ai lo tatou tali atu i puapuaga i le olaga o Kerisiano – e aofia ai ma tatou? Aso Tofi, Novema 26, 2015: “Ia outou fefaasoa a’i.” Tusi Faitau: Roma 12:11-15. Matua – Roma 12:15 - Ia outou olioli faatasi ma e ua olioli, ia outou tagi foi faatasi ma e ua fetagisi. O se tasi lenei o faitauga ou te fiafia tele i ai mai tusitusiga a Paulo – na ma filifilia ma lo’u to’alua lenei faitauga ina ia faitauina i le aso o la ma faaipoipoga – ona o le lelei o fautuaga e faatatau i le olaga o le Kerisiano, pe faia se aiga pe leai foi. Ua toe aumaia se ata o le olioli lautele, e pei ona ta’ua, ma ua tusia mo le ekalesia i Roma ma le tulaga e tatau ona ola ma soifua ai le Kerisiano – ia tausoa le tausiga o le soifuaga, i taimi uma o le fiafia ma le faanoanoa. I lenei vaitau o le feso’ota’iga fealoa’i, ua tele ona tatou iloa mea o loo tutupu i le soifuaga o isi tagata, ma ua avea lea iloa ma ala ua faapogisa ai lo tatou iloa i mea tatau e ao ona tatou ave i ai le faataua ma le faamuamua. Ou te manatu e le faapea se tulaga na o’o i ai Paulo i lona vaitaimi. Afai o tatou o se faiga nu’u tulaga ese, i lona tula’i mai e fai ma faata’ita’iga lelei, e pei ona finagalo i ai Paulo mo e na tusi atu ai lenei tusi, e tatau la ona tatou tu’u ese o tatou manatu 52 faapito, a e tatala atu o tatou tagata e faasoa a tatou vaivaiga ma malosiaga, o mea lelei ma mea lē lelei, e fesoasoani mai i ai isi o i tatou, ma ia tatou sauni e faalogo ma tuu avanoa i e o loo mana’omia le fesoasoani. E ui ina foliga faigofie i nisi o i tatou le talanoa, ma faasoa atu ni o tatou lagona, pe lelei pe leaga, e le faapena le manatu o isi, ona latou te faapea e le tatau fua ona iloa mai e isi ni o latou lava lagona, ona o māfua’aga tatau. E le ina ia faapea ua tatou faasoa atu ni lapisi, o ni o tatou mafaufauga i mea e tutupu mai, ma tatou tau vi’ivi’i i a tatou fanau! E leai! A e o le faaaliga lea o loo tatou faailoa ai la tatou tausiga ma lo tatou alolofa i o tatou uso ia Keriso. O lo tatou tuuina atu o tatou lagona loloto tatou te maua ai le faanoanoaga loloto, a e o loo matuā faalautele ai lo tatou malosi i le olioli. Tatalo: Iesu e, o lē na auai i faaipoipoga, ma sa tagi foi i le tuugamau, ia matou faasoa ma tausoa i vaega uma ia o le soifuaga, ma ia matou fesoota’i ai faatasi ma oe, ina ia matou ausia faatasi le loloto ma le maualuga o lou ola auauna mo ou tagata. Amene. Mafaufauga Loloto: E faapefea ona e te’ena isi, a e talia isi tagata i lou olaga, ma a’afia ai ou uiga i totonu o le aulotu, po o le ekalesia? Aso Faraile, Novema 27, 2015: “Ua faaliliuina.” Tusi Faitau: Galuega 3:1-10. Matua – Galuega 3:5-6 - Ona naunau mai lea o ia ia te i laua, fā’i e maua se mea mai ia te i laua. A ua fai atu Peteru, “E leai sa’u ario po o sa’u auro; a o le mea ua ia te au, ou te avatu lea ia te oe; o le suafa o Iesu Keriso o le Nasareta, ou te fai atu ai, ina savali ia.” O le mea ou te ofo tele ai i lenei faitauga, ona o le ese’ese o manatu, o le mea na ole atu ai le tagata pipili, ma le mea na ia maua! Afai e faapea tagata i le na vaitaimi, e pei o tagata o le taimi nei, e leai lava ma so’u masalosalo e umi lava se taimi o nofonofo pea nei tagata i le faitotoa o le malumalu e aunoa ma se mea e tuuina atu mo i latou. Peitai ane, ina ua taunuu ane Peteru ma Ioane, ua avea lo la tali atu ma ala ua faapea ai le tagata pipili o le a laua tuuina atu se meaalofa ia te ia. Ma na faia lava, a e le o le tulaga e pei ona mafaufaua i ai le tagata pipili. O lona mafaufau, na ia faapea ai, o le a ia maua ni tupe siliva, nai lo’o le lē amana’iaina o ia. Peita’i, ua maoa’e le faasoa atu a Peteru ma Ioane, ua le faasoa atu i se tamaoaiga mo le tausiga, a e ua faamaloloina i lona ma’i tumau. E tele se a’oa’oga o loo i ai i lenei tala mo i tatou. I ni mea o loo tatou nonofo faatalitali ai, pe a fai tatou te feiloa’i ma le Atua? Po o i ai ni a tatou lava vaaiga sa faatulaga i ni mea na tutupu i le tele o tausaga ua tuana’i? Po o taotaomia pea, pe faaluafesasi o tatou lagona ma mafaufauga i le lalolagi ona o mea na tutupu ia i tatou? E le o finagalo le Atua ina ia tu’uina mai na o ni tupe siliva i o tatou 53 lima, ma savali ese atu. O loo finagalo le Atua e faafesaga’i ma le tagata, ma faailoa mai ia i tatou ina ia liliuina ai o tatou tagata; atonu e amata mai i lo tatou toe sa’iliili i lo tatou malamalama ma le iloa o le Atua, i le uiga moni o le ‘fetalai mai o le Atua’! O le a le aunoa foi ma se lu’i: ona pau lea o le auala na faalagolago i ai le ola o lenei tagata pipili, ona o lona ma’i tumau. O lona faamalologa ua faatupu ai lagona ma mafaufauga fou e toe si’itia ai le tulaga o lona soifuaga, ma faavae ai se amataga fou mo ia. E i ai taimi tatou te fetaia’i ai ma Iesu, o le taimi foi lea na te liliuina ai o tatou tulaga ma le soifuaga, ma o se taimi lelei lea e tatau ona tatou tuu atu ai ia Iesu. Tatalo: Le Atua e, ia o’o mai lou malo, ia feliua’ina o matou tagata, ina ia o matou iloa lou faaali mai ia te i matou. Fesoasoani mai, ia matou ave’esea a matou vaaiga faale-tagata, a e ia matou iloa lou finagalo moni, e liliuina ai o matou tagata. Amene. Mafaufauga Loloto: Mafaufau po o le a se ata vaaia o suiga i lou olaga. O a ni suiga e te taliaina? O a ni suiga e mafai ona e tete’eina? Aso Toona’i, Novema 28, 2015: “Ia faafetaia.” Tusi Faitau: Faaaliga 19:1-9. Matua – Faaaliga 19: 6-7a - Ua ou faalogo foi e peiseai o le leo o le motu o tagata e toatele, e peiseai o le taalili o vai e tele, e peiseai o le taalili foi o faititili tetele, ua faapea atu, “Aleluia! Auā ua fai ma tupu le Alii le Atua e ona le malosi uma lava. Ia tatou fiafia ma olioli, ma tuu atu le viiga ia te ia.... Ua tatou taunuu mai nei i le tusi o Faaaliga. E ui i le fenumia’i o mafaufauga i tala o le toto masa’a ma fafine talitane, o loo aumaia se faaupuga faapea: Ia tatou fiafia ma olioli! Auā ua o’o mai le tausama’aga o le Tama’i Mamoe. E tele faataoto a Iesu ua ia faatusa ai le malo o le Atua i le tausama’aga. Ua toe faaaogaina foi i lenei faitauga, ua i ai le manatu o lenei ata faatusa e faamatala ai le fiafia ma le olioli tele; o le foafoaga fou, ua faatasia nu’u uma ma le filemu, ma Keriso o loo nofo i lona nofoalii. Ua avea lenei taunuuga ma mea o loo tatou faamoemoe i ai mo le lumanai. E tatau ona tatou iloa o le fiafia o se filifiliga – e le o se mea e tupu ia i tatou, a e o se va’aiga i le lalolagi o i lumanai ua uma ona tofia mo i tatou. O lo tatou filifili i le fiafia ma le olioli, ua tatou i ai faatasi ma le Atua i lona malo i le taimi nei. E toatele tusitala ua latou tusia le tele o tusi e faatatau i auala tatou te maua ai le fiafia. O tusi e pei o le, ‘O Nofoaga e 1000 e tatau ona e vaai i ai a e te le’i oti’, ua faamalosia ai tala fatu e faapea, e te lē maua le fiafia moni pe a le asiasi atu i nei nofoaga ese’ese; e te maua le fiafia moni pe a e alu i ‘fafo’. O aso taitasi ua na o se avanoa e fia faatumu, e maua ai le potomasani mo le taimi lumana’i. 54 Tatou te sailia ai iina le fiafia i mea sa tatou le iloa o le olaga. Ou te manatu, o le ki lea o le loto faafetai. Fai mai le manatu a Ann Vonskamp, o le loto faafetai, ‘O le faatinoina lea o la tatou Ioe! i le alofa tunoa’. (One Thousand Gifts, Zondervan: Grand Rapids, 2010,). O le lu’i, ia tatou iloa lo tatou tiute tau’ave, o i tatou lava e iloa ai lo tatou fiafia moni. O se manatu e tatau ona faamalosia, e ui i le tele o faafitauli e fetaia’i ma i tatou, ia tatou sa’ilia avanoa lelei e faatino ai lo tatou fiafia. O se mea na lē mafaufau i ai a ua faaliliuina, pe a fai tatou te faailoa o meaalofa ma faamanuiaga mai le Atua, ma o lona i’uga tatou te lagona ai le fiafia moni. Tatalo: Le Atua agalelei e, faamagalo mai i matou i taimi ua matou lē vaai tino ai i le fiafia moni, o loo e si’omia ai i matou. Tatala o matou mata, o matou lima, ma o matou loto, ia matou iloa ma talia au meaalofa ma au faamanuiaga. Amene. Mafaufauga Loloto: E pei ona faasoa mai Ann Voskamp, ia tatou tausia uiga ma amio o le faafetai, e ala i lo tatou tusitusia o mea lelei ua tatou faia i galuega faasolo o aso ta’itasi. Faitauga o Luka “Sauniuniga o tagata.” [Saunia e: John Birch] Aso Sa, Novema 29, 2015: “O le mafaufau e tuu fesilisili.” [Aso Sa o le Etiveni] Tusi Faitau: Luka 1:1-4. Matua – Luka 1:3-4 - O le mea lea ua ou manatu ai, ona ua ou matuā su’e i mea uma lava talu le amataga, ou te tusi faasolo atu ia te oe le alii e, Teofilo, ina ia e silafia le tonu o tala ua a’oa’oina ai oe. A o a’oa’oina lo’u atalii i mataupu o le tala faasolopito, na ia iloa ai le taua o le to’e su’esu’e i le amataga i le māfua’aga o tala faamaumauina. O le toe fo’i e su’esu’e ma sa’iliili mea na tutupu i aso ua tuana’i, e mafai ona faavae ai ni manatu e tusa ma mea na tutupu i le tuana’i. Na ou faalogo i se tasi o faiaoga o faapea, na tuputupu a’e o ia ma se tala’aga e faatatau i se faau’o, ma ua ia talitonu ai e faapea, ai e moni nei faamatalaga. Peitai ane, o le tuu fesilisili o le mafaufau, na ia su’esu’e atili ai i nei faamatalaga, ma iloa tino ai le ese o nei faamatalaga mai le mea moni. O le tuu fesilisili o le mafaufau e taua tele pe a fia malamalama i le talitonuga faa-Kerisiano. O le faalagolago tasi i tala mai le Aoga Aso Sa, e lē mafai ona faamalieina ai lo tatou iloa pe a o’o i taimi e tofotofoina ai lo tatou faatuatua. I lenei vaiaso, o le a tatou faitau i ni tagata ua latou tuu fesiligia ai le Atua, ma ua latou maua ni tali ua suia ai o latou olaga. 