Statutas dalla musica da tscheiver
Transcript
Statutas dalla musica da tscheiver
Statutas dalla musica da tscheiver A. NUM, SEDIA, INTENT Art. 1 Sut il num musica da tscheiver LAS ZOCLAS exista ina uniun tenor art. 60 ss. dil cudisch civil svizzer cun sedia a Sumvitg. Art. 2 Igl intent da quell'uniun ei da porscher divertiment musical duront il tscheiver e da tgirar la collegialitad denter ils commembers. B. COMMEMBERS, OBLIGAZIUNS, DRETGS, EXTRADAS ED EXCLUSIUNS Art. 3 L ' uniun ha duas categorias da commembers: a) activs b) passivs Art. 4 Commembers activs ein tals ch’ein vegni recepi a caschun dalla radunonza generala ni digl emprem exercezi d’atun e che prendan activamein part dalla fasa preparativa da mintga stagiun e dallas representaziuns. Novs commembers activs vegnan pri si dalla radunonza generala sut la davosa tractanda avon varia. Els vegnan denton enviadi en pér a l’emprema occasiun da LAS ZOCLAS suenter radunonza. Intressents ston s’annunziar cun il formular ufficial sil pli tard duas jamnas avon radunonza generala. Il diember maximal da commembers activs ei limitaus sin 42 commembers. En cass spezials sa la radunonza prender si dus commembers dapli, sto denton reduzir en cass d’extradas igl onn proxim puspei sin 42 commembers. Commembers passivs ein tals che sustegnan l’uniun finanzialmein. Il diember maximal da commembers passivs ei buca limitaus. Art. 5 Ils commembers activs ein obligai dad observar ils statuts e las disposiziuns dall'uniun, da prender part punctualmein e regularmein allas emprovas, radunonzas ed occurenzas dall' uniun. Commembers ch'ein impedi da prender part als exercezis han da seperstgisar tier il dirigent ni tier il president. Art. 6 Mintga commember s'oblighescha da pagar punctualmein sias contribuziuns, q.v.d. che la contribuziun annuala duei vegnir pagada gest suenter la radunonza generala. Art. 7 Material dall'uniun che vegn daus ad in commember ad emprest sto vegnir tractaus cun precauziun e cun quitau. Sch'in commember fa empaglia da levsenn ni schizun da bugen material, sto el star buns persuenter. Art. 8 Segiradas encunter accident ni malsogna dils commembers ein buca caussa dall'uniun. Ella surpren negina responsabladad en quella direcziun. Medemamein negina responsabladad vegn surpriu per instruments ed auter material privat. Art. 9 Ei in commember impedius da visitar duront ina sesiun exercezis ni (e) producziuns, sa el prender congedi per in onn cun indicar alla suprastonza ils motivs (p.ex. scolaziun, viadi egl exteriur ni auters motivs persunals). Tals giavischs ein d’inoltrar a scret alla suprastonza, e quei sil pli tard sin igl 1. d’october. Suenter che la sesiun da musica ha entschiet (october/november), eis ei buca pli pusseivel d’extrar dall’uniun per quella sesiun. Art. 10 Sch'enzatgi vul extrar dall'uniun, sto el annunziar quei a scret al president. L'extrada sto vegnir annunziada sin radunonza generala dalla primavera e suenter ch'il commember pertuccau ha pagau eventuals deivets visavi l'uniun. Art. 11 In commember sa vegnir sclaus dall'uniun: - sch'el sesutametta buca allas disposiziuns dalla suprastonza ni dil dirigent - sch'el sedeporta a moda nuncollegiala e caschuna cheutras malemperneivladads - sch'el maunca dapli che 3 exercezis ni producziuns buca perstgisai Talas exclusiuns succedan entras la suprastonza. C. ORGANS Art. 12 Ils organs dall'uniun ein: a) la radunonza generala b) la suprastonza c) ils revisurs da quen d) la gruppa da