E` LA NOTTI RI NATALI E` la notti ri Natali è la festa principali e
Transcript
E` LA NOTTI RI NATALI E` la notti ri Natali è la festa principali e
E’ LA NOTTI RI NATALI E’ la notti ri Natali è la festa principali e scinneru li pasturi pà adurari nostru signuri. Bambineddu ruci, ruci, io ti portu li me nuci ti li scacciu e ti li manci accussì sta zittu e nun chianci. Bambineddu ruci assai, lu granatu ti purtai ti lu manna la mamma mia chi è chiu ricca ri Maria. Bambineddu ruci e amatu io ti portu u cuccidratu ti lu manci in cumpagnia ri Giuseppi e ri Maria. NATALI NATALE Tuttu è biancura, fridda è la nuttata ma mai lu celu fu tantu vicinu, cadi la nivi modda e spinsirata e chiovi celu, chiovi gersuminu: La terra si lu cogghi e si nn’appara, certu pi na gran festa si pripara. L’arvuli nudi nni la fridda terra avviluti di centu furturati quantu cchiù ponnu spincinu di ‘nterra li vrazza ‘mpuviruti e assiccumati e cc’è nni dd’attu na muta prijera, l’anima ansiusa di cu soffri e spera. E speranu li ciumi chianciulini spersi, cunfusi, ‘ngramagghiati e stanchi, speranu li muntagni sularini vecchi pinsusi cu li testi bianchi, spera la terra ca si puru ciata sutta d’un mantu friddu è vurricata. Ma eccu un primu toccu di campana vola dicennu: E’ natu lu Missia! navutru toccu curri, s’alluntana, e in ogni cori ‘mpinci e tuppulia, po’ nautri centu e l’ariu chinu chinu murmura è festa! E’ natu lu Bamminu. Lu sentinu dda ‘nfunnu li pastura nta sonnu e vigghia, e cridinu sunnari pirchì cci agghiorna nni la notti scura e stralunati ‘un sannu a chi pinsari; po’ currinu a sdrirrutta nni ddu locu unni una grutta pari tutta un focu. E trovanu, miraculu divinu, dintra na fridda e nuda manciatura, vicinu di la matri lu Bamminu ntra un ghiocu d’occhi ca tuttu ‘nnamura e dintra a l’occhi beddi di Maria, cc’è tuttu l’universu ca firria. E’ festa è festa! Unn’era tramuntana già fici occhiu l’arba di l’amuri, nescinu l’armaluzzi di la tana e li spiranzi pigghianu culuri. La nivi squagghia cadi a stizza a stizza, si strudi ‘nchiantu pi la cuntintizza. Salvatore Equizzi LU NAZZARENU Cu l’occchi chini di celesti amumri E lu splinnuri di lu suli ardenti , supra di la muntagna lu Signuri parrò a lu cori di tutti li genti : e la parola so divina e forti la ‘ntisi puru e nni trimò la Morti. E doppu a ncora lu Patri divinu a lu scuccari di l’ura superna si fici pani di furmentu e vinu e si spartiu pi dari Vita Eterna. Doppo ccchiù bonu si lu pani duci , si carricò la cchiù pisanti Cruci e pi na via spinusa e sdirrubbata, cu nni l’occhi lu celu addipinciutu, binidicia la fudda sdisangata e dda gintaglia chi l’avia tradutu: ed arrancava ccu lu cori ruttu , mentri lu celu si vistia di luttu. —Ed arrivò a la cima e nni la Cruci vippi l’amaru di tutti l’amari, E l’occchi sò si ficiru cchiù duci, cchiù granni di lu celu e di lu mari e risplinnianu sutta a li capiddi Co mu dui celi carrichi di stiddi.—Poi s’abbatteru stanchi di duluri , Po’ s’abbatteru pi lu troppu amari, e ccu li vrazza ‘ncruci, lu Signuri, ristò ccu l’ali aperti pi vulari: Cu l’occhi ancora chini di palori, ammustra li firiti di lu cori.— Di tannu, cca lu suli ogni matina , si spinci com u l’Ostia Cunsagrata ‘ntra sangu e luci e tutta la marina addinucchiuni lu talia ‘ncantata. Sciamanu pi li campi l’ocidduzi, facennusi la Cruci cu l’aluzzi. Salvatore Equizzi LA BEFANA Dumani è la befana; è la gran festa addisiata di li picciriddi e ogn’unu già smanìa nni la so testa pi cavadduzzi, strummuli, pupiddi, sciabuli, treni e ci pari mill’anni l’ura ca ponnu fari cosi granni! E li me’ figghi, animi 'nnuccenti, oduri santu di la vita mia, hannu fuddatu dintra di la menti tuttu chiddu ca cc’è nni la putia, e cu pinsera di centu culura cci pàrinu mill’anni quannu scura. Pirchì sannu,’ nnuccenza di li figghi, sannu chi a menzanotti la befana trasi cu li so centu maravigghi di lu pirtusu di la pirsiana: di du pirtusu ca lu nicareddu lu vuleva allargari c’un cuteddu! Quannu è dumani li me’ picciriddi Mi ristirannu affritti e scunsulati, nni dd’occhi di 'nnuccenti muti e friddi quantu sònnura d’oru sdirrubbati! Salvatore Equizzi