55 O lea ua i ai Teofilo, o lē na faalogo i tala ia Iesu, e ui i le fete’ena’i o tala, ua alu i ai le mafaufaua o Luka, o se tagata e iloa le tala faasolopito, ua ia su’esu’e ma taumafai e faatulaga le faasologa o tala e feagai ma le tala ia Iesu, ina ia mafai e Teofilo (ma tagata faitau uma), ona malamalama i le upu moni, e faatupuina ma faamalosia ai le faatuatua. O le faatuatua e tuu fesilisili pea, o le faatuatua e tuputupu pea! Tatalo: Le Alii e, foa’i mai lou malamalama, ina ia mafai ona matou su’esu’e ma sa’iliili i lau Tusi Paia, ia matou latalata atu ai i lau Afio, ma faatupu ai lo matou faatuatua. Amene. Aso Gafua, Novema 30, 2015: “Feiloa’i i le aiga!” Tusi Faitau: Luka 1:5-20. Matua – Luka 1:11-13a - Ona faaali lea ia te ia le agelu a le Alii, o loo tu i le itu taumatau o le fata e mu ai mea manogi. Ua iloa e Sakaria, ona atuatuvale ai lea, ua oo ia te ia le mata’u. A ua faapea mai le agelu ia te ia, “Sakaria e, aua e te mata’u; auā ua faafofogaina lau tatalo.” O le su’esu’ega a Luka o loo aumaia ai se tala’aga i tua atu o lenei tala. O le fia malamalama atili ia Maria ma lona taua i le tala o le Etiveni, e tatau ona tatou malamalama muamua i lona tausoga o Elisapeta ma lona to’alua o Sakaria. E tofu i tatou ma o tatou tala’aga, e tele ina faalagolago i ai le faamatalaina o ai i tatou. E mafai ona iloa se tala i auala na mafua ai ona feiloa’i o tatou matua, o le ituaiga olaga na latou soifua ai, o nuu ua tatou fananau ai, faapea nisi tulaga taua. Na mua’i feiloa’i o’u matua ina ua faafeiloa’i e le tausoga a lo’u tamā, o ia i lana faauo teine, o lo’u tinā ma le lē iloa o taimi lava a le Atua! Ma ua avea le fesoasoani, o le faafaileleina, ma le tausiga o a’u e le tele o tagata ua fesoasoani ai i lo’u ola tuputupu a’e. O le tala a Luka o loo faatatau i tagata masani ma le taimi a le Atua. Ua faatatau lenei tala i se ulugali’i faatuatua, ma se ulugali’i ua mafana le la mafutaga, ma ua mafai ona la tete’e atu i le faifai mai o tagata ona o le leai o sa la fanau i le tele o tausaga. Ua tatou iloa le taua o lenei mea ina ua fetalai atu le agelu a le Atua ia Sakaria, ma ua faailoa ai o laua mana’o, o le tatalo faatauanau mo le tele o tausaga ina ia foa’i mai se tama. A o faagasoloso pea tausaga, e le’i uma ai lo la faamoemoe pea i le Atua. E i ai nofoaga faapitoa tatou te molimauina ai le faatasi mai o le Atua. Mo a’u, o taeao uma ou te savalivali ai ma la’u maile i totonu o si o matou nu’u. A e mo Sakaria, o le pito i totonu o le malumalu, e le iloa atu, a e ua na o le manogi o lo’o si’osi’oina ai o ia. O i na na talia ai talosaga o tausaga e tele a Sakaria, ma ua gūgū ai o ia. O le taimi lea, o le taimi a le Atua! ‘Aua e te mata’u; auā ua faafofogaina lau tatalo.’ (f.13). Tatalo: Le Alii e, foa’i mai le onosa’i a o matou tatalo, ma ia matou iloa o loo e faafofoga i a matou talosaga, i ou taimi e te finagalo ai. Amene. 56 Mafaufauga Loloto: Mafaufau i taimi e faaosooso gofie ai oe, ma e faapea ane e le tali mai le Atua i a tatou talosaga, peitai, ia e manatua Sakaria ma Elisapeta. Aso Lua, Tesema 01, 2015: “O le faalauteleina o le ata.” Tusi Faitau: Luka 1:21-25. Matua – Luka 1:23-25 - Ua uma ona aso na fai ai le galuega, ona alu ai lea o ia i lona aiga. Ua mavae ia aso, ona to lea o Elisapeta lana āva, ua nofo faalilo o ia i ona masina e lima, ua faapea ane, “Ua faapea ona faia e le Alii ia te au i ona aso ua silasila mai ai o ia, e ave ese ai lo’u luma i tagata.” I le tele o taimi ou te faapea ai e tatau ona ou manatunatu i mea o loo tutupu i le lalolagi, a e maise lava i atunuu o loo tauivi ai pea tagata ma faafitauli ma le sauaina. Ou te ta’utino atu i le tele lava o taimi ou te manatu faapito ai ia te a’u, ma taualumaga i uiga masani o aso ta’itasi. Ona ou toe nofo lea ma ou toe mafaufau, e itiiti lava a’u, a o le silafaga a le Atua e matuā taua tele, ona o a’u ua na o se vaega o le ata lautele. Mo se faata’ita’iga, o Elisapeta ma Sakaria: O Sakaria o se tasi o le afe o ositaulaga, ma Elisapeta e pa, ua tauemu le toatele ia te ia. Na momo’o ia maua sa la tama e atoatoa ai le aiga i le vaaiga a tagata. E leai lava ma se mea e tulaga ese ai la’ua mai isi tagata, vagana ai le fuafuaga lilo a le Atua aua o i laua o se vaega o le faaolataga mo tagata uma! O le ata lautele, o le taunuuga lea o fuafuaga a le Atua i ana folafolaga mo tagata uma, e avea ai le ma’i tō o Elisapeta e fai ma faamalosi loto ia Maria, a o ia manatunatu i lona usita’ia i le faatonuga a le Atua, ma lona atalii o Ioane na te folafolaina le afio mai o Iesu le Mesia. O le faamaoni i le galue tautua, ma le finafinau i le tatalo, e ui ina lē mafai ona tatou fuatia le galuega a le Atua, a ua avea nei tagata e to’alua e faamanatu mai ai o loo tausia pea i tatou e le Atua. Ma e ui i lo tatou faatauva’a, a e o loo faaatauaina pea o tatou mana’oga uma. O tatou uma o vaega o le ata lautele a le Atua, e ui ina tatou manatu ifo i lo tatou faatauvaa. O a tatou faatinoga uma, ma lou fesoasoani atu i isi, o upu faamalosi, o lou faasoa atu i isi i soo se auala, po o lou taimi ua ofoina atu mo isi, o auala uma nei o loo tatou maua ai faamanuiaga i le lalolagi. Ma, i lo tatou faasoa atu, ua toe faamanuiaina ai i tatou! Tatalo: Le Atua agalelei e, matou te faafetai atu i lau Afio, ona ua avea i matou ta’ito’atasi e fai ma vaega o au fuafuaga lilo e faavavau. Ia e faaaogaina i matou i la matou savaliga faale-faatuatua, ina ia fai ma faamanuiaga i tagata uma matou te fesoota’i. Amene. 57 Mafaufauga Loloto: Afai o lo’o e tauivi pea ma ni lagona e te le o iloa ai po o fea tonu o e iai i le ata lautele a le Atua, ia e toe manatunatu ifo, atonu o le mea o loo e iai i le taimi nei, o i ina tonu o loo mana’omia ai oe e le Atua. Aso Lulu, Tesema 02, 2015: “E faapefea ona tupu lenei mea?” Tusi Faitau: Luka 1:26-38. Matua – Luka 1:28-29 - Ua ulufale mai le agelu ia te ia, ona faapea mai lea o ia, “Si o’u alofa ia te oe, le ua alofaina, ua ia te oe le Alii.” A ua atuatuvale o ia i lana upu, ua taumanatunatu foi o ia, pe se a le uiga o lenei alofaaga. Ua faasolo nei e Luka le tala. Ua uma ona tatou faitau ia Elisapeta ma Sakaria, o lenei ua tatou o’o ia Maria, se tama’ita’i faatuatuaina ma talavou, ua tofia e le Atua mo ana fuafuaga lilo! I aso na ou galue ai i totonu o fale e gaosia ai le tamaoaiga, o taimi e valaauina ai a’u e le alii pule ou te masalosalo ai lava ma popole, “Ioane, e i ai le mea ou te fia talanoa atu ai ia te oe, faamolemole.” O lona uiga, e i ai se mea sese ua ou faia, pe i ai foi se galuega tele ua mana’omia e faatino, o lea o le a tu’uina mai ou te faia. Mai le na galuega, ou te manatunatu ai i le mea na tupu ia Maria ma lona loto popole i le mafaufau i lenei feiloa’iga ma le Atua, a e po’o afea foi e faataunuu ai. E faapea lo’u mana’o i le fia mautinoa mai lo’u pule ma lona faatuatuaina o a’u i la’u galuega. E foliga faapea ni lagona na o’o ia Maria i le fia iloa po’o le a le finaglo a le Atua mo ia. A e aua ne’i galo, o lea ua sauniuni e faaipoipo atu ia Iosefa, ma o se tama’ita’i taupou. O fuafuaga uma nei a le Atua i se ata e foliga lautele lava. O Maria le tausoga a Elisapeta, ua lima masina i lona ma’itaga. Afai o le a faigata ia Maria ona talitonu i lenei mea, o se vavega mai le Atua ia te ia, e molimau Elisapeta e faamaoni vavega a le Atua. Aua e leai se mea e faigata i le Atua, ua faailoa mai e le agelu. Sa le’i tele sa’u filifiliga e fai ina ua tofia a’u mo se galuega, peitai, o Maria sa i ai le avanoa e tete’e atu ai i le faatonuga, e ui ina ua faamautinoa mai. A e ui lava i lea, na finagalo lava le Atua ia te ia, ua faapea foi ona tali atu, aua sa ia Maria lona faatuatua i le Atua. Tatalo: O lo matou tali atu i le valaauina o i matou mo lau galuega: Le Atua e, aua ne’i o matou fesiligia pe masalosalo, a ia talia ma le mautinoa, ua vala’auina i matou ma le mautinoa, e mafai ona faataunu’uina. Amene. Mafaufauga Loloto: E faapefea ona fuafua lelei o tatou ola? O tatou taliaina ma tuu avanoa e i ai taimi e ta’ita’iina ai i tatou e le Atua i se isi laasaga? 