lavur La radunonza generala Art. 13 La radunonza generala annuala ha liug mintgamai la primavera. Ella ei obligatorica per mintga commember activ. Commembers ch'ein impedi da prender part alla radunonza generala ston seperstgisar tier il president cun indicar las raschuns. Ina radunonza generala extraordinaria sa vegnir convocada entras la suprastonza ni sin giavisch dad 1/3 dils commembers activs. Il dretg da votar alla radunonza generala ei reservaus als commembers activs. Per ch'ina proposta vegni acceptada drova ei ina majoritad da 2/3 dallas vuschs. Propostas dils commembers ein d'inoltrar tier la suprastonza sil pli tard 15 dis avon la radunonza generala (a scret). La suprastonza Art. 14 La suprastonza secumpona da: a) president /a b) actuar /a (vice-president /a) c) cassier /a d) dirigent /a e vicedirigent /a L'incarica dallas differentas scharschas ei l'usitada. Il vicedirigent ei substitut dil dirigent. Art. 15 Il cuoz d'uffeci munta per la suprastonza e la gruppa da lavur à dus onns. Ils onns pèr succeda l'elecziun da president, actuar e vicedirigent. Ils onns dusp succeda l'elecziun da cassier, dirigent, revisurs da quen, gruppa da lavur e pedel. Art. 16 La demissiun d'in commember dalla suprastonza sto vegnir inoltrada a scret tier il president silmeins in meins avon la radunonza generala. Revisurs da quen Art. 17 Ils dus revisurs da quen revedan il quen annual e rapportan alla radunonza generala. La gruppa da lavur Art. 18 La gruppa da lavur consista ord 5 dels. Quels e quellas han l’incarica da levgiar la suprastonza da lavur. Suandontas lavurs ein suttamessas alla gruppa: cumpra e vendita dils vestgius da tscheiver ni organisar igl uorden da far els, sco era per gidonters/as, localitads eav.. Plinavon mira la gruppa da lavur per ils artechels da tscheiver sco pins, medaglias etc.. Aschi lunsch sco pusseivel ha la gruppa da lavur era da segidar cun il dirigent cun scriver tocs da musica, rimnar ideas per tocs etc.. Tgi che fa tgei ella gruppa ei caussa dil meinagruppa. Tier las sedutas dalla gruppa da lavur, sto mintgamai ina persuna dalla suprastonza vegnir envidada. D. FINANZAS Art. 19 L'uniun dispona sur dils suandonts mieds finanzials per contonscher sia finamira: a) La contribuziun annuala dils commembers activs che vegn mintgamai fixada dalla radunonza generala. b) La contribuziun annuala dils commembers passivs. c) Il recav ord tils, concerts, lottos ed autras producziuns. d) Donnaziuns dils fauturs. Art. 20 La facultad dall'uniun secumpona da: a) daners en cassa d) contos (banca/posta) c) inventari Art. 21 La suprastonza sa decider sur dad expensas tochen igl importo da frs. 500.-- e quei inagada ad onn. E. DISPOSIZIUNS GENERALAS Art. 22 Senza lubientscha ni incarica dalla suprastonza astga negina gruppa sepresentar sco musica el num "LAS ZOCLAS". Art. 23 L'uniun sa vegnir sligiada mo, sche 4/5 da tuts commembers activs acceptan quei. Ina tala votaziun ha liug a scret. Art. 24 En cass che l'uniun vegn sligiada si, van las suandontas disposiziuns en vigur: La davosa suprastonza depona tut il material per tschun onns en in liug adattau. Sch'ei reussescha buca da fundar ina nova uniun cun medem num ed intent, vegn l'entira facultad surdada alla casa d'impedi a Glion. Quels statuts ein vegni approbai a caschun dalla radunonza generala dils 25 d'avrel 1998 e van en vigur cul medem datum. Els remplazzan ils statuts dils 19 d’october 1996. Il president: Igl actuar: Daniel Duff Maurus Cajacob