presentada ghia - Provincia di Cagliari
Transcript
presentada ghia - Provincia di Cagliari
PRESENTADA GHIA ARCHIOLÒGICA Sa ghia archiològica de sa Provìncia de Casteddu est su traballu de furriadura in sardu de sa 'Guida Archeologica della Provincia di Cagliari', chi est bessia in su 2009, in italianu e in ingresu. Nci amancàt su sardu. Custu traballu dd'at fatu su Portalitu de sa Lìngua Sarda de sa Provìncia etotu, chi at incumentzau a traballai in su mesi de abrili de su 2013. In mesu de is fainas de su Portalitu, ddoi est pròpiu a tradusi in sardu pubricatzionis de interessu de su logu nostu, aingìriu de chistionis stòricas, culturalis e finas archiològicas. Cun custu traballu eus bòfiu torrai a amostai ca cun su sardu podeus chistionai de totu, de sa vida de dònnia dii finsas a is registrus culturalis e literàrius prus artus. Pensaus chi potzat essi cosa agradessia a is sardus e una faina de profetu, aìnturu de totu su traballu chi is operadoris de sa lìngua sarda ant fatu in custus annus, po torrai a su sardu su logu chi ddi spetat in sa cultura e in sa sociedadi sarda. A candu scriendi cosa originali e a candu tradusendi òperas giai pubricadas in italianu o finsas in àteras lìnguas stràngias. Custu traballu ddu podint ligi totu is chi funt interessaus a custas chistionis, ca est postu on line po chi donniunu si-ddu potzat castiai candu ddi benit prus a beni e candu ndi tenit praxeri de ligi òperas scritas in sardu, chentza de spendi nudda. Po totu custas arrexonis pensaus de essi fatu cosa chi serbit, cunforma a cudda faina de ndi torrai a acostai a is sardus a sa lìngua insoru cun traballus beni fatus e de interessu po totus. Cuncòrdiu de su Portalitu de sa Lìngua Sarda de sa Provìncia de Casteddu