58 Aso Tofi, Tesema 03, 2015: “Ia faatusatusa a tatou tala.” Tusi Faitau: Luka 1:39-45. Matua – Luka 1:39-42 - Ua tulai Maria i ia ona aso, ua faatelevave atu i le atu mauga, i le tasi aai o Iuta; ua ulu atu foi o ia i le fale o Sakaria, ma alofa atu ia Elisapeta. Ua faalogo mai Elisapeta i le alofa o Maria, ona osooso ai lea o le tama i lona manava; ua faatumuina foi Elisapea i le Agaga Paia; ua alaga ia, ua leo tele, ua faapea mai, “Amuia oe i fafine, amuia foi lē a fanau mai ia te oe!? Ua toatele ua faaaoga auala fou faanei-onapo e fesootai ai i le ‘ea i faauo ma aiga; ua ‘aumai ata o mafutaga fiafia ma aso faamanatu, ua tuu i le komipiuta ma faailoa ai o loo manuia ma fiafia. O ia faatinoga ua fesoota’i ai aiga i le agaga o le fiafia, e ala i le tali atu i nei ata ma avea o se mafutaga e ui ina vavamamao i nofoaga. O se tasi lea o natura masani a le tagata, na te mana’o e faasoa atu ni tala lelei ma tala fiafia. E le gata ina faasoa atu le fiafia o i latou i mea lelei na tutupu, ma ni aso taua ua faailogaina i aiga ma uo, a e faapena foi ona faafiafiaina ai i latou o e faalogo, faitau ma taliaina nei tala lelei. Ua tuufaatasia e Luka ana tala’aga e lua i le tala lenei, a o aga’i atu Maria e feiloa’i ma Elisapeta i lona fale e ta’u atu ai lenei tala lelei, ma faatusatusa ai o la tala, ma i lo la feiloa’iga, ua toe faamaonia ai lenei faamanuiaga mai le Atua. E mafai lava ona e manatunatu i le talanoaga a Maria ma Elisapeta e le o faamatalaina mai e Luka: O le fiafia o Elisapeta e faalogologo i tala a Maria; o le saili atu o Maria ia Elisapeta mo fautuaga, e ala i le tausiga o lona ma’i; o le la faasoa ia Iosefa ma lona taliaina o lenei mea ua tupu. Ia faaopoopo ai lava ma le tele o isi tala fiafia! Maria ma Elisapeta: O le ogatotonu o lo la fiafia, ua iloa ai le avea o i laua ma vaega o se fuafuaga lautele, o le finagalo matagofie o le Atua ua faia mo i la’ua ma le lalolagi atoa. O a tatou tala e le o ni tala e matuā mata’utia ma ofoofogia. A e afai o ni tala ua faamanuia mai ai le Atua ia i tatou, e o’o mai lava le lagona o le fiafia tele ma le mana’o ina ia faailoa lo tatou fiafia. Tatalo: Le Alii e, matou te fiafia ma olioli faatasi ma nei tina, ona o faamanuiaga e tele ua talia, e ala i le faasoa o tala fiafia ma le lelei i e ua matou alolofa ma feso’ota’i atu i ai. Amene. Mafaufauga Loloto: Pe i ai ‘ea ni taimi tatou te faalotolotolua ai e faasoa atu tala lelei i isi? Aisea tatou te faapea ai? E tatau ‘ea ia i tatou ona toe mafaufau i lagona o isi, a e le’i faasoa atu i ai a tatou tala? 59 Aso Faraile, Tesema 04, 2015: “O le pese o le fiafia.” Tusi Faitau: Luka 1:46-56. Matua – Luka 1:46-48 Ona fai ane lea o Maria, “Ua vivii atu lo’u loto i le Alii, ua olioli foi lo’u agaga i le Atua lo’u Faaola, auā ua silasila mai o ia i lana auauna fafine ua faamaulaloina; auā e amata mai nei ona faa’amuia mai ia te au o tupulaga uma.” E faaleiloga lenei aganuu i atunuu i Sisifo. A e o le tele o atunuu, a e maise lava i Sasa’e Tutotonu ma Aferika, afai e i ai se faatasiga e tatau ona fiafia ai, e faatutu i luga fafine e pepese ma sisiva e faailoa lo latou fiafia. Ua latou malamalama lelei i lea faatinoga o le fiafia, e sili atu nai lo le tusia o se tusifaamanuia! O le faaosofia o Maria e usu lana pese, e fiafia faatasi ai ma Elisapeta ona o lona olioli tele, o se faatinoga masani lea e o’o ifo i le tagata. O le ala tatau lea o le pese a Maria, e pei o le tele o pese i le Feagaiga Tuai e faapei o le pese a Hana i le, I Samuelu 2, i lona fiafia tele i le fanau mai o Samuelu ma le faaaogaina e le Atua o lona ola. Ua fiafia faatasi nei fafine e to’alua i fuafuaga a le Atua pe a o’o ina fanau mai Iesu, faapea ma Ioane. O loo aumaia foi e Luka se fuaiupu, e fa’alētāua tele pe a faitau i ai, o le fuaiupu 56 e faapea, “Ua nofo Maria ma ia, pe tolu masina, ona foi ai lea o ia i lona aiga.” O loo aofia i lenei taimi le taimi e fanau ai Elisapeta ia Ioane, ma i lena manatu, e mafai ona tatou faapea, na tausia e Maria Elisapeta, i ona mana’oga a o feagai ma le ma’i. Pe afai o le tulaga lea, manaia foi lea manatu! O le nofo faatalitali mo le fanau mai o se pepe fou, o se taimi fiafia lea e le gata i aiga, a e o le nofo faatalitali mo se faasinoga a le Atua mo le tagata i totonu o ana fuafuaga aoao a le Atua, ma le faamoemoe mo tagata. Ua tatou iloa ma malamalama i le tala ia Iesu ma Ioane. A e faapefea a tatou fanau? o le a se faasinoga a le Atua o loo taoto i olaga o a tatou fanau, ma a latou fanau? Tatalo: Le Atua faavavau e, matou te tatalo mo fanau uma, ma pepe fou ua fananau i lenei aso; po o fea lava o i ai ia latou iloa lau faasinoga mo i latou. Amene. Mafaufauga Loloto: A o tatou tutupu a’e pea, ma avea i tatou ma tagata matutua, po o avea ea i tatou ma tagata ua finagalo i ai le Atua? E faapefea ona tatou ausia tulaga ua faamoemoe le Atua e mafai ona tatou o’o i ai? 60 Aso Toonai, Tesema 05, 2015: “Ia sauniuni tagata uma.” Tusi Faitau: Luka 1:57-66. Matua – Luka 1:65a,66 - Ua oo ai le mata’u i e ua latou tuaoi uma. ...O i latou uma na faalogo ai ua manatunatu i ai, ua faapea ane, “Pe i’u la ina faapefea le na tama?” Auā ua ia te ia le aao o le Alii. E to’alua la’u fanau ua matutua, ua fai a’u ma faatama i a la fanau laiti e to’atolu. Ua amata ona tuufesili lo’u mafaufau mo le taimi lumana’i, “O le a se faasinoga e tatau mo lenei fanau pe a o’o ina matutua?” E ese’ese le faafaileleina ma le tausia e matua o a latou fanau. E i ai matua ua tausia fanau ma u’una’i i mea ua manana’o i ai i le lumana’i. A o isi e tuu avanoa i fanau ia faamalolosi e su’esu’e ma sa’ili’ili, e fua i mea ua vaivai ai pe malolosi ai, e faavae ai a latou filifiliga i galuega e tala feagai ma i latou. O tatou manana’o ia tulaga lelei fanau i le vaaiga a le lalolagi, po o le mana’o foi ia tutupu a’e fanau ma ola fiafia tusa pe mau’oa pe mativa? O le pogai lea e matua faigata tele ai le tiute faamatua! Ai lava sa le manatu tele Maria ma Elisapeta i faamatalaga a e nofotua’oi, e faatatau i lenei mea ua tupu ia i la’ua. ‘A faapefea nei pe a matua o ia? O le a lona tofi pe a o’o ina matua?’ O se vaaiga mautinoa, na iloa e nei tina e to’alua ua i ai le Agaga o le Atua ia Ioane, o le a faaaogaina o ia i se galuega taua tele. O le a sauniuni ma tapenapena e ia le nuu mo le afio mai o le Mesia, o le tama o lona igoa o le a manatua e auga tupulaga fai mai – e lē ona o le ‘oa ma le tamaoaiga faale-tino e pei ona avea ai o ia ma tagata e fealua’i i le vao, a e ona o le ‘oa ma le tamaoaiga o le alofa tunoa o le Atua e pei ona faaalia i lona ola! Tatalo: Le Alii e, faafetai mo le soifua o Ioane ma lana galuega tala’i, ua ia faafeiloa’i le lalolagi i le Alii Faaola! Ia e alofa, faamalosi mai ma fa’aa’upegaina i matou ia mafai ona matou tala’iina lou finagalo, e faapei ona faia e Ioane. Amene. Mafaufauga Loloto: O a ni mea e te manatu o faamanuiaina ai lenei soifuaga? E sili atu na i le faaputuga o le ‘oa? 61 2 Faitauga mai ia Luka Ua fanau mai le tama [Saunia e: Sham.P.Thomas ] Aso Sa, Tesema 6, 2015: “Faaigoa ma le leai o se igoa.” Tusi Faitau: Luka 1: 67 – 80 Matua - Luka 1:76-77 O oe foi, le tama, e ta’ua oe o le perofeta a le Silisili ese, āua e te muamua atu i luma o le Alii e sauni i ona ala; e faailoa atu le faaolataga i lona nuu i le faamagaloina o a latou agasala. O le Etiveni o le valaau ina ia sauniuni e faailoa le afio mai o le tama o Iesu. O le vaavaai atu lea ma le faatuatua i le manuia o le lumanai ua faagaeetia ai i tatou i le o’o mai o le ola fou. O lenei vaitau o le Etiveni, ua luiina ai i tatou ia mafaufau ma faailoa le Atua e afio mai i le Tamaitiiti, o ia o le Alii. I lenei vaiaso, ua faailoa ai i latou o loo fai talosaga ma faatalitali i le Mesia e afio mai, ma avea i latou ma vaega o lenei galuega faaola e ala ia Keriso Iesu. E ui ina gūgū Sakaria, e pei o se perofetaga se ia fanau mai le Mesia ona toe tautala lea. O le upu muamua na tautala ai Sakaria, (ia viia oe le Alii le Atua), o le upu e faaigoa ai lona atalii o Ioane. Ina ua toe maua lona leo, na ia vivii atu i le Alii. Pe a tatou lagona le alofa o le Atua, ona ta’uta’u atu i o tatou gutu le viiga o le Alii ma le loto faafetai. Ua le gata ina faailoa atu e Sakaria lona atalii, a e ua faailoa atu le ala e mafuta ai ma le Atua, o le tama o le a na faalauleleiina le ala o le Alii. I nisi upu, ua manatu Sakaria ia ta’ua le igoa o lona atalii, i mea ua na faia mo le Atua ma le galuega a Iesu. Tatalo: Le Atua e, seia e taitaiina i matou i ala o augatamā. Ia le avea ma viiga i o matou tagata, a ia avatu le mamalu ma le faaneetaga i lau Afio. Amene Aso Gafua, Tesema 7, 2015: “E leai se mea e nofo ai le tama” Tusi Faitau: Luka 2: 1 – 7 Matua - Luka 1:7 Ua fanau e ia o lana tama ulumatua, ua ia aui ia te ia i le ie, ma faataoto ia te ia i le falemanu, auā latou te le ofi i le fale e tali ai malo. Ua faailoa mai e Luka le fanau mai o Iesu i se tala e iitiiti lona faamatalaina: o le tala lelei e autū ia Iesu. E peiseai, o le tala i lona fanau mai e le tāua. E le o ta’ua foi e Luka, o Iesu na fanau i le fale o manu; o se vaaiga e tulaga ese lea, ua le o ta’ua le mea na fanau ai Iesu. O lona uiga ‘ea o le fanau o Iesu, e le tāua lea pe ā faatusatusa i le mafuaaga na fanau ai ma le olaga na soifua ai? O le tala a Luka, ua na faailoa mai o Iesu e leai se mea na fanau ai. 62 E manatu Luka sa i ai le avanoa i le fale talimalo e mapu i ai Iosefa ma Maria. A e na i ai faaletonu na toe mafaufau ai le pule o le fale talimalo ua lē talia ai i laua. O nisi sa nonofo i le fale talimalo, sa popole i le i ai o se tina faatalitali mo se pepe fou e fanau mai. Ua faailoa mai foi e Luka, o Iosefa ma Maria na malaga i Peteleema, o le nuu o le aiga o Tavita. I se isi faaupuga, ua oo mai i laua i lona nuu e tatau ona maua ai se mea e nonofo ma saogalemu ai. Peitai, ua le maua se mea e nonofo ai ona o lona atalii o le ā fanau mai. E foliga o lenei vaaiga o le faailoga ua te’ena Iesu i lona fanau mai. O le finauga mo e soifua mai a e leai ni ā’iga e tua i ai. Peitai, o le manatu e faatāua: o le leai o se lagona i taimi o mafatiaga; faapea le faailoga tagata na lē maua ai se nofoaga e soifua ai Iesu. Ua avea Iesu ma faailoga o tamaiti uma ua le maua ni ā’iga e malutia ai. O le valaauina foi lea o i tatou ia faaavanoa o tatou loto i le Atua ma lona afio mai. Tatalo: Le Alii e, na e afio mai o se tagata faatauvaa, o le pepe na saili se nofoaga e fanau ai. E ui i lea, na e faia le togiola mo le lalolagi agasala, e ao ona talia lou afio mai i o matou loto. Ia ave’esea le loto leaga ua fai ma mea e taofia ai nisi mai avanoa i nofoaga e malutia ai. Amene. Mafaufauga Loloto: O le a sa tatou vaai i le lē talia o Iesu i le taimi na fanau mai ai? E faapefea ona tatou faamanatuina le Kerisimasi i sona uiga taua? Aso Lua, Tesema 8, 2015: “O le tala fou: o le fanau mai” Tusi Faitau: Luka 2: 8 – 20 Matua - Luka 2:15-16 Ua o i le lagi agelu sa ia i latou, ona fetautalatala’i ai lea o leoleo mamoe, “Ina tatou o ia i Peteleema, tatou te vaavaai i lenei mea ua faia, ua faailoa mai ia te i tatou e le Alii.” Ua latou faataalise atu, ona maua lea o Maria, ma Iosefa, ma le tama meamea o loo taoto i le fale manu. O le fanau mai o Iesu i ona po o le pule a Aukuso, na le’i faailoaina lona fanau mai e pei o aga masani a le malo o Roma. E le’i faailoa mai e le lagi i le malo o Roma lenei tala fou, e pei ona faailoa mai i le ‘au leoleo mamoe. O lenei tala, o le tala ua lagona e le lalolagi uma. Ua faailoa mai e le ‘au agelu le tala e feteenai ma le talitonuga o Roma, e faapea, O le malo o Roma o le ā avea Kaisara Aukuso, ma faaola na te aumaia le filemū i tagata uma. Peitai, o le pepe ua faailoa mai e le ‘au agelu, e fanau i le fale o manu, o le faaola lea na te aumaia le olioli ma le filemu i tagata uma o le lalolagi. O le upu moni, ua faailoa mai e le Atua lona finagalo alofa i tagata faapitoa ua ia filifilia. O Iesu, o ia o le taitai ‘au sili ua valaauina tagata i lona malo, ina ia maua le fiafia ma olioli i le saolotoga ua ofoina mai. O le fiafia o lenei tala fou, o le tali atu lea a le ‘au leoleo mamoe ma le loto fiafia. Na latou tuua mea uma, ma malaga atu i Peteleema latou te talia le o’o mai o le faaola. O le malaga e faia ma le faatuatua i aso uma o lo latou ola, o le 63 malaga ua avea ai i latou ma tagata talitonu i le Alii ua soifua mai i le fale o manu. Na latou iloa atu le faaola ma feiloai atu ia te Ia. Na fo’i i latou ma vivii, ua molimauina le ofoofogia o le vaaiga i le Alii o le Aso Kerisimasi. O le fale o manu ua valaauina ai i tatou ina ia feiloai atu i le o’o mai o le Atua i le lalolagi, e pei ona soifua mai o Iesu i le fale o manu. Tatalo: Le Alii e, seia matou maua faamanuiaga o le olioli ma viiga i lau Afio i lenei aso. Amene Mafaufauga Loloto: O leoleo mamoe na o e saili le Alii; o fitafita na faatonu e fasiotia le Alii. O le a sau feiloai atu i le Alii; e fasiotia pe sailia? Aso Lulu, Tesema 9, 2015: “O suiga ua aumaia e le tama.” Tusi Faitau: Luka 2: 21 -35 Matua - Luka 2:29-31 Le Alii e, e te tuuina atu nei lau auauna, ia alu ma le manuia, e pei o lau afioga; auā ua iloa e ou mata lau faaolataga ua e saunia i luma o nuu uma lava. O le tuuina atu o Iesu i le malumalu atoa ma le valoaga na faatatau ia te ia, ua taoto ai se mafaufauga taua mo i tatou. E pei foi o Sakaria, na aumaia Iesu e ona matua e pei ona faatonu mai e le Alii. Na la aumaia o Ia i le malumalu ia avea ma tama e tusa ma le folafolaga i le feagaiga a le Atua ma ona tagata. O le olaga mativa na foa’i ai le taulaga e tusa ma le taulaga a le tagata mativa (Levitiko12:8) I le tuuina atu o le tama i le malumalu, na latou maua ai le valoaga ia te Ia. O le mea ofoofogia, latou te le i maua se upu a le Alii ina ua fanau mai le tama. Peitai, o le faailoa e le au leoleo mamoe le fanau mai o le tama i le fale manu, faapea le faagaeetia o Simeona e le Agaga o le Alii i le malumalu na olioli ai i le Alii, ua iloa ai iina le tama sa faatalitali atu i ai. O se vaaiga taua le nā i le asō, ua luiina ai i tatou i le afio mai o Iesu. O Simeona na ia faailoa mai le tama ua suia mea uma, o le faailoga o le faatuatua ma le faamoemoe ua taunuu. Na ia faailoa ma le mautinoa o le lumana’i manuia o le lalolagi ua i aao lea o le Atua. E ui ina le o vaai atu ona mata i le faataunuuina o fuafuaga uma a le Atua, peitai, o lea ua vaaia e ona mata le oo mai o le amataga fou e ala i le tama ua vaai ona mata aua sa faatalitali i ai. O le viia o se tama po’o se teine i faatinoga o ala faale-Atua, o le mea silisili lea i Ie lumanai, o le manulauti lea a le tagata i lona olaga i aso uma. O le faamanuia ma le faaaupegaina o fanau, o le faamoemoega tausaafia lea mo le lumanai. Ma o le faamanuiaga sili lea ona taua e ofoina atu ma maua ai le lumanai manuia o le lalolagi. 64 Tatalo: Le Alii e, a’oa’o mai i matou ina ia lagona e o matou loto le tau o le tauaveina o le faaolataga i le lalolagi. Ia avea o matou puapuaga i le talaiga ma faailoga e iloa ai lou alofa. Amene Mafaufauga Loloto: O le a se faasiliga o la tatou savaliga e mautinoa ai lo tatou tutupu i le agaga i nei ona po? Aso Tofi, Tesema 10, 2015: “O le avefeau a le pepe” Tusi Faitau: Luka 2: 36 - 40 Matua - Luka 2:38 O lea lava itu aso, ua sau ai o ia, ua faafetai atu i le Atua, ma tautala ia te ia i tagata uma lava o e na faatali atu i le togiola i Ierusalema. I le vaaiga e Ana o Iesu i le malumalu, na ia vivii atu ai i le Atua. O Simeona foi na ia maua le avanoa i le valoaga ua ia vaaia le Mesia ma lona fanau mai, o le faamoemoe ina ia aulia atu lona ola, ma ia vaai atu i ai. E ui lava ina tāua Ana i le vaaiga a Simeona ona o lona ā’iga ma ona tagata ma lona tamā na ta’ua, peitai o le faanoanoaga o Ana ona na te lei maua se folafolaga poo se perofetaga i le Alii o lea afio mai. I sona lagona faatinā ua oti lona toalua sa la nonofo i tausaga e fitu, o ia ose tamaita’i ua nofo ma le tigā faapea le leai o se faamoemoe. O le mea fiafia ua liliuina lona ola i le tuuina atu atoa o lona olaga i le malumalu i le tatalo faapea le anapogi. Na te lei faia lenei galuega ona o le faamoemoe i se folafolaga poo se taui. O le va’aiga lea i le tamaita’i ua faaeaina i le olaga tatalo ma le anapogi e aunoa ma sona manatu i le oo mai o se lumanai manuia. Na molimauina e Ana le tama o lē ua fanau mai, ma avea ai o ia ma avefeau, ma faailoa atu ai lenei tala fou. O Ana lava na ia faailoa muamua le tala ma molimau i le afio mai o Iesu ao lei amataina e Iesu lana galuega. O se olaga ua faailoa mai i ai tatou, o se laau fua lelei, o le olaga o le tagata faatuatua. Tatalo: Le Alii e, ia avea i matou ma fua lelei o le olaga faatuatua ma molimau i lau faaolataga. Ia faatumauina i matou i le faatuatua e ui ina matou le iloa le i’uga o loo faatali mai. Amene Mafaufauga Loloto: Pe tatou te tatalo ea e aunoa ma se faamoemoe i mea o loo e talosia? Aso Faraile, Tesema 11, 2015: ‘’O le tama ua tali atu ma le ofoofogia.” Tusi Faitau: Luka 2: 41 – 45 Matua - Luka 2:49 Ona fai atu lea o ia ia te i laua, “Se a ea le mea na oulua saili mai ai ia te a’u? Lua te le iloa ea e tatau ona ou i le fale o lo’u Tama?” O lenei tala ua faamauina e Luka i le avea o Iesu ma tamaitiiti, e le o taua i nisi faievagelia. O Iosefa ma Maria sa mulimuli pea i le faiga o le tapuaiga, faapea 65 foi ona a’oa’o atu i le atalii ina ia mulimuli ai. O lenei ua maua le avanoa o Iesu e ulufale ai i le malumalu, e faalogo ma fefaasoaa’i ai ma faifeau ma faiā’oga i le mataupu tau le faatuatua. I le ma’ea o le talanoaga ua ia faailoa atu lona iloa, o le tama e pei ona iloa, ma le taunuuga o lona ola. Na silafia e Iesu ona tausaga ma lona matua ua i ai nei e sefulu ma le lua. O se mea fiafia lea iā tatou fanau o le iloa e i latou o fanau a le Atua e ui ina lei avea i latou ma tagata matutua. O le tala i le malumalu ma le feagai ma Iesu i lenei tala, e tele lava ni lavelave ua tulai mai i manatu. Aisea na nofo ai Iesu i le malumalu e aunoa ma le faailoa atu i ona mātua? Pe na mafaufau ‘ea e le toe fo’i mai ona mātua e saili mai ia te ia? Aisea na manatu ai mātua o loo malaga faatasi i latou ma Iesu? Pe lē o le lapataiga ina ia le tu’ua tamaiti e fai o latou loto a ia fai le mea e pei ona faatonu atu? Pe afai o iai se sesē o matua ia Iesu, pe lē o le valaau foi lea mo mātua uma ina ia avea tamaiti ma faataitaiga uma ia Iesu? Tatalo: Le Alii e, ia e fesoasoani mai ina ia matou iloa le feagai ma lau afio. Ia matou maua le mea e tatau ona matou faia i taimi uma o lo matou ola. Amene Mafaufauga Loloto: O a ni auala ua manatu ai e lē talia ai manaoga o fanau? E faapefea ona tatou tu’ua ia mea? Aso Toonai Tesema 12, 2015: “O le tapenaga e faia ma le loto atoa.” Tusi Faitau: Luka 3: 1 -20 Matua - Luka 3:16, Ua tali atu Ioane ia te i latou uma, ua faapea atu, “O au nei lē papatiso atu ia te outou i le vai, a o lē maliu mai, e silisili o ia ia te au, e le aoga a’u ona tatala le noanoa o ona seevae; o ia lava na te papatiso ia te outou i le Agaga Paia ma le afi.” I le faalauleleiina o le ala o le Mesia, na avea ai Ioane ma avefeau e folafola atu le valaau o le salamo faapea ai ma le olaga tatau e soifua ai le tagata mo le Alii. O le salamo, o le ala lea e iloa ai le tagata faatuatua. E moomia ai tagata uma, e leai se tagata e faaolaina ona oni manatu i faiga e pei o mea na sau ai. O le faatuatua i augā tupulaga, e tāua ma faasilisiliina pea faatusatusa i augatupulaga e silisili le ola faatuatua. O i latou uma e faailoa mai le faatuatua i o latou augātamā, e tatau ona faamaonia lo latou faatuatua i uiga o loo ola ma soifua ai. O le salamo, o le olaga e tatau ona iloa i le tagata, o le tagata e tatau ona ola toefuataina. I le tali atu a Ioane i ai latou na fesili atu ia te ia ua maua lea i le fuaiupu e 11 – “O le tagata e lua ona ofu tino, ia avane ia te ia e leai sona ofu; o le ua ia te ia mea e ‘ai, ia faapea foi ona fai” O le tali a Ioane ina ia latou avatu mea ua latou maua ma tufatufa atu i e ua fia maua le fesoasoani. O le maua o ni ofu se lua, o le agaga o le valaau ia avatu le isi ofu i lē o moomia. O le agaga faasoa atu, o le vaaiga lea i le tagata ua fua mai i fua lelei ma fua tele mai. Ua faailoa mai foi e Ioane le olaga faamaoni, ia 66 faamaoni i taitaiga lelei, ia ola ma le loto fiafia, o le auala lea na te ave’esea le loto ele’elea, ma maua ai se lalolagi filemū ma le olaga saoloto. Tatalo: Fesoasaoani mai ina ia matou maua le agaga faasoa ma fesoasoani atu i tagata. Amene. Mafaufauga Loloto: I le feagai ma le etiveni, o le a se fesoasoani a Ioane e tusa ma le faasoa atu ma le faatauaina o lou ola? E faapefea ona e faailoa atu lenei faasoa i le aso Kerisimasi? Faitauga ma ia Luka Saunia le ala [Saunia e: Anthony Loke] Aso Sa, Tesema 13, 2015: “O le papatisoga o Iesu.” Tusi Faitau: Luka 3: 21 – 38 Matua - Luka 3:21-22 Ua papatisoina le nuu uma, ona papatisoina ai lea o Iesu, ua tatalo o ia, ona faaavanoaina ai lea o le lagi, ona afio lea o le Agaga Paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, “O lo’u atalii pele oe, ou te fiafia lava ia te oe. Ua silafia e Iesu le faigatā o lana galuega o loo faatalitali mai, o le mea lea e tatau ai ona saunia o ia mo le feagai ma le galuega. O le auala tāua i lana galuega o le mafuta ma ola faatasi ma tagata, o le ala na afio mai ai o Ia mo le faaolaina o tagata. Ina ua papatisoina Iesu e Ioane i le vai o le Ioritana, ua tuuina atu Iesu ina ia papatisoina o Ia, o se mea e lē tatau mo Ia peitai, ua faitauina o Ia o se tagata ua papatiso faatasi ma tagata, faapea i latou sa tumutumu ane ia Ioane. O le ulufale atu o Iesu mo le papatisoina, e pei ua faapea atu o Ia i tagata, ‘‘O ia o se tagata e pei o i latou.” Peitai, e loloto le fetalaiga a Iesu e pei ona ia fai atu, o le lagona o le Alii ua faailoa atu ua faatasia o Ia ma tagata uma o le lalolagi. O lē e le i agasala ua filifilia e avea ma tagata agasala; o lē ua leai sana agasala e lē tatau ona papatisoina i le vai, lenei ua filifilia e papatisoina faatasi ma tagata, mo lo tatou faaolaina. Mai lava i le amataga o le galuega a Iesu, na ia mau faatasi ma faitauina faatasi ma tagata agasala. O le siufofoga o le Atua mai le lagi ua faailoa mai lona fiafia tele i lona atalii, atoa ai ma le faiga o lana galuega. Tatalo: Le Alii e,faafetai ona o Iesu ua afio mai ma mafuta faatasi ma i matou. Amene 67 Aso Gafua, Tesema 14, 2015: “O le faaosoosoga o Iesu” Tusi Faitau: Luka 4: 1 – 13 Matua - Luka 4:3-4 Ona fai mai lea o le tiapolo ia te ia, “Afai o oe o le Alo o le Atua, ina fetalai ane ia i lenei maa ia liu areto.” Ona tali atu lea o Iesu ia te ia, “Ua tusia, E le na o mea e ‘ai e ola ai le tagata.” O le faaosoosoga o Iesu, o le faaaliga taua lea ua saunia ai Iesu mo mea faigatā o le a feagai ma Ia i lana galuega. O le manumalo o le Alii o loo atagia lea i lana galuega, peitai o le faiaina, o le olopalaina lea o fuafuaga uma mo le faaolaina o le lalolagi. E tolu faaosoosoga ua faamauina e le Tala Lelei na faaosoosoina ai e le tiapolo ia Iesu. O le faaosoosoga muamua, o le tino ua moomia le fia ‘ai. “Afai o oe o le Alo o le Atua, ina fetalai ane ia i lenei maa ia liu areto.” Na tali atu Iesu e tele atu mea lelei i le ola nai lo o mea ‘ai.(Teuterenome 8:3) O le faaosoosoga lona lua, o le faailoa atu lea o le malosi faale-tagata. “O lenei, afai e te ifo mai ia te au, e fai ma au mea uma.” (f 7). Tali Iesu, “E te ifo i le Alii lou Atua, ua na o ia lava e te auauna i ai.” (Teuterenome 6:13). O le faaosoosoga e tolu, o le moomia o le puipuiga – “Ina oso ia oe i lalo i le mea nei,...” (f.9a), ma vaavaai pe faaolaina oe e le Atua. Tali atu Iesu, “Aua e te tofotofo i le Alii lou Atua...” (Teute. 6:16). E faapea ona suesueina tagata e fia ave taavale, e tatau ona pasia lana suega ona faatagaina lea e ave taavale i luga o le auala. E faapea Iesu ma lana suega, ua faalelea mai nei lana fu’a o le manumalo ia Satani ma ona faaoso’osoga, peitai, e i ai pea le aso e toe osofa’ia ai e Satani Iesu i ona taimi. Ua manumalo Iesu i le asō, a e o le finauga ma Satani e faaauau pea se ia i ai se aso. Tatalo: Le Alii e, ua le maua se saolotoga ona o faaosoosoga a satani i lenei olaga. Se’i e aumaia le manumalo ia te a’u, e pei ona faia e Iesu. Amene. Mafaufauga Loloto: O le Upu a le Alii tatou te tau ai ma Satani ma manumalo ai. Aso Lua, Tesema 15, 2015: “Ua afio mai Iesu i lona aiga.” Tusi Faitau: Luka 4:14 – 30 Matua - Luka 4:18 Ua i o’u luga le Agaga o le Alii, auā ua na faauu mai ia te au e folafola le tala lelei i e matitiva...” Ua faatumulia Iesu i le mana o le Agaga, o lea na fo’i mai ai o ia i Kalilaia ma lauga ma a’oa’o atu i tagata. Ua faalogo ona tagata i Nasareta a e le’i o’o atu o Ia. Ua maua tala i lona ta’uta’ua i ana lauga ma ana faamalologa, ma ua faatalitali mai tagata uma e fia faalogo i le tama-ole-nuu ua faia galuega lelei. 68 I le aso na ulufale ai o Ia i le sunako i Nasareta, na valaauina o Ia na te faitau ma faamatala afioga a le Atua. O le tusi a Isaia 61:1-2 na ia faitauina ma faailoa ai ua taunuu le afioga a le Atua ia te Ia. Peitai, o tagata ua liliu atu i latou ia te Ia ma le tali le talafeagai. Muamua a o faitau e ia le afioga a le Atua, na ofo tagata uma i le upu ua faailoa mai e Iesu. O la latou tali mai ua suia i se tali matagā – O lea na fetalai atu ai Iesu, na te le faia faailoga faapea vavega e pei ona latou fia vaai i ai e pei ona faia i Kalilaia. E i ai le mafuaaga na le faia ai e Iesu vavega e pei ona Ia faia i Kalilaia; o lona nuu, o tagata e fiafia e vaavaai i mea ofoofogia, ae le fiafia i a’oa’oga a Iesu e faatatau ia i latou. O lea na latou ave ai ia te Ia i tua o le aai, ua ta’ita’i fo’i ia te Ia i le tofē o le mauga ina ia latou faatitō ifo ia te Ia. Peitai, fai mai le tala, ‘ua savali ane Ia i o latou va, ma maliu ese’. O le faailoga o le te’ena o Ia e lo latou nuu, ma ua faapea foi ona Ia te’ena i latou. Tatalo: Le Alii e, e tele lava mea ua matou feeseeseai ai i le faiga o lau galuega. Fesoasoani mai ina ia matou tumau ma faaauau lo matou valaauina. Amene Mafaufauga Loloto: E faigatā ona e galue i lou nuu moni ona ua iloa ‘oe e tagata uma. Aso Lulu, Tesema 16, 2015: “O le pule a Iesu” Tusi Faitau: Luka 4: 31 – 37 Matua - Luka 4:35 Ona vavao lea o Iesu ia te ia, ua faapea atu, “Ina faalologo ia, ma ē alu i fafo nai ia te ia.” Ona lafo i lalo lea o le temoni ia te ia i o latou luma, ona alu lea i fafo ia te ia, ua le afaina lava ia. I lenei faitauga ua tatou vaaia ai le isi vaaiga o Iesu ma le amataga o lana galuega: O lea ua faailoa mai o ana vavega e ala i faailoga ma mea ofoofogia. O galuega, o le faailoga e ta’ita’iina tagata i le Atua. O faailoga ma mea ofoofogia, e mafai foi ona faia e le tiapolo ma temoni. Peitai, o faailoga ma vaaiga ofoofogia e moomia lona faamatalaina. O galuega, e o faatasi ma le laugaina o le Upu. O le laugaina o le Upu e faamatala ai le Atua ma lona feagai ma le tagata, e faapea foi faailoga ma mea ofoofogia e o faatasi ma le laugaina o le Upu. I le sunako i Kapanaumi na feagai ai Iesu ma le tagata ua ulutinoina e temoni, po o le agaga leaga. O le i ai o Iesu na tautala ai le tagata ma le leotele. O le manatu o le tiapolo ua afio mai le Alii i le lalolagi e aveesea le galuega a le tiapolo ma temoni. Ua iloa e le temoni ua oo mai le taimi e uma ai lana galuega. O le tali a Iesu, o se faataitaiga lea mo i tatou uma e ao ona mulimuli ai. Ua silafia e Iesu o le faaletonu ua o’o i le tagata ma’i ona o le malosi o le temoni, a e le o se ma’i ulu po’o le mafaufau. Na aveesea le temoni i fafo ma le lē gaoiā i le fetalaiga a Iesu, na ia faatonu atu le temoni ina ia filemū ma aluese ma le tagata. E faapea foi nisi o Iutaia ma i latou na fa’aaogāina le mana o Iesu e ave’esea ai temoni (Galuega 19:13-16). O le mea ua mautinoa, e mafai ona 69 tautala atu ma le malosi i le mana o Iesu, e mafai ai ona tuli’eseina le temoni ma alu ese mai le tagata ma’i ia nofo filemu. Tatalo: Le Alii e, fesoasoani mai ina ia avea au ma tagata e maua lou mana e oo atu ai lou finagalo faamalolo i tagata. Amene Mafaufauga Loloto: Na silafia e agaga leaga le mana o Iesu, o le Alo o le Atua. E faapea foi ona tatou faailoa atu lana galuega ma lona agaga ua faailoa mai ia i tatou. Aso Tofi, Tesema 17, 2015: “O le malosi o Iesu.” Tusi Faitau: Luka 4: 38- 44. Matua - Luka 4:39 Ona tu lea o ia i ona tafatafa, ua vavao le ma’i vevela, ona te’a ai lea; ona tulai loa lea o ia, ua auauna ia te i latou. I lenei faitauga ua tatou iloa ai le galuega a Iesu i ana vavega na ia faia e ala i le faamaloloina o e mama’i ma tigaina. O le galuega muamua lea ua faia e Iesu, o le faamaloloina lea o le tinā o le avā a Peteru. Na ia vavao atu i le ma’i vevela, e le matua iloa po o le ma’i na afua mai i agaga leaga e pei ona faamaloloina le tagata na ulutinoina e temoni. Ua iloa, na faamaloloina le tinā, ma ua aluese le fiva ma toe fo’i mai lona malosi. O le faamaoniga o lona malosi, ua tula’i le tinā ma auauna mai ia te i latou. O lea lava aso ua fetuleni mai ai tagata mama’i ma e mafatia ina ia faamaloloina e Iesu. I nisi taimi ua tau alaga mai temoni ua ulutino i tagata ma faailoa mai i a Iesu. Peitai, ua vavao e Iesu i latou ma faatonu atu e tu’ua le tagata ma’i ma sau i fafo. Na faia e Iesu lana faamalologa ia i latou uma na ‘auai i lea aso. I nisi aso sa le’i faia e Iesu se galuega faamalolō. I le evagelia a Ioane, mataupu lima (5), ua tatou maua ai le tagata na faamalolō e Iesu, o le tagata ua gase lona lima mai le aso na fanau mai ai. O le tagata ua leva ona taumafai atu o ia ia o’o i le vai o Petesa. O le tala ua tatou maua, na faamalolōina e Iesu le na tagata ma’i. O le molimau e manatua pea e i tatou, o le faamalologa, o le galuega e faia e le Alii. Ua silafia e le Alii le taimi e faia ai lana faamalologa ma lē o le a faia i ai. Ia tatou manatua e le mafai ona tatou faatonu atu Iesu ina ia faia ana faamalologa. Peitai, o i tatou e auala atu ai faaaliga a le Atua i lona alofa ma lona agalelei. Tatalo: Le Alii e, ia e fesoasoani mai ia ou laugaina lau Upu, i au vavega ma au faamalologa ina ia iloa ai e tagata le silisili ese o le Atua soifua. Amene. Mafaufauga Loloto: O Iesu na faailoa mai ana vavega ma ana faamalologa. 70 Aso Faraile, Tesema 18, 2015: “O le valaauina o Iesu.” Tusi Faitau: Luka 5:1 – 11 Matua - Luka 5:8a, 10 Ua iloa e Simona Peteru, ona faapaū lea o ia i tulivae o Iesu, ua faapea atu, “Le Alii e, ina maliu ese atu ia oe ia te au, auā o a’u o le tagata agasala.”… Ona fetalai atu lea o Iesu ia Simona, “Aua e te fefe, e amata i nei ona po ona e maua tagata. E tele ona tatou tu’u eseesea le olaga paia ma le olaga faale lalolagi ma le manatu, na o le olaga paia o le mea sili lea ona tāua. Ua tatou manatu foi e le tāua tele i le Atua a tatou galuega e pei ona masani ai. E pei e faatāua e le Atua na o le olaga paia ma le auaunaga paia e galue ai. I lenei faitauga, ua tatou iloa ai le faatāuaina e le Atua o le olaga o le tagata, e le gata i lea, a o galuega a le tagata o loo galue ai i aso uma. Ua valaauina i tatou e Iesu ina ia auauna atu ia te Ia, ia le tuua a tatou galuega e masani ona galulue ai pe a valaauina i tatou i nisi galuega, a ia auauna ia te Ia i soo se mea o tatou galulue ai. I lenei tala, ua lauga atu Iesu i le motu o tagata. Ona o le tumutumu o tagata, na oso ai Iesu i luga o le vaa o Simona ina ia maua se avanoa e faia ai lana galuega. Ina ua maea le lauga, ona luiina lea e Iesu o Peteru ma fetalai atu, ina ia tuu le upega i le loloto. Peitai na tali atu Peteru, e le aogā ona tuu i le loloto auā ua uma le po e le’i maua lava se i’a. E ui i lea, na faalogo Peteru ia Iesu ma tu’u le upega i le loloto, ma maua ai i’a e tele. O le tele o i’a, na lagona ai e Peteru lenei avanoa ua toe aumaia faalua ia te ia, ma faapaū ai i vae o Iesu ma faapea atu, “Le Alii e, ina maliu ese atu ia oe ia te au, auā o a’u o le tagata agasala.” O le mafuaaga lea o le toe tuuina atu e Iesu o le avanoa faalua ia Peteru, “Aua e te fefe, e amata i nei ona po ona e maua tagata.” O le fetalaiga ofoofogia e le gata ia Simona, a o le au faifaiva uma ua latou lafoa’i mea uma ma mulimuli atu ia te Ia.(f 11) Tatalo: Le Alii e, ia e fesoasoani mai ia matou faia au feau ma le faamaoni i lau Afio a e le o tagata. Amene. Mafaufauga Loloto: Ua valaauina i tatou e Iesu mai galuega masani ina ia auauna atu ia te Ia e ala i le fa’aaogāina o a tatou taleni ma agavaa taua. 71 Aso Toonai, Tesema 19, 2015: “O le mutimutivale o le alofa o Iesu.” Tusi Faitau: Luka 5: 12 – 16 Matua - Luka 5:13 Ona aapa atu lea e ia lona aao, ua pa’i atu ia te ia, ua faapea atu, “Ou te loto i ai; ia mamā oe.” Ona te’a ese loa lava lea o le ma’i lepela ia te ia. I le lalolagi o ia ona po, o le ma’i lepela e faatusaina i le tele o ma’i e tutupu i le tino o le tagata, o nisi o ma’i e toe lelei a o isi o gasegase e le maua lava se vaifofo. Ona o lenei natura o le lepela, o le ma’i ua fefefe i ai le toatele o tagata ona e le togafitia. I ia aso, pau le vaifofō i lenei faama’i o le aveesea lea o le tagata ma’i mai le sosaiete o tagata. O motu sa ave i ai tagata lepela, o motu e mamao ‘ese mai nofoaga e nonofo ai e malolosi. Afai e i ai se lepela e fia o’o mai i le mea e i ai tagata malolosi, e tatau ona maua se tusi faamaonia. I le nuu o tagata Iutaia ua i ai le ‘au ositaulaga ua avea ma faamasino e vaaia mea uma tau lepela, faapea le faamaonia o le tagata ua manuia lona ma’i e ala i asiasiga e faamaonia ai le tagata ua malosi. ( Levitiko 13,14) O le lepela na feagai ma Iesu i se tasi aso, na augani atu ia Iesu ina ia faamaloloina o ia (f12). O le lepela ua lilofia i le ma’i lepela, na manatu o ia e le faia e Iesu le faamalologa mo ia, peitai, ua aapa atu Iesu ma tago ia te ia. O lona tago atu ia te ia, o le ata o le ala laupapa sa mamao ma motusia, o lenei ua fesootai e Iesu ma tago atu i le tagata lepela. O le mea uiga ese ona o le tele o tausaga faatoa pa’i lea o se tagata ia te ia. O le pa’i atu a Iesu, o le faailoga o le mutimutivale o lona alofa, ma ia faia le faamalologa e le gata i lona pa’i atu i le tino lepela, a e faapea foi ona faamaloloina ma lona loto. Na fetalai atu Iesu ina ia alu ma faailoa i le ositaulaga e pei o tu ma aga masani, ma avatu le taulaga mo lona faamaloloina. Na oo atu lenei tala i le faamaloloina o lenei tagata, ma ua avea ma afimumū i loto ma le faalogo a tagata. Tatalo: Le Alii e, ou te fia pa’i atu i tagata e pei ona e faia. Amene Mafaufauga Loloto: O le faamaloloina o le lepela, o le molimau sili lea i le ositaulaga faapea le lepela ma tagata uma. 72 Faitauga mai ia Luka 4. O le amataga o galuega [Saunia e Bola Iduoze] Aso Sa, Tesema 20, 2015: “O Iesu le foma’i na te faamalōlō.” Tusi Faitau: Luka 5: 17 - 26 Matua - Luka 5:20-22 Ua silafia e ia lo latou faatuatua, ona fetalai atu lea o ia ia te ia, “Sole, ua faamagaloina au agasala.” Ona manatunatu lea o le au tusiupu ma le au faresaio, ua faapea ane, “O ai ea lenei ua na faifai i le Atua? O ai na te mafaia ona faamagaloina agasala, ua na o le Atua lava?” Ua silafia e Iesu o latou manatunatu, ona tali atu lea o ia ia te i latou, “Se a le mea tou te manatunatu ai i o outou loto?” O le tagata sa ma’i na i ai ana uō na naunau e ave o ia ia Iesu. Na latou iloa le toatele o tagata na fia vaai ma fia faalogologo ia Iesu. E pei lava o le masani a tagata mama’i i lea nuu ma lea nuu, e tofu lava le tagata ma lona faamoemoe e fia vaai ai ia Iesu. O nei uō, o le faamoemoe e tasi i o latou manatu, ia papa’i ane Iesu i la latou uō ma’i ma malolo ai o ia. E ui ina faigatā a e na latou maua le auala e pa’i ai le ma’i ia Iesu, ma na silafia e Iesu i lo latou faatuatua. O le tulaga pito tāua ia iloa e Iesu le loto faatuatua. Ua silafia e Iesu le faatuatua o e na aumaia le tagata ma’i; e faapea foi ona ia silafia le faatuatua e oo mai i nei ona po. Na silafia e Iesu le faatuatua ma ua faamalōlōina ai le tagata ma’i, e le gata i lea, a ua faamagaloina ana agasala. O la latou galuega sa faatino e ala i lo latou faatuatua ia Iesu, ua fai ma fesootaiga taua e faamaloloina ai la latou uō. Na faamaloloina e Iesu lenei tagata ma faapea ane ai le au tusiupu ma le au faresaio, ua upu vale o Ia i le Atua, auā ua ia fetalai atu ma faamagalo i le agasala a le tagata. Ua molimau mai le Tusi Paia (f.22), “Ua silafia e Iesu o latou manatunatu...”, ua ia a’oa’o atu foi ia te i latou. Tatalo: Le Alii e, seia e fesoasoani mai ia ou ola i le faatuatua, ia atagia i a’u galuega e ala i le talitonu ia te Oe, ia avea mafaufauga o lo’u loto ma mea e mālie ia te Oe. Amene. Aso Gafua, Tesema 21, 2015: “Ua valaauina ma le faaaloalo.” Tusi Faitau: Luka 5: 27-39 Matua - Luka 5:27-28 Ua mavae ia mea, ona ulufafo ai lea o ia, ua silafia e ia le tagata ao lafoga e igoa ia Levi, ua nofo i le fale e tali ai lafoga; ona faapea atu lea ia te ia, “Ina mulimuli mai ia ia te au.” Ona tuua lea e ia o mea uma, ua tulai ma mulimuli ia te ia. 73 Ua o’o atu Iesu ma iloa le tagata ua igoa ia Levi. I vaaiga faaono po nei, o ia o le tagata agasala auā o ia o le tagata ao lafoga na te faamamafaina lafoga i tagata, na te faasili se vaega o lafoga a tagata ina ia maua ai sona tamaoaiga. E faapea le tamaoaiga o Levi sa ia maua. O le tagata ua faitauina o se tagata agasala e ta’ita’i ma tagata lolotu, ona o le lē tonu o ana faatinoga. O le valaauina o Levi e Iesu, o se faafitaulu tele lea i le vaai a le au faresaio ma le au tusiupu. Ua le fiafia i latou ina ua oo atu Iesu ua mafuta i e ao lafoga ma e agasala; o se vaaiga e le tatau ona faataga ma le talafeagai ma Iesu ina ia mafuta ma e agasala. O le vaaiga taua e ui ina faato’ā vaaia e Levi ia Iesu; ua sauini o ia ma le loto atu i le Alii e tusa ma le valaau. O le afioga a le Atua na fetalai ina ia tuu mea uma ma mulimuli atu ia te ia, o se valaau ua leva ona ia faatali i ai ina ia mafuta faatasi o ia ma le Upu moni. Na ia tuua mea uma ma lona tamaoaiga ma ana agasala sa ia faia, a e galue mo le Alii. E le gata i lea, a ua ia faia se faiga’ai tele e valaaulia ai tagata uma ia faatasi ma ia. Ma, ua avea nei tagata uma ma tagata ua aafia i le galuega a Iesu. I le valaauina o Levi, ua o mai tagata uma e feiloai ma le Alii, auā ua latou iloa le Alii e le faatua’oia lana silisili i tagata uma ma le alofa. Ua o’o atu o ia ma valaauina i latou i lona malo. E faapea foi i tatou ina ia tatou o atu ma valaau tagata uma ina ia oo mai ia Iesu ma lona malo. Tatalo: Le Alii e, seia avea i matou ma tagata e valaauina tagata i lou malo. Ia avea i matou ma tagata e faailoa atu lou malo a e aua ma le faamasino atu. Amene Mafaufauga Loloto: Ua sauni Levi e mulimuli ia Iesu – ua sauni o ia mo se faatonuga. A i ai se tasi o faatali i le valaau, ia vave faao’o atu loa lea valaau. Aso Lua, Tesema 22, 2015: “Saili i se mafuaaga e molia ai.” Tusi Faitau: Luka 6: 1 -11 Matua - Luka 6:6-7 O le tasi fo’i sapati ua ulu atu ai o ia i le sunako, ma a’oa’o atu, sa i ai le tagata ua gase lona lima taumatau. Ua lamalama ia te ia le au tusiupu ma le au faresaio, pe faamalolo e ia i le sapati, ina ia latou maua se mea e momoli ai ia te ia. Ou te manatua se tasi tamaita’i sa matou a’o’oga e mātau a matou amioga e le tatau e tusa ai ma le finagalo o le Atua. O lona manatu o Kerisiano uma e le maua le alofa o le Atua ona o le lē tausia o tulafono a le Alii. E faapea le mea na fai e le au tusiupu ma le au faresaio, na latou saili ia Iesu po o a ana mea o fai. E pei lava ona maua i le Tusi Paia, e lē masani i latou i faiga a Iesu ma lē talia ai e i latou auala o loo faatino ai e Iesu lana galuega. O le mea 74 lea na mulimuli ai ia Iesu, e le ina ia iloa ni mea fou e tāua mo i latou, a e mulimuli e autilo mea o faia e Iesu ma ni mea sesē e molia ai o ia . I lenei faitauga, na molia so’o o Iesu i le ootiina o ‘au saito i le aso sapati. O lenei ua faailoa atu le faamaloloina o le tagata na gase lona lima i le aso sapati e Iesu, ma solia ai e Iesu le tulafono e le tatau ona faia i le aso sapati. Na tali atu Iesu ma le atamai i le moliaga ua tulai mai: Po o se mea leaga le tagata e mata’i i mea sesē e fai e isi ma saili leaga e molia ai! Na silafia e Iesu ma lona faanoanoa lo latou lē talia o Ia ma lana galuega, ona o latou mafaufauga e saili se mea sesē e molia ai o ia e tusa ma lana galuega. O le manatu o le saili sesē i aso uma ina ia molia ai tagata, o le ā faaleagaina ai lou faatuatua atoa ma lau savaliga i le Atua ma lona malo. Tatalo: Le Alii e, seia e fesoasoani mai ina ia le avea a’u ma tagata e saili sesē, ma avea ma faamasino i tagata o lou malo. Amene Mafaufauga Loloto: O le mafaufau e faamasino atu e faaitiitia ai le tagata mai ona manuia e tele ua faailoa mai e le Alii. Aso Lulu, Tesema 23, 2015: “O le mafuaaga o le malosi.” Tusi Faitau: Luka 6: 12 – 19 Matua - Luka 6:12 O aso lava ia ua maliu a’e ai o ia i le mauga e tatalo; ua aoina lana tatalo i le Atua. E masani ona ou faalogo i le faifeau matua na faapea mai, ‘“E ui ina faia e le Atua galuega lelei mo a’u, a e le o a’u o se tagata faapitoa.” Peitai, na te iloa le mafutaga ma le Atua i le malosi o le tatalo i taimi uma e valaau atu ai ia te Ia. O le nā aso na o’u faamaonia ai le mafuaaga o loo manuia ai le galuega a lenei tamā, e faia pea lana tatalo i aso uma ma mafuta atu i le Atua. E masani ona faapea mai, “O le tatalo e oo atu i le lagi, na te aumaia suiga lelei i le lalolagi.” Ua sauni nei Iesu e valaauina lana aufaigaluega, o le mea muamua ia te Ia o le mafutaga ma lona Tamā i le tatalo, o lē ma te aumaia le malosi sili ia te Ia e faia ai lana galuega. Ina ua mae’a lana tatalo, na mafaia ai e Iesu ona faamalolo i tagata mama’i, na ia faia vavega ma ave’ese temoni ma agaga leaga na ulufia ai tagata ma sa’olotoina i latou. I le fuaiupu e sefulu iva (19), ua faamauina e Luka, “Ua alu atu le mana ia te Ia.” O le manatu o Luka, ua tupu tele le agaga o le faamalologa ma ua faatumulia e le Atua lona mana i le tatalo a Iesu. E faapea foi i tatou i aso uma, e tutupu mai mea uma i le malosi o le tatalo ma le mafutaga ma le Atua. Pe afai tatou te faia filifiliga taua i o tatou olaga, o le upu moni tatou te maua le malosi i le tatalo. I le filifilia o se tagata e galulue faatasi i se pisinisi, e faapea foi i le filifilia o sau uō, e faapea foi i se filifilia o se ‘au faigaluega e galulue 75 faatasi, e tatau lava ona muamua valaau ma mafuta atu i le Atua i le tatalo, aua o Ia lava na te faailoa mai taunuuga lelei uma e taitaiina ai i tatou i mea tonu uma. Tatalo: Le Alii e, ia ou maua lou alofa tunoa ou te mafuta atu ai ia te Oe i le tatalo. Ia ou faailoa atu lou finagalo i a’u filifiliga ma o’u manatu i aso uma. Amene Mafaufauga Loloto: Na pa’i atu Iesu i tagata uma ona na mua’i pa’i atu i le amataga o le malosi silisili. Ia faapea ona tatou faia ma tatou vaaia suiga o le a tula’i mai. Aso Tofi, Tesema 24, 2015: “E sili atu aso i le lumanai.” Tusi Faitau: Luka 6: 20 – 26 Matua - Luka 6:21 Amuia outou e fia aai nei; auā e maoona outou. Amuia outou e tagi nei; aua e featani outou. O le tala taua na ou maua a o o’u feagai ma a’u a’oa’oga i se Aoga Kerisiano Maualuga i mea tau a’oa’oga, na ou iloa ai se teine a’oga ua lē talia e lona aiga ina ua liliu i le a’oa’oga, faapea le faatuatuaga faa- Kerisiano. O nisi taimi na toe mafaufau ai i lenei faaiuga ua ia fai ma faigatā e faaopoopo i lona olaga. I le taimi sa totogi ai e lona tamā lana a’oga, sa tele mea lelei sa ia maua. A o le taimi nei, ua avea o ia ma tagata mativa, ua faatonuina foi ona uso ma ona aiga ia aua ne’i toe fesootai atu ia te ia. Peitai, na tumau lona talitonuga ia Iesu, a e maise le Tusi Paia. O lona faamoemoe ua fausia i folafolaga a le Atua, e sili atu mea uma o loo faatalitali mai mo ia i le lumanai ma aso uma o lona ola. E faapei o lenei teine, o tagata uma ua avea ma molimau, talitonu, ma mautinoa mea silisili o i lumanai, o loo faatalitali mai mo i latou. O le faamoemoe lea o le afio mai o Iesu i le lalolagi. O i tatou uma o loo i ai lo tatou faamoemoe i le aso a taeao. O le upu moni, pe a puapuaga i tatou ona o lo tatou faaolaina, tatou te maua le olioli ona o le Atua na te aumaia le palealii e faapaleina ai le tagata e tumau pea ia te Ia. O le valaau lea a Iesu i ona soo ina ia olioli i aso o puapuaga, auā ua i le lagi lo latou taui e tele e pei ona faamauina i le fuaiupu (f .23). Ia tatou olioli ma fiafia i le asō ona o lo tatou faamoemoe i le manuia i le aso a taeao. O le Atua lava na te aumaia le taui e tele i le tagata e tumau ia te Ia i taimi o puapuaga. Tatalo: Le Alii e, ia e faamanatu mai ia te a’u lau folafolaga i le faapaleina o le tagata i taimi o mea faigatā. Aumaia ia te a’u lou alofa tunoa e mafai ai ona tumau ma le loto tele ma auauna atu i lau Afio. Amene. Mafaufauga Loloto: Ia e tumau ia Iesu auā e faapaleina lava oe. 76 Aso Faraile, Tesema 25, 2015: “O le mealofa silisili.” (Aso Kerisimasi). Tusi Faitau: Luka 6: 27 – 38 Matua - Luka 6:37b, 38 Ia outou faamagaloina atu, e faamagaloina mai ai outou. Ia outou foai atu, e foaiina mai ai ia te outou; e foai mai e i latou lo outou lava ie pulupulu le fua lelei, e lolomi ma luluina, e tumau ma solo i tua. Auā o le fua tou te fuaina atu ai, e fuaina mai ai ia te outou. O le Aso Kerisimasi o le aso o le tuuina atu o mea alofa. O le aso e tuuina atu ai lau mea alofa i le ua sili ia te oe. O le Aso Kerisimasi o le aso o le fiafia ma le loto faagaeetia aua o le a maua meaalofa. O loo i ai foi le agaga e fai meaalofa atu i se tagata na te le iloa ona fai meaalofa mai ia te i tatou. O lenei aso tāua ua faailoa mai e le Atua le meaalofa sili, ua Ia foai mai lona Alo ina ia faaolaina i tatou ma avatu i tatou i le mafutaga ma Ia. I le fuaiupu e tolusefulu ma le lima (f.35), ua aoao atu Iesu “Ia outou alolofa atu i e o fai outou mo latou fili, ma ia agalelei atu...” Na Ia faapea atu foi, ia tuuina atu mea uma i lē ua moomia, ma ia aua le toe mafaufau i ai. E tele taimi e tuuina atu ai le fesoasoani i le tagata ua moomia se fesoasoani ma lē toe mafaufau mai ina ia aumai se taui. E faapea le finagalo o Iesu, ia tatou ola i le na olaga. E faapea foi i le Aso Kerisimasi, ia tuuina atu meaalofa uma ma le loto atoa, ma le faamoemoe ia lē toe maua mai se mea i lē ua tuuina i ai, auā o le Atua o loo silafia e Ia mea uma. Na tuuina mai e le Atua lona Alo ma lona silafia le tagata e le fai meaalofa atu ia te Ia. O le avanoa lelei lea na ia faia ai le leleiga ma le tagata ma le lalolagi uma. O le Atua ua ia aumaia le mea alofa sili i mea uma; ia faapea foi ona tuuina atu meaalofa ma ia lē toe mafaufau ia maua mai se taui. Inā faitaulaga atu ia i le Atua, o lē ua alofa mai. Tatalo: Le Atua e, se ia e foa’i mai le loto fiafia e tuuina atu ai meaalofa i ē o ita mai. Se ia e faamanuia atu i e ua ita mai. Amene. Mafaufauga Loloto: Ia tatala faitotoa o tatou loto se ia ulufale mai ai le Atua. Aso Toonai, Tesema 26, 2015: “Ina sau ia, ia faalogo ma ia faia.” Tusi Faitau: Luka 6: 39 – 49 Matua - Luka 6:46-47 Se a ea le mea e ta’ua ai au e outou, Le Alii e, Le Alii e, ae tou te le faia mea ou te fai atu ai? O sē sau ia te au ma faalogo i a’u upu, ma faia e ia, ou te faailoa atu ia te outou le ua tusa i ai o ia. O le mea sili ona le fiafia ai mātua, o fanau e a’oa’o atu a e le faalogo. E i ai le mafua’aga e aoaoina ai e matua le fanau, ma e i ai le tali e manaomia e matua e 77 ao ina tali mai ai le fanau. O le tali e mana’omia, ia faataunuu le mea ua a’oa’o atu ai. E faapea le vaaiga a le Atua ia i tatou lana fanau. E fiafia o Ia pe a tatou ō atu ia te Ia. A e faanoanoa, ona e toatele e fiafia e tautau lona suafa, a e lē usiusita’i i lona finagalo---e le faatinoina a’oa’oga e pei ona IA finagalo ai. O le upu, ‘“Le Alii e,’’ o le agaga lea e le gata ua tuuina atu atoa i le Alii le loto ma le agaga: Ia tali atu ma sauni e le gata ina faalogo, a ia faatino lona finagalo. Ia avea i tatou ma faataitaiga o lana Upu ma ona ala. O le Atua e fia silasila i le tagata e mafuta faatasi ma Ia ma usiusita’i. Pe a tatou mulimuli ia Iesu, e taua le usiusitai, ia faamuamua Iesu i lou olaga. Na a’oa’o Iesu e uiga i le tagata faamaoni, e faapei o le tagata atamai na ia fau lona fale i luga o le papa, a o’o ina feagai ma matagi ma afa, e le mafai e ia mea faigata ona luluina lona fale. E faapea le vaaiga i le tagata faamaoni ma usiusita’i, e tumau o ia auā ua avea le Atua ma papa mautū e malu ai ma faaolaina. Ua valaauina ia avea i tatou ma tagata e fiafia e faalogo ma faia le finagalo o le Atua. Ia lē avea i tatou ma tagata e folafola i le gutu a e le mulimuli i a’oa’oga a Iesu ma lona finagalo. Tatalo: Le Alii e, ia avea a’u ma Kerisiano faamoni. O le tagata e talia lau valaau, e faalogo ma faia lou finagalo. Amene. Mafaufauga Loloto: O lu’i o le olaga e le uma, peitai, ia tumau i le faatuatua ma mulimuli i le Alii, e pei ona faailoa mai ana a’oa’oga tatou te soifua ma ola ai. Mulimuli i le fetu o Peteleema. [Saunia e: Tom Arthur] Aso Sa, Tesema 27, 2015: “Ua liutino le Upu – o le Upu mo tatou.” Tusi Faitau: Ioane 1: 1 -14 Matua - Ioane 1:12a A o i latou uma e na talia o ia … na ia avatu i ai o lea manuia, ia avea i latou ma fanau a le Atua. Ou te manatua a o o’u matamata i le ata o le, The Lone Ranger, i lau TV, ina ua malaga ane le tama o le ata faatoa mae’a lona manumalo mai le osofaiga a le fili. Na ou maua atu le tala a le tagata sa vaavaai atu i le malaga mai a le tagata ma fesili, “ O ai le na tagata matapulepule lea ua tietie mai?” I le mataupu silisili faa-Kerisiano o loo atagia i le fesili, ua faailoa mai ai le o’o mai o Iesu. O le fesili o loo fesiligia, “Po’o ai lenei tagata?” O le ituaiga lenei o fesili e ono faatupu mai ai o isi foi fesili, e faapea atu ai, “Ao ai a’u?” O le ‘upu’, po’o le ‘poto’, e avea ma fafagu mo i tatou, a e le mo Iesu. 78 Ua faamatala e Ioane le fanau mai o le taupou o se tala e faaauau pea i lea auga tupulaga ma lea auga tupulaga lona taua. Ma, ua aoaoina i tatou ia iloa ona faaopoopo upu ia fai ma tala-fou e uiga i le Upu a le Atua. O le tala ia Iesu, ua le o se tala e faatatau i se toa ta’uta’ua, ua le o se tala e faatatau i se faafiafiaga, a e o le tala e uiga i le fafagaina ma le faamaloloina o e ua matelaina, o e na se ma le iloa, a ua toe maua mai. Ua valaauina i tatou e Ioane ina ia tootutuli i o tatou tulivae ma tatalo ma faapea atu; “O ai a’u?”. Tatalo: Le Alii e, ia e faailoa mai lou pupula. Ia tupu ma ola lau Afioga i totonu ia te a’u. Amene. Aso Gafua, Tesema 28, 2015: “Ia tuuina atu mea uma i totonu.” Tusi Faitau: Galuega 11: 27-30 Matua - Galuega 11:29 Ona filifili lea taitoatasi o le au soo, ia faatatau i mea uma ua manuia ai, e avatu ai se alofa i le au uso o nonofo i Iutaia. Na ou taitaia le lotu i lo matou nuu ina ua ou malolo mai i lau galuega. O le tapuaiga ua pei ose tapuaiga a tagata matutua, ona ou saunia lea o se vaega o le tapuaiga e tupu ai le fiafia o tagata talavou i le tapuaiga. O le mea na ou faia, o le tusia lea o upu o le ‘hokey-cokey’. O se mea sa ou le iloa, a ua usu mai e tagata o le Malo Soofaatasi o Peretania, le fuaiupu e le o maua e tagata o Amerika, e faapea, ‘Oh, the hokey-cokey,/ Oh, the hokey-cokey,/ Oh, the hokeycokey,/ Knees bend, arm stretch, ra ra ra!’ Na alalaga fiafia tagata tapua’i, ma ua latou uulima faatasi ma pepese ma sisiva e pei lava ona usuina i se fale kalapu. Na faapea foi ona ‘ou siva faatasi ma i latou. O le fiafia ia o tagata auā o lenei taimi ua latou faailoa mai o se tapuaiga fiafia. O tagata ua faagaeetia ma pepese ma le fiafia e pei o le aso o le Penetekoso. Ua o tagata tapua’i ma le agaga ua so’o faatasi ma talatalanoa i le o’o mai o le Upu a le Atua. O le faaliliuina o le upu ‘iloa’ i le gagana Eperu, o le (yadah): ‘ia tuu atu lou tagata i totonu.’ E faapea le vaaiga i soo e pei ona maua mai le Tusi a Galuega i lenei taeao. O tagata uma ua tuufaatasia le tamaoaiga ua latou maua, ua ‘tuu faatasia o latou loto’ ma le loto faagaeetia, e galulue ma lagolago atu i le au faatuatua matitiva i Ierusalema. O le ituaso o le faailoa mai o le Alii ia i latou, ma tuuina atu ai faailoga o le liutino tagata i le Upu a le Alii. O i tatou o loo saili atu i le puna o le ola na faia ai i tatou, a e maise o le agalelei atu i e o loo moomia le fesoasoani. 79 Tatalo: Le Alii e, se ia tuuina lou Agaga i o matou loto, ina ia faatasia ai i matou ma Keriso i lenei lalolagi. Amene Mafaufauga Loloto: O le Agaga o le Alii na te faaosofia tagata e tapuai i le Atua i le agaga ma le faamaoni. Aso Lua, Tesema 29, 2015: “Faailoa mai le Atua ma lona silisili ese.” Tusi Faitau: Roma 12; 16 -21 Matua - Roma 12:16a,20b Ia gatasitasi o outou manatu … a matelaina le ua ita mai ia te oe, fafaga ia te ia …” Na mafatia lo’u tama i le gasegase ua ta’ua o le Alzheimer’s. O lana toe meaalofa lava na mulimuli to’esea, o lana taleni e uiga i ona mafaufauga---o lana solo, e fai ma faataitaiga. A o lei aga’i atu o ia i le ā’iga o tama’itai tausi mai, na ia tusia le solo, e faapea: O le tigaina, e moomia ai se tinā; O le olaga agasala, e moomia ai se tamā; O le nofo toatasi e moomia ai se tagata; O le lē iloa, e moomia ai le fetu. I le vaaiga i le tala a Mataio i le oo mai o le Aso Kerisimasi, ua tatou mulimuli ai i le fetu ina ia tatou iloa le mafuta mai o le Alii faatasi ma i tatou, o le mafutaga e faaauau, e pei ona faailoa mai e Paulo i lana tusi i Roma. O i latou ua faatasia i le agaga e tasi e pei o le tino e tasi ia Keriso, ua faamagaloina, o olaga sa vao eseese o lenei ua fuifui faatasi. E manatu le tusi tala, o le vaaiga lenei i le Atua ua faailoa mai, ma faatasia ai tagata uma i le Upu a le Alii. Tatou te moomia le silisili ese o le mana faaola o le Atua. Tatou te fia maua le faamalologa, o lea e tatau ai ona tatou maua le faaali mai o le Atua ma faailoa atu ia te ia lo tatou mamao ese ma Ia. O le mafuaaga lea o lo tatou mulimuli atu ai i le fetu. Tatalo: Ia e faalautele le lalolagi ina ua vaapiapi la matou vaai, ina ia matou maua ai le mafuta faatasi ma le filemū. Amene. Mafaufauga Loloto: Ia fatu sau solo, faaaoga upu tāua faa-Kerisiano, ma tuu atu i tagata e faitau ai. 80 Aso Lulu, Tesema 30, 2015: “O ofu fou” Tusi Faitau: Kalatia 3: 23 – 29 Matua - Kalatia 3:26-27 Auā o atalii o le Atua outou uma lava i le faatautua ia Keriso Iesu. Auā o outou uma lava na papatisoina ia Keriso, ua outou oofu ia Keriso. O le tasi o faafiafiaga ou te fiafia e matamata ai i le Mad Magazine, o le vaaiga lea i le alii o Fester Bestertester i lana laulau i le umukuka, o loo nonofo faatasi ai ma ana uō ma faitio i le ‘National Gorilla Suit Day’. Ua na o se vaaiga e faatele ai tupe a le falegaosimea i le faatauina o suti kolila. Peitai, e le moni le faaaliga. Ina ua ulufale mai se tamaita’i ma lafo mai lona suti kolila na faamauluina, ua foliga ai i se kolila. Na oso atu le alii o Fester ma tuli, ua oo ina maua ma sasa i le tamaitai i le sasa. E faapefea i tatou pe a faaofu ia faapei o le ofu o le kolila, e pei ona faia i le National Gorilla Suit Day? O le ā le uiga o le saunoaga a le Aposetolo, “ua faaofuina i tatou ia Keriso Iesu”? O le uiga o le a’oa’oga a Paulo, ua faaofuina i tatou e Keriso i ofu fou ma tula’i mai le tagata fou ina ua uma ona papatisoina i le vai ma le agaga. Ua manatu foi le aposetolo i le olaga o le tagata ua liliuina, ua avea le tagata ma faailoga o le avea ma sui o le tino o Keriso ua faamomoina. O le faailoga o le mafuta faatasi ma Keriso i aso uma o lo tatou ola. O le Upu a le Alii ua avea ai le tagata fou ia te Ia. O le ofu e le o se ofu tafao, a e o le faailoga o le tagata ua avea ma tagata fou i le mafutaga ma le Atua e ala ia Keriso Iesu. Tatalo: Le Alii e, ua avea a’u ma tagata ua papatisoina faatasi ma lou maliu, se ia e fesoasoani mai ina ia fanaufouina a’u e lou agaga. Amene Mafaufaua Loloto: Ia e iloa i lenei aso faailoga o le upu liutino tagata o le Atua i lou olaga, faapea le mafutaga ma tagata. Aso Tofi, Tesema 31, 2015: “E moni ma faamaoni.” Tusi Faitau: Faaaliga 22: 1-8 Matua - Faaaliga 22:4 Latou te vaavaai atu foi i ona fofoga, e i ai foi i o latou muaulu lona suafa. Tuu lou tagata e faafoliga ia i latou ma faatinoina le tusia o le Tusi Paia, e pei ona taoto mai ai. O le upu moni, o le a e iloa ai le talafeagai o le tusia o le Tala i le Faaaliga e pei ona avea ma Tusi mulimuli. O se mea e ofo tele ai i nisi o faaaliga, ua faailoa mai ai ia i tatou le liliuina o le lagi ma le lalolagi fou. I le oo mai i le faaiuga o le Tusi Paia, ua faapea ai ona faaiu tusitusiga. O le mea ua faailoa mai, o mea uma o loo tatou ola ai, o mea na faia e le Atua e le mafaia ona suia e se tasi. E manatua le solo a le alii Amerika o Wallace Stevens: O lo’o tatou ola pea i le seneturi e luasefulu; Ma le la o lo’o susulu pea. 81 Ou te manatua i se tasi aso malulu, ma tau manatnatu i le toamalie o le aso na soso’o ma le Aso Kerisimasi i le masina o Tesema. Sa ou nofonofo i lo’u ofisa, ma mafaufau ua uma atu aso o le Kerisimasi. O se tasi sa i ai i le malumalu na ia tuuina i lalo moli Kerisimasi. Na ou tusia se solo e faailoa ai ou lagona i lea taimi, e faapea: Faauta, i le aso ua mae’a le Kerisimasi i aiga uma; E leai se manu na paō e faapea foi lou toalua; Ua mae’a le maneta. Pe moni ea? O le alii o Thurman na ia tautala i le galuega o le Kerisimasi e amata ona faatinoina, pe a fai tatou te manatu e tuu a tatou taaloga, ma tuu a tatou meaalofa uma ina ia fa’aaogāina i lea tausaga fou. Na soifua mai Keriso i o tatou olaga a o tatou galulue e saili i e ua le iloa; ia faamalolo i e ua tigaina; ma avea o Ia ma pese malie i o tatou loto. O le mea foi lea tatou te maua, pe a tatou liliu i le Tusi a le Faaaliga. Ua mae’a le Aso Kerisimasi. Tatou te iloa moni ma faamaonia le o’o mai o le Aso Kerisimasi i le faatinoga o lou olaga ma ia e soifua ai. Tatalo: Ia ou maua le malosi o lau faaaliga i totonu ia te au, ina ia ou ola ai i lenei lalolagi i lo’u olaga atoa. Amene. Mafaufauga Loloto: I le lumanai, e faapefea ona ou maua se Kerisimasi moni? Ia manuia le Kerisimasi ma le tausaga fou. Tatou te toe alafa’i mai i le aso fou ma faalogo pea i le Upu a le Alii ma ana tulafono, e taitaiina ai pea la tatou savaliga, nei ma taeao. Ia manuia! 82